မၤတၢ် 23
23
1စီၤပီလူးကွၢ်ဃီၤတၢ်လိၤလိၤဆူကီၣ်ကးကရၢဖိတဖၣ်အအိၣ်ဒီးစံးဝဲ, “ယဒီပုၢ်ဝဲၢ်သ့ၣ်ဧၢ, ယသးလၢအသ့ၣ်ညါဒၣ်တၢ်လၢအဂ့ၤဆှံဝဲဒၣ်လီၤတံၢ်လီၤဆဲး ဘၣ်ဃးဒီးယတၢ်အိၣ်မူဒီကတီၢ်ညါလၢကစၢ်ယွၤအမဲာ်ညါ, တုၤလီၤလၢမုၢ်မဆါတနံၤအံၤလီၤ.” 2ပှၤလုၢ်တၢ်အခိၣ်အဒိၣ်ကတၢၢ်စီၤအနၤနံဟ့ၣ်လီၤအကလုၢ် လၢပှၤအိၣ်ဆၢထၢၣ်ဘူးဒီးစီၤပီလူးတဖၣ်ကတီၢ်အကိာ် ပူၤလီၤ. 3စီၤပီလူးစံးဘၣ်အီၤ, “ကစၢ်ယွၤကတီၢ်သုသပှၢ်ကတၢၢ်လီၤ. တၢ်ဒူၣ်လၢအဖှူဝါအသးဧၢ, သုဆ့ၣ်နီၤဖဲန့ၣ်ဒ်သိးသုကစံၣ်ညီၣ်ယကွီၢ်ဒ်တၢ်သိၣ်တၢ်သီနဲၣ်ကျဲ အသိးလီၤ. ဘၣ်ဆၣ်ဒီးသုလုၣ်သ့ၣ်ခါပတာ်တၢ်သိၣ်တၢ်သီခီဖျိ သုဟ့ၣ်လီၤသုကလုၢ်လၢအဝဲသ့ၣ်ကတီၢ်ယၤအဂီၢ်လီၤ.”
4ပှၤလၢအအိၣ်ဘူးဒီးစီၤပီလူးတဖၣ်စံးဘၣ်အီၤ, “နကတိၤတရီတပါကစၢ်ယွၤအပှၤလုၢ်တၢ်အခိၣ်အဒိၣ် ကတၢၢ်န့ၣ်လီၤ.”
5စီၤပီလူးစံးဆၢဝဲ, “ယတသ့ၣ်ညါလၢအဝဲဒၣ်မ့ၢ်ပှၤလုၢ်တၢ်အခိၣ်အဒိၣ် ကတၢၢ်ဘၣ်. ယဒီပုၢ်ဝဲၢ်သ့ၣ်ဧၢ, တၢ်ကွဲးအသးစံးဝဲ, ‘သုတစံးအၢစံးသီပှၤလၢအပၢသုပှၤဂီၢ်မုၢ်န့ၣ်တဂ့ၤ.’ ”
6ဖဲစီၤပီလူးထံၣ်လၢပှၤအိၣ်ဖဲန့ၣ်တနီၤမ့ၢ်ပှၤစးဒူၤကဲဒီး အဂၤတနီၤမ့ၢ်ပှၤဖၤရံၤၡဲန့ၣ်, အဝဲဒၣ်ကိးထီၣ်လၢကီၣ်ကး တၢ်အိၣ်ဖှိၣ်အပူၤ, “ယဒီပုၢ်ဝဲၢ်သ့ၣ်ဧၢ, ယမ့ၢ်ပှၤဖၤရံၤၡဲတဂၤ, ပှၤဖၤရံၤၡဲတဖၣ်အဖိခွါလီၤ. ယဘၣ်တၢ်သမံသမိးယၤဖဲအံၤမ့ၢ်လၢယမုၢ်လၢ်ပှၤသံကဘၣ် တၢ်ဒုးဂဲၤဆၢထၢၣ်သမူထီၣ်က့ၤအီၤအဃိလီၤ.”
