လံာ်ယၡါယၤ 29
29
ဝ့ၢ်ယရူၤၡလ့ၣ်အဘူၣ်အတီၢ်
1ကစၢ်ယွၤအတၢ်လုၢ်လီၢ်, ဝ့ၢ်ယရူၤၡလ့ၣ်အကစၢ်ဒၣ်ဝဲအံၤ, ဘၣ်တၢ်စံၣ်ညီၣ်အီၤဃါမနၤလီၤ. ဝ့ၢ်ဖဲစီၤဒၤဝံးသူၣ်တ့ၢ်အဒဲအလီၢ်န့ၣ်ဘၣ်တၢ်စံၣ်ညီၣ်ဃါမနၤလီၤ. ပျဲအတၢ်အီၣ်အမူးတဖၣ်ဒီးအဘူၣ်တဖၣ်မၤအသး လၢနံၣ်ကဟဲကဒီးတနံၣ်မ့တမ့ၢ်ခံနံၣ်အတီၢ်ပူၤန့ၣ်တက့ၢ်. 2အန့ၣ်ဒီး, ကစၢ်ယွၤကဆှၢလီၤတၢ်တတၢးတနါလၢဝ့ၢ်လၢ အဘၣ်တၢ်ကိးတ့ၢ်အီၤလၢ “အရံၤအ့လး’ အခီပညီ “ကစၢ်ယွၤအတၢ်လုၢ်လီၢ်” အဖီခိၣ်န့ၣ်လီၤ. တၢ်ဟီၣ်တၢ် ယၢၤဒီးတၢ်မဲာ်ထံမဲာ်နိကအိၣ်ဝဲ, ဒီးဝ့ၢ်ဒီဝ့ၢ်န့ၣ်ကလီၤဂာ်ဒီးတၢ် လုၢ်လီၢ်တတီၤလၢတၢ်သွံၣ်ကးဘၢကွံာ်အီၤန့ၣ်လီၤ. 3ကစၢ်ယွၤကလဲၤထီၣ်ဆူဝ့ၢ်န့ၣ်, ကဝီၤဃာ်အီၤဒီးပာ်လီၤတိာ်ဧိၤ တာ်ဧိၤဒီးဒုးအီၤန့ၣ်လီၤ. 4ဝ့ၢ်ယရူၤၡလ့ၣ်ကလီၤဂာ်ဒီးတၢ်တဃၣ်တဒုလၢအဂဲၤပျူၢ်ကတိၤ တၢ်လၢဟီၣ်ခိၣ်အဖီလာ်, အကလုၢ်သီၣ်ဧိၤဧိၤဧၤဧၤဟဲထီၣ်လၢ ဖၣ်ဆါကျါန့ၣ်လီၤ.
5ဝ့ၢ်ယရူၤၡလ့ၣ်ဧၢ, ကယဲၢ်ပှၤတခီဘီမုၢ်ဖိခဲလၢာ်လၢအဟဲထီၣ် ဒုးနၤန့ၣ်ကဘၣ်တၢ်အူဒံဖျိးကွံာ်အီၤဒ်ဖၣ်ကမူၣ်ဖၣ်ဆါအသိးဒီး အဝဲသ့ၣ်အသုးမုၢ်သံၣ်ဘိလၢအပျံၤတၢ်ဖုးတၢ်တဖၣ်ဒံကွံာ်ဖျိး ကွံာ်ဝဲဒ်ဘုလီၢ်အသိးန့ၣ်လီၤ. သတူၢ်ကလာ်ဒီးလၢတၢ်တမုၢ်လၢ် အပူၤန့ၣ်, ယွၤသ့တၢ်လၢာ်ကမၤပူၤဖျဲးသုခီဖျိလီသီၣ်လီသဲဒီး ဟီၣ်ခိၣ်ဟူးဝးတဖၣ်န့ၣ်လီၤ. 6အဝဲကဆှၢလီၤကလံၤမုၢ်တွၤတဖၣ်ဒီးမ့ၣ်အူလၣ်လၢအကအီၣ် ကွံာ်တၢ်လီၤ. 