လံာ်ပှၤစံၣ်တဲၤတဲလီၤတၢ် 2

1ယပာ်လီၤတ့ၢ်ယသးလၢယကမုာ်လၤသးခုဒီးဃုထံၣ်တၢ်သူၣ်ဖှံ သးညီမ့ၢ်တၢ်မနုၤလဲၣ်န့ၣ်လီၤ. ဘၣ်ဆၣ်ယထံၣ်တ့ၢ်လၢအဝဲအံၤမ့ၢ်စ့ၢ်ကီးတၢ်လၢအဘျုးတအိၣ်ဘၣ် န့ၣ်လီၤ. 2ယထံၣ်တ့ၢ်လၢတၢ်နံၤတၢ်အ့မ့ၢ်တၢ်မၢးဒီးတၢ်မုာ်လၤတမၤဂ့ၤနၤ နီတမံၤဘၣ်. 3လၢယတၢ်ဆၢန့ၢ်တၢ်ကူၣ်သ့မၢန့ၢ်ဆီၣ်ခံယၤအဃိဒီး, ယပာ်လီၤတ့ၢ်ယသးလၢယကမၤမုာ်ထီၣ်ယသးလၢစပံးထံဒီးအိၣ်မူ ဖှံဖှံညီညီလီၤ. ယဆိကမိၣ်တ့ၢ်လၢအအံၤမ့ၢ်ကျဲအဂ့ၤကတၢၢ်လၢပှၤကညီကမၤလၢာ်အတၢ် အိၣ်မူဖုၣ်ဖုၣ်တဖၣ်အံၤလၢဟီၣ်ခိၣ်ချၢန့ၣ်လီၤ.

4ယမၤကဲထီၣ်လိၣ်ထီၣ်တၢ်ဖးဒိၣ်တဖၣ်လီၤ. ယသူၣ်ထီၣ်ဘှီထီၣ်တ့ၢ်ဟံၣ်တဖၣ်ဒီးသူၣ်လီၤဖျးလီၤစပံးလီၢ် တဖၣ်လၢယဂီၢ်န့ၣ်လီၤ. 5ယသူၣ်လီၤဖျးလီၤဖီကရၢၢ်တဖၣ်ဒီးတၤသၣ်အလီၢ်တဖၣ်ဃုာ်ဒီးတၤ သၣ်အထူၣ်အကလုာ်ကလုာ်လၢအပူၤန့ၣ်လီၤ. 6ယခူၣ်ကမါတဖၣ်လၢတၢ်ကဖှိၣ်န့ၢ်အဝဲသ့ၣ်လၢထံအဂီၢ်န့ၣ်လီၤ. 7ယပှ့ၤတ့ၢ်ကုၢ်တဖၣ်အါမးဒီးယအိၣ်စ့ၢ်ကီးဒီးကုၢ်တဖၣ်လၢအအိၣ် ဖျဲၣ်ထီၣ်လၢယဟံၣ်ပူၤလီၤ. ယအိၣ်ဒီးဂီၤဘုၣ်ဂီၤဖံး, သိ, မဲာ်တဲးလဲးအဖုအဂီၢ်တဖၣ်အါန့ၢ်ဒံးပှၤလၢအအိၣ်ဝဲလၢ ယမဲာ်ညါလၢဝ့ၢ်ယရူၤၡလ့ၣ်အပူၤတက့ၢ်န့ၣ်လီၤ. 8ယပာ်ဖှိၣ်စ့ၢ်ကီးစ့ဒီးထူလၢအဟဲထီၣ်လၢစီၤပၤအတၢ်ပာ်ဖှိၣ် အလီၢ်တဖၣ်လၢကီၢ်တဖၣ်လၢယပၢအီၤအပူၤန့ၣ်လီၤ. ပိာ်ခွါတဖၣ်ဒီးပိာ်မုၣ်တဖၣ်သးဝံၣ်တၢ်လၢကမၤမုာ်ယၤဒီးယအိၣ် ဒီးကယဲၢ်ပိာ်မုၣ်တဖၣ်လၢပှၤပိာ်ခွါတဂၤအသးဆၢန့ၢ်ဘၣ်ဝဲန့ၣ်လီၤ.

