လံာ်ပှၤစံၣ်တဲၤတဲလီၤတၢ် 4

1မၤကဒီးတစု, ယကွၢ်တၢ်စံၣ်ညီၣ်တတီခဲလၢာ်လၢအမၤဒံးအသးလၢ ဟီၣ်ခိၣ်ချၢအံၤန့ၣ်လီၤ. ပှၤလၢအဘၣ်တၢ်မၤနးမၤဖှီၣ်အီၤတဖၣ်ဟီၣ်တၢ်ယၢၤတၢ်ဘၣ်ဆၣ်ပှၤမၤ စၢၤအီၤတအိၣ်နီတဂၤဘၣ်. ပှၤတမၤစၢၤအီၤနီတဂၤဘၣ်န့ၣ်မ့ၢ်လၢတၢ်စိကမီၤအိၣ်လၢပှၤမၤ နးမၤဖှီၣ်တၢ်တဖၣ်အစုပူၤအဃိန့ၣ်လီၤ. 2ယသူၣ်က့ၣ်သးကါဘၣ်ပှၤတဖၣ်လၢအသံဒီးက့ၤတ့ၢ်လံန့ၣ်လီၤ. တၢ်မၤအသးလၢအဝဲသ့ၣ်အဂီၢ်ဂ့ၤဒိၣ်န့ၢ်ဒံးပှၤလၢအအိၣ်မူဒံး တဖၣ်တက့ၢ်လီၤ. 3ဘၣ်ဆၣ်ပှၤတဖၣ်လၢအဂ့ၤဒိၣ်န့ၢ်ဒံးအဝဲသ့ၣ်န့ၣ်, မ့ၢ်ပှၤလၢတအိၣ်ဖျဲၣ်ဒံးဘၣ်, ပှၤလၢတထံၣ်ဒံးဘၣ်တၢ်စံၣ်ညီၣ်တတီလၢအမၤအသးလၢဟီၣ်ခိၣ်ချၢ အံၤန့ၣ်လီၤ.

4ဘၣ်မနုၤအဃိပှၤမၤတၢ်ဆူၣ်ဆူၣ်လၢကမၤန့ၢ်မၤနၢၤတၢ်အဂီၢ်လဲၣ်န့ၣ်, ယမၤလိဃုနၢ်ပၢၢ်ယဲစ့ၢ်ကီးလီၤ. အဂ့ၢ်ဒ်အံၤ, အဝဲသ့ၣ်သးကါပှၤလၢအဃၢၤတဖၣ်အဃိလီၤ. ဘၣ်ဆၣ်တၢ်အံၤမ့ၢ်တၢ်လၢအဘျုးတအိၣ်ဘၣ်လီၤ. မၤအသးဒ်တၢ်လူၤဖီၣ်ကလံၤအသိးန့ၣ်လီၤ. 5အဝဲသ့ၣ်စံးဝဲဒၣ်, ပှၤတဂၤလၢအတဝံထီၣ်အစုဒီးအိၣ်လီၤဒိ သံအသးန့ၣ်, မ့ၢ်ပှၤအမၢးဖိတဂၤလီၤ. 6ဘၣ်သ့ၣ်သ့ၣ်ကမ့ၢ်ဒ်န့ၣ်လီၤ. ဘၣ်ဆၣ်တၢ်အိၣ်ဒီးတၢ်တဆံးတက့ၢ်ဃုာ်ဒီးသးအတၢ်ဃူတၢ်ဖိးန့ၣ်, ဂ့ၤဒိၣ်န့ၢ်ဒံးတၢ်ဖံးအါမၤအါတထံၣ်ဃီလၢစုခံခီလၢာ်ဒီး တၢ်ကျဲးစၢးဖီၣ်ကလံၤတက့ၢ်န့ၣ်လီၤ.

7ယထံၣ်န့ၢ်တၢ်အဂၤတမံၤလၢတၢ်အိၣ်မူအပူၤလၢအမ့ၢ်တၢ်လၢ အဘျုးတအိၣ်ဘၣ်န့ၣ်လီၤ. 8တၢ်အံၤမ့ၢ်ပှၤအိၣ်ဝဲတဂၤလၢအအိၣ်ဒၣ်ထဲတဂၤဧိၤန့ၣ်လီၤ. အဖိခွါတအိၣ်, အဒီပုၢ်ဝဲၢ်တအိၣ်နီတဂၤသနာ်က့အဝဲမၤတၢ်တထံၣ် ဃီဒီးတသးမံဒံးဝဲလၢတၢ်ထူးတၢ်တီၤလၢအအိၣ်ဒီးအီၤန့ၣ် ဘၣ်. မ့ၢ်အဝဲမၤတၢ်ဆူၣ်ထဲအံၤညါဒီးညိကွံာ်အတၢ်မုာ်လၤသးဖှံလၢ မတၤတဂၤအဂီၢ်န့ၣ်လဲၣ်. အအံၤစ့ၢ်ကီးမ့ၢ်တၢ်လၢအဘျုးတအိၣ်ဘၣ်ဒီးမ့ၢ်တၢ်ဘၣ်ကိၢ်ဘၣ် ဂီၤအတၢ်အိၣ်မူန့ၣ်လီၤ.