7တုၤအဝဲဒၣ်ကတိၤထီၣ်တၢ်ဒ်အံၤဒီး, တၢ်ဂ့ၢ်လိာ်ဘှီလိာ်အိၣ်ထီၣ်လၢပှၤဖၤရံၤၡဲဒီးပှၤစးဒူၤ ကဲတဖၣ်အဘၢၣ်စၢၤဒီးအဝဲသ့ၣ်လီၤဖးခံဖုလီၤ. 8(အဂ့ၢ်ဒ်အံၤ, ပှၤစးဒူၤကဲတဖၣ်စံးလၢပှၤကညီတဂဲၤဆၢ ထၢၣ်က့ၤလၢတၢ်သံဘၣ်. ဒီးမူခိၣ်ကလူးမ့ၢ်ဂ့ၤ, သးမ့ၢ်ဂ့ၤ တအိၣ်နီတမံၤဘၣ်. မ့မ့ၢ်ပှၤဖၤရံၤၡဲတခီနာ်လၢတၢ်သၢ ခါလိာ်အံၤခဲလၢာ်လီၤ.) 9တၢ်ကိးပသူကိးပသီသီၣ်ဒိၣ်ထီၣ်ဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတနီၤလၢအဘၣ်ထွဲဒီးပှၤဖၤရံၤၡဲအကရူၢ် တဖၣ်ဂဲၤဆၢထၢၣ်, ဒီးကတိၤထီဒါတၢ်ဆူၣ်ဆူၣ်ကလဲာ်ဒီးစံးဝဲ, “ပတထံၣ်ပှၤတဂၤအံၤမၤကမၣ်တၢ်နီတမံၤဘၣ်. ဘၣ်တဘၣ်သး, မ့တမ့ၢ်မူခိၣ်ကလူး, ကတိၤတၢ်ဒီးအီၤနီၢ်နီၢ်လီၤ.”
10တၢ်ကတိၤဂ့ၢ်လိာ်ဘှီလိာ်ယံာ်ထီၣ်ဆူၣ်ထီၣ်တုၤဒၣ်လဲာ်ပှၤ သုးဖိတကထိအခိၣ်ဘၣ်ယိၣ်လၢစီၤပီလူးကဘၣ်တၢ်မၤလီၤကလဲကွံာ်အီၤ လၢပှၤသ့ၣ်တဖၣ်န့ၣ်အဃိ, ဟ့ၣ်လီၤအကလုၢ်ဆူပှၤသုးဖိတဖၣ်အအိၣ်ဒ်သိးအကလဲၤ လီၤဆူပှၤဂီၢ်မုၢ်သ့ၣ်တဖၣ်န့ၣ်အကျါ, ဂုာ်ထုးထီၣ်က့ၤဒီးဆှၢစီၤပီလူးဆူသုးဖိအိၣ်တၢ်အလီၢ်တိာ် ပူၤန့ၣ်လီၤ.
11နၤအဝဲန့ၣ်, ကစၢ်ဆၢထၢၣ်လၢစီၤပီလူးအကပၤဒီးစံးဝဲ, “ပာ်နသးဒူဒူတက့ၢ်. နဟ့ၣ်တ့ၢ်လံတၢ်အုၣ်အသးလၢယဂ့ၢ်ဖဲဝ့ၢ်ယရူၤၡလ့ၣ်အံၤ အပူၤလံ. ဒီးနကဘၣ်မၤတၢ်တမံၤဃီအံၤဖဲဝ့ၢ်ရိမ့ၤစ့ၢ်ကီးလီၤ.”
