လံာ်နီၢ်အ့ၤစတၢ် 4
4
စီၤမၢ်ဒကဲၤဃ့နီၢ်အ့ၤစတၢ်အတၢ်မၤစၢၤ
1တုၤစီၤမၢ်ဒကဲၤသ့ၣ်ညါဘၣ်တၢ်မၤအသးခဲလၢာ်ဒီး, အဝဲဖှီအကူအသိးလၢတၢ်သူၣ်ကိၢ်သးဂီၤနးမးအပူၤလီၤ. အန့ၣ်ဝံၤဒီးအဝဲကူထီၣ်သိးထီၣ်ဆ့ကၤထၢသွ့, ဖှံအခိၣ်ဒီးဖၣ်ဆါဒီးဟးလၢဝ့ၢ်ပူၤ, ဒီးဟီၣ်ဝဲဒိၣ်ဒိၣ် ကလဲာ်လၢတၢ်သူၣ်အုးသးအုးအပူၤ, 2တုၤအဝဲဟဲတုၤဆူနီအကျဲစၢၤတစုန့ၣ်လီၤ. အဝဲတလဲၤနုာ်ဆူနီပူၤဘၣ်, မ့ၢ်လၢတၢ်တပျဲလဲၤနုာ်ဘၣ်ပှၤလၢအကူအသိး ဆ့ကၤထၢၣ်သွ့ဘၣ်အဃိန့ၣ်လီၤ. 3သကုၤကီၢ်ဒီဘ့ၣ်ညါဖဲစီၤပၤအတၢ်ဘိးဘၣ်သ့ၣ်ညါဘၣ်တၢ်ဒုးသ့ၣ် ညါအီၤန့ၣ်, တၢ်သူၣ်အုးသးအုးဒီးတၢ်ဟီၣ်တၢ်ယၢၤဖးဒိၣ်အိၣ်ဝဲဒၣ်လၢပှၤ ယူဒၤဖိအကျါလီၤ. အဝဲသ့ၣ်ဒုၣ်တၢ်အီၣ်တၢ်အီ, ဟီၣ်ဝဲယၢၤဝဲဒီးပှၤအါဂၤကူထီၣ်သိးထီၣ်ဆ့ကၤထၢၣ်သွ့ ဒီးမံလီၤလၢဖၣ်ဆါကျါလီၤ.
4တုၤနီၢ်အ့ၤစတၢ်အကုၢ်ပိာ်မုၣ်ဖိတဖၣ်ဒီးပှၤဒ့ဒံၣ်ဖိ တဖၣ်တဲဘၣ်အီၤတၢ်လၢစီၤမၢ်ဒကဲၤမၤဝဲန့ၣ်ဒီးအဝဲ အသူၣ်အုးသးအုးဒိၣ်နီၢ်မးလီၤ. အဝဲဆှၢလီၤတၢ်ကူ တၢ်သိးတနီၤဆူစီၤမၢ်ဒကဲၤအအိၣ်ဒ်သိးကကူဝဲကၤဝဲ လၢဆ့ကၤထၢၣ်သွ့အလီၢ်န့ၣ်လီၤ. ဘၣ်ဆၣ်ဒီးဒီးစီၤမၢ်ဒကဲၤတတူၢ်လိာ်ဘၣ်ဝဲဘၣ်. 5လၢတၢ်န့ၣ်အဃိနီၢ်အ့ၤစတၢ်ကိးဃီၤစီၤဟၤတး, ပှၤဒ့ဒံၣ်ဖိလၢနီပူၤအကျါတဂၤလၢစီၤပၤဃုထၢပာ်လီၤအီၤဒ် တၢ်ခ့တၢ်ပှၤလၢအဂီၢ်န့ၣ်, ဒီးမၢအလဲၤဝဲဆူစီၤမၢ်ဒကဲၤအအိၣ် ဒီးဃုထံၣ်တၢ်မနုၤမၤအသးဒီးဘၣ်မနုၤမၤအသးလဲၣ်အဂ့ၢ် န့ၣ်လီၤ. 