1 ကရံၣ်သူး 15
15
ခရံာ်အတၢ်ဂဲၤဆၢထၢၣ်သမူထီၣ်က့ၤ
1ဒီးခဲကနံၣ်အံၤ, ယဒီပုၢ်ဝဲၢ်သ့ၣ်ဧၢ, ယသးအိၣ်ဒုးသ့ၣ်နီၣ်ထီၣ်သုဘၣ်ဃးတၢ်သးခုကစီၣ် လၢယစံၣ်တဲၤတဲလီၤဆူသုအိၣ်, လၢသုဒိးန့ၢ်သုဝဲဒီးလၢသုတၢ်စူၢ်တၢ်နာ်အိၣ်ဆၢထၢၣ်လၢ အလိၤဂၢၢ်ဂၢၢ်ကျၢၤကျၢၤန့ၣ်လီၤ. 2အဝဲန့ၣ်မ့ၢ်တၢ်သးခုကစီၣ်, တၢ်ကစီၣ်လၢယစံၣ်တဲၤတဲလီၤ ယဲဆူသုအိၣ်န့ၣ်လီၤ. မ့တမ့ၢ်လၢသုစူၢ်သုနာ်ကလီကလီ တၢ်ဘၣ်ဒီးသုမ့ၢ်ဟံးဃာ်တၢ်သးခုကစီၣ်အံၤကျၢၤကျၢၤန့ၣ်, သုဒိးန့ၢ်ဘၣ်တၢ်အုၣ်က့ၤခီၣ်က့ၤလၢအီၤလီၤ.
3တၢ်လၢယဒိးန့ၢ်ဘၣ်တ့ၢ်ယဲန့ၣ်, ယဟ့ၣ်လီၤကဒီးယဲဆူသုအိၣ် တဆီလၢအမ့ၢ်တၢ်အကါဒိၣ်ကတၢၢ်တမံၤ, လၢခရံာ်သံလၢ ပတၢ်ဒဲးဘးအဃိဒ်အအိၣ်ကွဲးအသးလၢတၢ်ကွဲးအသးစီဆှံ အပူၤအသိး, 4လၢအဝဲဒၣ်ဘၣ်တၢ်ခူၣ်လီၤအီၤဒီးဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဖဲသၢသီဝံၤအလီၢ်ခံ, ဒ်အအိၣ်ကွဲးအသးလၢတၢ်ကွဲးအသးစီဆှံအပူၤအသိးန့ၣ်, 5လၢအဝဲဒၣ်လီၣ်ဖျါထီၣ်အသးလၢစီၤပ့းတရူးဝံၤအလီၢ်ခံလၢပှၤ တၢ်မၢဖိတဆံခံဂၤလၢာ်န့ၣ်လီၤ. 6အန့ၣ်ဝံၤအလီၢ်ခံအဝဲဒၣ်လီၣ်ဖျါထီၣ်အသးလၢအပျဲၢ်အဘီၣ် အါန့ၢ်အဂၤယဲၢ်ကယၤ, လၢတဘျီဃီအတီၢ်ပူၤဒီးပှၤသ့ၣ်တဖၣ် အံၤစှၤဂၤန့ၣ်, သံတ့ၢ်လံဝဲသနာ်က့အဝဲသ့ၣ်အါဒၣ်တၢ်တက့ၢ် အိၣ်မူအိၣ်ဂဲၤဒံးဝဲလီၤ. 7အန့ၣ်ဝံၤအလီၢ်ခံအဝဲဒၣ်လီၣ်ဖျါထီၣ်အသးလၢစီၤယၤကိာ်, ဒီးလၢခံန့ၣ်လၢပှၤတၢ်မၢဖိခဲလၢာ်လီၤ.
