လံာ်ပှၤစံၣ်တဲၤတဲလီၤတၢ် 3
3
တၢ်အကတီၢ်တကတီၢ်လၢတၢ်ကိးမံၤဒဲးအဂီၢ်
1တၢ်ခဲလၢာ်လၢအမၤအသးလၢဟီၣ်ခိၣ်အံၤ, မၤအသးဖဲတၢ်အကတီၢ်လၢကစၢ်ယွၤဃုထၢအီၤန့ၣ်လီၤ.
2အဝဲပာ်လီၤဝဲတၢ်အကတီၢ်လၢတၢ်အိၣ်ဖျဲၣ်ထီၣ်အဂီၢ်ဒီးတၢ်အကတီၢ် လၢတၢ်သံအဂီၢ်,
တၢ်အကတီၢ်လၢတၢ်သူၣ်လီၤဖျးလီၤတၢ်အဂီၢ်, ဒီးတၢ်အကတီၢ်လၢတၢ် ထဲးထီၣ်ကွံာ်တၢ်အဂီၢ်,
3တၢ်အကတီၢ်လၢတၢ်မၤသံတၢ်အဂီၢ်, ဒီးတၢ်အကတီၢ်လၢတၢ်မၤဘျါက့ၤ တၢ်အဂီၢ်,
တၢ်အကတီၢ်လၢတၢ်ဂုၤလီၤပှီၢ်တၢ်အဂီၢ်, ဒီးတၢ်အကတီၢ်လၢတၢ်သူၣ် ထီၣ်ဘှီထီၣ်တၢ်အဂီၢ်လီၤ.
4အဝဲပာ်လီၤဝဲတၢ်အကတီၢ်လၢတၢ်သးအုးအဂီၢ်ဒီးတၢ် အကတီၢ်လၢတၢ်သးခုအဂီၢ်,
တၢ်အကတီၢ်လၢတၢ်ဟီၣ်တၢ်ယၢၤအဂီၢ်, ဒီးတၢ်အကတီၢ်လၢတၢ်ဂဲၤကလံၣ်အဂီၢ်,
5တၢ်အကတီၢ်လၢတၢ်အဲၣ်လိာ်ကွံလိာ်သးအဂီၢ်, ဒီးတၢ်အကတီၢ်လၢတၢ်တအဲၣ်လိာ်တကွံလိာ်သးအဂီၢ်,
တၢ်အကတီၢ်လၢတၢ်နၢမူလိာ်သးအဂီၢ်, ဒီးတၢ်အကတီၢ်လၢတၢ်တနၢမူလိာ်သးအဂီၢ်လီၤ.
6ပာ်လီၤဝဲတၢ်အကတီၢ်လၢတၢ်ထံၣ်န့ၢ်တၢ်အဂီၢ်ဒီးတၢ် အကတီၢ်လၢတၢ်ကဟါမၢ်အဂီၢ်,
ဒီးတၢ်အကတီၢ်လၢတၢ်ကပာ်ဖှိၣ်ပာ်တံၤတၢ်အဂီၢ်, ဒီးတၢ်အကတီၢ်လၢတၢ်ကစူးကွံာ်ညိကွံာ်တၢ်အဂီၢ်,
7တၢ်အကတီၢ်လၢတၢ်ကဖှီတဲာ်တၢ်အဂီၢ်, ဒီးတၢ်အကတီၢ်လၢတၢ်ကဆးကျးတၢ်အဂီၢ်,
တၢ်အကတီၢ်လၢတၢ်ကအိၣ်ဘှ့ၣ်အဂီၢ်, ဒီးတၢ်ဆၢကတီၢ်လၢတၢ်ကကတိၤတၢ်အဂီၢ်လီၤ.
