မၤတၢ် 22
22
1ဒီပုၢ်ဒီဝဲၢ်, ဒီးပၢ်သ့ၣ်ဧၢ, ဒိကနၣ်ယတၢ်ကတိၤဒီဒၣ်ယသးလၢသုမဲာ်ညါအံၤတက့ၢ်. 2ဖဲအဝဲသ့ၣ်နၢ်ဟူအဝဲဒၣ်ကတိၤတၢ်ဒီးအီၤလၢဧ့ၤဘြံၤ အကျိာ်န့ၣ်, အဝဲသ့ၣ်အိၣ်ဘှီၣ်ဒိၣ်န့ၢ်အလီၢ်တက့ၢ်, ဒီးစီၤပီလူးကတိၤကဒီးတၢ်ဒီးစံးဝဲ,
3“ယမ့ၢ်ပှၤယူဒၤဖိတဂၤ, ယအိၣ်ဖျဲၣ်ထီၣ်ဖဲဝ့ၢ်တၢ်စူးဘၣ်ဃး ဒီးကီၢ်ကံၤလံၤကံ, ဘၣ်ဆၣ်တၢ်လုၢ်ဒုးဒိၣ်ထီၣ်ယၤဖဲအံၤလၢဝ့ၢ် ယရူၤရှလ့ၣ်ဒီးမၤလိဘၣ်တၢ်လၢစီၤကမၤလ့လးအစုပူၤလီၤ. ယဘၣ်တၢ်သိၣ်လိတ့ၢ်ယၤဃံးဃံးလၢတၢ်သိၣ်တၢ်သီလၢအဘၣ် တၢ်ပိာ်ထွဲတ့ၢ်အီၤလၢမိၢ်ပၢ်ဖံဖုလၢပျၢၤတဖၣ်, ဒီးယသူၣ်ဆူၣ်သးဂဲၤလၢကစၢ်ယွၤအတၢ်ဖံးတၢ်မၤအပူၤလၢ ယသးဒီဖျၢၣ်ညါဒ်သုဝဲကိးဂၤလၢမုၢ်မဆါတနံၤအံၤဖဲတၢ် လီၢ်တပူၤအံၤန့ၣ်လီၤ. 4ပှၤလၢအပိာ်ယ့ၣ်ၡူးခရံာ်အကျဲတဖၣ်န့ၣ်, ယမၤအၢမၤနးအီၤတုၤတၢ်မၤသံဒၣ်လဲာ်န့ၣ်လီၤ. ယဖီၣ်ဒီးဒၢနုာ်ပိာ်မုၣ်ပိာ်ခွါတဖၣ်ဆူဃိာ်ပူၤလီၤ. 5ပှၤလုၢ်တၢ်အခိၣ်အဒိၣ်ကတၢၢ်ဒီးကီၣ်ကးဒီဖုညါန့ၣ်အုၣ် အသးသ့ဝဲလၢယကတိၤတၢ်မ့ၢ်တၢ်တီန့ၣ်လီၤ. ယဒိးန့ၢ်ဘၣ်အဝဲသ့ၣ်အတၢ်ပရၢလၢအကွဲးဝဲဆူပှၤ ယူဒၤဖိဒ်သိးဒီးအီၤလၢအအိၣ်ဖဲဝ့ၢ်ဒၤမ့ၤစ့းတဖၣ် အအိၣ်, သတးဒီးယလဲၤဖဲန့ၣ်ဒ်သိးယကဖီၣ်ပှၤပိာ် ယ့ၣ်ၡူးခရံာ်အကျဲတဖၣ်န့ၣ်, စၢဃာ်အီၤလၢပျံၤထးဒီးဟဲက့ၤကိးအီၤဆူဝ့ၢ်ယရူၤၡလ့ၣ် လၢတၢ်စံၣ်ညီၣ်အဂီၢ်န့ၣ်လီၤ.
