Openboarunk 11
11
De Doot un daut Oppstonen de twee Zeijen
1Un daut wort mie een Rua, aus eene Stang (Motstock), jejäft un jesajcht: Sto opp un mat däm Tempel Gottes un däm Aultoa un dee, dee doabennen aunbäden. 2Un dän Hoff, dee buta däm Tempel es, schmiet rut un mat am nich; dan hee es de Heiden jejäft worden, un see woaren de heilje Staut 42 Moonaten veklunjen. 3Un ekj woa miene twee Zeijen [Krauft] jäwen, un see woaren 1260 Doag profezeien, met Sakj bekjleet. 4Dit sent dee twee Eeljbeem un dee twee Laumpenhoola (Laumpen), dee ver däm Harn de Ieed stonen. 5Un wan wäa an beschädjen (schoden) well, soo jeit Fia ut äarem Mul un vetäat äare Fiend; un wan wäa an beschädjen well, soo mott hee aulsoo doot jemoakt woaren. 6Dise ha de Macht, dän Himmel to veschluten, om dautet aun de Doag äara Profezeiunk kjeen Räajen felt; un see ha Macht äwa de Wotasch, dee (de Wotasch) en Bloot to vewaundlen, un de Ieed to schlonen met jiedre Ploag, soo foaken see wellen. 7Un wan see äa Zeichnis vollbrocht ha, soo woat daut Tia, daut ut däm Aufgrunt nohecht sticht, Kjrich met an fieren, un woat an besiejen un an doot moaken. 8Un äare Doodeskjarpa woaren oppe Gauss de groote Staut ligjen, de jeistlich Sodom un Ägipten heet, wua uk äa Har jekjriezicht wort. 9Un väle ut de Velkja un Stam un Sproaken un Nazionen seenen äare Doodeskjarpa dree un haulf Doag, un erlauben nich, äare Doodeskjarpa em Grauf to lajen. 10Un dee oppe Ieed wonen, freien sikj äwa an un sent froo un woaren eenaunda Jeschenkja schekjen, wiels dise, dee twee Profeeten, dee kjwälden, dän, dee opp de Ieed wonen. 11Un no de dree un haulf Doag kjeem de Jeist vom Läwen ut Gott en an, un see stunden opp äare Feet; un groote Angst foll opp dee, dee an sagen. 12Un ekj hieed eene lude Stemm ut däm Himmel to an sajen: Komt hia enopp! Un see stieejen em Himmel enopp enne Wolkj, un daut sagen an äare Fiend. 13Un en jane Stund passieed een grootet Ieedbäben, un daut tieende Poat de Staut foll, un 7 000 Menschen met Nomes kjeemen en daut Ieedbäben om; un de äwaje worden voll Angst un jeewen däm Gott det Himmels Iea.
14Daut tweede Wee es vebie; kjikj, daut dredde Wee kjemt boolt.
De säwende Posaun woat jeblost
15Un de säwenda Enjel posaund; un daut kjeemen lude Stemmen em Himmel, dee säden: Daut Rikj de Welt von onsem Harn un sien Christus es jekomen, un hee woat harschen von Eewichkjeit to Eewichkjeit. 16Un dee 24 Eltestasch, dee ver Gott opp äare Troons setten, follen opp äare Aunjesechta un bäden Gott aun, 17un säden: Wie danken die, Har, Gott, Aulmajchtja, dee doa es un dee doa wia, daut du aunjenomen hast diene groote Macht un diene Harschoft aunjefongen (aunjenomen) hast! 18Un de Velkja sent oajalich jewast, un dien Oaja es jekomen un de Tiet de Doodje, om jerecht to woaren, un dän Loon to jäwen diene Kjnajchts, de Profeeten, un de Heilje un dän, dee dienen Nomen ferchten, de Kjliene un de Groote, un dee to vedoawen, dee de Ieed vedoawen.
19Un de Tempel Gottes em Himmel wort opjemoakt, un de Lod {2Mo.25,10; Heb.9,4.5} von sienen Bunt wort en sienen Tempel jeseenen; un daut passieeden Blitzen un Stemmen un Donna un een Ieedbäben un een groota Hoagel.
Currently Selected:
Openboarunk 11: PBJHF
Highlight
Share
Copy
Want to have your highlights saved across all your devices? Sign up or sign in
© SW-Radio e.V.