8အဝဲပာ်လီၤဝဲတၢ်အကတီၢ်လၢတၢ်အဲၣ်တၢ်အဂီၢ်, ဒီးတၢ်အကတီၢ်လၢတၢ်သးဟ့တၢ်အဂီၢ်,
တၢ်အကတီၢ်လၢတၢ်ဒုးတၢ်ယၤအဂီၢ်, ဒီးတၢ်အကတီၢ်လၢတၢ်ဃူတၢ်ဖိးအဂီၢ်လီၤ.
9လၢပတၢ်မၤခဲလၢာ်အဃိ, ပဘၣ်ဘျုးလၢမနုၤတမံၤလဲၣ်. 10ယသ့ၣ်ညါတၢ်ဝံဃၢတဖၣ်လၢကစၢ်ယွၤပာ်ထီၣ်လၢပလိၤန့ၣ်လီၤ. 11အဝဲပာ်လီၤတၢ်အကတီၢ်အဘၣ်လၢတၢ်ကိးမံၤဒဲးအဂီၢ်လီၤ. အဝဲဟ့ၣ်ပှၤတၢ်သးအိၣ်သ့ၣ်ညါတၢ်လၢအကမၤအသး, ဘၣ်ဆၣ်တၢ်လၢအမၤဝဲန့ၣ်, တဟ့ၣ်ပှၤတၢ်သးမံဒီးတၢ်နၢ်ပၢၢ်အလၢ အပှဲၤနီတစုဘၣ်. 12အဃိဒီးယထံၣ်သ့ၣ်ညါတ့ၢ်လၢတၢ်ခဲလၢာ်လၢပမၤသ့န့ၣ်မ့ၢ်ဒၣ် ပကအိၣ်ဒီးတၢ်သူၣ်ဖှံသးညီဒီးမၤတၢ်အဂ့ၤကတၢၢ်ဒ်ပမၤသ့အသိး ဖဲပအိၣ်မူဒံးအခါန့ၣ်လီၤ. 13ပဝဲခဲလၢာ်ပကြၢးအီၣ်တၢ်အီတၢ်ဒီးမုာ်လၤသးခုလၢတၢ်လၢပမၤ တ့ၢ်ခဲလၢာ်အပူၤန့ၣ်လီၤ. အအံၤမ့ၢ်ကစၢ်ယွၤအတၢ်ဟ့ၣ်လီၤ.
14ယသ့ၣ်ညါလၢတၢ်ခဲလၢာ်လၢကစၢ်ယွၤမၤဝဲန့ၣ်ကအိၣ်ဂၢၢ်ဆိးကျၢၤ ဝဲလီၤထူလီၤယိာ်လီၤ. နပာ်ဖှိၣ်အါထီၣ်တၢ်တမံၤမံၤမ့ၢ်ဂ့ၤ, ထုးကွံာ်တၢ်တမံၤမံၤမ့ၢ်ဂ့ၤတသ့ဝဲဘၣ်. ဒီးတၢ်တမံၤလၢကစၢ်ယွၤမၤဝဲန့ၣ်မ့ၢ်, ကမၢပဆၢထၢၣ်လၢအမဲာ်ညါလၢတၢ်ပျံၤဒီးတၢ်ယူးယီၣ်အီၤပူၤန့ၣ်လီၤ. 15ကွၢ်ဖဲတၢ်ကမၤအသးတမံၤဂ့ၤတမံၤဂ့ၤ, မ့တမ့ၢ်, မၤအသးသ့တမံၤဂ့ၤတမံၤဂ့ၤန့ၣ်, မၤတ့ၢ်လံအသးလၢအပူၤကွံာ် န့ၣ်လီၤ. တၢ်တမံၤဃီန့ၣ်ကစၢ်ယွၤမၤအီၤတဘျီဝံၤတဘျီ ကဒီးန့ၣ်လီၤ.
