1. Mose 23

Sara stoaft un äa Bejrafnis

1Un daut Läwen von Sara wia 127 Joa; daut wieren Sara äare Läwensjoaren. 2Un Sara storf en Kirjat-Arba, daut es Hebron, em Launt Kanaan. Un Abraham kaum, om äwa Sara too kloagen un äwa ar too hielen.

3Doano jinkj Abraham wajch von siene Doodje un räd to de Kjinja Het un säd: 4Ekj sie een Framdlinkj un Enwona bie junt; jeft mie een Graufäjendoom bie junt, daut ekj miene Doodje begrowen kaun dee ver mienem Aunjesecht licht. 5Un de Kjinja Het auntwuaden däm Abraham un säden to am: 6Hea ons, mien Har! Du best een Ferscht Gottes unja ons, begroow diene Doodje em basten onse Jräwa; kjeena von ons woat die sien Grauf vewäaren, om diene Doodje too begrowen. 7Doa stunt Abraham opp un venäjd sikj ver däm Laundesvolkj, ver de Kjinja Het, 8un räd met an un säd: Wan daut jun Wellen es, daut ekj miene Doodje ver mienem Aunjesecht begroow, soo hieet mie un bedd fa mie bie Efron, däm Sän Zohar, 9daut hee mie de Heel von Machpela jeft, dee am jehieet, dee aum Enj von sienem Flekj es; om daut volle Jelt saul hee dee mie en june Medd toom Graufäjendoom jäwen. 10Oba Efron wond enne Medd de Kjinja Het; un Efron, de Hetita, auntwuad däm Abraham ver de Uaren de Kjinja Het, ver aule, dee toom Dooa en siene Staut enjinjen, un säd: 11Ne, mien Har, hia mie! Daut Flekj jäw ekj die; un de Heel, dee doa es, die jäw ekj dee; ver de Uagen de Kjinja von mienem Volkj jäw ekj dee die; begroow diene Doodje. 12Doa venäjd sikj Abraham ver däm Laundesvolkj; 13un hee räd too Efron ver de Uaren vom Laundesvolkj un säd: Doch, wan du nu opp mie hieren west! Ekj jäw däm Pries fa daut Flekj, nemm am von mie; un ekj well miene Doodje doa selfst begrowen. 14Un Efron auntwuad däm Abraham un säd to am: 15Mien Har, hia mie too! Een Launt von 400 Schekel Selwa, waut es daut tweschen mie un die? Soo begroow diene Doodje. 16Un Abraham hieed opp Efron; un Abraham wuag däm Efron daut Jelt auf, wuavon hee ver de Uaren de Kjinja Het jerät haud, 400 Schekel Selwa, gangboa bie Haundelslied.

17Soo wort daut Flekj Efron, daut bie Machpela, ver Mamre, licht, daut Flekj un de Heel, dee doabennen wia, un aule Beem, dee oppem Flekj en siene Jrensen runtom stunden, 18däm Abraham toom Ieejentum bestädicht ver de Uagen de Kjinja Het, ver aule, dee toom Dooa en siene Staut enjinjen. 19Un nodäm begroow Abraham Sara, siene Fru, en de Heel oppem Flekj Machpela, ver Mamre, daut es Hebron, em Launt Kanaan. 20Soo wort daut Flekj un de Heel, dee doa wia, däm Abraham toom Graufäjendoom bestädicht von de Kjinja Het.

Currently Selected:

1. Mose 23: PBJHF

Highlight

Copy