လံာ်ယၡါယၤ 30
30
တၢ်မၤတၢ်အၢၣ်လီၤအီလီၤ ဒီးကီၢ်အဲၤကူပတူး လၢအဘျုးတအိၣ်ဘၣ်တမံၤ.
1ယွၤကတိၤလံတၢ်လံ. “ပှၤတဖၣ်လၢအပၢကီၢ်ယူဒၤန့ၣ် ကဘၣ်တၢ်စံၣ်ညီၣ်ဃါမနၤလၢတၢ်ပူထီၣ်ထီဒါယၤအဃိလီၤ. အဝဲသ့ၣ်ပိာ်ထွဲတၢ်တိာ်ကျဲၤတဖၣ်လၢယတမၤတ့ၢ်အီၤဒီး ဆဲးလီၤအမံၤလၢလံာ်ဃံၤဃာ်တဖၣ်အပူၤလၢအထီဒါတၢ်ဘၣ်ယသး, ဒီးပာ်ဖှိၣ်တၢ်ဒဲးဘးတမံၤလၢအဂၤတမံၤအဖီခိၣ်လီၤ. 2အဝဲသ့ၣ်လဲၤဆူကီၢ်အဲၤကူပတူးလၢတၢ်မၤစၢၤအဂီၢ်လီၤ. တဃ့ယတၢ်ဟ့ၣ်ကူၣ်ဟ့ၣ်ဖးဘၣ်. အဝဲသ့ၣ်သးအိၣ်ဝဲလၢကီၢ် အဲၤကူပတူးကဒီဒၣ်အိၣ်ပှိၤအီၤ, သတးဒီးအဝဲသ့ၣ်ပာ်အတၢ်နာ် လၢကီၢ်အဲၤကူပတူးအစီၤပၤအပူၤန့ၣ်လီၤ. 3ဘၣ်ဆၣ်ဒီးစီၤပၤအစိကမီၤကလၢာ်ကွံာ်ဝဲလၢတၢ်မၤစၢၤ အဝဲသ့ၣ်အဂီၢ်လီၤ. ဒီးကီၢ်အဲၤကူပတူးအတၢ်ဒီဒၣ်အိၣ်ပှိၤကလဲၤ ကတၢၢ်လၢတၢ်ကီတၢ်ခဲဖးဒိၣ်အပူၤလီၤ. 4အဝဲသ့ၣ်အထံကီၢ်ခၢၣ်စးတဖၣ်မ့ၢ်လဲၤတုၤလံဆူပှၤအဲၤကူပတူး ဖိအဝ့ၢ်တဖၣ်လၢအမ့ၢ်ဝဲစိၤဧၣ်ဒီးဃါန့ၤဒၣ်လဲာ်န့ၣ်, 5ကီၢ်ယူဒၤအပှၤဂီၢ်မုၢ်ကသးအုးသးဟးဂီၤလၢအဝဲသ့ၣ်နာ် န့ၢ်တ့ၢ်ဘၣ်ပှၤတကလုာ်လၢတၢ်ပာ်ဂံၢ်ပာ်ဘါအီၤတသ့အဃိ, ပှၤတကလုာ်လၢ, အလဲၤသဒၣ်အီၤဖဲအဝဲသ့ၣ်မုၢ် လၢ်တၢ်မၤစၢၤအခါန့ၣ်လီၤ.”
6အအံၤမ့ၢ်ကစၢ်ယွၤအတၢ်ကစီၣ်ဘၣ်ဃးဆၣ်ဖိကီၢ်ဖိတဖၣ်အဂ့ၢ် လၢကလံၤထံးမဲးမုၢ်ခိၣ်လီၤ. “ထံကီၢ်ခၢၣ်စးတဖၣ်လဲၤတၢ် ခီဖျိထံကီၢ်လၢအလီၤပျံၤလီၤဘၣ်ယိၣ်, ဖဲခ့ယုၢ်တဖၣ်, ဖဲဂုၢ်လၢအစုၣ်အၢတဖၣ်ဒီးပယိၤလၢအယူၤတဖၣ် အိၣ်ဝဲန့ၣ်လီၤ. အဝဲသ့ၣ်ဒုးဝံဒုးစိာ်အကသ့ၣ်ယီၤဒီးကီၤလၤအူးတဖၣ် လၢတၢ်ဟ့ၣ်လုၢ်ဒိၣ်ပှ့ၤဒိၣ်တဖၣ်လၢပှၤတကလုာ်လၢအမၤ စၢၤအဝဲသ့ၣ်တသ့နီတမံၤဘၣ်အဂီၢ်န့ၣ်လီၤ. 7တၢ်မၤစၢၤလၢကီၢ်အဲၤကူပတူးဟ့ၣ်လီၤဝဲန့ၣ်အဘျုးတအိၣ်ဘၣ်. သတးဒီး, ယကိးကလိာ်ကလာ်တ့ၢ်ကီၢ်အဲၤကူပတူးအမံၤလၢ, ပယိၤလၢအစုၣ်အပျၢ်တအိၣ်ဘၣ်န့ၣ်လီၤ.