9မ့ၢ်လီၤ. ယမ့ၢ်တ့ၢ်ပှၤအဒိၣ်, လၢအဒိၣ်န့ၢ်ဒံးပှၤတဂၤလၢ်လၢ်လၢ အအိၣ်မူတ့ၢ်လၢဝ့ၢ်ယရူၤၡလ့ၣ်အပူၤန့ၣ်လီၤ. ဒီးယတၢ်ကူၣ်သ့တမၤဟးဂီၤယသးနီတစုဘၣ်. 10ဒီးတၢ်လၢယသးလီတမံၤလၢ်လၢ်န့ၣ်, ယမၤန့ၢ်ယဲလီၤ. ယတပျဲဘၣ်တၢ်မုာ်လၤသးခုလဲၤပူၤကွံာ်လၢယဂီၢ်နီတမံၤဘၣ်. ယပာ်ကဖၢလၢယသးလၢတၢ်လၢယမၤတ့ၢ်အီၤကိးမံၤဒဲးအဃိ, ဒီးတၢ်ခဲလၢာ်အံၤမ့ၢ်ယခိၣ်ဖးန့ၣ်လီၤ. 11အန့ၣ်ဝံၤယဆိကမိၣ်ထီၣ်တၢ်လၢယမၤတ့ၢ်ခဲလၢာ်ဒီးယမၤတ့ၢ်အီၤ ဆူၣ်ထဲလဲၣ်ထဲလဲၣ်အဂ့ၢ်ဒီးယသ့ၣ်ညါလၢအခီပညီတအိၣ်နီ တမံၤဘၣ်န့ၣ်လီၤ. မၤအသးဒ်တၢ်လူၤဖီၣ်ကလံၤအသိးဒီး အဘျုးတအိၣ်နီတမံၤဘၣ်န့ၣ်လီၤ. 12နီၢ်နီၢ်တခီန့ၣ်, စီၤပၤတဂၤမၤတၢ်ကသ့ဒၣ်ထဲသိးသိးစီၤပၤ လၢအပူၤကွံာ်တဖၣ်မၤတ့ၢ်ဝဲန့ၣ်လီၤ. မၤသးဒ်န့ၣ်ဒီး, ယစးထီၣ်ဆိကမိၣ်ထီၣ်တၢ်ကဲထီၣ်ပှၤကူၣ်တၢ်သ့, မ့တမ့ၢ်ပှၤလၢအတပလီၢ်အသး, မ့တမ့ၢ်ပှၤဟးဂီၤဖိ, အခီပညီမ့ၢ်တၢ်မနုၤလဲၣ်န့ၣ်လီၤ. 13အိ, ယသ့ၣ်ညါလံ. တၢ်ကူၣ်သ့န့ၣ်ဂ့ၤန့ၢ်တၢ်သးတဆး, ဒ်တၢ်ကပီၤဂ့ၤန့ၢ်တၢ်ခံးအသိးန့ၣ်လီၤ. 14ပှၤကူၣ်တၢ်သ့တဖၣ်န့ၣ်မ့ၢ်အဝဲသ့ၣ်လဲၤဆူလဲၣ်ဆူလဲၣ်န့ၣ်ထံၣ် သ့ၣ်ညါဝဲလီၤ. မ့မ့ၢ်ပှၤဟးဂီၤဖိတဖၣ်တထံၣ်သ့ၣ်ညါဝဲဘၣ်. ဘၣ်ဆၣ်ဒီးယသ့ၣ်ညါစ့ၢ်ကီးလၢတၢ်ဘူၣ်တၢ်တီၢ်တမံၤဃီန့ၣ်အိၣ် ခိးပာ်ပှၤကိးဂၤဒဲးလီၤ. 15ယဆိကမိၣ်ထီၣ်ယဲ, “ယကဘၣ်တူၢ်တၢ်ဘူၣ်တၢ်တီၢ်တမံၤဃီဒ်ပှၤဟး ဂီၤဖိတဖၣ်အသိးလီၤ. မၤသးဒ်န့ၣ်ဒီး, လၢယကူၣ်တၢ်သ့ထဲန့ၣ်ညါအဃိ, ယမၤန့ၢ်တၢ်မနုၤလဲၣ်.” ယစံးဆၢယဲ, “တန့ၢ်တၢ်နီတမံၤဘၣ်.” 16ပှၤတသ့ၣ်နီၣ်ပှၤကူၣ်တၢ်သ့မ့ၢ်ဂ့ၤ, ပှၤဟးဂီၤဖိတဖၣ်မ့ၢ်ဂ့ၤ နီတဂၤဘၣ်. မုၢ်နံၤလၢအကဟဲတဖၣ်အပူၤန့ၣ်, ပဝဲခဲလၢာ်ပကဘၣ်တၢ်သးပ့ၤနီၣ်ကွံာ်ပှၤန့ၣ်လီၤ. ပှၤကူၣ်တၢ်သ့မ့ၢ်ဂ့ၤ, ပှၤဟးဂီၤဖိမ့ၢ်ဂ့ၤ, ပကဘၣ်သံဒၣ်ခဲလၢာ်န့ၣ်လီၤ. 17အဃိဒီးတၢ်အိၣ်မူအခီပညီအိၣ်ဖျါထီၣ်လၢတမ့ၢ်တၢ်နီတမံၤလၢ ယဂီၢ်ဘၣ်န့ၣ်လီၤ. အဂ့ၢ်ဒ်အံၤ, တၢ်ကိးမံၤဒဲးလၢတၢ်အိၣ်မူအပူၤအံၤဟဲစိာ်န့ၢ် ဒၣ်ယၤထဲတၢ်ကီတၢ်ခဲန့ၣ်လီၤ. တၢ်ခဲလၢာ်မ့ၢ်တၢ်အဘျုးတအိၣ်ဘၣ်န့ၣ်လီၤ. ယလူၤဖီၣ်တ့ၢ်ကလံၤန့ၣ်လီၤ.