တၢ်ကူၣ်ထီဒါစီၤပီလူးအသးသမူ
12မုၢ်ဆ့ၣ်ထီၣ်တနံၤန့ၣ်, ပှၤယူဒၤဖိတနီၤပာ်ဖှိၣ်ထီၣ်သကိးအသးဒီးကူၣ်ထီၣ်ဖးလီၤ တၢ်တမံၤလီၤ. အဝဲသ့ၣ်ဆိၣ်လီၤအသးလၢမ့ၢ်တမၤသံဘၣ်စီၤပီလူးဘၣ်ဒီး တအီၣ်တၢ်အီတၢ်နီတမံၤဘၣ်လီၤ. 13ပှၤလၢအကူၣ်ထီၣ်ဖးလီၤသကိးတၢ်တဖုအံၤ, အနီၣ်ဂံၢ်အိၣ်ဝဲအါန့ၢ်အဂၤလွံၢ်ဆံလီၤ. 14တုၤနုၤတစုအဝဲသ့ၣ်လဲၤဆူပှၤလုၢ်တၢ်အခိၣ်အဒိၣ် တဖၣ်ဒီးပှၤယူဒၤဖိကရၢအခိၣ်အနၢ်တဖၣ်အအိၣ်ဒီးစံးဝဲ, “ပဆိၣ်လီၤလံပသးသပှၢ်ပှၢ်လၢပမ့ၢ်တမၤသံဘၣ်စီၤပီလူး ဘၣ်ဒီးပတအီၣ်တၢ်နီတမံၤဘၣ်လီၤ. 15လၢတၢ်န့ၣ်အဃိခဲကနံၣ်အံၤ, သုဝဲဒီးကီၣ်ကးမၤလိာ်ရိမ့ၤသုးဖိတကထိအခိၣ်လၢအကဟဲ ဆှၢစီၤပီလူးဆူသုအိၣ်, ပာ်မၤသုသးလၢသုအဲၣ်ဒိးသ့ၣ်ညါလီၤတံၢ်ဂ့ၤထီၣ်အဝဲ အဂ့ၢ်အကျိၤန့ၣ်တက့ၢ်. မ့မ့ၢ်ပဝဲ, ပကအိၣ်ကတဲာ်ကတီၤ ပသးလၢပကမၤသံအီၤတချုးအဝဲဒၣ်ဟဲတုၤဖဲအံၤန့ၣ်လီၤ.”
16ဘၣ်ဆၣ်ဒီးစီၤပီလူးအဒီပုၢ်ဝဲၢ်မုၣ်အဖိခွါနၢ်ဟူတၢ်ကူၣ်ထီ ဒါစီၤပီလူးတမံၤအံၤအဂ့ၢ်လီၤ. လၢတၢ်န့ၣ်အဃိအဝဲလဲၤနုာ်ဆူသုးဖိအိၣ်တၢ်အလီၢ် တိာ်ပူၤဒီးတဲဘၣ်စီၤပီလူးလၢတၢ်ဂ့ၢ်အံၤလီၤ. 17ဖဲန့ၣ်စီၤပီလူးကိးပှၤသုးဖိတကယၤအခိၣ်အကျါ တဂၤဒီးစံးဘၣ်အီၤ, “ဆှၢပိာ်ခွါသးစၢ်တဂၤအံၤဆူပှၤသုးဖိတကထိအခိၣ်အအိၣ် တက့ၢ်. အဝဲအိၣ်ဒီးတၢ်ဂ့ၢ်တမံၤလၢအကစံးဘၣ်တဲဘၣ်အီၤလီၤ.” 18ပှၤသုးဖိတကယၤအခိၣ်ဆှၢအီၤဆူပှၤသုးဖိတကထိအခိၣ် အအိၣ်ဒီးစံးဝဲ, “ပှၤဃိာ်ဖိစီၤပီလူးကိးယၤဒီးမၢယဟဲကိး ပိာ်ခွါသးစၢ်တဂၤအံၤဆူနအိၣ်, မ့ၢ်လၢအဝဲအိၣ်ဒီးတၢ်တမံၤလၢအကစံးဘၣ်တဲဘၣ်နၤ အဃိလီၤ.”
19ပှၤသုးဖိတကထိအခိၣ်ဖီၣ်ထီၣ်အဝဲဒၣ်အစု, ဒီးဆှၢအီၤဆူ တၢ်တဒၢအလီၢ်, ဒီးသံကွၢ်အီၤကစုဒု, “နအဲၣ်ဒိးတဲ ယၤတၢ်ဂ့ၢ်မနုၤတမံၤလဲၣ်.”
