1. Mose 14

Abram rad Loot ute Jefangenschoft

1Un daut passieed aun de Doag Amrafel, däm Kjennich von Sinear, Arioch, däm Kjennich von Ellasar, Kedor-Laoma, däm Kjennich von Elam, un Thidhal, däm Kjennich von Gojim, 2daut see met Bera Kjrich fieeden, däm Kjennich von Sodom, un met Birscha, däm Kjennich von Gomorra, Schineab, däm Kjennich von Adama, un Schemeba, däm Kjennich von Zebojim, un met däm Kjennich von Bela, daut es Zoar. 3Aul dise vebungen sikj un kjeemen em Tol Siddim, daut es daut Soltmäa. 412 Joa hauden see Kedor-Laoma jedeent, un aum 13 Joa jinjen see von am auf. 5Un aum 14 Joa kaum Kedor-Laoma un de Kjennichs, dee met am wieren, un schluagen de Refaim bie Asteroth-Karnaim un de Susim bie Ham un de Emim enne Läacht von Kirjathaim, 6un de Horita opp äare Boaj Seir bat El-Paran, daut aune Wieste licht. 7Un see dreiden sikj un kaumen no En-Mischpat, daut es Kades; un see schluagen daut gaunze Launt de Amalekita un uk de Amorita, dee bie Hazazon-Tamar wonden. 8Un daut jinjen ut de Kjennich von Sodom un de Kjennich von Gomorra un de Kjennich von Adama un de Kjennich von Zebojim un de Kjennich von Bela, daut es Zoar; un see stalden sikj jäajen an en Schlachtordninj opp em Tol Siddim: 9Jäajen Kedar-Laoma, däm Kjennich von Elam, un Thidhal, däm Kjennich von Gojim, un Amrafel, däm Kjennich von Sinear, un Arioch, däm Kjennich von Ellasar, vea Kjennichs jäajen fief. 10Oba daut Tol Siddim wia voll von Ieedpetj Kjwalen; un de Kjennichs von Sodom un Gomorra randen un follen doa nenn, un de aundre randen enne Boaj. 11Un see neemen aulet Hab un Goot von Sodom un Gomorra un aul äare Speise un jinjen doavon. 12Un see naumen Loot, Abram sienem Brooda sienen Sän, un sien Hab un Goot un jinjen doavon; dan hee wond en Sodom.

13Un daut kaum een Wajchjeranda un berecht daut Abram, däm Hebräa; oba hee wond unjre Terebinten Mamre, däm Amorita, däm Brooda von Eskol un däm Brooda von Aner, un dise wieren Abram siene Bundesfrind. 14Un aus Abram hieed, daut sien Broodasän wajch jefieet wia, leet hee siene Erfoarne, siene Husjebuarne, uttrakjen, 318 Maun, un juagen an no bat Dan. 15Un maun deeld sikj jäajen an de Nacht, hee un siene Kjnajchts, un schluach an un juach an no bat Hoba, daut linkjsch von Damaskus licht. 16Un hee brocht aulet Hab un Goot trigj; un uk Loot, sienen Broodasän, un sien Hab un Goot brocht hee trigj, un uk de Frues un daut Volkj.

17Un aus hee trigj jekomen wia, nodäm hee Kedar-Laoma un de Kjennichs, dee met am jewast, jeschloagen haud, jinkj de Kjennich von Sodom ut, am entjäajen, en daut Tol Schawe, daut es daut Kjennichsdol. 18Un Melchisedek, de Kjennich von Salem, brocht Broot un Wien rut; un hee wia Priesta Gottes, däm Hechsten. 19Un hee säajend am un säd: Jesäajent es Abram von Gott, däm Hechsten, dee de Himmel un Ieed jeschaufen haft! 20Un jeloft es Gott, de Hechsta, dee de Fiend en diene Henj jejäft haft! Un Abram jeef am daut 10-de von aulem.

21Un de Kjennich von Sodom säd to Abram: Jeff mie dee Seelen, un daut Hab un Goot neem fa die. 22Un Abram säd toom Kjennich von Sodom: Ekj häw miene Haunt opp nom Harn, no Gott, däm Hechsten, dee Himmel un Ieed besett: 23Wan ekj vom Riedrot bat toom Schnooareeme, jo, wan ekj irjent waut neem von däm, waut die jehieet! Om daut du nich sajchst: Ekj ha Abram rikj jemoakt. 24Nuscht fa mie! Blooss waut de Jinjlinje jejäten ha, un daut Deel de Mana, dee met mie jegonen sent: Aner, Eskol un Mamre, dee muchten äa Deel nämen!

Currently Selected:

1. Mose 14: PBJHF

Highlight

Copy