18တၢ်လၢယမၤတ့ၢ်ဒီးမၤန့ၢ်တ့ၢ်တဖၣ်အခီပညီတအိၣ်လၢယဂီၢ်နီ တမံၤဘၣ်. အဂ့ၢ်ဒ်အံၤ, ယသ့ၣ်ညါလၢယကဘၣ်ပာ်တီၢ်တ့ၢ်တၢ်တဖၣ်အံၤလၢပှၤလၢ အကဟဲထီၣ်လၢခံတစိၤအဂီၢ်န့ၣ်လီၤ. 19ဒီးအဝဲကမ့ၢ်ပှၤကူၣ်တၢ်သ့မ့တမ့ၢ်ပှၤဟးဂီၤဖိဧါ, မတၤသ့ၣ်ညါကသ့တဂၤလဲၣ်. အန့ၣ်ဒၣ်လဲာ်, တၢ်လၢယမၤတ့ၢ်ခဲလၢာ်, ဒီးတၢ်ခဲလၢာ်လၢယတၢ်ကူၣ်သ့ မၤန့ၢ်တၢ်လၢယဂီၢ်လၢဟီၣ်ခိၣ်အံၤန့ၣ်ကကဲထီၣ်အဝဲအတၢ်ခဲလၢာ် လီၤ. တၢ်ခဲလၢာ်န့ၣ်အဘျုးတအိၣ်ဘၣ်. 20မၤသးဒ်န့ၣ်ဒီးယသးအုးဒီးပီၢ်ယၢ်လီၤက့ၤယသးလၢယမၤတၢ်ဆူၣ် တဘၢးဘၢးညါအဃိလီၤ. 21နမၤတၢ်လၢတၢ်တမံၤမံၤအဂီၢ်လၢကယဲၢ်နတၢ်ကူၣ်သ့, တၢ်သ့ၣ်ညါ, ဒီးတၢ်သ့တၢ်ဘၣ်အပူၤ, ဝံၤဒီးနဘၣ်ပာ်တီၢ်တၢ်ခဲ လၢာ်န့ၣ်လၢပှၤတဂၤဂၤလၢအတဘၣ်မၤတၢ်လၢတၢ်န့ၣ်အဂီၢ်ဘၣ်လီၤ. တၢ်အံၤမ့ၢ်တၢ်အဘျုးတအိၣ်ဘၣ်ဒီးတမ့ၢ်တၢ်အဘၣ်စ့ၢ်ကီးဘၣ်. 22နမၤတၢ်ဒီးမၤကိၢ်မၤဂီၤနကျဲလၢနတၢ်အိၣ်မူဒီကတီၢ်ညါ, ဒီးနအိၣ်ဒီးတၢ်မနုၤလၢနကပာ်ကဖၢလၢနသးအဂီၢ်န့ၣ်လဲၣ်. 23လၢနတၢ်အိၣ်မူဒီကတီၢ်ညါန့ၣ်, တၢ်လၢနမၤအီၤခဲလၢာ်ဟဲစိာ် န့ၢ်နၤထဲတၢ်ကိၢ်တၢ်ဂီၤဒီးတၢ်သူၣ်လီၤဘှံးသးလီၤတီၤန့ၣ် လီၤ. လၢမုၢ်နၤခီအဆၢကတီၢ်ဒၣ်လဲာ်, နသးတဘၣ်တၢ်အမုာ်ဘၣ်. တၢ်ခဲလၢာ်န့ၣ်အဘျုးတအိၣ်နီတမံၤဘၣ်.