8လၢခံကတၢၢ်န့ၣ်, အဝဲလီၣ်ဖျါထီၣ်စ့ၢ်ကီးအသးလၢယၤ, လၢယမ့ၢ်လီၤဂာ်သနာ်က့ဒီးပှၤတဂၤလၢအတအိၣ်ဖျဲၣ် ထီၣ်ဘၣ်ဆၢဘၣ်ကတီၢ်ဘၣ်န့ၣ်လီၤ. 9အဂ့ၢ်ဒ်အံၤ, ယမ့ၢ်ပှၤအဆံးကတၢၢ်လၢပှၤတၢ်မၢဖိခဲလၢာ်အကျါ လီၤ. ယတကြၢးဘၣ်တၢ်ကိးဒၣ်လဲာ်ယၤလၢပှၤတၢ်မၢဖိတဂၤဘၣ်. အဂ့ၢ်မ့ၢ်လၢယမၤအၢမၤနးကစၢ်ယွၤအတၢ်အိၣ်ဖှိၣ်အဃိလီၤ. 10ဘၣ်ဆၣ်ဒီးခီဖျိကစၢ်ယွၤအဘျုးန့ၣ်, ယမ့ၢ်တၢ်လၢယမ့ၢ်ဒီးတၢ်ဘျုးတၢ်ဖှိၣ်လၢအဝဲဒၣ်ဟ့ၣ်တ့ၢ်ယၤန့ၣ် တကဲတၢ်ကလီကလီဘၣ်. မ့မ့ၢ်ယဖံးမၤတ့ၢ်တၢ်ဆူၣ်န့ၢ်ပှၤတၢ်မၢဖိအဂၤတဖၣ်ခဲလၢာ်လီၤ. ဘၣ်ဆၣ်ဒီးတမ့ၢ်ယတၢ်မၤဒၣ်ယဲနီၢ်နီၢ်ဘၣ်, မ့မ့ၢ်တခီမ့ၢ်ဝဲယွၤအဘျုးအဖှိၣ်ဖံးမၤတၢ်ဒီးယၤလီၤ. 11လၢတၢ်န့ၣ်အဃိ, မ့ၢ်တၢ်ဟဲလၢယအိၣ်မ့ၢ်ဂ့ၤ, လၢအဝဲသ့ၣ် အအိၣ်မ့ၢ်ဂ့ၤ, အဝဲအံၤမ့ၢ်တၢ်လၢပဝဲကိးဂၤဒဲးပစံၣ်တဲၤတဲလီၤဒီး အဝဲအံၤမ့ၢ်တၢ်လၢသုစူၢ်သုနာ်န့ၣ်လီၤ.
ပတၢ်ဂဲၤဆၢထၢၣ်သမူထီၣ်က့ၤ
12ခဲကနံၣ်အံၤ, မ့ၢ်လၢပတၢ်ကစီၣ်မ့ၢ်ဝဲခရံာ်ဘၣ်တၢ်ဒုးဂဲၤဆၢထၢၣ်သမူ ထီၣ်က့ၤအီၤလၢတၢ်သံအဃိဒီး, သုဝဲတနီၤသုစံးလၢပှၤသံတဖၣ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤန့ၣ်သ့ဝဲလၢကျဲဒ်လဲၣ်. 13အဝဲန့ၣ် မ့မ့ၢ်မ့တီဒီး, အခီပညီခရံာ်တဘၣ်တၢ်ဒုးဂဲၤ ဆၢထၢၣ်သမူထီၣ်အီၤဘၣ်န့ၣ်လီၤ. 14ဒီးခရံာ်မ့ၢ်တဘၣ်တၢ်ဒုးဂဲၤဆၢထၢၣ်က့ၤအီၤလၢတၢ်သံဘၣ် န့ၣ်, ပတအိၣ်ဒီးတၢ်လၢပကစံၣ်တဲၤတဲလီၤအဂီၢ်နီတမံၤ, ဒီးသုတအိၣ်ဒီးတၢ်လၢသုကစူၢ်ကနာ်အဂီၢ်နီတမံၤဘၣ်လီၤ. 