1 ကရံၣ်သူး 16
16
တၢ်မၤဘူၣ်လၢပှၤစူၢ်က့ၤနာ်က့ၤတၢ် သကိးသကိးဒီးပှၤတဖၣ်အဂီၢ်
1ခဲကနံၣ်အံၤ, ဘၣ်ထွဲဒီးတၢ်လၢသုကွဲးတ့ၢ်သုဝဲဘၣ်ဃးတိၢ်လၢသု ကထၢဖှိၣ်အီၤလၢသုကမၤစၢၤယွၤအပှၤဂီၢ်မုၢ်ဖဲကီၢ်ယူဒၤတဖၣ် အဂီၢ်န့ၣ်, သုကဘၣ်မၤသုဝဲဒ်ယစံးဘၣ်တဲဘၣ်တ့ၢ်တၢ်အိၣ်ဖှိၣ် တဖၣ်ဖဲကီၢ်ကလၤတံလၢအကမၤဝဲန့ၣ်လီၤ. 2ကိးမုၢ်အိၣ်ဘှံးနံၤဒဲးန့ၣ်, သုဝဲတဂၤဘၣ်တဂၤ, ကဘၣ်ပာ်လီၤဆီတိၢ် တနီၤ, ဒ်အကြၢးအဘၣ်ဒီးတၢ်လၢအဒိးန့ၢ်ဘၣ်တ့ၢ်ဝဲခီဖျိ အတၢ်ဖံးတၢ်မၤအသိး, ဒီးပာ်ဖှိၣ်ပာ်စၢၤဒ်သိးဖဲယဟဲန့ၣ်, အလီၢ်သုတအိၣ်လၢယကထၢဖှိၣ်တိၢ်တဂ့ၤအဂီၢ်န့ၣ်လီၤ. 3ဖဲယဟဲဝံၤအလီၢ်ခံန့ၣ်, ယကဟ့ၣ်လီၤပှၤလၢသုဘၣ်သူၣ်ဘၣ်သးအီၤ တဖၣ်လံာ်ပရၢလၢအတဲဖျါထီၣ်အဝဲသ့ၣ်အဂ့ၢ်, ဒီးဆှၢလီၤအဝဲသ့ၣ် ဒ်သိးအကလဲၤဆှၢသုတၢ်ဟ့ၣ်ဆူဝ့ၢ်ယရူၤၡလ့ၣ်အဂီၢ်န့ၣ်လီၤ. 4မ့ၢ်အိၣ်ဖျါကြၢးဝဲဘၣ်ဝဲလၢယကဘၣ်လဲၤန့ၣ်, အဝဲသ့ၣ်လဲၤဃုာ် ဒီးယၤသ့ဝဲလီၤ.
စီၤပီလူးအတၢ်ကူၣ်ထီၣ်ဖးလီၤတဖၣ်
5ယကဟဲယဲဆူသုအိၣ်ဖဲယလဲၤခီဂာ်ကီၢ်မၤက့းဒနံဝံၤအလီၢ်ခံလီၤ. အဂ့ၢ်ဒ်အံၤ, ယကဘၣ်လဲၤခီဂာ်ယဲကီၢ်မၤက့းဒနံလီၤ. 6ဘၣ်သ့ၣ်သ့ၣ်ယကအိၣ်ယဲဒီးသုတစိၢ်တလီၢ်, ဘၣ်တဘၣ်ကမ့ၢ်ဝဲတၢ်ဂိၢ်ခါဒီကတီၢ်, ဒီးအန့ၣ်အလီၢ်ခံ, သုမၤစၢၤယၤကသ့ဝဲလၢယကလဲၤကဒီးတၢ်ဆူညါ, ဆူတၢ်လီၢ်ဖဲယကလဲၤကဒီးယဲတပူၤလၢ်လၢ်န့ၣ်လီၤ. 7ယဆၢထံၣ်ဘၣ်အါထီၣ်သုတမ့ၢ်ထဲတစိၢ်ဖိလၢကျဲန့ၣ်ဘၣ်. ယဆၢအိၣ်ဘၣ်ယဲဒီးသုဖးယံာ်ဖိ, ဒ်ကစၢ်ဟ့ၣ်အခွဲးအသိးလီၤ.