20အဝဲဒၣ်စံးဆၢဝဲ, “ပှၤယူဒၤဖိအခိၣ်အနၢ်တဖၣ်အၢၣ်လီၤအီလီၤသကိးလိာ်အသး လၢခဲမုၢ်ဆ့ၣ်န့ၣ်, ကပာ်မၤအသးလၢကီၣ်ကးသးအိၣ်သ့ၣ်ညါလီၤတံၢ်တၢ်ဂ့ၢ် ဘၣ်ဃးဒီးစီၤပီလူးဒီးကမၢနလဲၤဆှၢအီၤဆူကီၣ်ကးအအိၣ်လီၤ. 21ဘၣ်ဆၣ်ဒီးတဘၣ်ဒိကနၣ်အဝဲသ့ၣ်အကလုၢ်တဂ့ၤ. အဂ့ၢ်ဒ်အံၤ, ပှၤအိၣ်ဝဲဒၣ်အါန့ၢ်အဂၤလွံၢ်ဆံလၢအကအိၣ်ခိးခူသူၣ်အခိၣ်န့ၣ် လီၤ. အဝဲသ့ၣ်ဆိၣ်လီၤတ့ၢ်အသးလၢမ့ၢ်တမၤသံဘၣ်စီၤပီလူးန့ၣ် တအီၣ်တၢ်အီတၢ်နီတမံၤဘၣ်လီၤ. ခဲအံၤအဝဲသ့ၣ်အိၣ်ကတဲာ်ကတီၤအသးလၢအကမၤတၢ်တမံၤ အံၤဒီးအိၣ်ခိးဝဲဒ်သိးကနၢ်ဟူဘၣ်နကဟ့ၣ်တၢ်စံးဆၢဒ်လဲၣ် န့ၣ်လီၤ.”
22တုၤနုၤတစုပှၤသုးဖိတကထိအခိၣ်စံးဘၣ်အီၤ, “တဘၣ်တဲပှၤနီတဂၤလၢနဒုးသ့ၣ်ညါယၤလၢတၢ်ဂ့ၢ်တမံၤအံၤ န့ၣ်တဂ့ၤ.” ဝံၤဒီးအဝဲဒၣ်ပျဲက့ၤပိာ်ခွါသးစၢ်တဂၤအံၤန့ၣ်လီၤ.
တၢ်ဆှၢထီၣ်စီၤပီလူးဆူပဒိၣ်ဖးဒိၣ် စီၤဖ့လံးအအိၣ်
23အန့ၣ်ဝံၤဒီး, ပှၤသုးဖိတကထိအခိၣ်ကိးထီၣ်အသုးဖိတကယၤ အခိၣ်ခံဂၤဒီးစံးဘၣ်အီၤ, “ဒုးအိၣ်ကတဲာ်ကတီၤထီၣ်ပှၤသုးဖိခံ ကယၤ, ဃုာ်ဒီးပှၤဒိးကသ့ၣ်အဂၤနွံဆံဒီးပှၤစိာ်ဘီအဂၤခံကယၤ, ဒ်သိးအကလဲၤဆူဝ့ၢ်ကဲၤစါရံၤဒီးကတဲာ်ကတီၤသုသးလၢသုကဟး ထီၣ်ဒီးအဝဲသ့ၣ်ဖဲတနၤအံၤခွံနၣ်ရံၣ်အကတီၢ်တက့ၢ်. 24ကတဲာ်ကတီၤကသ့ၣ်စှၤဒုလၢစီၤပီလူးကဒိးဝဲအဂီၢ်ဒီး လဲၤဆှၢအီၤပူၤဖျဲးဒီးအဒုၣ်အဒါဆူပဒိၣ်ဖးဒိၣ်စီၤဖ့လံး အအိၣ်န့ၣ်တက့ၢ်.” 25အန့ၣ်ဝံၤအလီၢ်ခံ, ပှၤသုးဖိတကထိအခိၣ်ကွဲးလံာ်ပရၢတဘ့ၣ်ဒ်လၢလာ် အသိးလီၤ.