6စီၤဟၤတးလဲၤဆူစီၤမၢ်ဒကဲၤအအိၣ်လၢဝ့ၢ်အတၢ်လီၤပျီဖဲ နီအကျဲစၢၤန့ၣ်လီၤ. 7စီၤမၢ်ဒကဲၤတဲဘၣ်အီၤကယဲၢ်တၢ်လၢအမၤတ့ၢ်အသး ဒီးအီၤခဲလၢာ်ဒီးစီၤဟၤမၣ်အၢၣ်လီၤတ့ၢ်အသးလၢကဒၢနုာ် စ့ဆံးအါဆူစီၤပၤအတၢ်ပာ်ဖှိၣ်အလီၢ်ဖဲပှၤယူဒၤဖိခဲလၢာ်ဘၣ် တၢ်မၤသံကွံာ်အီၤအဂ့ၢ်န့ၣ်လီၤ. 8အဝဲဟ့ၣ်လီၤစီၤဟၤတးလၢလံာ်ဘိးဘၣ်သ့ၣ်ညါ အဒိတဘ့ၣ်လၢအဘၣ်တၢ်ရၤလီၤအီၤလၢဝ့ၢ်ၡူ ၡၣ်အပူၤလၢအအိၣ်ဒီးတၢ်မၤလိာ်လၢတၢ်ကမၤ ဟးဂီၤကွံာ်ပှၤယူဒၤဖိခဲလၢာ်အဂ့ၢ်န့ၣ်လီၤ. စီၤမၢ်ဒကဲၤမၢအက့ၤစိာ်လံာ်အံၤဆူနီၢ်အ့ၤစတၢ်အအိၣ်, ဒီးတဲဘၣ်အီၤလၢတၢ်အဂ့ၢ်အခၢးဒီးမၢအလဲၤဒီးဃ့ကညး စီၤပၤဒ်သိးကသးကညီၤအပှၤဂီၢ်မုၢ်အဂီၢ်လီၤ. 9စီၤဟၤတးမၤဝဲဒ်န့ၣ်လီၤ.
10နီၢ်အ့ၤစတၢ်ဟ့ၣ်လီၤတၢ်ကစီၣ်အံၤလၢစီၤဟၣ်တး ကလဲၤစိာ်ဝဲဆူစီၤမၢ်ဒကဲၤအအိၣ်န့ၣ်လီၤ. 11ဒီးစံးဝဲဒၣ်, “ပှၤတဂၤလၢ်လၢ်, ပိာ်ခွါမ့ၢ်ဂ့ၤ, ပိာ်မုၣ်မ့ၢ်ဂ့ၤ, မ့ၢ်လဲၤနုာ်ဆူဂၢၤပူၤဒီးထံၣ်စီၤပၤတအိၣ်ဘၣ်ဒီးစီၤပၤ အတၢ်ကိးအီၤဘၣ်န့ၣ်ကဘၣ်သံလီၤ. တၢ်အံၤမ့ၢ်တၢ်သိၣ်တၢ်သီလၢပှၤကိးဂၤဒဲးစးထီၣ် လၢစီၤပၤအပှၤကူၣ်လိာ်တၢ်တဖၣ်ဒီးတုၤလၢပှၤဂီၢ်မုၢ်ခဲလၢာ် လၢဘီမူၢ်အပူၤသ့ၣ်ညါဝဲန့ၣ်လီၤ. ကျဲအိၣ်ဒၣ်ထဲတဘိဧိၤလၢတၢ်သိၣ်တၢ်သီအံၤပျဲပူၤအီၤသ့ ဝဲလၢအမ့ၢ်ဝဲဖဲစီၤပၤယူာ်ဃီၤအနီၣ်ထိးထူဆူပှၤတ ဂၤဂၤအအိၣ်န့ၣ်အဝဲအသးသမူကပူၤဖျဲးဝဲလီၤ. မ့မ့ၢ်ယဲစီၤပၤတကိးဘၣ်ယၤအိၣ်လံတလါလံန့ၣ်လီၤ.”