8ယကအိၣ်ယဲဖဲအံၤလၢဝ့ၢ်အ့းဖ့းစူး, တုၤလီၤလၢဘူၣ်ယဲၢ်ဆံ အမုၢ်နံၤတစုလီၤ. 9ပှၤလၢအထီဒါတၢ်အိၣ်ဝဲအါဒံအါဂၤဖဲအံၤသနာ်က့, တၢ်အခွဲးအယာ်နီၢ်နီၢ်အိၣ်ဝဲလၢတၢ်ဖံးတၢ်မၤဖးဒိၣ်, ဒီးတၢ်ဖံးတၢ်မၤလၢအဘျုးအိၣ်အဂီၢ်န့ၣ်လီၤ.
10စီၤတံၤမသ့းမ့ၢ်ဟဲဘၣ်ဆူသုအိၣ်န့ၣ်, ပာ်သူၣ်ပာ်သးဒ်သိးအဝဲဒၣ်ကကလၢၢ်ဘၣ်သုတၢ် တူၢ်လိာ်မုာ်အီၤလၢသုသိးသုကျါန့ၣ်တက့ၢ်. အဂ့ၢ်ဒ်အံၤ, အဝဲဒၣ်မၤတၢ်လၢကစၢ်အဂီၢ်ဒ်ယမၤယဲအသိးလီၤ. 11ပှၤတကြၢးကွၢ်တလီၤအီၤနီတဂၤဘၣ်. မ့မ့ၢ်သုကဘၣ်မၤစၢၤ အီၤဒ်သိးအဝဲဒၣ်ကလဲၤဘၣ်ကဒီးတၢ်လၢတၢ်မုာ်တၢ်ပၢၤအပူၤ, ဒ်သိးအဝဲဒၣ်ကဟဲက့ၤဆူယအိၣ်န့ၣ်လီၤ. အဂ့ၢ်ဒ်အံၤ, ယကွၢ်လၢ်အဝဲဒၣ်အကျဲ, လၢအကဟဲက့ၤဝဲဒီးဒီပုၢ်ဝဲၢ်တဖၣ်လီၤ.
12ခဲကနံၣ်အံၤ, ဖဲလၢအဘၣ်ဃးဒီးစီၤအပီးလိၤအဂ့ၢ်န့ၣ်, ယသဆၣ်ထီၣ်တ့ၢ်အခံဒ်သိးအကလဲၤအိၣ်သကိးသုဒီးဒီပုၢ်ဝဲၢ် အဂၤတဖၣ်, ဘၣ်ဆၣ်ဒီးအဝဲတနာ်သပှၢ်ကတၢၢ်လၢအကြၢးလဲၤဝဲခဲ ကနံၣ်အံၤဘၣ်. ဘၣ်ဆၣ်ဒီး ဖဲအဝဲဒိးန့ၢ်အခွဲးန့ၣ်, ကလဲၤဝဲဒၣ်လီၤ.
တၢ်ကတိၤလၢခံကတၢၢ်
13အိၣ်ပလီၢ်သူၣ်ပလီၢ်သး, ဆၢထၢၣ်ကျၢၤကျၢၤလၢတၢ်စူၢ်တၢ်နာ် အပူၤ, အိၣ်ဒီးတၢ်သးဒူ, အိၣ်ဒီးတၢ်ဂံၢ်တၢ်ဘါတက့ၢ်. 14မၤသုတၢ်မၤခဲလၢာ်လၢတၢ်အဲၣ်တၢ်ကွံအပူၤတက့ၢ်.