24တၢ်အဂ့ၤကတၢၢ်လၢပှၤကညီတဂၤမၤဝဲသ့န့ၣ်, မ့ၢ်တၢ်အီၣ်တၢ်အီတၢ်ဒီးတၢ်မုာ်လၤသးဖှံလၢတၢ်လၢအမၤန့ၢ် တ့ၢ်ဝဲအပူၤန့ၣ်လီၤ. သနာ်က့ဒီး, ယသ့ၣ်ညါလၢအအံၤဒၣ်လဲာ်, ဟဲလၢကစၢ်ယွၤအအိၣ်န့ၣ်လီၤ. 25နကအိၣ်ဒီးတၢ်တမံၤမံၤလၢနကအီၣ်တၢ်အဂီၢ်မ့ၢ်ဂ့ၤ, လၢနကမုာ်လၤသးဖှံအဂီၢ်မ့ၢ်ဂ့ၤကသ့ဒ်လဲၣ်. 26ကစၢ်ယွၤဟ့ၣ်တၢ်ကူၣ်သ့, တၢ်သ့ၣ်ညါဒီးတၢ်သူၣ်ဖှံ သးညီဆူပှၤတဖၣ်လၢအမၤမုာ်အသးန့ၣ်လီၤ. မ့မ့ၢ်, မၢပှၤတၢ်ဒဲးဘးဖိတဖၣ်မၤတၢ်, မၤန့ၢ်တၢ်ဒီးပာ်ဖှိၣ် တၢ်, ဒ်သိးတၢ်လၢအဝဲသ့ၣ်မၤန့ၢ်တ့ၢ်တဖၣ်, ကဘၣ်တၢ်ဟ့ၣ်လီၤအီၤဆူ ပှၤလၢအမၤမုာ်အဝဲအသးတဖၣ်အအိၣ်န့ၣ်လီၤ. တၢ်ခဲလၢာ်န့ၣ်, အဘျုးတအိၣ်ဘၣ်. တၢ်န့ၣ်လီၤဂာ်ဒီးတၢ်လူၤဖီၣ်ကလံၤန့ၣ်လီၤ.

Currently Selected:

လံာ်ပှၤစံၣ်တဲၤတဲလီၤတၢ် 2: KSWC

Highlight

Copy