1. Mose 13

Abram trant sikj von Loot

1Un Abram jinkj nopp ut Ägipten, hee un siene Fru un aules, waut hee haud, un Loot met am, nom Sieden (vom Launt Kanaan). 2Un Abram wia sea rikj aun Vee, aun Selwa un aun Golt. 3Un hee jinkj opp siene Stiej vom Sieden bat Betel, bat däm Uat, woa aum Aunfank sien Zelt jewast wia, tweschen Betel un Ai, 4no dee Städ vom Aultoa, däm hee doa verhäa jemoakt haud. Un Abram roopt doa selfst däm Nomen det Harn aun. 5Un uk Loot, dee met Abram trock, haud Kjlienvee un Rinda un Zelten. 6Un daut Launt vekrauft daut nich, daut see toop wonden; dan äa Hab un Goot wia groot, un see kunnen nich toop wonen. 7Un daut jeef Striet tweschen de Hoads von Abram un de Hoads von Loot sienem Vee. Un de Kanaanita un de Perisita wonden doa noch em Launt. 8Doa säd Abram too Loot: Lot doch kjeen Striet tweschen mie un die un tweschen miene Hoads un diene Hoads sennen; dan wie sent Breeda! 9Es nich daut gaunze Launt ver die? Trann die doch von mie! West du too Linkjen, soo well ekj mie too Rajchten dreien, un west du too Rajchten, soo well ekj mie too Linkjen dreien. 10Un Loot hoof siene Uagen opp un sach de gaunze Läacht vom Jordan, daut dee gaunze Jäajent feicht wia [ver däm Har Sodom un Gomorra vetilcht haud] aus de Goaden Gottes, aus daut Ägiptenlaunt, bat no Zoar han. 11Un Loot erwäld sikj de gaunze Läacht vom Jordan, un Loot jinkj nom Oosten; un see tranden sikj von eenaunda. 12Abram wond em Launt Kanaan, un Loot wond en de Städa enne Läacht un schluach Zelten opp bat no Sodom. 13Un de Lied von Sodom wieren bees un groote Sinda ver däm Harn.

14Un de Har säd to Abram, nodäm Loot sikj von am jetrant haud: Häw diene Uagen opp un kjikj von däm Uat, woa du best, nom Nuaden un nom Sieden un nom Oosten un nom Wasten! 15Dan daut gaunze Launt, daut du sitst, ekj well die daut jäwen un dienem Somen opp eewich. 16Un ekj well dien Somen aus daut Stoff oppe Ieed moaken, soo daut, wan wia däm Stoff oppe Ieed talen kaun, soo woat uk dien Somen jetalt woaren. 17Moak die opp un derchwaunda daut Launt no siene Lenj un no siene Breed; dan die well ekj daut jäwen. 18Un Abram schluach Zelten opp, un kaum un wond unjre Terebinten Mamre, de bie Hebron sent; un hee bud doa selfst däm Harn een Aultoa.

Currently Selected:

1. Mose 13: PBJHF

Highlight

Copy