Openboarunk 12

De Frau, äa Kjint un de Droak (Drachen)

1Un een grootet Tieekjen wort jeseenen aum Himmel: Eene Fru bekjleet met de Sonn, un de Mon wia unja äare Feet, un opp äa Kopp (Haupt) eene Kroon von (met) 12 Stierns. 2Un see es schwanga un schricht en Jeburtsweeen un en Weedoag de Jeburt.

3Un daut kjeem een aundret Tieekjen em Himmel; un kjikj, een groota, fiarooda Droak (Drachen), dee säwen Kjap un tieen Hieena haud, un opp siene Kjap säwen Kroonen; 4un sien Zoagel trakjt daut dredde Poat de Stierns vom Himmel met sikj wajch; un hee schmeet dee oppe Ieed. Un de Droak (Drachen) stunt ver de Fru, dee jebäaren sull, om daut hee, wan see jebuaren haud, äa Kjint veschlinjt. 5Un see jebua eenen menlichen Sän, dee aule Velkja weiden sull met ne iesane Wäd (Iesastang); un äa Kjint wort entrekjt no Gott un no sienem Troon.

6Un de Fru rant en de Wieste, wua see von Gott eene reedjemoakte Städ haud, doamet maun ar doa selfst 1260 Doag vesorcht.

7Un daut jeef een Kaumf em Himmel: Michael un siene Enjel kjamften met däm Droak (Drachen). Un de Droak (Drachen) kjamft un siene Enjel; 8un see jewonnen nich, un äa Plauz wort nich mea em Himmel jefungen. 9Un daut wort jeschmäten de groote Droak (Drachen), de oole Schlang, de Diewel un Soton jenant woat, dee de gaunz bewonde Ieed veleid, jeschmäten wort hee oppe Ieed, un siene Enjel worden met am rauf jeschmäten. 10Un ekj hieed eene lude Stemm em Himmel sajen: Nu es daut Heil (Radunk) un de Macht un daut Rikj (de Harschoft) von onsem Gott un de Vollmacht (Jewault) von sienem Christus (Jesaulwden) jekomen; dan rauf jeschmäten es de Vekjläaja de (von onse) Breeda, dee an Dach un Nacht ver onsem Gott vekloagd. 11Un see haben am besiecht derch daut Bloot vom Laum un derch daut Wuat von äa Zeichnis un see ha äa Läwen nich jeleeft bat em Doot. 12Doawäajen siet froo, jie Himmels un dee jie en an wonen! Wee de Ieed un daut Mäa! Dan de Diewel es no junt rauf jekomen un haft groote Oaja, doa hee weet, daut hee weinich Tiet haft.

13Un aus de Droak (Drachen) sach, daut hee opp de Ieed jeschmäten wia, vefoljd hee de Fru, dee daut menliche Kjint jebuaren haud. 14Un daut worden de Fru de twee Flichten vom groote Odla jejäft, doamet see en de Wieste flicht, aun äare Städ, wua see jenäat (vesorcht) woat eene Tiet un Tieden un eene haulwe Tiet, wajch von daut Aunjesecht de Schlang. 15Un de Schlang spieech (schmeet) ut äarem Mul Wota, aus eenen Stroom, hinja de Fru häa, doamet see von dän Stroom wajchjeräten woat. 16Un de Ieed holp de Fru, un de Ieed muak äa Mul op un veschlukt dän Stroom, dän de Droak ut sien Mul spieech. 17Un de Droak (Drachen) wia oajalich äwa de Fru un jinkj han, Kjrich to fieren met de äwaje von äaren Somen, dee de Jebooten Gottes hoolen un daut Zeichnis Jesus haben.

18Un stunt oppem Saunt aum Mäa.

Currently Selected:

Openboarunk 12: PBJHF

Highlight

Copy