7အန့ၣ်ဒီး, ပှၤကလုာ်အသုးမုၢ်သံၣ်ဘိတဖၣ်လၢအဟဲထီၣ်ဒုး ကစၢ်ယွၤအတၢ်လုၢ်လီၢ်အဝ့ၢ်, ဃုာ်ဒီးအတၢ်စုကဝဲၤဒီး အတၢ်ပီးတၢ်လီတဖၣ်ခဲလၢာ်န့ၣ်, ကလီၤမၢ်ကွံာ်ဝဲဒ်တၢ်မံမီၢ် အသိးဒီးကလီၤဂာ်ဒီးတၢ်တမံၤမံၤလၢတၢ်ဆိကမိၣ်ထီၣ်န့ၢ် အီၤလၢမုၢ်နၤခီအဆၢကတီၢ်န့ၣ်လီၤ. 8ပှၤကလုာ်ခဲလၢာ်လၢအပာ်ဖှိၣ်အသးလၢကလဲၤထီၣ်ဒုးဝ့ၢ်ယရူၤ ၡလ့ၣ်န့ၣ်, ကလီၤဂာ်ဒီးပှၤသၣ်ဝံၤလီၤဒိတဂၤလၢအမံမီၢ်ဝဲလၢ အီၣ်တၢ်, ဘၣ်ဆၣ်ပၢၢ်ထီၣ်ဝဲလၢတၢ်သူၣ်ဝံၤသၣ်စ့ၤန့ၣ်လီၤ. မ့တမ့ၢ်ဘၣ်ဒီးကလီၤဂာ်ဒ်ပှၤတဂၤလၢအသးသူထံဘူးကသံ တ့ၢ်မးအသိးဒီးမံမီၢ်ဝဲလၢအအီထံ, ဘၣ်ဆၣ်ပၢၢ်ထီၣ်လၢအကိာ်ယူၢ်ဃ့ထီဝဲန့ၣ်လီၤ.
တၢ်ဟ့ၣ်ပလီၢ်တဖၣ် လၢအတဘၣ်တၢ်ပာ်လ့ၢ်ပာ်ကါအီၤ
9လဲၤစၢ်ခီလၢတၢ်သးတဆးအပူၤတက့ၢ်. လဲၤစၢ်ခီလၢတၢ်မဲာ်ဘျီၣ်အပူၤတက့ၢ်. စပံးထံတအိၣ်ဘၣ်ဒီးမူၤ စၢ်ခီတက့ၢ်. မ့ၢ်တအီနီတလီၤစီၤဒၣ်လဲာ်ဟးကနူၤကပၤနဲဒၣ်တက့ၢ်. 10ယွၤမၤဃၢတ့ၢ်သုမဲာ်ဖံးတုၤသုကလီၤဆူတၢ်မံယိာ်အပူၤလီၤ. ဝံတဖၣ်ကြၢးမ့ၢ်ပှၤဂီၢ်မုၢ်အမဲာ်ချံတဖၣ်, ဘၣ်ဆၣ်ကစၢ်ယွၤ ကးဘၢတ့ၢ်အဝဲသ့ၣ်အမဲာ်ချံလီၤ. 11ဝံအတၢ်ထံၣ်လၢညါခီကိးမံၤဒဲးအခီပညီကဘၣ်တၢ်ပာ်ခူသူၣ် အီၤလၢသုဒီးကလီၤဂာ်ဒီးလံာ်ထူလၢတၢ်စဲပနီၣ်ဃာ်အီၤ တထူန့ၣ်လီၤ. သုမ့ၢ်လဲၤစိာ်အီၤဆူပှၤတဂၤဂၤလၢအဖးလံာ်သ့ အအိၣ်ဒီးမၢအီၤလၢအကဖးန့ၢ်သုန့ၣ်, အဝဲကစံးဝဲ, ယဖးတသ့ဘၣ်မ့ၢ်လၢတၢ်စဲပနီၣ်တံၢ်အီၤအဃိလီၤ. 12သုမ့ၢ်ဟ့ၣ်လီၤအီၤဆူပှၤတဂၤဂၤလၢအဖးလံာ်တသ့ဒီးမၢအီၤလၢ အကဖးန့ၢ်သုန့ၣ်, အဝဲကစံးဆၢဝဲလၢယဖးလံာ်တသ့ဘၣ်န့ၣ်လီၤ.