9ပှၤခံဂၤန့ၣ်ဂ့ၤဒိၣ်န့ၢ်ဒံးပှၤတဂၤတက့ၢ်လီၤ. အဂ့ၢ်ဒ်အံၤ, မၤသကိးတၢ်တုၤလီၤတီၤလီၤသ့ဒိၣ်တက့ၢ်လီၤ. 10တဂၤမ့ၢ်လီၤဃံၤဒီး, အဂၤတဂၤဝံၣ်ဆၢထၢၣ်က့ၤအီၤသ့လီၤ. ဘၣ်ဆၣ်ပှၤမ့ၢ်အိၣ်ဒၣ်ထဲတဂၤဒီးမ့ၢ်လီၤဃံၤန့ၣ်, ပှၤကမၤစၢၤအီၤတအိၣ်ဘၣ်နီတဂၤအဃိဒီးမ့ၢ်တၢ်နးဖးဒိၣ်န့ၣ် လီၤ. 11တၢ်မ့ၢ်ခုၣ်န့ၣ်, ပှၤခံဂၤမံသကိးဒီးလၢၤဝဲသ့လီၤ. ဘၣ်ဆၣ်ဒီးနအိၣ်ထဲတဂၤဧိၤန့ၣ်, နမၤလၢၤနသးကသ့ဒ်လဲၣ်. 12တၢ်ဟဲထီဒါတမံၤလၢအမၤနၢၤပှၤအိၣ်ထဲတဂၤဧိၤန့ၣ်ပှၤခံဂၤ တြီဆၢဝဲသ့န့ၣ်လီၤ. ပျံၤပိၤအသးလၢပျံၤဖိသၢဘိန့ၣ်, တၢ်မၤတဲာ်အီၤကီလီၤ.

13ပှၤတဂၤဂဲၤထၢၣ်လၢတၢ်ဖှီၣ်တၢ်ယာ်အပူၤဒီးကဲထီၣ်စီၤပၤလၢ အထံကီၢ်ဒၣ်ဝဲမ့ၢ်ဂ့ၤ, ဟးထီၣ်လၢဃိာ်ပူၤဒီးထီၣ်ဆူ တၢ်စိတၢ်ကမီၤအလီၢ်ပစိာ်မ့ၢ်ဂ့ၤသ့ဝဲလီၤ. 14ဘၣ်ဆၣ်ဒီး, လၢအဝဲအသးပှၢ်ထီၣ်အဆၢကတီၢ်န့ၣ်, အဝဲမ့ၢ်မၢးတုၤဒၣ်လဲာ်တတူၢ်လိာ်တၢ်ဟ့ၣ်ကူၣ်ဟ့ၣ်ဖးဘၣ်ဒီး, အဝဲတဂ့ၤထဲသိးဒီးပှၤသးစၢ်တဂၤလၢအဖှီၣ်ဝဲဘၣ်ဆၣ်အိၣ်ဒီး တၢ်ကူၣ်တၢ်ဆးန့ၣ်ဘၣ်. 15ယဆိကမိၣ်ထီၣ်ကယဲၢ်ပှၤဂီၢ်မုၢ်လၢအအိၣ်မူလၢဟီၣ်ခိၣ်ချၢအံၤအ ဂ့ၢ်, ဒီးယထံၣ်သ့ၣ်ညါလၢ, ဖဲအဝဲသ့ၣ်အကျါတတီၤတီၤန့ၣ်, ပှၤသးစၢ်အိၣ်ဝဲတဂၤလၢကဟံးန့ၢ်စီၤပၤအလီၢ်န့ၣ်လီၤ. 16တၢ်မၤနီၣ်ဃးပှၤဂီၢ်မုၢ်အနီၣ်ဂံၢ်လၢစီၤပၤတဂၤကပၢအီၤအဂီၢ် န့ၣ်တသ့ဝဲဘၣ်. ဖဲအဝဲလဲၤပူၤကွံာ်ဝဲန့ၣ်, ပှၤတစံးဘျုးအီၤလၢတၢ်လၢအမၤတ့ၢ်ဝဲတဖၣ်အဃိနီတဂၤဘၣ်. တၢ်အံၤမ့ၢ်တၢ်လၢအဘျုးတအိၣ်ဘၣ်လီၤ. မၤသးဒ်တၢ်လူၤဖီၣ်ကလံၤအသိးန့ၣ်လီၤ.

Currently Selected:

လံာ်ပှၤစံၣ်တဲၤတဲလီၤတၢ် 4: KSWC

Highlight

Copy