လံာ်ယၡါယၤ 28
28
တၢ်ဟ့ၣ်ပလီၢ်တမံၤဆူကလံၤစိးအဘီအမုၢ်
1ကီၢ်အံၣ်စရ့လးအဘီအမုၢ်ဘၣ်တၢ်စံၣ်ညီၣ်ဃါမနၤလီၤ. အလၤကပီၤလီၤညွံးလီၤဘဲဝဲဒ်ဘဲခိၣ်ကွီၤဖီတဖၣ်လၢအအိၣ် ဝဲလၢခိၣ်နၢ်လၢအအီမူၤသံးတဖၣ်အခိၣ်လိၤအသိးန့ၣ်လီၤ. အဝဲသ့ၣ်အခိၣ်လၢအပာ်ထီၣ်ထီအသးတဖၣ်ဘၣ်တၢ်မၤနၢ မူနၢဆှီတ့ၢ်အီၤဂ့ၤမး, ဘၣ်ဆၣ်အဝဲသ့ၣ်မံလီၤဒၣ်ဖဲန့ၣ်လၢတၢ် မူၤသံမူၤဟါမၢ်အပူၤလီၤ. 2ယွၤအိၣ်ဒီးပှၤလၢအဂံၢ်ဆူၣ်ဒီးအစိကမီၤဒိၣ်တဂၤလၢအအိၣ် ကတဲာ်ကတီၤအသးလၢကဒုးအဝဲသ့ၣ်ဒီးကဟဲဝဲဒ်ကလံၤမုၢ် အိၣ်ဒီးသူၣ်, ဒ်တၢ်စူၤထံလၢယွၤလီၤသဖူးဆူၣ်မး, ဒ်ထံဒိၣ်ဘၢတၢ်လၢအဟဲသဖှိဃီၤဝဲဆူၣ်ဆူၣ်ကလဲာ်အသိး, ဒီးကလုၣ်ဘၢကွံာ်ကီၢ်တဘ့ၣ်န့ၣ်လီၤ. 3ခိၣ်နၢ်လၢအမူၤသံးတဖၣ်အတၢ်ပာ်ထီၣ်ထီသးန့ၣ်ကဘၣ် တၢ်ယီၢ်တံၢ်အီၤလၢပှၤအခီၣ်ဖီလာ်လီၤ. 4ခိၣ်နၢ်တဖၣ်လၢအပာ်ထီၣ်ထီအသးအလၤကပီၤကဒံ ကွံာ်ဝဲဒီးလီၤမၢ်ကွံာ်ဒ်ချၢၣ်ဒၢသၣ်တဖၣ်လၢ အမံဆိလၢတၢ်အကတီၢ်အပူၤအသိး, ဒီးဘၣ်တၢ်ဒဲးအီၣ်အီၤတဘျီဃီဖဲအမံထီၣ်ဝဲန့ၣ်လီၤ.
5မုၢ်တနံၤဟဲဝဲဖဲယွၤသ့တၢ်လၢာ်ကလီၤဂာ်ဒ်တၢ်လၤကပီၤခိၣ်ကျီၤဖီတခါအသိး လၢအပှၤဂီၢ်မုၢ်လၢအအိၣ်မူတ့ၢ်တဖၣ်အဂီၢ်လီၤ. 6အဝဲကဟ့ၣ်လီၤသးတမံၤလၢအစံၣ်ညီၣ်တီတၢ်ဆူပှၤလၢအမၤ စံၣ်ညီၣ်ကွီၢ်အတၢ်မၤတဖၣ်, ဒီးတၢ်သူၣ်ဒူသးဒူဆူပှၤလၢအက ဟုကယာ်ဝ့ၢ်အတြဲၤတဖၣ်လၢတၢ်ဟဲထီဒုၣ်ထီဒါအီၤန့ၣ်လီၤ.