စီၤပီလူးတဲဖျါဘၣ်ဃးအတၢ်သးလဲလိာ်အဂ့ၢ်
(မၤတၢ်. ၉:၁-၁၉; ၂၆:၁၂-၁၈)
6ဖဲယလဲၤတၢ်ဘူးထီၣ်ဒီးဝ့ၢ်ဒၤမ့ၤစ့းကဘၣ်ဖဲမုၢ်ထူၣ် အဆၢကတီၢ်န့ၣ်, တၢ်ကပီၤကပြုၢ်ကပြီၤလၢမူခိၣ်ဟဲကပီၤထီၣ်သတူၢ် ကလာ်ဝးတရံးယၤလီၤ. 7ယလီၤတဲာ်လၢဆၣ်ဖိကီၢ်ဖိလၢယဒိးအီၤတဒုအလိၤဆူဟီၣ် ခိၣ်လိၤဒီးနၢ်ဟူတၢ်ကလုၢ်သီၣ်ထီၣ်ဒီးစံးဘၣ်ယၤ, “စီၤစီလူးဧၢ, စီၤစီလူးဧၢ, ဘၣ်မနုၤအဃိနမၤအၢမၤနးယၤ လဲၣ်.” 8“နမ့ၢ်မတၤလဲၣ်ကစၢ်ဧၢ,” ယသံကွၢ်ယဲ, “ယမ့ၢ်ပှၤနစၤရ့းဖိယ့ၣ်ၡူးလၢနမၤအၢမၤနးအီၤတဂၤန့ၣ် လီၤ.” အဝဲဒၣ်စံးဆၢယၤ. 9ပှၤအိၣ်ဒီးယၤတဖၣ်ထံၣ်ဘၣ်တၢ်ကပီၤဘၣ်ဆၣ်ဒီးတနၢ်ဟူပှၤ လၢအကတိၤတၢ်ဒီးယၤတဂၤအကလုၢ်ဘၣ်. 10ယသံကွၢ်ယဲ, ‘ကစၢ်ဧၢ, ယကဘၣ်မၤဒ်လဲၣ်.’ ဒီးကစၢ်န့ၣ်စံးဘၣ်ယၤ, ‘ဂဲၤဆၢထၢၣ်ဒီးလဲၤနုာ်ဆူဝ့ၢ်ဒၤမ့ၤစ့း အပူၤတက့ၢ်. ဒီးဖဲန့ၣ်နကဘၣ်တၢ်စံးဘၣ်တဲဘၣ်နၤတၢ်ခဲလၢာ်လၢကစၢ်ယွၤ တိာ်ပာ်ဝဲလၢနဂီၢ်လၢနကဘၣ်မၤအီၤန့ၣ်လီၤ.’ 11လၢတၢ်ကပီၤကပြုၢ်ကပြီၤတမံၤန့ၣ်အဃိ, ယမဲာ်ဘျီၣ်ယဲဒီးယတံၤသကိးတဖၣ်ဘၣ်ဟံးဃာ်ယစုဒီးဆှၢနုာ်ယၤ ဆူဝ့ၢ်ဒၤမ့ၤစ့းအပူၤန့ၣ်လီၤ.
12ပှၤအိၣ်ဝဲတဂၤလၢအမံၤမ့ၢ် စီၤအနၤနံ, ပှၤတဂၤလၢအအဲၣ် ထူအဲၣ်ယွၤ, ဒ်တၢ်သိၣ်တၢ်သီအိၣ်ဝဲအသိး, ဒီးဘၣ်တၢ်ပာ်ကဲအီၤအဒိၣ်အအါလၢပှၤယူဒၤ ဖိအိၣ်ဖဲဝ့ၢ်ဒၤမ့ၤစ့းတဖၣ်န့ၣ်လီၤ. 13အဝဲဒၣ်ဟဲဆူယအိၣ်, ဆၢထၢၣ်လၢယကပၤဒီးစံးဘၣ်ယၤ, ‘ဒီပုၢ်ဝဲၢ်စီၤစီလူးဧၢ, ထံၣ်ထီၣ်က့ၤတၢ်တက့ၢ်.’ တဘျီဃီဖဲန့ၣ်ယထံၣ်ထီၣ်က့ၤတၢ်ဒီးထံၣ်ဘၣ်အီၤလီၤ. 14စီၤအနၤနံစံးဘၣ်ယၤ, ‘ကစၢ်ယွၤလၢပပၢ်လၢပျၢၤတဖၣ်ဘူၣ်ထီၣ်ဘါထီၣ်အီၤ တဂၤန့ၣ်, ဃုထၢတ့ၢ်နၤဒ်သိးနကသ့ၣ်ညါအတၢ်ဘၣ် အသး, နကထံၣ်ဘၣ်အခ့တီပှၤလိၤတဂၤ, ဒီးနၢ်ဟူဘၣ်အကတိၤတၢ်လၢအကလုၢ်ဒၣ်ဝဲန့ၣ်လီၤ. 15အဂ့ၢ်ဒ်အံၤ, နကမ့ၢ်ပှၤအုၣ်အသးလၢတဂၤအဂီၢ်လၢအကတဲ ဘၣ်ပှၤကိးဂၤဒဲးတၢ်လၢနထံၣ်ဒီးနၢ်ဟူဘၣ်တ့ၢ်ဝဲန့ၣ်လီၤ. 16ဒီးခဲကနံၣ်အံၤဘၣ်မနုၤဃိနမၤယံာ်မၤနီၢ်နသးလဲၣ်. ဂဲၤဆၢထၢၣ်ဒီးဒိးဘျၢနသးလၢထံဒီးပျဲနတၢ်ဒဲးဘးဘၣ် တၢ်သ့စီကွံာ်အီၤခီဖျိနကိးထီၣ်အမံၤန့ၣ်တက့ၢ်.’