တၢ်စံၣ်ညီၣ်တတီလၢဟီၣ်ခိၣ်ချၢ
16အါန့ၢ်အန့ၣ်, လၢဟီၣ်ခိၣ်အံၤအပူၤယပာ်သူၣ်ပာ်သးစ့ၢ်ကီးလၢ, ဖဲတၢ်စံၣ်ညီၣ်တီဒီးတၢ်အဘၣ်ကြၢးအိၣ်ဝဲအလီၢ်န့ၣ်, တၢ်ထံၣ်န့ၢ်တၢ်တတီတလိၤလီၤ. 17ယစံးလၢယသးကံၢ်ပူၤ, “ကစၢ်ယွၤကစံၣ်ညီၣ်ပှၤအတီအလိၤ, ဒီးပှၤအၢပှၤသီဒ်သိးသိးလီၤ. မ့ၢ်အဂ့ၢ်ဒ်လဲၣ်န့ၣ်, တၢ်ခဲလၢာ်, တၢ်မၤခဲလၢာ်, ကမၤအသးလၢတၢ်အကတီၢ်ဒၣ်ဝဲဒ်တၢ်ပာ် လီၤတ့ၢ်အီၤအသိးန့ၣ်လီၤ. 18ယသ့ၣ်ညါလီၤတံၢ်လၢကစၢ်ယွၤမၤကွၢ်ပှၤဒ်သိးကဒုးနဲၣ်ပှၤလၢ ပတဂ့ၤန့ၢ်ဆၣ်ဖိကီၢ်ဖိတဖၣ်ဘၣ်န့ၣ်လီၤ. 19နီၢ်နီၢ်န့ၣ်, တၢ်ဘူၣ်တၢ်တီၢ်တမံၤဃီအိၣ်ခိးပှၤကညီဒီးဆၣ်ဖိ ကီၢ်ဖိဒ်သိးသိးန့ၣ်လီၤ. တဂၤသံဝဲဒ်အဂၤတဂၤအသိးလီၤ. အဝဲသ့ၣ်မ့ၢ်ဒၣ်တၢ်ဘၣ်တ့ဒ်သိးသိးလီၤ. ပှၤကညီတဂၤတဂ့ၤန့ၢ်ဆၣ်ဖိကီၢ်ဖိတဒုဘၣ်. မ့ၢ်လၢတၢ်အိၣ်မူ အခီပညီတအိၣ်ဘၣ်လၢအဝဲသ့ၣ်အဂီၢ်အဃိလီၤ. 20အဝဲသ့ၣ်ကလဲၤဆူတၢ်လီၢ်တပူၤဃီဆူဟီၣ်ခိၣ်အကမူၣ်န့ၣ်လီၤ. ဟဲထီၣ်လၢဟီၣ်ခိၣ်အကမူၣ်ဒီးကက့ၤဆူဟီၣ်ခိၣ်အကမူၣ်န့ၣ်လီၤ. 21မ့ၢ်မတၤတဂၤသ့ၣ်ညါလီၤတံၢ်သ့ဝဲလၢပှၤကညီအသးလဲၤထီၣ်ဆူထး ဒီးဆၣ်ဖိကီၢ်ဖိအသးလဲၤလီၤဆူဟီၣ်ခိၣ်လာ်န့ၣ်လဲၣ်. 22လၢတၢ်န့ၣ်အဃိ, ယထံၣ်သ့ၣ်ညါလၢတၢ်အဂ့ၤကတၢၢ်လၢပမၤသ့န့ၣ် မ့ၢ်ဒၣ်ပကမုာ်လၤသးခုလၢတၢ်လၢပမၤတ့ၢ်တဖၣ်အပူၤလီၤ. တၢ်အဂၤလၢပမၤသ့တအိၣ်နီတမံၤဘၣ်. ပသံဝံၤတၢ်မနုၤကမၤအသးလဲၣ်န့ၣ်, ကျဲတအိၣ်နီတဘိလၢပကသ့ၣ်ညါဘၣ်အီၤအဂီၢ်န့ၣ်ဘၣ်.
Currently Selected:
လံာ်ပှၤစံၣ်တဲၤတဲလီၤတၢ် 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.