15အါန့ၢ်အန့ၣ်, ပဘၣ်တၢ်ပာ်ဖျါထီၣ်ပှၤလၢပကတိၤတၢ်ကတိၤ တမ့ၢ်တတီဘၣ်ဃးဒီးယွၤအဂ့ၢ်န့ၣ်လီၤ. အဂ့ၢ်ဒ်အံၤ ပစံးလၢအဝဲဒၣ်ဒုးဂဲၤဆၢထၢၣ်က့ၤခရံာ်လၢတၢ်သံန့ၣ်လီၤ. ဘၣ်ဆၣ်ဒီး, ပှၤသံတဘၣ်တၢ်ဒုးဂဲၤဆၢထၢၣ်သမူထီၣ်အီၤအဂ့ၢ်န့ၣ် မ့မ့ၢ်မ့တီဒီး, အဝဲဒၣ်တဒုးဂဲၤဆၢထၢၣ်သမူထီၣ်က့ၤခရံာ်ဘၣ်လီၤ. 16အဂ့ၢ်ဒ်အံၤ, ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ်သမူထီၣ် က့ၤအီၤဘၣ်ဒီး, ခရံာ်တဘၣ်တၢ်ဒုးဂဲၤဆၢထၢၣ်က့ၤအီၤစ့ၢ်ကီးဘၣ်. 17ဒီးခရံာ်မ့ၢ်တဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, သုတၢ်စူၢ်တၢ်နာ်မ့ၢ်ဒၣ်တၢ်နာ်ကမူၤကမၣ်, ဒီးသုလီၤမၢ်ဒံးဒၣ်တၢ်လၢသုတၢ်ဒဲးဘးတဖၣ်အပူၤန့ၣ်လီၤ. 18အခီပညီကမ့ၢ်စ့ၢ်ကီးလၢပှၤစူၢ်က့ၤနာ်က့ၤခရံာ်လၢအသံ တ့ၢ်လံတဖၣ်န့ၣ်လီၤမၢ်ကွံာ်ဝဲဒၣ်လီၤ. 19ပတၢ်မုၢ်လၢ်လၢခရံာ်အပူၤန့ၣ်, မ့ၢ်ဂ့ၤထဲလၢတၢ်အိၣ်မူတစိၤအံၤအဂီၢ်ဒီးတအါန့ၢ်အန့ၣ်ဘၣ်ဒီး, ပကြၢးဘၣ်တၢ်သးကညီၤပှၤဒိၣ်န့ၢ်ပှၤကိးဂၤဒဲးလၢဟီၣ်ခိၣ် ဒီဘ့ၣ်ညါန့ၣ်လီၤ.
20ဘၣ်ဆၣ်ဒီး, တၢ်မ့ၢ်တၢ်တီန့ၣ်မ့ၢ်ဝဲခရံာ်ဘၣ်တၢ်ဒုးဂဲၤဆၢထၢၣ် သမူထီၣ်တ့ၢ်လံအီၤဒ်အမ့ၢ်တၢ်အုၣ်ခီၣ်အသးလၢပှၤမံလၢတၢ်သံ အပူၤတဖၣ်ကဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤစ့ၢ်ကီး န့ၣ်လီၤ. 21အဂ့ၢ်ဒ်အံၤ, ဒ်တၢ်သံဟဲအိၣ်ထီၣ်ခီဖျိပှၤကညီတဂၤအသိး န့ၣ်, လၢကျဲတဘိဃီအဝဲန့ၣ်တၢ်ဂဲၤဆၢထၢၣ်က့ၤလၢတၢ်သံအိၣ်ထီၣ် ဝဲဒၣ်ခီဖျိပှၤကညီတဂၤန့ၣ်လီၤ. 