13ဒီးယွၤစံးဝဲဒၣ်, “မ့ၢ်ပှၤဂီၢ်မုၢ်အံၤသုးဘူးအသးဆူ ယအိၣ်လၢအထးခိၣ်ဒီးမၤလၤကပီၤယၤလၢအပျူၤ ဘၣ်ဆၣ်ဒီးပာ်အသးယံၤဒီးယၤလီၤ. အတၢ် ဘူၣ်တၢ်ဘါန့ၣ်မ့ၢ်ဒၣ်ပှၤကညီအတၢ်သိၣ်တၢ်ဘျၢ တဖၣ်ဒီးတၢ်ဟဲလီၤစၢၤတဖၣ်ဧိၤ, လၢအဝဲသ့ၣ်တိၢ်ရူးဝဲန့ၣ်လီၤ. 14အဃိဒီး, ယကမၤဖုးမၤပျီၢ်ဒီးမၤလီၤထူၣ်အဝဲသ့ၣ်အသးလၢတၢ်လၢ အဝဲသ့ၣ်တမုၢ်လၢ်လၢအကဟဲဘၣ်အီၤတမံၤဝံၤတမံၤန့ၣ်လီၤ. ပှၤလၢအကူၣ်တၢ်သ့တဖၣ်ကကဲထီၣ်ကဒါက့ၤပှၤအမၢးတဖၣ်, ဒီးအတၢ်သ့တၢ်ဘၣ်ခဲလၢာ်န့ၣ်အဘျုးတအိၣ်လၢၤဘၣ်.”
တၢ်မုၢ်လၢ်လၢခါဆူညါအဂီၢ်
15ပှၤတဖၣ်လၢအကျဲးစၢးပာ်ခူသူၣ်အတၢ်တိာ်ကျဲၤတဖၣ်လၢ ယွၤန့ၣ်, ဘၣ်တၢ်စံၣ်ညီၣ်ဃါမနၤလီၤ. အဝဲသ့ၣ်မၤထွဲအတၢ်ကူၣ်တဖၣ် လၢတၢ်ခူသူၣ်အပူၤဒီးဆိကမိၣ်ဝဲလၢပှၤတထံၣ်ဒီးတသ့ၣ်ညါတၢ် လၢအဝဲသ့ၣ်မၤန့ၣ်နီတဂၤဘၣ်န့ၣ်လီၤ. 16အဝဲသ့ၣ်ဘိးကဒါကွံာ်တၢ်ခဲလၢာ်န့ၣ်လီၤ. ပှၤတ့သပၢၤဒီးကပံာ်န့ၣ်အ ကါဒိၣ်လၢလဲၣ်တမံၤလဲၣ်. တၢ်တမံၤလၢပှၤကညီတဂၤမၤတ့ၢ်ဝဲန့ၣ်စံးဘၣ်အီၤလၢ, “နတမၤတ့ၢ်ယၤဘၣ်” မ့တမ့ၢ် “နမၤတၢ်မနုၤလဲၣ်န့ၣ်နတသ့ၣ် ညါဘၣ်” မ့ၢ်ကသ့ဧါ.
17ဒ်တၢ်စံးပာ်အိၣ်ဝဲအသိးန့ၣ်, တယံာ်လၢၤဘၣ်ဒီးသ့ၣ်ဒိၣ်ပှၢ် တီၣ်န့ၣ်ကကဲထီၣ်စံာ်ပျီ, ဒီးစံာ်ပျီကကဲထီၣ်က့ၤသ့ၣ်ဒိၣ်ပှၢ် တီၣ်လီၤ.
