လံာ်နီၢ်အ့ၤစတၢ် 7
7
1ဒီးလၢတၢ်န့ၣ်အဃိစီၤပၤဒီးစီၤဟၤမၣ်လဲၤဒ်သိး ကအီၣ်သကိးတၢ်ဒီးနီၢ်အ့ၤစတၢ်ခံဘျီတဘျီလီၤ. 2ဖဲအအီမူၤစပံးထံန့ၣ်စီၤပၤသံကွၢ်ကဒီးအီၤ, “ခဲအံၤနီၢ်ပၤမုၣ်အ့ၤစတၢ်ဧၢ, နအဲၣ်ဒိးတၢ်မနုၤလဲၣ်. တဲဘၣ်ယၤဒီးနကမၤန့ၢ်အီၤလီၤ. ယကဟ့ၣ်ဒၣ်လဲာ်နၤလၢယဘီ ယမုၢ်တဝာ်န့ၣ်လီၤ.”
3နီၢ်ပၤမုၣ်အ့ၤစတၢ်စံးဆၢဝဲ, “မ့ၢ်ဘၣ်တၢ်ဒိၣ်ကစၢ်စီၤပၤအသးလၢကဟ့ၣ်ယၤယတၢ်ဃ့ဝံသးစူၤ အံၤန့ၣ်ဒီးယတၢ်အဲၣ်ဒိးမ့ၢ်ယကအိၣ်မူဘၣ်ဒံး, ဒီးယပှၤဂီၢ်မုၢ်ကအိၣ်မူဘၣ်ဒံးန့ၣ်လီၤ. 4ယၤဒီးယပှၤဂီၢ်မုၢ်ဘၣ်တၢ်ဆါလီၤကွံာ်အီၤလၢတၢ်မၤသံ အဂီၢ်န့ၣ်လီၤ. တၢ်န့ၣ်မ့ၢ်တအၢန့ၢ်ဒံးတၢ်ဆါလီၤကွံာ် ဆူတၢ်ကဲကုၢ်အပူၤဘၣ်ဒီး, ယကအိၣ်ဘှီၣ်ကလာ်ဒီးတမၤတံာ်တာ်ဘၣ် နၤလၢတၢ်ဂ့ၢ်န့ၣ်ဘၣ်. မ့မ့ၢ်ခဲအံၤပကဘၣ်တၢ်မၤဟးဂီၤကွံာ်ပှၤတုၤ အလၢာ်တစုန့ၣ်လီၤ.”
5တုၤနုၤတစု, စီၤပၤအဃၤၡဝ့ရိၣ်သံကွၢ်နီၢ်ပၤမုၣ်အ့ၤစတၢ်, “မတၤမၤတၢ်ဒ်န့ၣ်တမံၤဘူၣ်တဂၤလဲၣ်. ပှၤတဂၤအံၤအိၣ်ဖဲလဲၣ်.”
6နီၢ်အ့ၤစတၢ်စံးဆၢဝဲ, “ပဒုၣ်ပဒါ, ပှၤလၢအမၤနးမၤဖှီၣ်ပှၤန့ၣ်, မ့ၢ်ပှၤအအၢစီၤဟၤမၣ်အံၤလီၤ.”
တုၤနုၤတစုစီၤဟၤမၣ်ပျံၤတၢ်ဖုးတၢ်လၢစီၤပၤဒီးနီၢ်ပၤမုၣ်အမဲာ် ညါန့ၣ်လီၤ. 7စီၤပၤဂဲၤဆၢထၢၣ်လၢတၢ်သးကဲၤထီၣ်အပူၤ, ဒီးဟးထီၣ်ကွံာ်လၢဒၢးပူၤဒီးလဲၤဆူနီအတၤသၣ်လီၢ်အပူၤန့ၣ်လီၤ. တုၤစီၤဟၤမၣ်ထံၣ်ဘၣ်ဝဲလၢစီၤပၤပာ်လီၤလံအသးလၢ ကစံၣ်ညီၣ်အီၤလၢတၢ်အံၤအဃိန့ၣ်အဝဲအိၣ်တ့ၢ်ဒ်သိးကဃ့ကညး နီၢ်ပၤမုၣ်အ့ၤစတၢ်လၢအသးသမူအဂီၢ်လီၤ. 8အဝဲထိၣ်လီၤပှီၤဃီၤအသးလၢနီၢ်အ့ၤစတၢ်အလီၢ်မံခးအဖီခိၣ်, ဒ်သိးကဃ့ကညးအီၤလၢတၢ်သးကညီၤအဂီၢ်, ဖဲစီၤပၤဟဲက့ၤကဒါက့ၤဆူဒၢးပူၤလၢတၤသၣ်လီၢ်အခါန့ၣ်လီၤ. တုၤအဝဲထံၣ်တၢ်မၤအသးအံၤဒီး, စီၤပၤထုထီၣ်အကလုၢ်, “မ့ၢ်ပှၤတဂၤအံၤသါကမၤတရီတပါနီၢ်ပၤမုၣ်ဖဲအံၤလၢယမဲာ်ညါ, လၢယနီဒၣ်ယဲအပူၤန့ၣ်ဧါ.”
စီၤပၤစံးတၢ်အံၤဝံၤတဘျီဃီ, ပှၤဒ့ဒံၣ်ဖိတဖၣ်ကျၢၢ်ဘၢစီၤဟၤမၣ်အခိၣ်န့ၣ်လီၤ. 9တုၤနုၤတစု, အဝဲသ့ၣ်အကျါတဂၤ, လၢအမံၤမ့ၢ်ဝဲစီၤဃၤရဘိစံးဝဲဒၣ်, “စီၤဟၤမၣ်မၤတ့ၢ်ဒၣ်လဲာ်ပှၤပျၤထီသံတၢ်အသ့ၣ်တကျီၣ်လၢအ ဟံၣ်, ဒ်သိးကဘျးထီၣ်စီၤမၢ်ဒကဲၤ, ပှၤလၢအမၤပူၤဖျဲးတ့ၢ်ကစၢ်စီၤပၤအသးသမူလီၤ. ဒီးသ့ၣ်ကျီၣ်န့ၣ်, ထီဝဲဒၣ်အပျၢ်ယဲၢ်ဆံလီၤ.”
စီၤပၤဟ့ၣ်လီၤအကလုၢ်, “ဘျးထီၣ်စီၤဟၤမၣ်လၢအလိၤတက့ၢ်.”
10မၤသးဒ်န့ၣ်ဒီး, စီၤဟၤမၣ်ဘၣ်တၢ်ဘျးထီၣ်အီၤလၢသ့ၣ်လၢပှၤပျၤထီသံတၢ်တကျီၣ် အလိၤလၢအဝဲမၤတ့ၢ်လၢစီၤမၢ်ဒကဲၤအဂီၢ်န့ၣ်လီၤ. တုၤနုၤတစုစီၤပၤအတၢ်သးဒိၣ်စၢ်လီၤဝဲဒၣ်န့ၣ်လီၤ.
Currently Selected:
လံာ်နီၢ်အ့ၤစတၢ် 7: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
