လံာ်နီၢ်အ့ၤစတၢ် 8
8
ပှၤယူၤဒၤဖိတဖၣ်ဘၣ်တၢ်တဲအီၤလၢ ကထီဒါဆၢတၢ်
1ဒီးလၢမုၢ်တနံၤဃီန့ၣ်, စီၤပၤအဃၤၡဝ့ရိၣ်ဟ့ၣ်ကွံာ်, ပှၤယူဒၤဖိတဖၣ်အဒုၣ်အဒါစီၤဟၤမၣ်, အတၢ်စုလီၢ်ခီၣ်ခိၣ်ခဲလၢာ်ဆူနီၢ်ပၤမုၣ်အ့ၤစတၢ်အအိၣ်လီၤ. နီၢ်အ့ၤစတၢ်တဲဘၣ်စီၤပၤလၢစီၤမၢ်ဒကဲၤမ့ၢ်ပှၤဒီဘူးဒီတံၢ်ဒီးအီၤ, ဒီးစးထီၣ်ဖဲန့ၣ်, စီၤမၢ်ဒကဲၤမၤန့ၢ်တၢ်အခွဲးအယာ် လၢကလဲၤနုာ်ဆူစီၤပၤအမဲာ်ညါလီၤ. 2စီၤပၤဘ့ၣ်လီၤကွံာ်အပသံးလၢအအိၣ်ဒီးအဝဲအတၢ်စဲပနီၣ်, (လၢအဟံးန့ၢ်က့ၤဝဲလၢစီၤဟၤမၣ်အအိၣ်န့ၣ်), ဒီးဟ့ၣ်လီၤဝဲစီၤမၢ်ဒကဲၤန့ၣ်လီၤ. ဒီးနီၢ်အ့ၤစတၢ်ပာ်စီၤမၢ်ဒကဲၤဒ်ပှၤပၢၤစီၤဟၤမၣ်အတၢ်စုလီၢ် ခီၣ်ခိၣ်န့ၣ်လီၤ.
3တုၤနုၤတစုနီၢ်အ့ၤစတၢ်တဲဘၣ်ကဒီးစီၤပၤအိၣ်ဒီးတၢ်ထိၣ်လီၤ ပှီၤအသးလၢစီၤပၤအခီၣ်ထံးဒီးဟီၣ်ဝဲဒီးဃ့ကညးစီၤပၤ လၢကမၤတၢ်တမံၤမံၤဒ်သိးကဆိကတီၢ်ကွံာ်ပှၤအကၤကးဖိ အစၢၤအသွဲၣ်စီၤဟၤမၣ်, အတၢ်ကူၣ်အၢခူသူၣ်ထီဒါပှၤယူဒၤဖိ တဖၣ်န့ၣ်လီၤ. 4စီၤပၤယူာ်ဃီၤအနီၣ်ထိးထူဆူအအိၣ်, ဒီးနီၢ်အ့ၤစတၢ်ဆၢထၢၣ်ဒီးစံးဝဲ, 5“မ့ၢ်ဘၣ်တၢ်ဒိၣ်ကစၢ်စီၤပၤအသး, ဒီးနမ့ၢ်သူၣ်အိၣ်သးအိၣ်ယၤ, ဒီးမ့ၢ်ဂ့ၤဝဲလၢနမဲာ်ဒီး, ဝံသးစူၤရၤလီၤလံာ်ဘိးဘၣ်သ့ၣ်ညါတဘ့ၣ်လၢကဘိး ကဒါက့ၤစီၤဟၤမၣ်အတၢ်မၤလိာ်တဖၣ်လၢတၢ်ရၤလီၤ တ့ၢ်လံအီၤန့ၣ်တက့ၢ်. တၢ်မၤလိာ်တဖၣ်န့ၣ်ဘၣ်တၢ်ရၤလီၤတ့ၢ် အီၤလၢပှၤအကၤကးဖိအစၢၤအသွဲၣ်စီၤဟးမဒၤသၤအဖိခွါ, ဒ်သိးတၢ်ကမၤဟးဂီၤကွံာ်ပှၤယူဒၤဖိလၢဘီမုၢ်အပူၤခဲလၢာ်န့ၣ်လီၤ. 6တၢ်တတၢးတနါဒ်သိးအံၤမ့ၢ်တုၤအိၣ်ယပှၤဂီၢ်မုၢ်, ဒီးယဘူးယတံၢ်ဒၣ်ယဲတဖၣ်မ့ၢ်ဘၣ်တၢ်မၤသံအီၤန့ၣ်ဒီး, ယတူၢ်ယဲကသ့ဒ်လဲၣ်.”
