လံာ်ယၡါယၤ 31
31
ကစၢ်ယွၤကဒီဒၣ်အိၣ်ပှိၤဝ့ၢ်ယရူၤရှလ့ၣ်
1ပှၤလၢအလဲၤဆူကီၢ်အဲၤကူပတူးလၢတၢ်မၤစၢၤအဂီၢ်တဖၣ် ကဘၣ်တၢ်စံၣ်ညီၣ်ဃါမနၤလီၤ. အဝဲသ့ၣ်သန့ၤထီၣ်အသးလၢ ကီၢ်အဲၤကူပတူးအသုးမုၢ်ဖးဒိၣ်လၢအဂံၢ်ဆူၣ်ဘါဆူၣ်ဝဲ, သုးမုၢ် လၢအအိၣ်ဒီးကသ့ၣ်တဖၣ်, လ့ၣ်ကဟၣ်ဒုးသုးတဖၣ်, ဒီးသုးမုၢ်သံၣ်ဘိတဖၣ်လီၤ. ဘၣ်ဆၣ်အဝဲသ့ၣ်တသန့ၤအသးလၢ ယွၤ, အံၣ်စရ့လးအယွၤစီၤဆှံ, ဒီးတဃ့အီၤတၢ်မၤစၢၤဘၣ်. 2အဝဲသ့ၣ်ညါတၢ်လၢအမၤဝဲန့ၣ်လီၤ. အဝဲမၢလီၤတၢ်ဟးဂူာ်ဟးဂီၤလီၤ. အဝဲမၤထွဲအတၢ်မၤပျံၤမၤဖုးလၢကစံၣ်ညီၣ်ပှၤ အၢပှၤသီတဖၣ်ဒီးပှၤလၢအဒီဒၣ်အိၣ်ပှိၤအဝဲသ့ၣ်န့ၣ်လီၤ. 3ပှၤအဲၤကူပတူးဖိတဖၣ်တမ့ၢ်ကစၢ်တဖၣ်ဘၣ်. အဝဲသ့ၣ်မ့ၢ်ဒၣ်ပှၤကညီလီၤ. အကသ့ၣ်တဖၣ်တအိၣ်ဒီးစိ ကမီၤလၢန့ဆၢၣ်အဖီခိၣ်ဘၣ်. ဖဲယွၤမၤတၢ်လံဒီး, ပှၤကလုာ်လၢအဂံၢ်ဆူၣ်ကဟးဂီၤဝဲလီၤ. ဒီးပှၤကလုာ်လၢအဂံၢ်စၢ်လၢအဝဲသ့ၣ်မၤစၢၤဝဲန့ၣ်ကလီၤဃံၤ ဝဲလီၤ. ဒီးခံဖုလိာ်ကဘၣ်တၢ်မၤဟးဂီၤကွံာ်အီၤလီၤ.
4ယွၤစံးဘၣ်ယၤ, “ပှၤကွၢ်သိတဖၣ်မ့ၢ်ကိးပသူကိးပသီထီၣ် နာ်က့, အဝဲသ့ၣ်မၤပျံၤမၤဖုးကွံာ်ခ့ ယုၢ်တဒုလၢဆၣ်ဖိကီၢ်ဖိတဒုလၢအမၤသံတ့ၢ်ဝဲအအိၣ်န့ၣ် တသ့ဘၣ်. ဒ်န့ၣ်အသိး, ယွၤသ့တၢ်လၢာ်လၢအတၢ်ဒီဒၣ် အိၣ်ပှိၤကစၢၢ်စံယိၣ်န့ၣ်, တၢ်တြီအီၤသ့တအိၣ်နီတမံၤဘၣ်. 5ဒ်ထိၣ်တဘ့ၣ်ယူၤဝ့ၤဝီၤလၢအသွံအဖီခိၣ်လၢတၢ်ဒီဒၣ်အိၣ်ပှိၤ အဖိတဖၣ်အဂီၢ်အသိး, ယၤ, ယွၤသ့တၢ်လၢာ်ကဒီဒၣ်အိၣ်ပှိၤ ဝ့ၢ်ယရူၤၡလ့ၣ်ဒီးခီၣ်ဆၢတၢ်လၢအဂီၢ်လီၤ.”
6ယွၤစံးဝဲဒၣ်, “အံၣ်စရ့လးအပှၤဂီၢ်မုၢ်သ့ၣ်ဧၢ, သုမၤတ့ၢ်တၢ်ဒဲးဘးထီဒါယၤဒီးသုထီဒါယၤလီၤ. ဘၣ်ဆၣ်အခဲအံၤ, ဟဲက့ၤဆူယအိၣ်တက့ၢ်. 7တၢ်ဆၢကတီၢ်ဟဲတုၤဝဲဖဲသုခဲလၢာ်သုကစူးကွံာ်တၢ်ဒဲးဘး အတၢ်ဂီၤတၢ်ဖီၣ်တဖၣ်လၢသုမၤတ့ၢ်အီၤလၢစ့ဒီးထူန့ၣ်လီၤ. 8ကီၢ်အၤၡူၢ်ကဘၣ်တၢ်မၤဟးဂီၤအီၤလၢတၢ်ဒုးအပူၤ, ဘၣ်ဆၣ်တမ့ၢ်လၢပှၤကညီအတၢ်စိကမီၤဘၣ်. ပှၤအၤၡူၢ်ဖိတဖၣ်ကထွးထီၣ်ဃ့ၢ်ကွံာ်လၢတၢ်ဒုးဒီးအဝဲသ့ၣ် အပှၤသးစၢ်တဖၣ်ကဘၣ်တၢ်ဒုးကဲထီၣ်အီၤလၢကုၢ်တဖၣ်န့ၣ်လီၤ. 9အဝဲသ့ၣ်အစီၤပၤကဃ့ၢ်ကွံာ်လၢတၢ်ပျံၤတၢ်ဖုးအပူၤ, ဒီးအမူဒါလီၢ်လၤခိၣ်တဖၣ်ကပျံၤတၢ်တုၤဒၣ်လဲာ်ကပာ်လီၤတဲာ် ကွံာ်အတၢ်ဒုးအနီၣ်တယၢ်တဖၣ်လီၤ. ယွၤကတိၤလံတၢ်လံ. မ့ၢ်ယွၤလၢအဘၣ်တၢ်ဘူၣ်ထီၣ်ဘါ ထီၣ်အီၤလၢဝ့ၢ်ယရူၤၡလ့ၣ်အပူၤဒီးယွၤလၢအမ့ၣ်အူ အီၣ်တၢ်ဖဲန့ၣ်လၢတၢ်လုၢ်ထီၣ်ပာ်ထီၣ်အဂီၢ်န့ၣ်လီၤ.”
Currently Selected:
လံာ်ယၡါယၤ 31: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