22အဂ့ၢ်ဒ်အံၤ, ဒ်ပှၤကိးဂၤဒဲးသံဝဲဒၣ်ခီဖျိအဝဲသ့ၣ်အတၢ် ပာ်ဖှိၣ်ဃုာ်အသးဒီးစီၤအၤဒၣ်အသိးန့ၣ်, လၢကျဲတဘိဃီ အဝဲန့ၣ်ပှၤကိးဂၤဒဲးကဘၣ်တၢ်မၤမူထီၣ်က့ၤအီၤခီဖျိ အဝဲသ့ၣ်အတၢ်ပာ်ဖှိၣ်ဃုာ်အသးဒီးခရံာ်န့ၣ်လီၤ. 23ဘၣ်ဆၣ်ဒီးပှၤတဂၤဘၣ်တဂၤကဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤလၢအဂ့ၢ်အဝီဘၣ်ဘျီးဘၣ်ဒါန့ၣ်လီၤ. အဆိကတၢၢ်န့ၣ်, ခရံာ်, အန့ၣ်ဝံၤအလီၢ်ခံ, ဖဲအဝဲဒၣ်ဟဲ အဆၢကတီၢ်န့ၣ်, ပှၤတဖၣ်လၢအဘၣ်ထွဲဒီးအီၤန့ၣ်လီၤ. 24အန့ၣ်ဝံၤဒီး, တၢ်အကတၢၢ်ကတုၤဃီၤဝဲဒၣ်လီၤ. ခရံာ်ကမၤနၢၤကွံာ်ပှၤပၢတၢ်ပြးတၢ်လၢနီၢ်သးတကပၤခဲလၢာ်, တၢ်ခိၣ်တၢ်နၢ်, ဒီးတၢ်စိတၢ်ကမီၤခဲလၢာ်ခဲဆ့ဒီးကဟ့ၣ်လီၤ က့ၤဘီမုၢ်ဆူပၢ်ကစၢ်ယွၤအစုပူၤန့ၣ်လီၤ. 25အဂ့ၢ်ဒ်အံၤ, ခရံာ်ကဘၣ်ပၢတၢ်တုၤလီၤလၢကစၢ်ယွၤမၤနၢၤ ကွံာ်ဒုၣ်ဒါခဲလၢာ်ဒီးပာ်အဝဲသ့ၣ်လၢအဝဲဒၣ်အခီၣ်ဖီလာ်တစုန့ၣ်လီၤ. 26ဒုၣ်ဒါလၢခံကတၢၢ်တဂၤလၢအကဘၣ်တၢ်မၤနၢၤကွံာ်အီၤန့ၣ် မ့ၢ်ဝဲဒၣ်တၢ်သံလီၤ. 27အဂ့ၢ်ဒ်အံၤ, တၢ်ကွဲးအသးစံးဝဲ, “ယွၤပာ်တၢ်ခဲလၢာ်ခဲဆ့ လၢအခီၣ်ဖီလာ်လီၤ” သပှၢ်ကတၢၢ်, အိၣ်ဖျါဝဲဒၣ်ဆှံဆှံလၢတၢ်ကတိၤ, “တၢ်ခဲလၢာ်ခဲဆ့” န့ၣ်, တပၣ်ဃုာ်ဒီးကစၢ်ယွၤအနီၢ်ကစၢ်ဒၣ်ဝဲ, လၢအပာ်တၢ်ခဲလၢာ်ခဲဆ့လၢခရံာ်အဖီလာ်န့ၣ်ဘၣ်လီၤ. 28ဘၣ်ဆၣ်ဒီး, ဖဲတၢ်ခဲလၢာ်ခဲဆ့ဘၣ်တၢ်ပာ်လံအီၤလၢခရံာ် အတၢ်ပၢအဖီလာ်န့ၣ်, တုၤနုၤတစု အဝဲအနီၢ်ကစၢ်ဒၣ်ဝဲ, ဖိခွါ, န့ၣ်ကပာ်လီၤအသးလၢကစၢ်ယွၤအဖီလာ်, ကစၢ်ယွၤလၢအပာ်တ့ၢ်လံတၢ်ခဲလၢာ်လၢအဝဲဒၣ်အဖီလာ်, ဒီးကစၢ်ယွၤကပၢတၢ်လၢာ်လၢာ်ဆ့ဆ့လၢတၢ်ခဲလၢာ် အဖီခိၣ်လီၤ.