7တုၤနုၤတစု, စီၤပၤအဃၤၡဝ့ရိၣ်စံးဘၣ်နီၢ်ပၤမုၣ်အ့ၤစတၢ်ဒီးပှၤယူဒၤဖိ စီၤမၢ်ဒကဲၤ, “ကွၢ်, ယဘျးထီၣ်တ့ၢ်လံစီၤဟၤမၣ်လၢအတၢ်ကူၣ် အၢခူသူၣ်ထီဒါပှၤယူဒၤဖိတဖၣ်အဃိ, ဒီးယဟ့ၣ်လီၤတ့ၢ်လံအတၢ်စုလီၢ်ခီၣ်ခိၣ်ဆူနီၢ်အ့ၤ စတၢ်လံန့ၣ်တက့ၢ်. 8မ့မ့ၢ်, လံာ်ဘိးဘၣ်သ့ၣ်ညါတဘ့ၣ်လၢအဘၣ်တၢ်ရၤလီၤတ့ၢ်လံအီၤ လၢစီၤပၤအမံၤ, ဒီးစီၤပၤအတၢ်စဲပနီၣ်န့ၣ်, တၢ်ဘိးကဒါအီၤတသ့ဘၣ်. ဘၣ်ဆၣ်, သုကွဲးလံာ်ပရၢဆူပှၤယူဒၤဖိတဖၣ်အအိၣ်ဖဲသုအဲၣ်ဒိးသ့ဝဲ ဒီးသုကဘၣ်ကွဲးအီၤလၢယမံၤဒီးစဲပနီၣ်ဃာ်အီၤဒီးစီၤပၤအတၢ်စဲ ပနီၣ်လီၤ.”
9တၢ်အံၤမၤအသးဖဲလါသၢလါတလါ, လါစံဝၣ်ထီၣ်ခံဆံသၢသီအနံၤန့ၣ်လီၤ. စီၤမၢ်ဒကဲၤကိးန့ၢ်စီၤပၤအပှၤကွဲးလံာ်ဒိၣ်တဖၣ်, ဒီးကိးထီၣ်န့ၢ်အီၤလံာ်ပရၢတဖၣ်လၢကဘၣ်ကွဲးဝဲဆူပှၤယူဒၤဖိတဖၣ်, ဒီးဆူပဒိၣ်တဖၣ်, လၢပှၤပၢတၢ်ဆှၢတၢ်တဖၣ်ဒီးပဒိၣ်ဖးဒိၣ်တဖၣ် အအိၣ်လၢကီၢ်တကယၤခံဆံနွံဘ့ၣ်အပူၤ, စးထီၣ်လၢကီၢ်ဟံၣ်ဒူၤတုၤဆူကီၢ်ကူၤၡးန့ၣ်လီၤ. လံာ်ပရၢတဖၣ်န့ၣ်ဘၣ်တၢ်ကွဲးအီၤဆူကီၢ်တဘ့ၣ်ဘၣ်တဘ့ၣ်လၢအကျိာ် ဒၣ်ဝဲဒီးအတၢ်ကွဲးအကျိၤအကွာ်ဒၣ်ဝဲဒီးဆူပှၤယူဒၤဖိတဖၣ်အအိၣ် လၢအကျိာ်ဒီးအတၢ်ကွဲးအကျိၤအကွာ်ဒၣ်ဝဲန့ၣ်လီၤ. 10စီၤမၢ်ဒကဲၤဒုးကွဲးလီၤလံာ်ပရၢတဖၣ်အံၤလၢစီၤပၤအဃၤၡဝ့ရိၣ်အမံၤ, ဒီးစဲပနီၣ်ဃာ်အီၤလၢစီၤပၤအတၢ်စဲပနီၣ်လီၤ. လံာ်ပရၢတဖၣ်န့ၣ်ဘၣ်တၢ်ရၤလီၤအီၤလၢပှၤဒိးကသ့ၣ်အချ့တဖၣ် လၢကဒိးကသ့ၣ်လၢပှၤဘုၣ်ဃာ်အီၤလၢစီၤပၤအဂီၢ်န့ၣ်လီၤ.
