လံာ်တၢ်ကူၣ်သ့အတၢ်ကတိၤ 20
20
1တၢ်အီမူၤသံးဒုးကဲထီၣ်နၤလၢပှၤတၢထီၣ်တၢလီၤဒီးပှၤ ဟးဂီၤဖိလီၤ. တၢ်အီၤမူၤအီဘှီးန့ၣ်မ့ၢ်တၢ်မၢးလီၤ.
2ပျံၤစီၤပၤတဂၤလၢအသူၣ်ဒိၣ်သးဖျိးဒ်နပျံၤခ့ယုၢ်တဒုလၢ အကညီၤရူၢ်ရူၢ်အသိးန့ၣ်တက့ၢ်. နမ့ၢ်ထိၣ်ဂဲၤအတၢ်သးထီၣ်ဒီး, မ့ၢ်ဒၣ်နမၤသံလီၤနသးလီၤ.
3ပှၤဟးဂီၤဖိတဂၤလၢ်လၢ်စးထီၣ်တၢ်ဂ့ၢ်လိာ်ဘှီလိာ်တဖၣ်သ့လီၤ. မ့မ့ၢ်တၢ်အိၣ်ယံၤဒီးတၢ်အ့ၣ်လိာ်ဆိးက့လိာ်န့ၣ်, မ့ၢ်တၢ်လၤကပီၤတမံၤလီၤ.
4ပှၤထူစံာ်ဖိတဂၤလၢအကၢၣ်မးတုၤကထဲၣ်လီၤအစံာ်ပျီတဖၣ်ဘၣ်ဆၢ ဘၣ်ကတီၢ်န့ၣ်, တအိၣ်ဒီးတၢ်နီတမံၤလၢကကူးက့ၤဝဲအဂီၢ်န့ၣ်ဘၣ်.
5ပှၤတဂၤအတၢ်ဆိကမိၣ်တဖၣ်လီၤဂာ်ဒ်ထံလၢထံပူၤယိာ်တပူၤအသိး လီၤ. ဘၣ်ဆၣ်ပှၤတဂၤလၢအအိၣ်ဒီးတၢ်ထံၣ်လၢသးန့ၣ်, ထုးထီၣ်အီၤသ့ဝဲလီၤ.
6ပှၤကိးဂၤကတိၤတၢ်ဘၣ်ဃးအဝဲမ့ၢ်ပှၤအသးတီဒီးတၢ်နာ်န့ၢ်အီၤ သ့ထဲလဲၣ်ထဲလဲၣ်အဂ့ၢ်လီၤ. ဘၣ်ဆၣ်ကျဲးစၢးဃုကွၢ်ဒၣ်ကလိာ်ပှၤတဂၤဂၤလၢအမ့ၢ်တၢ်ဒ်အစံးဝဲ အံၤအသိးန့ၣ်တက့ၢ်.
7ဖိတဖၣ်လၢအအိၣ်ဒီးအပၢ်တဂၤလၢအတီအလိၤဒီးမၤတၢ်အဘၣ်န့ၣ်, ဘၣ်ဆိၣ်ဂ့ၤဝဲလီၤ.
8စီၤပၤဆ့ၣ်နီၤဝဲလၢအစံၣ်ညီၣ်တၢ်အလီၢ်ပစိာ်ဒီးသ့ၣ်ညါတၢ်အၢ ဖဲအထံၣ်ဝဲန့ၣ်လီၤ.
9မ့ၢ်ပှၤတဂၤစံးတီတီလၢ, အသးလၢအသ့ၣ်ညါဒၣ်တၢ်လၢအဂ့ၤန့ၣ် ကဆှီလံဒီးအဝဲတြူာ်ကွံာ်လံအတၢ်ဒဲးဘးလံန့ၣ်ကသ့ဧါ.
10ယွၤသးဘၣ်အၢပှၤတဖၣ်လၢအသူစီၤပီၢ်သၣ်ဒီးနီၣ်ထိၣ်တၢ်လၢ အတတီတလိၤတဖၣ်န့ၣ်လီၤ.