ကစၢ်ကိးစီၤပီလူးလၢအကလဲၤစံၣ်တဲၤတဲလီၤတၢ်လၢ ပှၤကလုာ်ဂၤအကျါ
17ယက့ၤကဒါက့ၤဆူယရူၤၡလ့ၣ်, ဒီးဖဲယဃ့ဘါထုကဖၣ်တၢ်လၢတၢ်လုၢ်ဟံၣ်ပူၤအဖၢမုၢ်န့ၣ်, ယဒိးန့ၢ်ဘၣ်တၢ်ထံၣ်လၢညါခီတမံၤလီၤ. 18လၢတၢ်ထံၣ်လၢညါခီဝဲအံၤအပူၤန့ၣ်ယထံၣ်ဘၣ်ကစၢ်ဒီး အဝဲဒၣ်စံးဘၣ်ယၤ, ‘မၤချ့ချ့ဒီးဟးထီၣ်ကွံာ်တဘျီဃီလၢယရူၤၡလ့ၣ်အပူၤ တက့ၢ်. အဂ့ၢ်ဒ်အံၤ, ပှၤဂီၢ်မုၢ်ဖဲအံၤတဖၣ်တတူၢ်လိာ်နတၢ်အုၣ်နသးလၢယဂ့ၢ်ဘၣ်.’ 19ယစံးဆၢယဲ, ‘ကစၢ်ဧၢ, အဝဲသ့ၣ်အနီၢ်ကစၢ်ဒၣ်ဝဲသ့ၣ်ညါဂ့ၤဂ့ၤလၢယလဲၤဆူဘူၣ်ဘျီၣ် တဖၣ်ဒီးမၢပှၤဖီၣ်ဒီးတီၢ်ပှၤလၢအစူၢ်က့ၤနာ်က့ၤနၤတဖၣ်လီၤ. 20ဒီးဖဲပှၤအုၣ်အသးလၢနဂ့ၢ် စီၤစတ့းဖၣ်ဘၣ်တၢ်မၤသံ အီၤန့ၣ်, ယနီၢ်ကစၢ်ဒၣ်ယဲယအိၣ်ဖဲန့ၣ်, ယအၢၣ်လီၤထွဲပှၤ အတၢ်မၤသံအီၤ, ဒီးကွၢ်ထွဲပှၤမၤသံအီၤတဖၣ်အဆ့ကၤ ဖီခိၣ်န့ၣ်လီၤ.’ 21ကစၢ်စံးဘၣ်ယၤ, ‘လဲၤတက့ၢ်. အဂ့ၢ်ဒ်အံၤ, ယကဆှၢလီၤနၤဆူတၢ်လီၢ်အယံၤဆူပှၤကလုာ်ဂၤတဖၣ် အအိၣ်န့ၣ်လီၤ.’ ”
22တုၤဖဲအံၤန့ၣ်, ပှၤဂီၢ်မုၢ်ဒိကနၣ်တၢ်လၢစီၤပီလူးစံးဝဲလီၤ. ဘၣ်ဆၣ်ဒီးအဝဲအံၤဝံၤအလီၢ်ခံ, အဝဲသ့ၣ်ကိးပသူထီၣ်လၢ အကလုၢ်ဖးဒိၣ်ဒီးစံးဝဲ, “မၤသံကွံာ်အီၤတက့ၢ်. မၤသံအီၤတက့ၢ်. အဝဲတကြၢးအိၣ်မူလၢၤဘၣ်.” 23အဝဲသ့ၣ်ကိးပသူကိးပသီ, ဝံၢ်ဝၢ်အကူအသိး ဒီးဖှံထီၣ်ဟီၣ်ခိၣ်ကမူၣ်ဆူမူခိၣ်လီၤ. 24ရိမ့ၤသုးဖိတကထိအခိၣ်ဟ့ၣ်လီၤအကလုၢ်ဆူအပှၤတဖၣ် အအိၣ်ဒ်သိးအကဆှၢစီၤပီလူးဆူသုးဖိအိၣ်တၢ်အလီၢ်တိာ်ပူၤ, ဒီးမၢအဝဲသ့ၣ်ဖျ့အီၤလၢအကဃုသ့ၣ်ညါပှၤယူဒၤဖိတဖၣ်ကိး ပသူထီဒါအီၤလၢမနုၤအဂ့ၢ်လဲၣ်န့ၣ်လီၤ. 25ဘၣ်ဆၣ်ဖဲအဝဲသ့ၣ်စၢဃာ်အီၤ ဒ်သိးအကဖျ့အီၤန့ၣ်, စီၤပီလူးစံးဘၣ်သုးဖိတကယၤအခိၣ်လၢအဆၢထၢၣ်ဖဲန့ၣ်တဂၤ, “သုကဖျ့ရိမ့ၤအပှၤထံဖိကီၢ်ဖိတဂၤလၢအတဘၣ်တၢ်သမံ သမိးဒံးဒၣ်လဲာ်အီၤလၢအတၢ်ကမၣ်အိၣ်တအိၣ်အဂ့ၢ်န့ၣ်, ဘၣ်လိာ်ဒီးထံကီၢ်အတၢ်သိၣ်တၢ်သီအကျဲကစီဒီဧါ.”