12တုၤစီၤမၢ်ဒကဲၤဒိးန့ၢ်ဘၣ်နီၢ်အ့ၤစတၢ်အတၢ်ကစီၣ်န့ၣ်,
13အဝဲဆှၢလီၤတၢ်ဟ့ၣ်ပလီၢ်အီၤဒီးစံးဝဲဒၣ်, “နအိၣ်လၢနီပူၤဘၣ်ဆၣ်ဒီးဒ်နမ့ၢ်ပှၤယူဒၤဖိတဂၤ အသိးန့ၣ်တဘၣ်ဆိကမိၣ်လၢနကပူၤဖျဲးန့ၣ်တဂ့ၤ. 14နမ့ၢ်အိၣ်ဘှီၣ်ကလာ်လၢတၢ်ဆၢကတီၢ်ဒ်သိးအံၤန့ၣ်, တၢ်မၤစၢၤကဟဲလီၤလၢမူခိၣ်လၢပှၤယူဒၤဖိတဖၣ်အဂီၢ်, ဒီးအဝဲသ့ၣ်ကပူၤဖျဲးလီၤ. မ့မ့ၢ်နဲဒၣ်နကသံဒီးနပၢ်အပှၤဟံၣ်ဖိကတုၤလၢတၢ်ဟးဂီၤလီၤ. ဒီးဘၣ်သ့ၣ်သ့ၣ်, ကမ့ၢ်နကဲထီၣ်ဘၣ်နီၢ်ပၤမုၣ်လၢတၢ်ဆၢကတီၢ်ဒ်သိးအံၤ အဂီၢ်ဧါ, န့ၣ်မတၤသ့ၣ်ညါတဂၤလဲၣ်.
15-16နီၢ်အ့ၤစတၢ်စံးဆၢကဒါက့ၤစီၤမၢ်ဒကဲၤဒ်အံၤ, “လဲၤဒီးကိးဖှိၣ်ပှၤယူဒၤဖိခဲလၢာ်, လၢအအိၣ်လၢဝ့ၢ်ၡူၡၣ်အပူၤတပူၤဃီဒီးမၤတၢ်ဒုၣ်တၢ်အီၣ်တၢ်အီတမံၤ ဒီးဘါထုကဖၣ်လၢယဂီၢ်တက့ၢ်. လၢသၢနံၤသၢနၤအတီၢ်ပူၤန့ၣ် အီၣ်တၢ်ဒီးအီတၢ်နီတမံၤတဂ့ၤ. ယၤဒီးယခ့ယပှၤပိာ်မုၣ်ဖိတဖၣ်ပကမၤဒ်န့ၣ်အသိးစ့ၢ်ကီးလီၤ. တၢ်န့ၣ်ဝံၤအလီၢ်ခံဒီး, မ့မ့ၢ်ဒၣ်လဲာ်တၢ်လၢအထီဒါတၢ်သိၣ် တၢ်သီဘၣ်ဆၣ်ဒီး, ယကလဲၤဆူစီၤပၤအအိၣ်လီၤ. ယမ့ၢ်ဘၣ်သံလၢယမၤတၢ်အံၤအဃိဒီးယကသံလီၤ.” 17အန့ၣ်ဒီးစီၤမၢ်ဒကဲၤဟးထီၣ်ဝဲ, ဒီးမၤတၢ်ကိးမံၤဒဲးလၢနီၢ်အ့ၤစတၢ်တဲဘၣ်အီၤလၢကမၤဝဲန့ၣ်လီၤ.
Currently Selected:
လံာ်နီၢ်အ့ၤစတၢ် 4: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
