လံာ်နီၢ်အ့ၤစတၢ် 6
6
စီၤပၤမၤလၤကပီၤစီၤမၢ်ဒကဲၤ
1ဖဲမုၢ်တနၤဃီန့ၣ်, စီၤပၤမံတန့ၢ်ဘၣ်အဃိ, အဝဲမၤလိာ်ဝဲလၢပှၤကဟဲစိာ်န့ၢ်အီၤဘီမုၢ်အတၢ်ကွဲးနီၣ် တဖၣ်ဒီးဖးန့ၢ်အီၤန့ၣ်လီၤ. 2တၢ်လၢအဝဲသ့ၣ်ဖးဝဲန့ၣ်အိၣ်ဃုာ်ဒီးတၢ်ဂ့ၢ်လၢ အဘၣ်ထွဲဒီးစီၤမၢ်ဒကဲၤထံၣ်န့ၢ်တၢ်ကူၣ်ခူသူၣ်တမံၤလၢတၢ် ကမၤသံစီၤပၤအဂ့ၢ်, တၢ်ကူၣ်တမံၤလၢပှၤဒ့ဒံၣ်ဖိလၢအပၢၤစီၤပၤအဒၢးခံဂၤလၢ အမ့ၢ်စီၤဘံးကသၤနၤဒီးစီၤတ့ရ့ၣ်တဖၣ်မၤဝဲန့ၣ်လီၤ. 3ဒီးစီၤပၤသံကွၢ်ဝဲ, “မ့ၢ်ပမၤလၤကပီၤဒီးဟ့ၣ်ဘျုးစီၤမၢ်ဒကဲၤ လၢတၢ်အံၤအဂီၢ်ဒ်လဲၣ်.”
အခ့အပှၤတဖၣ်စံးဆၢဝဲ, “တၢ်တမၤတၢ်နီတမံၤလၢအဂီၢ်ဒံးဘၣ်.”
4စီၤပၤသံကွၢ်ဝဲ, “မ့ၢ်ယပဒိၣ်အိၣ်တဂၤဂၤလၢနီပူၤန့ၣ်ဧါ.”
ဆၢကတီၢ်ဖဲန့ၣ်ဘၣ်ဖဲစီၤဟၤမၣ်ဟဲနုာ်ဆူနီအဂၢၤပူၤဒ်သိးကမၢ စီၤပၤဘျးထီၣ်စီၤမၢ်ဒကဲၤလၢသ့ၣ်လၢအအိၣ်ကတဲာ် ကတီၤပာ်လံအသးတကျီၣ်အလိၤန့ၣ်လီၤ. 5လၢတၢ်န့ၣ်အဃိစီၤပၤအခ့အပှၤတဖၣ်စံးဆၢဝဲ, “စီၤဟၤမၣ်အိၣ်ဖဲအံၤ, အိၣ်ခိးဝဲလၢကထံၣ်နၤလီၤ.”
ဒီးစီၤပၤစံးဆၢဝဲ, “ပျဲအဟဲနုာ်တက့ၢ်”
6အန့ၣ်ဒီးစီၤဟၤမၣ်ဟဲနုာ်ဝဲ, ဒီးစီၤပၤစံးဘၣ်အီၤ, “ပှၤအိၣ်ဝဲတဂၤလၢယအဲၣ်ဒိးမၤလၤကပီၤအီၤဒိၣ်မးလီၤ. ယကဘၣ်မၤတၢ်မနုၤလၢပှၤတဂၤအံၤအဂီၢ်န့ၣ်လဲၣ်.” စီၤဟၤမၣ်ဆိကမိၣ်လၢအသးပူၤ, “ခဲအံၤပှၤလၢစီၤပၤအဲၣ်ဒိးမၤလၤကပီၤအီၤဒိၣ်မးန့ၣ် ကမ့ၢ်မတၤလဲၣ်. ကမ့ၢ်ဒၣ်ယၤလီၤ.”
7အဃိစီၤဟၤမၣ်စံးဆၢစီၤပၤ, “မၢပှၤဟဲစိာ်ဆ့ကၤဖးထီတဖၣ်လၢပှၤတဂၤအံၤအဂီၢ်, 8ဆ့ကၤတဖၣ်လၢနကစၢ်ဒၣ်နဲနကၤအီၤတက့ၢ်. မၢပှၤဒုးကုာ်ထီၣ်အီၤလၢခိၣ်သလုးဒီးဒုးဒိးထီၣ်အီၤလၢနက သ့ၣ်ဒၣ်နဲတက့ၢ်. 9ဒီးမၢနပှၤတူၢ်ဒိၣ်ကီၤဒိၣ်ကတၢၢ်တဖၣ်အကျါတဂၤ ဒုးကူထီၣ်သိးထီၣ်ပှၤတဂၤအံၤလၢဆ့ကၤဖးထီတဖၣ်အံၤဒီးဒုး ဒိးထီၣ်အီၤလၢကသ့ၣ်, ဒီးဆှၢအီၤလၢဝ့ၢ်အကျဲဧိၤကပူၤဧိၤတဖၣ်တက့ၢ်. ဒီးဖဲအဝဲသ့ၣ်လဲၤတၢ်အခါမ်ပှၤတူၢ်ဒိၣ်ကီၤဒိၣ်တဂၤန့ၣ်ကိးထီၣ်, ကွၢ်, စီၤပၤမၤဘျုးပှၤတဂၤလၢအအဲၣ်ဒိးမၤလၤကပီၤဝဲန့ၣ်ဒ်လဲၣ်တက့ၢ်.”