26“တၢ်ဆၢဂ့ၤဆၢဝါလၢယၤ, စီၤကျီၤဒံလူၤစံ, ဆူတၢ်ဒိၣ်ကစၢ်ပဒိၣ်ဖးဒိၣ်စီၤဖ့လံးအအိၣ်, မ်နဘၣ်အမုာ်တက့ၢ်. 27ပှၤယူဒၤဖိတဖၣ်ဖီၣ်ဃာ်ပှၤတဂၤအံၤ, ဒီးဘူးတ့ၢ်မးလၢအကမၤ သံဘၣ်အီၤလီၤ. ယသ့ၣ်ညါဘၣ်လၢအဝဲမ့ၢ်ရိမ့ၤအပှၤထံဖိ ကီၢ်ဖိတဂၤအဃိ, ယလဲၤဒီးယပှၤသုးဖိတဖၣ်, ဒီးမၤပူၤမၤဖျဲးအီၤလီၤ. 28အဝဲသ့ၣ်ပာ်တၢ်ကမၣ်မနုၤတမံၤလၢအလိၤလဲၣ်န့ၣ်, ယသးအိၣ် သ့ၣ်ညါယဲအဃိ, ယဆှၢအီၤဆူအဝဲသ့ၣ်အကီၣ်ကးအအိၣ်လီၤ. 29တၢ်လၢအကြၢးဒီးတၢ်သံမ့ၢ်ဂ့ၤ, တၢ်ကဒၢနုာ်အီၤလၢဃိာ်ပူၤမ့ၢ်ဂ့ၤ, ယတထံၣ်ဘၣ်လၢအဝဲမၤဝဲနီတမံၤဘၣ်. တၢ်ကမၣ်လၢအဘၣ်တၢ်ပာ်ထီၣ်လၢအဝဲဒၣ်အလိၤန့ၣ်ဘၣ်ထွဲဒီး အဝဲသ့ၣ်အတၢ်သိၣ်တၢ်သီဒၣ်ဝဲလီၤ. 30ဒီးဖဲယဘၣ်တၢ်ဒုးသ့ၣ်ညါယၤလၢပှၤယူဒၤဖိတနီၤကူၣ်တၢ်ထီဒါ အီၤန့ၣ်, ယပာ်လီၤယသးလၢယကဆှၢအီၤဆူနအိၣ်တဘျီဃီလီၤ. ယစံးဘၣ်တဲဘၣ်ပှၤပာ်တၢ်ကမၣ်လၢအလိၤတဖၣ်လၢအကလိာ် ကွီၢ်ထီဒါအီၤလၢနမဲာ်ညါလီၤ.”
31ပှၤသုးဖိတဖၣ်မၤဝဲဒ်တၢ်ဟ့ၣ်လီၤတၢ်အကလုၢ်ဆူအအိၣ် အသိးန့ၣ်လီၤ. အဝဲသ့ၣ်ဟံးန့ၢ်စီၤပီလူးဒီးဆှၢအီၤတနၤဃီတုၤ အတုၤဝ့ၢ်အၣ်တံၤပၤတြံန့ၣ်လီၤ. 32မုၢ်ဆ့ၣ်ထီၣ်တနံၤန့ၣ်, ပှၤသုးဖိဟးလၢအခီၣ်တဖၣ်က့ၤက့ၤဆူသုးဖိအိၣ်တၢ်အလီၢ် တိာ်ပူၤဒီးပာ်တ့ၢ်ပှၤဒိးကသ့ၣ်တဖၣ်ဒ်သိးအကလဲၤဆူညါ ဒီးအီၤလီၤ. 33အဝဲသ့ၣ်လဲၤဆှၢအီၤဆူဝ့ၢ်ကဲၤစါရံၤ, ဟ့ၣ်လီၤတၢ်ပရၢဆူပဒိၣ်ဖးဒိၣ်အစုပူၤဒီးဆှၢထီၣ်စီၤပီလူး ဆူအအိၣ်လီၤ. 34ပဒိၣ်ဖးဒိၣ်ဖးကွၢ်တၢ်ပရၢ, ဒီးသံကွၢ်စီၤပီလူးလၢအဟဲလၢကီၢ်မတၤလဲၣ်န့ၣ်လီၤ. ဖဲအဝဲသ့ၣ်ညါဘၣ်ဝဲလၢအဟဲလၢကီၢ်ကံၤလံၤကံန့ၣ်, 35အဝဲဒၣ်စံးဘၣ်အီၤ, “ယကဒိကနၣ်နတၢ်စံးတၢ်ကတိၤဖဲ ပှၤပာ်တၢ်ကမၣ်လၢနလိၤတဖၣ်ဟဲတုၤဝဲန့ၣ်လီၤ.” အန့ၣ်ဝံၤဒီး, အဝဲဟ့ၣ်လီၤအကလုၢ်လၢစီၤပီလူးကဘၣ် တၢ်အိၣ်ခိးကွၢ်ထွဲအီၤလၢသုးဖိတဖၣ်, ဖဲနီလၢစီၤပၤဟ့ၤရိာ်ဘှီထီၣ်တ့ၢ်ဝဲတဖျၢၣ်အပူၤန့ၣ်လီၤ.
Currently Selected:
မၤတၢ် 23: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