26ဖဲသုးဖိတကယၤအခိၣ်နၢ်ဟူတၢ်အံၤန့ၣ်, အဝဲဒၣ်လဲၤဆူသုးဖိတကထိအခိၣ်အအိၣ်ဒီးသံကွၢ်အီၤ, “နမၤတၢ်မနုၤလဲၣ်န့ၣ် မ့ၢ်နသ့ၣ်ညါကစီဒီဧါ. ပှၤတဂၤန့ၣ်, မ့ၢ်ရိမ့ၤအထံဖိကီၢ်ဖိတဂၤလီၤ.”
27လၢတၢ်န့ၣ်အဃိသုးဖိတကထိအခိၣ်လဲၤဆူစီၤပီလူး အအိၣ်ဒီးသံကွၢ်အီၤ, “တဲဘၣ်ယၤတက့ၢ်. နမ့ၢ်ရိမ့ၤအပှၤထံဖိကီၢ်ဖိတဂၤဧါ.”
ဒီးစီၤပီလူးစံးဆၢအီၤ, “မ့ၢ်လီၤ.”
28သုးဖိတကထိအခိၣ်စံးဘၣ်အီၤ, “ယဲယကဲထီၣ်ရိမ့ၤအပှၤထံဖိကီၢ်ဖိတဂၤခီဖျိယဟ့ၣ်ထံ ကီၢ်ပဒိၣ်စ့အါအါဂီၢ်ဂီၢ်အဃိန့ၣ်လီၤ.”
စီၤပီလူးစံးဝဲ, “မ့မ့ၢ်ယဲယမ့ၢ်ရိမ့ၤအပှၤထံဖိကီၢ် ဖိခီဖျိယမိၢ်ယပၢ်တဖၣ်မ့ၢ်ရိမ့ၤအပှၤထံဖိကီၢ်ဖိ အဃိလီၤ.”
29တဘျီဃီဖဲန့ၣ်, ပှၤလၢအကသမံသမိးစီၤပီလူးတဖၣ်သုးကွံာ်အသးလၢ အအိၣ်လီၤ. ဒီးသုးဖိတကထိအခိၣ်ပျံၤတၢ်ဖဲအသ့ၣ်ညါ လၢစီၤပီလူးမ့ၢ်ရိမ့ၤအပှၤထံဖိကီၢ်ဖိတဂၤ, ဒီးအဝဲစၢဃာ်ဘၣ်အီၤလၢပျံၤထးတဖၣ်အဃိန့ၣ်လီၤ.
စီၤပီလူးလၢကီၣ်ကးအမဲာ်ညါ
30ပှၤသုးဖိတကထိအခိၣ်တဂၤအံၤအဲၣ်ဒိးသ့ၣ်ညါလီၤတံၢ်တၢ် ကမၣ်လၢပှၤယူဒၤဖိတဖၣ်ပာ်လၢစီၤပီလူးအလိၤသတးဒီး, မုၢ်ဆ့ၣ်ထီၣ်တနံၤန့ၣ်အဝဲဒၣ်မၢပှၤဃ့ၣ်လီၤကွံာ်ပျံၤထး တဖၣ်လၢစီၤပီလူးအလိၤဒီးဟ့ၣ်လီၤအကလုၢ်လၢပှၤလုၢ်တၢ် အခိၣ်အဒိၣ်တဖၣ်ဒီးကီၣ်ကးဒီဖုကအိၣ်ဖှိၣ်လီၤ. အန့ၣ်ဝံၤဒီးအဝဲဒၣ်ကိးစီၤပီလူးဒီးဒုးဆၢထၢၣ်အီၤလၢ အဝဲသ့ၣ်အမဲာ်ညါလီၤ.
Currently Selected:
မၤတၢ် 22: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
