လံာ်နီၢ်အ့ၤစတၢ် 5
5
နီၢ်အ့ၤစတၢ်ကွဲမုာ်စီၤပၤဒီးစီၤဟၤမၣ် ဆူတၢ်အီၣ်တၢ်အီအမူး
1လၢနီၢ်အ့ၤစတၢ်ဒုၣ်တၢ်အီၣ်တၢ်အီသၢနံၤတနံၤန့ၣ်, အဝဲကူထီၣ်သိးထီၣ်နီၢ်ပၤမုၣ်အကူအသိးဒီးလဲၤနုာ် ဒီးဆၢထၢၣ်လၢနီအဂၢၤအခၢၣ်သးဒၢးတဒၢးအပူၤလၢ အအိၣ်သဃီၤဒီးစီၤပၤအလီၢ်ပစိာ်အဒၢးအမဲာ်ညါန့ၣ်လီၤ. စီၤပၤဆ့ၣ်နီၤဝဲလၢအလီၢ်ပစိာ်အဖီခိၣ်လၢအအိၣ်သဃီၤဒီးကျဲ စၢၤဟဲနုာ်န့ၣ်လီၤ. 2တုၤစီၤပၤထံၣ်ဘၣ်နီၢ်ပၤမုၣ်အ့ၤစတၢ်ဆၢထၢၣ်ဖဲတၢ်ချၢန့ၣ်, အဝဲကွၢ်မဲာ်အီၤဒီးယူာ်ဃီၤအနီၣ်ထိးထူဆူအအိၣ်န့ၣ်လီၤ. နီၢ်အ့ၤစတၢ်ဟဲနုာ်ဒီးထိးနီၣ်ထိးထူအခိၣ်န့ၣ်လီၤ. 3စီၤပၤသံကွၢ်အီၤ, “တၢ်မနုၤလဲၣ်နီၢ်ပၤမုၣ်အ့ၤစတၢ်ဧၢ, တဲဘၣ်ယၤတၢ်လၢနအဲၣ်ဒိးတက့ၢ်. ဒီးတၢ်န့ၣ်မ့မ့ၢ်ယဘီယမုၢ်တဝာ်ဒၣ်လဲာ်ယကဟ့ၣ်နၤန့ၣ်လီၤ.”
4နီၢ်အ့ၤစတၢ်စံးဆၢအီၤ, “မ့ၢ်ဘၣ်တၢ်ဒိၣ်ကစၢ်စီၤပၤအသးဒီး, ယအဲၣ်ဒိးလၢတဟါအံၤနၤဒီးစီၤဟၤမၣ်ကမ့ၢ်ယပှၤတမှံၤ တဖၣ်လၢတၢ်အီၣ်အမူးတမူးလၢယကတဲာ်ကတီၤအီၤလၢ သုဂီၢ်န့ၣ်လီၤ.”
5အန့ၣ်ဒီးစီၤပၤမၤလိာ်စီၤဟၤမၣ်လၢကဟဲချ့ချ့, ဒ်သိးအဝဲသ့ၣ်ကကဲထီၣ်နီၢ်အ့ၤစတၢ်အပှၤတမှံၤတဖၣ်န့ၣ်လီၤ. လၢတၢ်န့ၣ်အဃိစီၤပၤဒီးစီၤဟၤမၣ်လဲၤဝဲဆူနီၢ်အ့ၤစတၢ် အတၢ်အီၣ်တၢ်အီအမူးန့ၣ်လီၤ. 6ဖဲစီၤပၤအီစပံးထံအခါန့ၣ်စီၤပၤစံးဘၣ်အီၤ, “တဲဘၣ်ယၤတၢ်လၢနအဲၣ်ဒိးတက့ၢ်. ဒီးယကဟ့ၣ်နၤလီၤ. နမ့ၢ်ဃ့ယဘီယမုၢ်တဝာ်ဒၣ်လဲာ်ယကဟ့ၣ်နၤလီၤ.”
7-8နီၢ်အ့ၤစတၢ်စံးဆၢဝဲ, “တၢ်ဒိၣ်ကစၢ်စီၤပၤမ့ၢ်သးအိၣ်ယၤတုၤဒၣ်လဲာ်လၢ ကဟ့ၣ်ယၤတၢ်လၢယဃ့န့ၣ်, ယအဲၣ်ဒိးလၢစီၤပၤဒီးစီၤဟၤမၣ်ကဟဲ ကဒီးဆူတၢ်အီၣ်အမူးလၢယကကတဲာ်ကတီၤလၢသုဂီၢ်ခဲမုၢ်ဆ့ၣ်န့ၣ် လီၤ. ဖဲန့ၣ်, ယကတဲဘၣ်စီၤပၤလၢတၢ်လၢယအဲၣ်ဒိးန့ၣ်လီၤ.”