15သုသ့ၣ်ညါဘၣ်ဃးစီၤစတ့းဖနၣ်ဒီးအဒူၣ်ဖိထၢဖိအဂ့ၢ်လီၤ. အဝဲသ့ၣ်မ့ၢ်ပှၤအဆိကတၢၢ်တဖုလၢအကဲထီၣ်ပှၤခရံာ်ဖိလၢကီၢ် အဃါယၤအပူၤ, ဒီးဟ့ၣ်လီၤတ့ၢ်အသးဆူယွၤအပှၤဂီၢ်မုၢ်တဖၣ် အတၢ်ဖံးတၢ်မၤအပူၤလီၤ. ယဃ့ကညးသု, ယဒီပုၢ်ဝဲၢ်သ့ၣ်ဧၢ, 16လၢသုကပိာ်ထွဲခိၣ်နၢ်ဒ်အံၤအသိးတဖၣ်အတၢ်ပၢတၢ်ဆှၢဒီးပှၤ တဂၤလၢ်လၢ်လၢအဖံးတၢ်မၤတၢ်ဒီးမၤယွၤအတၢ်မၤတပူၤဃီဒီး အဝဲသ့ၣ်တဖၣ်န့ၣ်အတၢ်ပၢတၢ်ဆှၢလီၤ.
17ယသူၣ်ခုသးခုယဲလၢစီၤစတ့းဖနၣ်, စီၤဖူာ်တူၤနါတူးဒီးစီၤအဃကူးတဖၣ်အတၢ်ဟဲအဃိလီၤ. အဝဲသ့ၣ်တဖၣ်မၤပှဲၤက့ၤသုလီၢ်, 18ဒီးအဝဲသ့ၣ်မၤသးဖှံထီၣ်က့ၤယသး, ဒ်အမၤဖှံထီၣ်က့ၤသုသး အသိးန့ၣ်လီၤ. ပှၤဒ်အံၤအသိးတဖၣ်ကြၢးဘၣ်တၢ်ပာ်သူၣ်ပာ်သး အီၤလီၤ.
19တၢ်အိၣ်ဖှိၣ်တဖၣ်လၢကီၢ်အၤစံအပူၤဆှၢလီၤ အတၢ်ဆၢဂ့ၤဆၢဝါဆူသုအိၣ်လီၤ. စီၤအကူလၤ, နီၢ်ပြံစကံးလၤ, ဒီးတၢ်အိၣ်ဖှိၣ်လၢအထံၣ်လိာ်အိၣ်ဖှိၣ်ဖဲအဟံၣ်ပူၤန့ၣ်, ဆှၢလီၤအတၢ်ဆၢဂ့ၤဒ်ပှၤခရံာ်ဖိတဖၣ်အသိးလၢအသးဒီဖျၢၣ်ညါလီၤ. 20ဒီပုၢ်ဝဲၢ်ဖဲအံၤခဲလၢာ်ဆှၢလီၤအတၢ်ဆၢဂ့ၤဆၢဝါတဖၣ်လီၤ.
ဆၢဂ့ၤဆၢဝါလိာ်သုသးတဂၤဒီးတဂၤ, လၢဒီပုၢ်ဒီဝဲၢ်အတၢ်နၢမူတက့ၢ်.
21လၢယစုဒၣ်ယဲန့ၣ်ယကွဲးတၢ်ကတိၤတထံၣ်အံၤ, “တၢ်ဆၢဂ့ၤဆၢဝါလၢစီၤပီလူးအအိၣ်လီၤ.”
22ပှၤတဂၤလၢ်လၢ်လၢအတအဲၣ်ကစၢ်န့ၣ်, မ်အဘၣ်ဆိၣ်အၢတက့ၢ်.
မၤရၤနၤသၤ - ပကစၢ်ဧၢ, ဟဲတက့ၢ်.
23မ်ပကစၢ်ယ့ၣ်ၡူးအဘျုးအဖှိၣ်အိၣ်ဒီးသုတက့ၢ်.
24ယတၢ်အဲၣ်တၢ်ကွံ မ်အအိၣ်ဒီးသုဝဲကိးဂၤဒဲးလၢယ့ၣ်ၡူးခရံာ် အပူၤတက့ၢ်.
Currently Selected:
1 ကရံၣ်သူး 16: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