ဝံယၡါယၤဒီးကီၢ်ယူဒၤအဝံတဖၣ် လၢအမူၤသံး
7ဝံတဖၣ်ဒီးပှၤလုၢ်တၢ်အခိၣ်တဖၣ်ဒၣ်လဲာ်အီမူၤသံးနးနးကလဲာ် တုၤအဟးကနူၤနူၤကပၤပၤလီၤ. အဝဲသ့ၣ်အီစပံးထံဒီးသံး အါတုၤဒၣ်လဲာ်မၤတၢ်တလိၤတဘၣ်လၢတၢ်သးကဒံကဒါအပူၤ လီၤ. ဝံတဖၣ်အီမူၤသံးတုၤဒၣ်လဲာ်တနၢ်ပၢၢ်လၢၤတၢ်ထံၣ် လၢညါခီတဖၣ်လၢယွၤဟ့ၣ်လီၤအီၤ, ဒီးပှၤလုၢ်တၢ်အခိၣ် တဖၣ်အီမူၤသံးတုၤဒၣ်လဲာ်ကစံၣ်ညီၣ်ကွီၢ်တဖၣ်လၢတၢ်ဟဲ စိာ်န့ၢ်ဆူအအိၣ်န့ၣ်, တသ့ဘၣ်လီၤ. 8စီၢ်နီၤခိၣ်ဖဲအဝဲသ့ၣ်ဆ့ၣ်နီၤတဖၣ်ဘၣ်တၢ်ကးဘၢအီၤဒီး တၢ်ဘှီး, ဒီးတၢ်လီၢ်ကဆှီတအိၣ်နီတတီၤလၢၤဘၣ်.
9အဝဲသ့ၣ်ကဒူးကဒ့ၣ်တၢ်ဘၣ်ဃးဒီးယၤလီၤ. အဝဲသ့ၣ်စံးဝဲ, “ပှၤအဝဲန့ၣ်ဆိကမိၣ်ဝဲလၢအသိၣ်လိမတၤ န့ၣ်လဲၣ်. မ့ၢ်မတၤလိၣ်ဘၣ်အတၢ်ကစီၣ်န့ၣ်လဲၣ်. ဂ့ၤဒၣ်ထဲလၢဖိသၣ်ဖိတဖၣ်လၢအဖှၣ် အနုၢ်ထံသီသီအဂီၢ်လီၤ. 10အဝဲကျဲးစၢးသိၣ်လိပှၤလံာ်တဖျၢၣ်ဘၣ်တဖျၢၣ်, တကျိၤဘၣ်တကျိၤ, တၢ်မၤလိတခါဘၣ်တခါလီၤ.”
11သုမ့ၢ်တဒိကနၣ်ယၤဘၣ်ဒီး, ကစၢ်ယွၤကသူပှၤတခီဘီမုၢ် ဖိတဖၣ်လၢအကတိၤကျိာ်လၢအသီၣ်လီၤတိၢ်လီၤဆီဒ်သိး ကသိၣ်လိသုတၢ်မၤလိတခါန့ၣ်လီၤ. 12အဝဲဟ့ၣ်တ့ၢ်သုတၢ်အိၣ်ဘှံးဒီးတၢ်မၤမုာ်လၢသုဝဲခဲလၢာ်အဂီၢ်, ဘၣ်ဆၣ်ဒီးသုဂ့ၢ်လိာ်တ့ၢ်လၢသုကဒိကနၣ်အီၤလီၤ. 13လၢတၢ်န့ၣ်အဃိ, ယွၤကသိၣ်လိသုလံာ်တဖျၢၣ်ဘၣ်တဖျၢၣ်, တကျိၤဘၣ်တကျိၤ, တၢ်မၤလိတခါဘၣ်တခါလီၤ. အန့ၣ်ဒီးသုခီၣ်ကဘၣ်တိၢ်လၢခီၣ်ကါလၢသုခါထီၣ်ကိးကါဒဲးလီၤ. သုကဘၣ်ဒိဘၣ်ထံး, ဘၣ်ပျံၤသကွီၤ, ဒီးဘၣ်တၢ်ဖီၣ်န့ၢ်ဒ်ပှၤဃိာ်ဖိအသိးလီၤ.