10အန့ၣ်ဒီးစီၤပၤစံးဘၣ်စီၤဟၤမၣ်, “မၤချ့ချ့ဒီးလဲၤဟံးန့ၢ်ဆ့ကၤဖးထီ တဖၣ်ဒီးကသ့ၣ်, ဒီးသုးကျဲၤတၢ်လၤကပီၤဒ်အံၤတဖၣ်လၢပှၤယူဒၤ ဖိစီၤမၢ်ဒကဲၤအဂီၢ်တက့ၢ်. မၤတၢ်ကိးမံၤဒဲးလၢအဝဲအဂီၢ်ဒ်နဟ့ၣ်ကူၣ်အသိးတက့ၢ်. နကထံၣ်ဘၣ်အဝဲဆ့ၣ်နီၤဖဲနီအကျဲစၢၤန့ၣ်လီၤ.”
11လၢတၢ်န့ၣ်အဃိစီၤဟၤမၣ်လဲၤဟံးန့ၢ်ဆ့ကၤဖးထီတဖၣ်ဒီးကသ့ၣ်, ဒီးဒုးကူထီၣ်သိးထီၣ်စီၤမၢ်ဒကဲၤလၢဆ့ကၤဖးထီန့ၣ်လီၤ. စီၤမၢ်ဒကဲၤဒိးထီၣ်ကသ့ၣ်ဒီးစီၤဟၤမၣ်ဆှၢအီၤလၢဝ့ၢ်အကျဲ ဧိၤကပူၤဧိၤတဖၣ်ဒီးကိးထီၣ်ဝဲဆူပှၤဂီၢ်မုၢ်, “ကွၢ်စီၤပၤမၤဘျုးပှၤတဂၤလၢအဝဲအဲၣ်ဒိးမၤလၤကပီၤဝဲဒ်လဲၣ် န့ၣ်တက့ၢ်.”
12အန့ၣ်ဝံၤဒီးဖဲစီၤမၢ်ဒကဲၤက့ၤကဒါက့ၤဆူနီအကျဲစၢၤဖဲ စီၤဟၤမၣ်မၤဘၢအမဲာ်လၢတၢ်မဲာ်ဆှးအပူၤဒီးက့ၤချ့ချ့ ဆူအဟံၣ်အခါန့ၣ်လီၤ. 13အဝဲတဲဘၣ်အမါနီၢ်စ့ရ့ၣ်ဒီးအသကိးခဲလၢာ်လၢတၢ် ကိးမံၤဒဲးလၢအမၤအသးဒီးအီၤန့ၣ်လီၤ. အန့ၣ်တစု, အမါဒီးအတံၤသကိးလၢအကူၣ်တၢ်သ့တဖၣ်စံးဘၣ်အီၤ, “နတၢ်စိတၢ်ကမီၤစးထီၣ်လီၤမၢ်ကွံာ်ဆူစီၤမၢ်ဒကဲၤအအိၣ်လံ. အဝဲမ့ၢ်ပှၤယူဒၤဖိတဂၤဒီးနမၤနၢၤအီၤတသ့ဘၣ်. အဝဲကမၤနၢၤကွံာ်နၤသပှၢ်ကတၢၢ်န့ၣ်လီၤ.”
စီၤဟၤမၣ်ဘၣ်တၢ်မၤသံကွံာ်အီၤ
14ဖဲအဝဲသ့ၣ်ကတိၤသကိးဒံးတၢ်အဖၢမုၢ်န့ၣ်, ပှၤဒ့ဒံၣ်ဖိလၢနီ ပူၤတဖၣ်ဟဲတုၤဝဲ, ဒီးမၤချ့ချ့ဒ်သိးကလဲၤကိးစီၤဟၤမၣ်ဆူ နီၢ်အ့ၤစတၢ်အတၢ်အီၣ်တၢ်အီအမူးန့ၣ်လီၤ.
Currently Selected:
လံာ်နီၢ်အ့ၤစတၢ် 6: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