ပှၤဂီၢ်မုၢ်လၢအတစူၢ်တၢ်
8ကစၢ်ယွၤစံးဘၣ်တ့ၢ်ယၤလၢယကကွဲးလီၤတၢ်လၢလံာ်တဘ့ၣ် အပူၤလၢပှၤဂီၢ်မုၢ်မ့ၢ်တၢ်ဒ်လဲၣ်, ဒ်သိးဒီးအဝဲသ့ၣ်အၢသီဝဲ ထဲလဲၣ်န့ၣ်တၢ်ကွဲးနီၣ်ကွဲးဃါအဂၢၢ်အကျၢၤကအိၣ်ဝဲအဂီၢ်လီၤ. 9အဝဲသ့ၣ်ပူထီၣ်ထီဒါကစၢ်ယွၤထီဘိ, လီတၢ်ထီဘိဒီးဂ့ၢ်လိာ် လၢအကဒိကနၣ်ယွၤအတၢ်သိၣ်လိသီလိတဖၣ်ထီဘိန့ၣ်လီၤ. 10အဝဲသ့ၣ်တဲဘၣ်ဝံတဖၣ်လၢကအိၣ်ဘှ့ၣ် အိၣ်ဘှီၣ်န့ၣ်လီၤ. အဝဲသ့ၣ်စံးဝဲ, “ကတိၤတၢ်ဒီးပှၤဘၣ်ဃးဒီးတၢ်လၢအဘၣ် အဂ့ၢ်တဂ့ၤ. တဲဘၣ်ပှၤတၢ်လၢပသးအိၣ်နၢ်ဟူတက့ၢ်. မ်ပဟံးဃာ်ပတၢ်ထံၣ်တၢ်ဆိကမိၣ်ကမၣ်တဖၣ်တက့ၢ်. 11ဟးထီၣ်ကွံာ်လၢပကျဲပူၤဒီးသုးကွံာ်တၢ်မၤတံာ်တာ်ပကျဲပက ပူၤတက့ၢ်. ပသးတအိၣ်နၢ်ဟူနအံၣ်စရ့လးကစၢ်ယွၤစီဆှံ တဂၤန့ၣ်အဂ့ၢ်ဘၣ်.”
12ဘၣ်ဆၣ်, အအံၤမ့ၢ်တၢ်လၢအံၣ်စရ့လးအကစၢ်ယွၤစီဆှံစံးဝဲ, “သုတပာ်ကဲတၢ်လၢယတဲဘၣ်သုဘၣ်ဒီးသုသန့ၤသုသးလၢတၢ် မၤဆူၣ်မၤစိးဒီးတၢ်လီတၢ်ဝ့ၤလီၤ. 13သုတၢ်ကမၣ်အိၣ်လီၤ. သုလီၤဂာ်ဒီးတၢ်အခိၣ်ဒူအထီၣ်ထီလၢ အအိၣ်ဒီးအတၢ်တဲၤဖးလၢအခိၣ်ဒီးတုၤလၢအခီၣ်ထံးလီၤ. သုကလီၤပှီၢ်သတူၢ်ကလာ်လီၤ. 14သုကလီၤကလဲဝဲဒ်သပၢၤဟီၣ်ခိၣ်အသိး, ကၢ်လီၤကလဲဝဲတုၤ ဒၣ်လဲာ်သပၢၤက့အဒိၣ်လၢပကထၢထီၣ်သွဲၣ်လးကိၢ်မ့ၢ်ဂ့ၤ, ပကဒၢၣ်ထီၣ်ထံလၢထံဒၢဖးဒိၣ် အပူၤမ့ၢ်ဂ့ၤအဂီၢ်တအိၣ်လၢၤဘၣ်န့ၣ်လီၤ.”