29ခဲကနံၣ်အံၤ, မ့မ့ၢ်ပှၤတဖၣ်လၢအဘၣ်တၢ်ဒိးဘျၢတ့ၢ်အီၤ လၢပှၤသံတဖၣ်အဂီၢ်တခီလဲၣ်. အဝဲသ့ၣ်မုၢ်လၢ်လၢအကဟ့ၣ်ထီၣ်တၢ်ဘျုးတၢ်ဖှိၣ်မနုၤတမံၤလဲၣ်. ဒ်ပှၤတနီၤစံးဝဲအသိး ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဘၣ်ဒီးဘၣ်မနုၤအဃိပှၤတဖၣ်န့ၣ်ဘၣ်တၢ်ဒိးဘျၢ အီၤလၢပှၤသံတဖၣ်အဂီၢ်လဲၣ်. 30ဒီးမ့မ့ၢ်ပဝဲသ့ၣ်တဖၣ်, ဘၣ်မနုၤအဃိပဘၣ်အိၣ်လၢတၢ်လီၤပျံၤ လီၤဘၣ်ယိၣ်အပူၤကိးနၣ်ရံၣ်ကိးဆၢကတီၢ်ဒဲးန့ၣ်လဲၣ်. 31ယဒီပုၢ်ဝဲၢ်သ့ၣ်ဧၢ, ယဘၣ်ကွၢ်ဆၢၣ်မဲာ်ဒီးတၢ်သံကိးနံၤဒဲးလီၤ. ယတၢ်ပာ်ကဖၢလၢယသးလၢသုပူၤ, လၢပတၢ်အိၣ်မူပာ်ဖှိၣ်ဃုာ် ပသးဒီးယ့ၣ်ၡူးခရံာ်န့ၣ်, ထိၣ်ဂဲၤယၤဒ်သိးယကပာ်ဖျါထီၣ် တၢ်တမံၤအံၤန့ၣ်လီၤ. 32ဒ်တၢ်မၤအသးအသိး, ယမ့ၢ်ဒုးတ့ၢ်တၢ်ဒီး “ဆၣ်ဖိကီၢ်ဖိ အဒူအဃိၤ” ဖဲအံၤလၢဝ့ၢ်အ့းဖ့းစူးအိၣ်ဒၣ်ဒီးပှၤကညီ အတၢ်ပာ်သူၣ်ပာ်သးတဖၣ်န့ၣ်, မ့ၢ်ယကမၤန့ၢ်တ့ၢ်ယဲတၢ်ဘျုး တၢ်ဖှိၣ်မနုၤလဲၣ်. မ့မ့ၢ်ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ် သမူထီၣ်အီၤဘၣ်ဒီး, ဒ်တၢ်ကတိၤအိၣ်ဝဲအသိး, “မ်ပကအီၣ်သကိးအီသကိးတက့ၢ်. အဂ့ၢ်ဒ်အံၤ, ခဲမုၢ်ဆ့ၣ်န့ၣ်ပကသံလီၤ.” 33သုတဘၣ်တၢ်လီန့ၢ်သုတဂ့ၤ. “တံၤသကိးအအၢအသီတဖၣ်န့ၣ်မၤဟးဂီၤလုၢ်လၢ်သကဲာ်ပဝး အဂ့ၤအဝါလီၤ.” 34ဃၣ်ကဒါက့ၤသုသးဆူသုတၢ်သ့ၣ်ညါအကြၢး အဘၣ်, ဒီးဆိကတီၢ်ကွံာ်သုကျဲအၢကျဲသီတဖၣ်န့ၣ်တက့ၢ်. လၢသုကမဲာ်ဆှးအဂီၢ်ယပာ်ဖျါယဲဒၣ်လၢ, သုဝဲတနီၤသုတသ့ၣ်ညါကစၢ်ယွၤဘၣ်န့ၣ်လီၤ.