18ဖဲမုၢ်နံၤန့ၣ်ဟဲတုၤဝဲဒီး, ပှၤနၢ်တအၢနၢ်ဟူလံာ်တဘ့ၣ်ဘၣ် တၢ်ဖးအီၤလၢကလုၢ်ဖးဒိၣ်ကသ့, ဒီးပှၤမဲာ်ဘျီၣ်, လၢအအိၣ်မူတ့ၢ်လၢ တၢ်ခံးတၢ်နၤအပူၤန့ၣ်, ကအိးထီၣ်အမဲာ်ချံဒီးကထံၣ်တၢ်လီၤ. 19ပှၤဂီၢ်မုၢ်လၢအဖှီၣ်အယာ်ဒီးဆီၣ်လီၤအသးန့ၣ်ကထံၣ်န့ၢ်က့ၤ ကဒီးတၢ်သူၣ်ဖှံသးညီလၢယွၤ, အံၣ်စရ့လးအကစၢ်ယွၤစီဆှံ, ဟ့ၣ်လီၤဝဲန့ၣ်လီၤ. 20ကမ့ၢ်တၢ်အကတၢၢ်လၢပှၤတဖၣ်လၢအမၤအၢမၤနးပှၤဂၤဒီး ဒုးနဲၣ်အတၢ်သးဘၣ်အၢကစၢ်ယွၤ, အဂီၢ်န့ၣ်လီၤ. ပှၤဒဲးဘးဖိကိးဂၤဒဲးကဘၣ်တၢ်မၤဟးဂီၤအီၤလီၤ. 21ပှၤတဖၣ်လၢအကတိၤခဲၣ်သူခဲၣ်ဂီၤပှၤဂၤ, ပှၤတဖၣ်လၢအတြီတၢ်စံၣ်ညီၣ်ပှၤမၤ တၢ်ထီဒါပဒိၣ်သဲစးဒီးပှၤတဖၣ်လၢအလီတၢ် ဝ့ၤတၢ်ဒ်သိးပှၤသူၣ်လိၤသးဘျၢတဖၣ်ကဒိး န့ၢ်တၢ်စံၣ်ညီၣ်တီန့ၣ်ကစၢ်ယွၤကမၤဟးဂီၤအီၤလီၤ.
22သတးဒီးခဲအံၤ, ယွၤ, အံၣ်စရ့လးအကစၢ်ယွၤတဂၤ, လၢအမၤပူၤမၤဖျဲးတ့ၢ်စီၤအၤဘြၤဟၣ်လၢတၢ်ကိၢ်တၢ်ဂီၤ အပူၤစံးဝဲ, “ယပှၤဂီၢ်မုၢ်သ့ၣ်ဧၢ, သုတဘၣ်တၢ်မၤမဲာ်ဆှး သုလၢၤဘၣ်, ဒီးသုမဲာ်သၣ်တဖၣ်တလီၤဝါလၢၤလၢတၢ်မဲာ် ဆှးအဃိနီတစုဘၣ်. 23ဖဲသုထံၣ်ဘၣ်ဖိတဖၣ်လၢယဟ့ၣ်လီၤသုန့ၣ်, သုကအၢၣ်လီၤတူၢ်လိာ်လၢယမ့ၢ်အံၣ်စရ့လး အကစၢ်ယွၤစီဆှံန့ၣ်လီၤ. သုကမၤလၤကပီၤယၤဒီး ဆၢထၢၣ်လၢတၢ်ပျံၤတၢ်ယူးယီၣ်ယၤအပူၤလီၤ. 24ပှၤဂီၢ်မုၢ်လၢအမၢးကမၤလိမၤနၢ်ပၢၢ်အသး, ဒီးပှၤတဖၣ်လၢအကဒူးကဒ့ၣ်တၢ်ထီဘိန့ၣ်ကသး ခုတူၢ်လိာ်တၢ်သိၣ်လိအီၤလီၤ.”
Currently Selected:
လံာ်ယၡါယၤ 29: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