လၢၢ်သနၢၣ်တဖျၢၣ်လၢဝ့ၢ်စံယိၣ်အဂီၢ်
14ခဲအံၤ, သုဝဲလၢအပာ်ထီၣ်ထီအသးဒီးပၢတၢ်ဖဲအံၤလၢဝ့ၢ် ယရူၤၡလ့ၣ်အပှၤဂီၢ်မုၢ်အဖီခိၣ်သ့ၣ်ဧၢ, ဒိကနၣ်တၢ်လၢယွၤစံး ဝဲန့ၣ်တက့ၢ်. 15သုပာ်ကဖၢလၢသုသးလၢသုမၤတ့ၢ်တၢ်အၢၣ်လီၤအီလီၤဒီး တၢ်သံဒီးမၤန့ၢ်တၢ်သးလီၤပလိာ်တမံၤဃုာ်ဒီးပှၤသံတဖၣ် အကီၢ်အဃိလီၤ. သုနာ်သပှၢ်တၢၢ်လၢဖဲတၢ်တတၢးတနါဟဲဝဲ အခါန့ၣ်ကကွၢ်ကပာ်သုလီၤ. အဂ့ၢ်ဒ်အံၤ, သုသန့ၤသုသးလၢတၢ်လီတၢ်ဝ့ၤဒီးတၢ်ကဘျံးက ဘျၣ်လၢအကမၤပူၤဖျဲးသုလီၤ. 16မၤသးဒ်န့ၣ်ဒီးခဲအံၤစိဒိၣ်ကမီၤဒိၣ်ယွၤစံးဝဲ, “ယပာ်လီၤတၢ်ခီၣ်ထံးအဂၢၢ်အကျၢၤဒီးဆူၣ်ဝဲတခါလၢ ဝ့ၢ်စံယိၣ်အပူၤလီၤ. လၢအပူၤန့ၣ်, ယပာ်လၢၢ်သနၢၣ်ဂၢၢ်ကျၢၤတ ဖျၢၣ်လၢအအိၣ်ဒီးတၢ်ကတိၤလၢအကွဲးလီၤအသးလၢအလိၤ, ‘တၢ်နာ်လၢအဂၢၢ်ဝဲကျၢၤဝဲန့ၣ်သးစူၤစ့ၢ်ကီးဝဲလီၤ.’ 17တၢ်စံၣ်ညီၣ်တီကမ့ၢ်နီၣ်ထိၣ်အပျံၤတဘိလၢတၢ်အခီၣ်ထံး အဂီၢ်, ဒီးတၢ်သူၣ်လိၤသးဘျၢကမ့ၢ်အနီၣ်ထိၣ်ထံအပျံၤ လၢအလီၤစဲၤဝဲန့ၣ်လီၤ.” ကလံၤမုၢ်အိၣ်ဒီးသူၣ်ကစိာ်ကွံာ် တၢ်လီတၢ်ဝ့ၤခဲလၢာ်လၢသုသန့ၤသုသး, ဒီးထံလုၣ်ဘၢ တၢ်ကမၤဟးဂီၤသုတၢ်ပူၤဖျဲးအလီၢ်န့ၣ်လီၤ. 18တၢ်အၢၣ်လီၤအီလီၤလၢသုမၤဒီးတၢ်သံကဘၣ်တၢ်မၤဟးဂီၤ ကွံာ်, ဒီးသုတၢ်သးလီၤပလိာ်ဒီးပှၤသံတဖၣ်အကီၢ်ကဘၣ် တၢ်တြူာ်ကွံာ်အီၤလီၤ. ဖဲတၢ်တတၢးတနါဟဲခီဂာ်တၢ်ဒီး, သုကဘၣ်တၢ်မၤနၢၤမၤဃၣ်သုလီၤ. 19ကမၤဘၣ်ဒိဘၣ်ထံးသုတဘျီဝံၤတဘျီ, တဂီၤဝံၤတဂီၤလီၤ. သုကဘၣ်တူၢ်အီၤမုၢ်ဆါဆဲးလၢမုၢ်နၤလီၤ. တၢ်ကစီၣ်အသီတမံၤဘၣ်တမံၤလၢကစၢ်ယွၤအအိၣ်ကဟဲစိာ် တၢ်ပျံၤတၢ်ဖုးအသီန့ၣ်လီၤ. 20သုကလီၤဂာ်ဒီးပှၤလၢတၢ်ကတိၤဒိအပူၤ, လၢအကျဲးစၢးမံ လီၤလၢလီၢ်မံခးလၢအဖုၣ်ကဲၣ်ဆိးအပူၤဒ်သိးကစူၣ်လီၤအခီၣ် အဂီၢ်, အိၣ်ဒီးယၣ်လုးလၢအအံၣ်ကဲၣ်ဆိးလၢကလုးဘၢအသး အဂီၢ်လီၤ. 21ယွၤကဒုးတၢ်ဒ်အမၤတ့ၢ်ဝဲဖဲကစၢၢ်ပရၤစံၣ်ဒီးလၢကံးဘိၣ် အကစၢၢ်ကဆူးအသိး, ဒ်သိးအကမၤတၢ်လၢအတိာ်မၤဝဲလီၤ. အဂ့ၢ်ဒ်အံၤ, အတၢ်မၤတဖၣ်ကဖျါလီၤလိၢ်လီၤလးဝဲလီၤ. အဝဲကမၤဝံၤအတၢ်မၤ, အတၢ်မၤလၢပနၢ်ပၢၢ်အဂ့ၢ်တသ့န့ၣ်လီၤ.