တၢ်ဂဲၤဆၢထၢၣ်သမူထီၣ်က့ၤအနီၢ်ခိ
35ပှၤတဂၤကသံကွၢ်ဝဲ, “ပှၤသံကဘၣ်တၢ်ဒုးဂဲၤဆၢထၢၣ်သမူထီၣ် က့ၤအီၤလၢကျဲဒ်လဲၣ်. အဝဲသ့ၣ်ကအိၣ်ဒီးအနီၢ်ခိဒ်လဲၣ်တကလုာ် လဲၣ်.” 36ပှၤသူၣ်တဆးသးတဆးဧၢ, ဖဲနဖှံလီၤတၢ်ချံလၢဟီၣ်ခိၣ် အပူၤန့ၣ်, မ့တမ့ၢ်လၢအသံဒီးတမဲထီၣ်ဝဲဘၣ်. 37ဒီးတၢ်လၢနဖှံလီၤန့ၣ်, မ့ၢ်ဒၣ်တၢ်ချံလီၤ. ဘၣ်တဘၣ်ကမ့ၢ်ဘုကၠူၣ်, မ့တမ့ၢ်ဘုအဂၤတမံၤမံၤလီၤ. တမ့ၢ်တၢ်မုၢ်တၢ်ဘိအလၢအပှဲၤဒ် အကဒိၣ်ထီၣ်ဝဲလၢခံအသိးန့ၣ်ဘၣ်. 38ကစၢ်ယွၤဟ့ၣ်တၢ်ချံအဝဲန့ၣ်လၢအနီၢ်ခိဒ်အဆၢဟ့ၣ်ဝဲအသိး လီၤ. အဝဲဒၣ်ဟ့ၣ်တၢ်ချံတဖျၢၣ်လၢအနီၢ်ခိဒၣ်ဝဲဒ်အကြၢးဒီး အီၤအသိးလီၤ.
39ဒီးတၢ်မူတၢ်ဂဲၤတဖၣ်အဖံးအညၣ်န့ၣ်, တမ့ၢ်တၢ်ဖံးတၢ်ညၣ် တကလုာ်ဃီဘၣ်. ပှၤကူပှၤကညီအိၣ်ဒီးအဖံးအညၣ်တကလုာ် ဒၣ်ဝဲ, ဆၣ်ဖိကီၢ်ဖိတဖၣ်အိၣ်ဒီးအဖံးအညၣ်တကလုာ်ဒၣ်, ထိၣ်ဖိလံာ်ဖိ, တကလုာ်ဒၣ်, ဒီးဒ့ၣ်ဧိၤညၣ်ဧိၤ, တကလုာ်ဒၣ်လီၤ.
40ဒီးတၢ်အမိၢ်ပှၢ်တဖၣ်လၢအဘၣ်ဃးဒီးမူခိၣ်, ဒီးတၢ်အမိၢ်ပှၢ် တဖၣ်ဘၣ်ဃးဒီးဟီၣ်ခိၣ်န့ၣ်အိၣ်ဝဲလီၤ. အတၢ်မိၢ်ပှၢ်လၢအဘၣ်ဃးဒီးမူခိၣ်အတၢ်ဃံတၢ်လၤန့ၣ်, လီၤဆီဒီးတၢ်အမိၢ်ပှၢ်လၢအဘၣ်ထွဲဒီးဟီၣ်ခိၣ် အတၢ်ဃံတၢ်လၤန့ၣ်လီၤ. 41မုၢ်အိၣ်ဒီးအတၢ်ဃံတၢ်လၤဒၣ်ဝဲ, လါအိၣ်ဒီးအတၢ်ဃံတၢ်လၤ အဂၤတကလုာ်ဒီးဆၣ်ဧိၤဖီဧိၤတဖၣ်အိၣ်ဒီးအတၢ်ဃံတၢ်လၤလီၤ ဆီဆီလီၤ. ဒီးဆၣ်တဖျၢၣ်ဒီးတဖျၢၣ်ဒၣ်လဲာ်အတၢ်ဃံတၢ်လၤ တဒ်သိးသိးဘၣ်.
