LUKA 14

Ko Faka'lei ne Iesu te Tagata Masaki

1I te sua Sapati, ne fanatu a Iesu o fai 'kaiga i te fale o te sua takitaki o Falesaio, kae ne alamati tino ki a ia. 2Ne vau ki a Iesu se tagata e maua ne te masaki fulafula. 3Ne faipati atu a Iesu kae fesili atu ki faiakoga o te Tulafono mo Falesaio penei: “E taga i te Tulafono a tatou o faka'lei masaki i te Sapati me ikai?” 4Ne seai se tino o latou ne tali mai, puke atu ei a Iesu ki te tagata masaki, o fai ke 'lei kae uga atu a ia ke fano. 5#Mata 12.11 Kae ne fai atu foki a ia ki a latou, “Kafai e isi se tino i a koutou e isi sena tamaliki tagata io me se pulumakau ko to ki te lua, e a, e se mafai ne koutou o 'futi ake ki luga i te Sapati?” 6Ka ko se mafai ne latou o tali mai ki a ia ki te mea tenei.

Ko te Alofa Kaimalie mo te Lotomalalo

7I te mateaga ne Iesu a latou kola ne ami, e filifili a nofoga sili mo latou, tala atu ei ne ia ki a latou katoa a te tala fakatusa tenei: 8#Faata 25.6-7 “Kafai e ami koe ne se tino ki se 'kaiga o te fakaipoipoga, ke se nofo koe i se koga sili. I te mea manafai e isi foki se tino ne ami ne ia e sili ake i a koe; 9ka fanatu la a ia tela ne ami ki a koulua o fai atu ki a koe, ‘Tuku mo ia nei te nofoga tenei.’ Ko fano ei koe mo te mavale o nofo i te koga tafasili i te malalo. 10Kae kafai e ami koe, fano eiloa koe o nofo i te koga tafasili i te malalo, ko te mea ke vau te tino tela ne ami ne ia koe, o fai atu, ‘Vau ki luga nei e toku taugasoa, ki te nofoga e sili atu i te 'lei. ’ Ka 'malu ei koe i mua o tino kola e 'kai fakatasi koutou. 11#Mata 23.12; Luka 18.14 So se tino e loto fia sili, ka fakamalalogina. Ka ko ia tela e loto malalo, ka fakamalugagina.”

12Tela, fai atu ei Iesu ki te tino e a ia te 'kaiga: “Kafai e fai sau 'kaiga, ke se ami ne koe ou taugasoa, me ko ou taina, me ko ou kaiga, io me ko tino mauko'loa kola e tuakoi mo koe, i te mea ka toe ami ne latou a koe; ko tena uiga la, ka toe maua ne koe te taui o au mea ne fai. 13Kae kafai e fai sau 'kaiga, ke ami ne koe tino mativa, vae 'mutu, 'pili mo tino 'kivi ei, 14e manuia ei koe, me se mafai ne latou o taui mai ki a koe. Kae ka taui mai ne te Atua ki a koe manafai e toetu mai a tino amiotonu mai te mate.”

Ko te Tala Fakatusa o te 'Kaiga Lasi i te Malo o te Atua

(Mata 22.1-10)

15Ko te tagata e tokotasi o latou kola ne 'kai i te laulau, ne lagona ne ia te mea nei, kae ne fai mai ki a Iesu: “Amutia latou kola ka 'kai i te Malo o te Atua!” 16Ne fai atu a Iesu ki a ia: “E isi se tagata ne fakatoka tena 'kaiga lasi, kae ne ami ne ia a tino e tokouke. 17Ko pili ki te taimi o te 'kaiga, kae uga atu ne ia tena tavini ke fai atu ki ana tino ami penei: ‘O'mai me ko toka mea katoa!’ 18Kae ne faka'fiti katoa latou takitokotasi, muna a te tino muamua ki te tavini, ‘Ko oti ne 'togi toku manafa kae 'tau au o fano o onoono ki ei, ke talia mai la ne koe taku fakamolemole.’ 19Muna a te sua tino, ‘Ne 'togi ne au e lima vasoa pulumakau, kae ka fano nei au o tofotofo; ke talia mai la taku fakamolemole.’ 20Ne fai mai foki te sua tino, ‘Au nei ko oti ne fakaipoipo, tena te mea ko se fanatu ei au!’ 21Ne foki atu te tavini, kae ne fakamatala atu a mea katoa ki tena pule. Ko oko eiloa i te kaitaua o te pule o te 'kaiga, kae fai atu ki tena tavini, ‘Fano ke vave ki auala 'lasi mo alatu i tua o te fa'kai, kae aumai ki konei a tino ma'tiva, vae 'mutu, 'pili mo tino 'kivi.’ 22E se leva foki ko te tavini eiloa ko fai mai, ‘Te aliki, a tau fakatonuga ko oti eiloa ne fai, kae seki taitai o fonu te fale.’ 23Tela, fai atu ei te pule ki te tavini, ‘Fano ki auala 'lasi mo ala fo'liki i tua o te fa'kai, o fai malo atu ki tino ke o'mai katoa, ko te mea ke fonu toku fale. 24Au e fai atu ki a koutou katoa, e seai eiloa se tino i a latou kola ne ami, e kai i taku 'kaiga!’"

Ko te Faigata o Fai mo Soko

(Mata 10.37-38)

25Ne olo fakatasi mo ia te vaitino. Ne mafuli mai a Iesu kae fai atu ki a latou: 26#Mata 10.37 “So se tino e vau ki a au, e se mafai o fai mo oku soko, vagana ke tulaga muamua te olotou alofa mai ki a au, i lō olotou tamana, matua, avaga mo tama, taina mo tuagane, mo ia ei. 27#Mata 10.38; 16.24; Male 8.34; Luka 9.23 A latou kola e se amo olotou sataulo, kae se tautali mai i a au, e se mafai o fai a latou mo oku soko. 28Kafai foki se tino i a koutou ko mafaufau o faite se olo, e 'tau eiloa o nofo muamua ki lalo o fuafua te 'togi, ke iloa me ko lava ana tupe e fakaoti ei tena galuega. 29Kafai e se fai pena ne ia, ka se mafai o fakapalele te olo tela ko oti ne fakatu te fakavae; kae ka fakatauemu ki a ia tino katoa kola ne lavea ne latou. 30Kae ka fai ake latou penei: ‘A te tino tenei ne kamata o fai te galuega kae se mafai ne ia o fakapalele!’ 31Kafai foki se tupu e fano mo sena kautau e toko sefulu afe tagata, o taua mo te sua tupu tela e vau mo tena kautau e toko lua sefulu afe tagata, e 'tau mo ia o nofo muamua ki lalo, o mafaufau me lava tena malosi o fakafetaui te sua tupu. 32Kafai e se mafai ne ia, e 'tau mo ia o uga atu ne ana avefekau o fakafetaui ki te sua tupu, ka koi tuai o oko mai, ko te mea ke fai se feagaiga e maua i ei se filemu.” 33Ne fakapalele muna a Iesu penei, “E pena foki eiloa mo koutou, e se mafai o fai a se tino mo oku soko seiloga ko tiakina ana mea katoa.”

Ko te Masima ko se Aoga

(Mata 5.13; Male 9.50)

34“Se mea 'lei te masima, kae kafai e masei, e seai eiloa se auala e mafai ei o fai ke 'lei. 35Ko se aoga mo te laukele, e se aoga foki o fai kaiao i ei, na ko te pei keatea. Kafai e isi ne otou taliga, na faka'logo mai.”

Currently Selected:

LUKA 14: Tusi Tapu

Highlight

Copy