15ယွၤပၢဘၣ်တၢ်ခဲလၢာ်ကစၢ်, အံၣ်စရ့လးအကစၢ်ယွၤစီဆှံ, စံးဘၣ်ပှၤဂီၢ်မုၢ်, “ဟဲက့ၤကဒါက့ၤဒီးပာ်သုတၢ်နာ်လၢ ယပူၤကစုဒုတက့ၢ်. အန့ၣ်ဒီး, သုဂံၢ်သုဘါကဆူၣ်ဒီးတၢ်အၢ တဘၣ်သုဘၣ်.” ဘၣ်ဆၣ်, သုဂ့ၢ်လိာ်လၢသုကမၤထွဲအီၤ အဂီၢ်လီၤ. 16အခိၣ်တလိာ်, သုကူၣ်ကျဲၤလၢသုကဃ့ၢ်ပူၤဖျဲးကွံာ်လၢသုဒုၣ် သုဒါတဖၣ်ခီဖျိတၢ်ဒိးကသ့ၣ်လၢအဃ့ၢ်ချ့တဖၣ်လီၤ. ဒီးသုတၢ်န့ၣ်, ဘၣ်လီၤ. အဂ့ၢ်ဒ်အံၤ, တၢ်ဃ့ၢ်ပူၤဖျဲးကွံာ်န့ၣ်, သုကဘၣ်မၤအီၤလီၤ. သုဆိကမိၣ်လၢသုကသ့ၣ်တဖၣ်ချ့တ့ၢ်မးလံ. ဘၣ်ဆၣ်, ပှၤလၢအလူၤသုတဖၣ်ချ့န့ၢ်သုတက့ၢ်လီၤ. 17သုပှၤလၢအကထိတဖၣ်ကဃ့ၢ်ကွံာ်ဝဲဖဲသုထံၣ်သုဒုၣ်သုဒါသုးဖိ ထဲတဂၤဧိၤဒၣ်လဲာ်, ဒီးသုးဖိယဲၢ်ဂၤဧိၤကလၢဝဲလၢတၢ်ဒုးဃ့ၢ်ကွံာ် သုခဲလၢာ်အဂီၢ်န့ၣ်လီၤ. တၢ်တအိၣ်တီၢ်နီတမံၤလၢၤဘၣ်လၢသု သုးမုၢ်ဒီဖုအပူၤဘၣ်. ကအိၣ်တီၢ်ဒၣ်ထဲနီၣ်တယၢ်အတၢၣ်တဘိ ဧိၤလၢကစၢၢ်တဖျၢၣ်အဒီခိၣ်လီၤ. 18အန့ၣ်ဒၣ်လဲာ်, ယွၤအိၣ်ခိးသုလၢကသူၣ်ကညီၤသးကညီၤ သုအဂီၢ်လီၤ. အဝဲအိၣ်ကတဲာ်ကတီၤအသးလၢကသးကညီၤသု လီၤ. အဂ့ၢ်ဒ်အံၤ, အဝဲမၤတၢ်လၢအဘၣ်ထီဘိလီၤ. ပှၤလၢအပာ်အတၢ်နာ်လၢယွၤအပူၤတဖၣ်န့ၣ်, မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
ကစၢ်ယွၤကဆိၣ်ဂ့ၤအပှၤဂီၢ်မုၢ်
19သုဝဲပှၤဂီၢ်မုၢ်လၢအအိၣ်လၢဝ့ၢ်ယရူၤၡလ့ၣ်အပူၤတဖၣ်န့ၣ်, တဟီၣ်ဘၣ်ယၢၤဘၣ်လၢၤဘၣ်. ယွၤသူၣ်ကညီၤသးကညီၤတၢ်သ့, ဒီးဖဲသုကိးထီၣ်တၢ်ဆူအအိၣ်လၢတၢ်မၤစၢၤအဂီၢ်န့ၣ်, အဝဲဒၣ်ကစံးဆၢသုလီၤ. 