42ဖဲပှၤသံတဖၣ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤအကတီၢ် န့ၣ်, တၢ်ကမၤအသးဒ်အံၤလီၤ. အနီၢ်ခိလၢအဘၣ်တၢ်ခူၣ်လီၤဘါလီၤ အီၤန့ၣ်, မ့ၢ်တၢ်သံသ့လီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, မ့ၢ်တၢ်သံတသ့ဘၣ်န့ၣ်လီၤ. 43ဖဲအဘၣ်တၢ်ခူၣ်လီၤဘါလီၤအီၤအဆၢကတီၢ်န့ၣ်, မ့ၢ်တၢ်လၢအလာ်အၢဒီးအဂံၢ်စၢ်ဘါစၢ်ဝဲလီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, ကဃံကလၤဒီးဂံၢ်ဆူၣ်ဘါဆူၣ်လီၤ. 44တၢ်လၢအဘၣ်တၢ်ခူၣ်လီၤဘါလီၤအီၤန့ၣ်, မ့ၢ်နီၢ်ခိလီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, မ့ၢ်နီၢ်သးန့ၣ်လီၤ. ဒ်နီၢ်ခိအိၣ်စဲဃဲၤဝဲအသိးန့ၣ်နီၢ်သးကဘၣ်အိၣ်ဝဲစ့ၢ်ကီးလီၤ. 45အဂ့ၢ်ဒ်အံၤ, တၢ်ကွဲးအသးစံးဝဲ, “ပှၤကညီအဆိကတၢၢ် တဂၤ, စီၤအၤဒၣ်ဘၣ်တၢ်တ့လီၤပာ်လီၤအီၤဒ်သးလၢအမူဝဲ,” မ့မ့ၢ်စီၤအၤဒၣ်လၢခံကတၢၢ်တဂၤမ့ၢ်ဝဲသးလၢအဟ့ၣ်တၢ်မူန့ၣ်လီၤ. 46တၢ်လၢအဟဲဆိလၢညါကတၢၢ်န့ၣ်တမ့ၢ်နီၢ်သးဘၣ်. မ့ၢ်ဝဲနီၢ်ခိဝံၤမးနီၢ်သးန့ၣ်လီၤ. 47စီၤအၤဒၣ်အဆိကတၢၢ်တဂၤလၢအဘၣ်တၢ်တ့အီၤလၢဟီၣ်ခိၣ်န့ၣ်, ဟဲလၢဟီၣ်ခိၣ်, မ့မ့ၢ်စီၤအၤဒၣ်ခံဂၤတဂၤန့ၣ်ဟဲလၢမူခိၣ်လီၤ. 48ပှၤလၢအဘၣ်ထွဲဒီးဟီၣ်ခိၣ်တဖၣ်န့ၣ်, လီၤဂာ်ဒီးပှၤတဂၤလၢအဘၣ်တၢ်တ့အီၤလၢဟီၣ်ခိၣ်, မ့မ့ၢ်ပှၤလၢအဘၣ်ထွဲဒီးမူခိၣ်တဖၣ်န့ၣ်, လီၤဂာ်ဒီးပှၤတဂၤလၢအဟဲလၢမူခိၣ်လီၤ. 49ဒီးဒ်ပဒိးဘၣ်ပှၤလၢအဘၣ်တၢ်တ့အီၤလၢဟီၣ်ခိၣ်တဂၤအက့ၢ် အဂီၤအသိးန့ၣ်, ပကဒိးဘၣ်စ့ၢ်ကီးပှၤတဂၤလၢအဟဲလၢမူခိၣ် အက့ၢ်အဂီၤစ့ၢ်ကီးန့ၣ်လီၤ.
50တၢ်လၢယအဲၣ်ဒိးစံးယဲန့ၣ်ယဒီပုၢ်ဝဲၢ်သ့ၣ်ဧၢ, တၢ်လၢအဘၣ်တၢ်တ့အီၤလၢတၢ်ညၣ်ဒီးတၢ်သွံၣ်တၢ်ထံန့ၣ်, ဒိးန့ၢ်ဃုာ်ယွၤအဘီအမုၢ်တသ့ဘၣ်. ဒီးတၢ်လၢအသံသ့န့ၣ်, န့ၢ်ဘၣ်တၢ်သံတသ့န့ၣ် တသ့ဘၣ်.