11ဖိသၣ်တဂၤဒၣ်လဲာ်န့ၣ်ဒုးနဲၣ်ဖျါထီၣ်ဝဲလၢအမ့ၢ်ပှၤဒ်သိးလဲၣ် တဂၤခီဖျိအမၤတၢ်တဖၣ်န့ၣ်လီၤ. ဒီးမ့ၢ်အဝဲတီလိၤဒီးဂ့ၤဧါန့ၣ်နတဲသ့လီၤ.
12ယွၤဟ့ၣ်တ့ၢ်လံပှၤမဲာ်ချံတဖၣ်လၢကထံၣ်တၢ်အဂီၢ်ဒီးနၢ်တဖၣ်လၢ ကဒိကနၣ်တၢ်အဂီၢ်လီၤ.
13နမ့ၢ်မၤလၢာ်နတၢ်ဆၢကတီၢ်လၢတၢ်မံဒီးနကဖှီၣ်ဝဲလီၤ. ခုဖံးခုမၤတက့ၢ်. ဒီးနကအိၣ်ဒီးတၢ်အီၣ်ကုးအီပှဲၤလီၤ.
14ပှၤပှ့ၤတၢ်ကဒူးကဒ့ၣ်ဝဲထီဘိလၢတၢ်အပှ့ၤဒိၣ်ကဲၣ်ဆိးအဃိ, ဝံၤဟးထီၣ်ဝဲလၢတၢ်ပာ်ကဖၢလၢအသးလၢတၢ်လၢမၤန့ၢ်ဝဲန့ၣ် အပှ့ၤဘၣ်အဃိလီၤ.
15နမ့ၢ်သ့ၣ်ညါတၢ်ဂ့ၢ်လၢနကတိၤအီၤန့ၣ်ဒီး, နအိၣ်လံဒီးတၢ်တမံၤ မံၤလၢအလုၢ်ဒိၣ်ပှ့ၤဒိၣ်န့ၢ်ဒံးထူဒီးတၢ်မျၢ်တဖၣ်လီၤ.
16ပှၤတဂၤလၢ်လၢ်လၢအသးတဆးတုၤဒၣ်လဲာ်အအုၣ်ခီၣ်အသးလၢပှၤလၢ အတသ့ၣ်ညါဝဲတဂၤအဒ့ၣ်ကမၣ်အဂီၢ်န့ၣ်, အစုလီၢ်ခီၣ်ခိၣ်ဒၣ်ဝဲတဖၣ်ကြၢးဘၣ်တၢ်ဟံးဃာ်အီၤဒ်တၢ်အုၣ်ကီၤ လၢတၢ်ကဟ့ၣ်က့ၤဒ့ၣ်ကမၣ်အဂီၢ်န့ၣ်လီၤ.
17တၢ်လၢနမၤန့ၢ်အီၤလၢတၢ်ကဘျံးကဘျၣ်အပူၤန့ၣ်, နကမုာ်လၤသးခုလၢအဃိဒ်တၢ်အီၣ်အဝံၣ်ကတၢၢ်အသိး ဘၣ်ဆၣ်ဒီးတယံာ်လၢၤဘၣ်န့ၣ်ကလီၤဂာ်ဒ်ထးခိၣ်ပှဲၤဒီးမဲး အသိးန့ၣ်လီၤ.
18မၤန့ၢ်တၢ်ဟ့ၣ်ကူၣ်အဂ့ၤဒီးနကမၤန့ၢ်မၤနၢၤတၢ်လီၤ. တၢ်တိာ်တၢ်ကျဲၤတမံၤတအိၣ်ဘၣ်ဒီးနုာ်လီၤသဖှိဆူတၢ်ဒုးတၢ်ယၤ အပူၤတဂ့ၤ.