20ယွၤကဒုးလဲၤခီဖျိသုလၢတၢ်ကီတၢ်ခဲအဆၢကတီၢ်တဖၣ်လီၤ. ဘၣ်ဆၣ်ဒီးအဝဲအကစၢ်ဒၣ်ဝဲကအိၣ်ဖဲန့ၣ်လၢတၢ်သိၣ်လိသု အဂီၢ်, ဒီးသုတဘၣ်လူၤဃုအီၤနီတစုလၢၤဘၣ်. 21သုမ့ၢ်ဟးဖျိးကွံာ်လၢကျဲဒီးဟးဆူစုထွဲမ့ၢ်ဂ့ၤ, ဆူစုစ့ၣ်မ့ၢ်ဂ့ၤ ဘၣ်ဆၣ်ဒီး, သုကနၢ်ဟူဘၣ်အကလုၢ်လၢသုလီၢ်ခံလၢအစံးဝဲ, “ကျဲအိၣ်ဖဲအံၤလီၤ. ပိာ်ထွဲအီၤတက့ၢ်,” န့ၣ်လီၤ. 22သုကဟံးန့ၢ်သုတၢ်ဂီၤတၢ်ဖီၣ်တဖၣ်လၢတၢ်ပီၤအီၤလၢစ့ကဘျၣ်, ဒီးသုတၢ်ဂီၤတၢ်ဖီၣ်တဖၣ်လၢအဘၣ်တၢ်ကးဘၢအီၤလၢထူ, ဒီးသုကဆူးကွံာ်အီၤဒ်တၢ်လီၤသးဘၣ်အၢအသိးဒီးစံး, “ဟးထီၣ်ကွံာ်လၢယမဲာ်ညါတက့ၢ်,” န့ၣ်လီၤ. 23ဖဲသုဖှံလီၤသုတၢ်ချံတဖၣ်တဘျီလၢ်လၢ်န့ၣ်, ယွၤကဆှၢလီၤ တၢ်စူၤထံလၢသုတၢ်မုၢ်တၢ်ဘိကဒိၣ်ထီၣ်အဂီၢ်ဒီးကဟ့ၣ်ထီၣ် သုတၤသူတၤသၣ်ထူးထူးတီၤတီၤ, ဒီးသုဆၣ်ဖိကီၢ်ဖိတဖၣ်ကအိၣ် ဒီးအီၣ်ဆၣ်အလီၢ်ဖးလဲၢ်န့ၣ်လီၤ. 24ကျီၢ်ဖါဒီးကသ့ၣ်ယီၤလၢအထဲၣ်သုစံာ်ပျီတဖၣ်ကအီၣ်ဘၣ် အဆၣ်အဂ့ၤကတၢၢ်ဒီးအဝံၣ်ကတၢၢ်န့ၣ်လီၤ. 25မုၢ်တနံၤဖဲသုဒုၣ်သုဒါအတိာ်တဖၣ်ဘၣ်တၢ်ဒုးန့ၢ်ဖီၣ်န့ၢ်အီၤ, ဒီးအပှၤတဖၣ်ဘၣ်တၢ်မၤသံကွံာ်အီၤန့ၣ်, ထံဖိကျိအထံတဖၣ် ကယွၤလီၤဝဲလၢကစၢၢ်ကိးဖျၢၣ်ဒဲးဒီးတၢ်လူၢ်ကိးလူၢ်ဒဲးန့ၣ်လီၤ. 26လါအတၢ်ကပီၤကဆှံဝဲဒ်မုၢ်အတၢ်ကပီၤအသိး, ဒီးမုၢ်အတၢ်ကပီၤန့ၣ်ကကပီၤအါထီၣ်နွံစးအါ န့ၢ်ညီနုၢ်မၤအသး, လီၤဂာ်ဒီးနွံသီအတၢ် ကပီၤလၢအကပီၤထီၣ်ဝဲလၢတနံၤဃီအတီၢ်ပူၤန့ၣ်လီၤ. တၢ်သ့ၣ်တဖၣ်အံၤခဲလၢာ်ကမၤအသး, ဖဲယွၤဘိၣ်ဘံထီၣ်ဒီးမၤဘျါက့ၤတၢ်ပူၤလီၢ်ပူၤကျဲတဖၣ်လၢ ယွၤမၤဘၣ်ဒိဘၣ်ထံးတ့ၢ်ဘၣ်အပှၤဂီၢ်မုၢ်အခါန့ၣ်လီၤ.