11လံာ်ပရၢတဖၣ်အံၤ, ပာ်ဖျါထီၣ်လၢစီၤပၤဟ့ၣ်တၢ်ပျဲဆူ ပှၤယူဒၤဖိလၢအအိၣ်လၢဝ့ၢ်ကိးဖျၢၣ်ဒဲးအပူၤ, ဒ်သိးကကရၢကရိထီၣ်အသးလၢတၢ်ဒီဒၣ်က့ၤအသးဒၣ်ဝဲအဂီၢ်န့ၣ်လီၤ. ပှၤတကလုာ်ဂ့ၤတကလုာ်ဂ့ၤမ့ၢ်အိၣ်လၢကီၢ်တဘ့ၣ်ဂ့ၤ တဘ့ၣ်ဂ့ၤအပူၤလၢအဟဲဒုးပှၤယူဒၤဖိ, အဝဲသ့ၣ်အဖိတဖၣ်ဒီးအပှၤပိာ်မုၣ်တဖၣ်န့ၣ်, အဝဲသ့ၣ်မၤဆၢက့ၤဝဲသ့ဒီးမၤသံကွံာ်ပှၤလၢခံ ကတၢၢ်တဂၤဒီးဟံးန့ၢ်ကွံာ်ဝဲအတၢ်ဖိတၢ်လံၤသ့န့ၣ်လီၤ. 12တၢ်စံၣ်ညီၣ်ဟ့ၣ်လီၤကလုၢ်အံၤကဘၣ်ကဲထီၣ်လိၣ်ထီၣ်ဝဲ သကုၤကီၢ်ပၤရၣ်အဘီအမုၢ်ဖဲမုၢ်တနံၤလၢတၢ်ပာ်လီၤတ့ၢ်အီၤ ဒ်တၢ်ကမၤသံပှၤယူဒၤဖိတဖၣ်အနံၤလၢအမ့ၢ်လါတဆံခံလါတလါ, လါအးဒၢ်ထီၣ်တဆံသၢနံၤတနံၤန့ၣ်လီၤ. 13လံာ်အံၤကဘၣ်တၢ်ဘိးဘၣ်သ့ၣ်ညါအီၤဒ်တၢ်သိၣ်တၢ်သီအသိး ဒီးကဘၣ်တၢ်ဒုးသ့ၣ်ညါပှၤကိးဂၤဒဲးလၢကီၢ်ဆၣ်ကိးဘ့ၣ်ဒဲးအပူၤ, ဒ်သိးပှၤယူဒၤဖိကအိၣ်ကတဲာ်ကတီၤအသးလၢက ဟ့ၣ်ကၣ်က့ၤအဒုၣ်အဒါဖဲမုၢ်တနံၤန့ၣ်တုၤဃီၤဝဲလီၤ. 14ဒ်စီၤပၤအတၢ်မၤလိာ်အိၣ်ဝဲအသိး, စီၤပၤအပှၤဒိးကသ့ၣ်ချ့တဖၣ် ဒိးထီၣ်ကသ့ၣ်ဒီးနီၣ်ထီၣ်ဝဲအချ့ကတၢၢ်လီၤ. ဒီးတၢ်စံၣ်ညီၣ်ဟ့ၣ်လီၤ ကလုၢ်အံၤ, ဘၣ်တၢ်ရၤလီၤစ့ၢ်ကီးအီၤလၢဝ့ၢ်ခိၣ်, ဝ့ၢ်ၡူၡၣ်အပူၤန့ၣ်လီၤ.
15စီၤမၢ်ဒကဲၤဟးထီၣ်ဝဲလၢနီပူၤ, ကူသိးဝဲဒၣ်စီၤပၤအကူအသိး, လၢတၢ်လါဒီးတၢ်ဝါဆ့ကၤဖးထီတဘ့ၣ်လၢပှၤမၤအီၤလၢ ဖှီဝါကဆှၣ်လုးတကုာ်အိၣ်ဒီးခိၣ်သလုးထူဖးဒိၣ်လီၤ. ဝ့ၢ်ၡူၡၣ်အပှၤဝ့ၢ်ဖိကိးပသူထီၣ်လၢတၢ်သူၣ်ခုသးခုဒီး တၢ်သူၣ်ဖှံသးညီလၢကျဲတဖၣ်အပူၤလီၤ. 16လၢပှၤယူဒၤဖိတဖၣ်အဂီၢ်န့ၣ်မ့ၢ်တၢ်သူၣ်ခုသးခု, တၢ်ထူၣ်ဖျဲး, တၢ်သူၣ်ဖှံသးညီဒီးတၢ်လၤကပီၤတကလုာ်န့ၣ်လီၤ. 17ဖဲဒၣ်စီၤပၤအတၢ်ဘိးဘၣ်သ့ၣ်ညါဘၣ်တၢ်ဖးအီၤလၢကီၢ်ဆၣ် တဘ့ၣ်လၢ်လၢ်အပူၤဒီးဝ့ၢ်တဝ့ၢ်လၢ်လၢ်အပူၤန့ၣ်ပှၤယူဒၤဖိ မၤတၢ်သူၣ်ခုသးခုအနံၤသဘျ့လၢအအိၣ်ဒီးတၢ်အီၣ် တၢ်အီဒီးတၢ်သူၣ်ဖှံသးညီန့ၣ်လီၤ. အန့ၣ်ဒီးပှၤဂီၢ်မုၢ်အဂၤအါဂၤကဲထီၣ်ပှၤယူဒၤဖိလီၤ. အဂ့ၢ်ဒ်အံၤ, ခဲအံၤအဝဲသ့ၣ်ပျံၤပှၤယူဒၤဖိန့ၣ်လီၤ.
Currently Selected:
လံာ်နီၢ်အ့ၤစတၢ် 8: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
