1. Mose 28

Jakob rant no Haran [Mesopotamien]

1Un Isaak roopt Jakob un säajend am; un hee befool am un säd to am: Du saust nich eene Fru von de Dajchta Kanaan nämen. 2Moak die opp, go no Paddan-Aram [Mesopotamien], en daut Hus Betuel, däm Voda von diene Mutta; un nemm die von doa eene Fru von de Dajchta Laban, dän Brooda diene Mutta. 3Un Gott de Aulmajchtja, säajent die un moakt die fruchtboa un vemieet die, daut du to eene Schoa von Velkja woascht; 4un hee jeft die däm Säajen von Abraham, die un dienem Somen met die, om daut du daut Launt von diene Framdlinkjschoft oafst, daut Gott däm Abraham jejäft haft! 5Un Isaak entleet Jakob; un hee jinkj no Paddan-Aram no Laban, däm Sän Betuel, däm Aramäa, Rebekka äarem Brooda, de Mutta von Jakob un Esau.

Esau siene aundre Fru

6Un aus Esau sach, daut Isaak däm Jakob jesäajent un am no Paddan-Aram jeschekjt haud, om sikj von doa eene Fru too nämen, endäm hee am säajend un am befool un säd: Du saust nich eene Fru vonne Dajchta Kanaan nämen, 7un daut Jakob sienem Voda un siene Mutta jehorcht haud un no Paddan-Aram jegonen wia: 8Aus Esau sach, daut de Dajchta Kanaan iebel wieren en sienem Voda Isaak siene Uagen, 9doa jinkj Esau no Ismael un neem sikj Mahalat to Fru, de Dochta von Ismael, von Abraham sienen Sän, de Sesta Nebajot, to siene aundre Frues.

Jakob sien Droom un Vespräakjen

10Un Jakob jinkj von Beerscheba wajch un jinkj no Haran. 11Un hee kjeem no eenem Uat un bleef doa äwa Nacht; dan de Sonn wia unjajegonen. Un hee neem von janem Uat eenen Steen un läd am aun sien Koppenenj un läd sikj aun däm Uat dol. 12Un am dreemd: Un kjikj, eene Lada wia oppe Ieed jestalt, un äare Spetz schieed aun däm Himmel; un kjikj, Enjel Gottes jinjen opp ar nopp un rauf. 13Un kjikj, de Har stunt äwa ar un säd: Ekj sie de Har, dienem Voda Abraham sien Gott, un de Gott von Isaak; dit Launt, opp däm du lichst, die well ekj daut jäwen un dienem Somen. 14Un dien Somen saul woaren aus de Stoff oppe Ieed, un du woascht die utbreeden nom Wasten un nom Oosten un nom Nuaden un nom Sieden han; un en die un en dienem Somen sellen aule Jeschlajchta de Ieed jesäajent woaren. 15Un kjikj, ekj sie met die, un ekj well die emma bewoaren, wuahan du jeist, un die trigjbrinjen en dit Launt; dan ekj woa die nich veloten, bat ekj jedonen ha waut ekj die jesajcht ha. 16Un Jakob wuak opp von sienem Schlop un säd: Woarhauft, de Har es aun disem Uat, un ekj wist daut nich! 17Un hee enjst sikj un säd: Woo furchtboa es dis Uat! Dit es nuscht aundret aus Gottes Hus, un dit daut Himmelsdooa. 18Un Jakob stunt tiedich Zemorjes opp un naum däm Steen, däm hee aun sienem Haupt jelajcht haud, un stald däm opp aus een Denkjmol un goot Eelj opp siene Spetz. 19Un hee jeef disem Uat däm Nomen Betel; oba aum Aunfank wia Lus de Nomen de Staut. 20Un Jakob jeef een Vespräakjen un säd: Wan Gott met mie es un mie bewoat opp disem Wajch, däm ekj go, un mie Broot too äten jeft un Kjleeda toom auntrakjen, 21un ekj en Fräd trigjkom no mienem Voda sien Hus, soo saul de Har mien Gott sennen. 22Un dis Steen, däm ekj aus een Denkjmol oppjestalt ha, saul een Hus Gottes sennen; un von aulem, waut du mie jäwen woascht, woa ekj die jewess daut 10-de jäwen.

Currently Selected:

1. Mose 28: PBJHF

Highlight

Copy