19တၢ်သီၣ်ဝံသဲကလၤတမံၤန့ၣ်ပၢၤဃာ်တၢ်ခူသူၣ်တမံၤတန့ၢ်နီတစု ဘၣ်. အိၣ်ယံၤဒီးပှၤလၢအတၢ်ကတိၤအါကဲာ်ဆိးတဖၣ်န့ၣ်တက့ၢ်.
20နမ့ၢ်ဆိၣ်အၢနမိၢ်နပၢ်န့ၣ်နတၢ်အိၣ်မူကကတၢၢ်ဝဲဒ်မ့ၣ်အူဒၢ တဖျၢၣ်လၢအလီၤပံာ်ကွံာ်ဝဲလၢတၢ်ခံးကျါအသိးန့ၣ်လီၤ.
21နမၤန့ၢ်နတၢ်ထူးတၢ်တီၤဒံးညီ, အတၢ်မၤဂ့ၤနၤကဒံးစှၤဝဲလီၤ.
22ဟံးန့ၢ်မူဒါဒၣ်နဲလၢနကဟ့ၣ်ကၣ်တၢ်အၢတမံၤအဂီၢ်တဂ့ၤ. သန့ၤနသးလၢယွၤဒီးအဝဲကမၤလိၤမၤဘၣ်အီၤလီၤ.
23ယွၤသးဘၣ်အၢပှၤလၢအသူစီၤပီၢ်သၣ်ဒီးနီၣ်ဃီၣ်တၢ်တဖၣ်လၢ အတတီတလိၤန့ၣ်လီၤ.
24ယွၤပာ်လီၤဃာ်လံပကျဲလီၤ. မ့မ့ၢ်ဒ်န့ၣ်ဒီး, ပှၤတဂၤဂၤနၢ်ပၢၢ်ဒီးပာ်လီၤအတၢ်အိၣ်မူအတၢ်ပညိၣ်ကသ့ဒ်လဲၣ်.
25တချုးနအၢၣ်လီၤတၢ်လုၢ်မၤဘူၣ်တမံၤဆူကစၢ်ယွၤန့ၣ်, ဆိကမိၣ်တၢ်လီၤတံၢ်လီၤဆဲးတက့ၢ်. နကသးအုးက့ၤဘၣ်ဖုးလၢခံ န့ၣ်လီၤ.
26စီၤပၤလၢအကူၣ်သ့တဂၤန့ၣ်ကဃုထံၣ်န့ၢ်မ့ၢ်မတၤတဂၤမၤကမၣ်တၢ် လဲၣ်ဒီးကစံၣ်ညီၣ်အီၤလၢတၢ်သးကညီၤတအိၣ်ဘၣ်အပူၤန့ၣ်လီၤ.
27ယွၤဟ့ၣ်ပှၤတၢ်ကူၣ်တၢ်ဆိကမိၣ်ဒီးသးလၢအသ့ၣ်ညါဒၣ်တၢ်လၢအဂ့ၤ လီၤ. ပပာ်ခူသူၣ်ပသးလၢပနီၢ်ကစၢ်ဒၣ်ပဝဲတသ့ဘၣ်.
28စီၤပၤတဂၤကအိၣ်ဂၢၢ်ဆိးကျၢၤလၢအတၢ်စိကမီၤအပူၤတဘိ ယူာ်ဃီဖဲအဝဲပၢတၢ်လၢတၢ်တီတၢ်လိၤ, စံၣ်ညီၣ်တီတၢ်, ဒီးတကွၢ်ဒိၣ်ဆံးအါစှၤတၢ်အခါန့ၣ်လီၤ.
29ပစံးထီၣ်ပတြၢၤပှၤသးစၢ်အဂံၢ်အဘါ, ဒီးယူးယီၣ်ပာ်ကဲပှၤသး ပှၢ်အခိၣ်ဝါန့ၣ်လီၤ.
30တဘျီဘျီတၢ်လဲၤခီဖျိတမံၤလၢအဘၣ်ဒိပှၤဆါန့ၣ်အလီၢ်အိၣ်ဝဲ, ဒ်သိးကဒုးလဲလိာ်က့ၤပကျဲတဖၣ်န့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 20: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