စီၤဟၤမၣ်ကူၣ်ထီၣ်တၢ်အၢလၢကမၤသံ စီၤမၢ်ဒကဲၤ
9တုၤစီၤဟၤမၣ်အီၣ်တၢ်ဝံၤဒီးဟးထီၣ်န့ၣ်အသူၣ်ခုသးခုဒီးအသူၣ် မုာ်သးမုာ်ဝဲဒၣ်လီၤ. ဘၣ်ဆၣ်ဒီးတုၤအထံၣ်စီၤမၢ်ဒကဲၤလၢနီအကျဲစၢၤ, ဒီးဖဲစီၤမၢ်ဒကဲၤတဂဲၤဆၢထၢၣ်မ့ၢ်ဂ့ၤ, တပာ်ဖျါထီၣ်တၢ်ပနီၣ် လၢအဟ့ၣ်အီၤတၢ်ယူးယီၣ်မ့ၢ်ဂ့ၤဖဲအဝဲက့ၤခီပတာ်ဘၣ်န့ၣ်အသး ထီၣ်ဘၣ်စီၤမၢ်ဒကဲၤန့ၣ်လီၤ. 10ဘၣ်ဆၣ်ဒီးစီၤဟၤမၣ်ကီၤအသးဒီးက့ၤဆူအဟံၣ်လီၤ. အန့ၣ်ဝံၤဒီးအဝဲကွဲဃီၤအတံၤသကိးတဖၣ်ဆူအဟံၣ်ဒီးမၢအမါ နီၢ်စ့ရ့ၣ်အိၣ်သကိးဒီးအဝဲသ့ၣ်စ့ၢ်ကီးလီၤ. 11အဝဲကတိၤဒိၣ်လီၤအသးလၢအဝဲသ့ၣ်အမဲာ်ညါဘၣ်ထွဲဒီးအဝဲ ထူးဝဲတီၤဝဲထဲလဲၣ်အဂ့ၢ်, အဖိခွါအိၣ်ပှံၤဂၤအဂ့ၢ်, စီၤပၤသုးထီထီၣ်အလီၢ်ဒ်လဲၣ်အဂ့ၢ် ဒီးအဝဲအကါဒိၣ်န့ၢ်ဒံးစီၤပၤအပဒိၣ်ပပှၢ်အဂၤထဲလဲၣ်အဂ့ၢ်န့ၣ်လီၤ. 12စီၤဟၤမၣ်စံးကဒီးဝဲ, “အါန့ၢ်အန့ၣ်နီၢ်ပၤမုၣ်အ့ၤစတၢ်မၤတၢ်အီၣ်အမူး တခါ, တမ့ၢ်လၢပှၤအဂၤနီတဂၤအဂီၢ်ဘၣ်, မ့မ့ၢ်, မ့ၢ်ဒၣ်လၢစီၤပၤဒီး ယၤပဂီၢ်, ဒီးအဝဲကွဲကဒါက့ၤကဒီးပှၤခဲမုၢ်ဆ့ၣ်တနံၤလီၤ. 13ဘၣ်ဆၣ်ဒီးတုၤယထံၣ်ဘၣ်ဒံးပှၤယူဒၤဖိစီၤမၢ်ဒကဲၤဆ့ၣ်နီၤဒံးဖဲနီ အကျဲစၢၤန့ၣ်, တၢ်သ့ၣ်တဖၣ်အံၤအဘျုးတအိၣ်လၢယဂီၢ်နီတမံၤ ဘၣ်.”
14လၢတၢ်န့ၣ်အဃိအမါဒီးအတံၤသကိးခဲလၢာ်ဟ့ၣ်ကူၣ်အီၤစံးဝဲ, “မၢပှၤသူၣ်ထီၣ်သ့ၣ်တကျီၣ်, လၢအထီဝဲအပျၢ်ယဲၢ်ဆံတက့ၢ်. ခဲမုၢ်ဆ့ၣ်ဂီၤခီ, နဃ့စီၤပၤဒ်သိးကမၢတၢ်ဘျးထီၣ်စီၤမၢ်ဒကဲၤလၢ အလိၤသ့ဝဲဒီးနကလဲၤဘၣ်ဆူတၢ်အီၣ်အမူးလၢတၢ်သူၣ်ခု သးခုအပူၤလီၤ.” စီၤဟၤမၣ်ဆိကမိၣ်လၢတၢ်အံၤမ့ၢ်တၢ်ဟ့ၣ်ကူၣ်အဂ့ၤတမံၤအဃိ, မၢပှၤဘှီထီၣ်သ့ၣ်တကျီၣ်လီၤ.
Currently Selected:
လံာ်နီၢ်အ့ၤစတၢ် 5: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