51-52ဒိကနၣ်တၢ်ဂ့ၢ်ဘၣ်ဃးတၢ်မ့ၢ်တၢ်တီလၢအမ့ၢ်တၢ်ခူသူၣ် တမံၤအံၤန့ၣ်တက့ၢ်. ပတသံပဝဲကိးဂၤဒဲးဘၣ်. မ့မ့ၢ်ဖဲကွဲၤသီၣ်ထီၣ်လၢခံကတၢၢ်န့ၣ်, ပကဘၣ်တၢ်လဲလိာ်ကွံာ်ပှၤလၢတစိၢ်ဖိအတီၢ်ပူၤ, ချ့သဒံးဒ်ပှၤဖျးပှၤမဲာ်ချံအသိးန့ၣ်လီၤ. အဂ့ၢ်ဒ်အံၤ, ဖဲကွဲၤသီၣ်ထီၣ်န့ၣ် ပှၤသံတဖၣ်ကဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤ, ဒ်သိးအသုတသံလၢၤနီတဘျီတဂ့ၤ. ဒီးပဝဲကိးဒံကိးဂၤဒဲးပကဘၣ်တၢ်လဲလိာ်ကွံာ်ပှၤလီၤ. 53အဂ့ၢ်ဒ်အံၤ, တၢ်လၢအသံသ့ကဘၣ်သိးထီၣ်တၢ်လၢအသံ တသ့, ဒီးတၢ်လၢအဟးဂီၤသ့ကဘၣ်သိးထီၣ်တၢ်လၢ အဟးဂီၤတသ့ဘၣ်န့ၣ်လီၤ. 54မၤသးဒ်န့ၣ်ဒီး ဖဲတၢ်သံသ့ဘၣ်တၢ်ဒုးသိးထီၣ်တ့ၢ်အီၤလၢတၢ် သံတသ့, ဒီးတၢ်လၢအဟးဂီၤသ့ဘၣ်တၢ်ဒုးသိးထီၣ်တ့ၢ် အီၤလၢတၢ်ဟးဂီၤတသ့န့ၣ်, တုၤနုၤတစုတၢ်ကွဲးအသးကဟဲလၢထီၣ်ပှဲၤထီၣ်ဝဲဒၣ်လီၤ.
55“တၢ်သံဘၣ်တၢ်မၤဟးဂီၤကွံာ်အီၤလံ. တၢ်မၤနၢၤလၢဝဲပှဲၤ ဝဲလံ. တၢ်သံဧၢ, နတၢ်မၤနၢၤအိၣ်ဖဲလဲၣ်.
တၢ်သံဧၢ, နတၢ်စိတၢ်ကမီၤလၢနကမၤဆူးမၤဆါတၢ်န့ၣ်အိၣ်ဖဲ လဲၣ်.”
56တၢ်သံဒိးန့ၢ်ဘၣ်တၢ်စိကမီၤလၢအကမၤဆူးမၤဆါတၢ်လၢတၢ်ဒဲး ဘးအအိၣ်, ဒီးတၢ်ဒဲးဘးဒိးန့ၢ်တၢ်စိတၢ်ကမီၤလၢတၢ်သိၣ်တၢ်သီ အအိၣ်လီၤ. 57ဘၣ်ဆၣ်ဒီး ကစၢ်ယွၤလၢအဟ့ၣ်ပှၤတၢ်မၤနၢၤခီဖျိပကစၢ် ယ့ၣ်ၡူးခရံာ်တဂၤန့ၣ်, မ်အဘၣ်တၢ်စံးဘျုးစံးဖှိၣ်အီၤတက့ၢ်.
58လၢတၢ်န့ၣ်အဃိ, ယဒီပုၢ်ဝဲၢ်သးဘိသ့ၣ်ဧၢ, အိၣ်ဆၢထၢၣ်ဂၢၢ်ဂၢၢ်ကျၢၤကျၢၤတက့ၢ်. လၢသုတၢ်မၤတၢ်လၢကစၢ်အဂီၢ်အပူၤန့ၣ်, မၤသုဝဲဆူၣ်ဆူၣ်ထီဘိတဘိယူၢ်ဃီတက့ၢ်. အဂ့ၢ်ဒ်အံၤ, သုသ့ၣ်ညါသုဝဲလၢကစၢ်အတၢ်ဖံးတၢ်မၤအပူၤ, သုတၢ်ဖံးတၢ်မၤလၢအဘျုးအဖှိၣ်တအိၣ်န့ၣ်, တအိၣ်ဝဲနီတမံၤဘၣ်န့ၣ်လီၤ.
Currently Selected:
1 ကရံၣ်သူး 15: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