ကစၢ်ယွၤကစံၣ်ညီၣ်ကီၢ်အၤၡူၢ်
27ယွၤအစိကမီၤဒီးအလၤကပီၤဘၣ်တၢ်ထံၣ်န့ၢ်အီၤလၢအယံၤ သ့လီၤ. မ့ၣ်အူဒီးမ့ၣ်အူလုၣ်ဒုးနဲၣ်အတၢ်သးကဲၤထီၣ်လီၤ. အဝဲကတိၤတၢ်, ဒီးအတၢ်ကတိၤတဖၣ်အီၣ်ကွံာ်တၢ်ဒ်မ့ၣ် အူအသိးလီၤ. 28အဝဲမၢလီၤကလံၤလၢအမဲာ်ညါဒ်ထံဒိၣ်ဘၢတၢ်လၢအစိာ် ကွံာ်တၢ်ခဲလၢာ်အသိးန့ၣ်လီၤ. ကလံၤအံၤအူပျီကွံာ်ပှၤ ကလုာ်တဖၣ်ဆူတၢ်ဟးဂီၤအပူၤဒီးအဝဲသ့ၣ်အတၢ်ကူၣ်ကျဲၤ အၢသီတဖၣ်ကတၢၢ်ကွံာ်ဝဲန့ၣ်လီၤ. 29ဘၣ်ဆၣ်သုဝဲယွၤအပှၤဂီၢ်မုၢ်တဖၣ်, သုကသူၣ်ခုသးခုဒီး သုကသးဝံၣ်တၢ်ဒ်သုမၤတ့ၢ်ဖဲမူးစီဆှံတနၤအဆၢကတီၢ် အသိးလီၤ. သုကသူၣ်ခုသးခုထဲသိးဒီးပှၤလၢအလဲၤတၢ်ဒ် တနၢ်သီတူၢ်အတၢ်ဒ့တၢ်အူအသိးလၢကျဲဆူယွၤ, အံၣ်စရ့လးအပှၤဒီဒၣ်တၢ်, အတၢ်လုၢ်ဟံၣ်န့ၣ်လီၤ.
30ယွၤကပျဲပှၤကိးဂၤဒဲးနၢ်ဟူဘၣ်အကလုၢ်ကဟုကညီၢ်ဒီး ကလၢၢ်ဘၣ်အတၢ်သးကဲၤထီၣ်အသဟီၣ်လီၤ. မ့ၣ်အူလၣ်တဖၣ်, တၢ်အၢၣ်အတၢ်သီၣ်ထီၣ်တဖၣ်, သူၣ်အဖျၢၣ်တဖၣ်, ဒီး တၢ်စူၤလီၤဒိၣ်ဒိၣ်မုၢ်မုၢ်တဖၣ်ကအိၣ်ထီၣ်ဝဲန့ၣ်လီၤ. 31ပှၤအၤၡူၢ်ဖိတဖၣ်ကပျံၤတၢ်ဖုးတၢ်ဖဲအဝဲသ့ၣ်နၢ်ဟူဘၣ်ယွၤ အကလုၢ်ဒီးကလၢၢ်ဘၣ်အတၢ်စံၣ်ညီၣ်အသဟီၣ်န့ၣ်လီၤ. 32ဖဲယွၤတီၢ်ဝံၤတီၢ်က့ၤအဝဲသ့ၣ်အဆၢကတီၢ်န့ၣ်, ယွၤအပှၤဂီၢ်မုၢ်ကကွၢ်နီၣ်ကွၢ်ဃါတၢ်ဆၢကတီၢ်အိၣ်ဃုာ် ဒီးဒၢဧိၤမိၤဧိၤဒီးတနၢ်သီတူၢ်တဖၣ်အတၢ်ဒ့တၢ်အူန့ၣ်လီၤ. ယွၤအကစၢ်ဒၣ်ဝဲကဒုးထီဒါပှၤအၤၡူၢ်ဖိတဖၣ်လီၤ. 33ယံာ်တ့ၢ်လံန့ၣ်, ယွၤကတဲာ်ကတီၤပာ်တၢ်လီၢ်တတီၤ ဖဲကီၢ်အၤၡူၢ်အစီၤပၤကဘၣ်တၢ်ဒွဲၣ်အူအီၤလၢမ့ၣ်အူအဂီၢ်လီၤ. တၢ်လီၢ်န့ၣ်ယိာ်ဝဲဒီးလဲၢ်ဝဲ, ဒီးသ့ၣ်မုၣ်ဘၣ်တၢ်ပူၣ်ထီၣ်ထီအီၤဖဲန့ၣ်လီၤ. ယွၤကသါသဖှိထီၣ်မ့ၣ်အူလၣ်တဖၣ်လၢမ့ၣ်အူလၢကအီၣ်ကွံာ်တၢ် အဂီၢ်လီၤ.
Currently Selected:
လံာ်ယၡါယၤ 30: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