22နံၤဘၣ်ဖၣ်လဲတၢ်ဟ့ၣ်ပလီၢ်လၢယဟ့ၣ်လီၤနၤအံၤတဂ့ၤ. နမ့ၢ်မၤဒ်န့ၣ်ဒီး, နကပူၤဖျဲးအဂီၢ်ကမ့ၢ်တၢ်ကီဒိၣ်တက့ၢ်န့ၣ်လီၤ. ယနၢ်ဟူတ့ၢ်လံယွၤသ့တၢ်လၢာ်အတၢ်ပာ်လီၤအသးလၢကမၤ ဟးဂီၤထံကီၢ်ဒီဘ့ၣ်ညါန့ၣ်လီၤ.
ကစၢ်ယွၤအတၢ်ကူၣ်သ့
23ဒိကနၣ်တၢ်လၢယစံး, ဒီးပာ်သူၣ်ပာ်သးလၢတၢ်လၢယတဲ ဘၣ်သုတက့ၢ်. 24ပှၤထူစံာ်ဖိလၢကထူအစံာ်တဖၣ်ဒီးကတဲာ်ကတီၤအီၤတပယူာ်ဃီ လၢဖှံတၢ်အဂီၢ်တအိၣ်နီတဂၤဘၣ်. 25ဖဲအကတဲာ်ကတီၤဟီၣ်ခိၣ်အကပံာ်ဝံၤလံတစုန့ၣ်, အဝဲဖှံလီၤတၢ်ချံတဖၣ်ဒ်အမ့ၢ်စမုၣ်သူဒီးစံယၤလီၤ. အဝဲဖှံလီၤဝဲဘုကၠူၣ်ဒီးဘုမုယီၤတဂ့ၢ်ဘၣ်တဂ့ၢ်လီၤ. ဒီးလၢအစံာ်ပျီတဖၣ်အသရ့ၤန့ၣ်, အဝဲဖှံလီၤဝဲတၢ်ချံအဂၤတဖၣ်လီၤ. 26ကဘၣ်မၤအတၢ်မၤဒ်လဲၣ်န့ၣ်အဝဲသ့ၣ်ညါဝဲ, မ့ၢ်လၢကစၢ်ယွၤ သိၣ်လိတ့ၢ်အီၤအဃိလီၤ. 27အဝဲတသူနီၣ်တီၢ်လၢအဃၢတဘိနီတစုလၢကတီၢ်ထုးထီၣ် စပံးမုၢ်ဒီးစံယၤအချံတဖၣ်အဂီၢ်န့ၣ်ဘၣ်. အခိၣ်တလိာ်, အဝဲသူဒၣ်နီၣ်က့ဘၣ်ဒံးဘၣ်ဒးဖိတဖၣ်န့ၣ်လီၤ. 28အဝဲတမၤဟးဂီၤဘုကၠူၣ်တဖၣ်ခီဖျိတၢ်ယီၢ်အီၤတထံၣ် ဃီန့ၣ်ဘၣ်. ကဘၣ်ယီၢ်အဘုဒ်လဲၣ်န့ၣ်, အဝဲသ့ၣ်ညါဝဲကစီဒီလီၤ. ကဘၣ်ဝီလ့ၣ်လၢအဖီခိၣ်ဒီးတမၤသဘှံးဘၣ်ဘုအသၣ် တဖၣ်ဘၣ်န့ၣ်လီၤ. 29တၢ်ကူၣ်သ့ခဲလၢာ်အံၤဟဲလၢယွၤသ့တၢ်လၢာ်အအိၣ်လီၤ. ကစၢ်ယွၤအတၢ်တိာ်ကျဲၤတဖၣ်ပှဲၤဒီးတၢ်ကူၣ်သ့, ဒီးကဲထီၣ်လိၣ်ထီၣ်ဝဲဒၣ်ထီဘိလီၤ.
Currently Selected:
လံာ်ယၡါယၤ 28: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
