LUKA 15

Ko te Mamoe ne Galo

(Mata 18.12-14)

1 # Luka 5.29-30 I te sua aso, e tokouke a tino ao lafoga mo tino agasala ne o'mai o fakalogo'logo ki akoakoga a Iesu. 2A Falesaio mo faiakoga o te Tulafono ne mui'mui penei, “A te tagata tenei e fiafia ki tino agasala, kae 'kai fakatasi foki mo latou!” 3Tela, fai atu ei ne Iesu ki a latou a te tala fakatusa tenei:

4“Kafai se tino o koutou e isi ne ana mamoe e lau, kae galo se tasi o latou, se a te mea ka fai ne ia? E tuku ne ia te tinoiva mo te tokoiva mamoe i te vao, kae fano o 'sala te mamoe ne galo ke maua. 5Kafai e maua, ko oko eiloa i tena fiafia, kae amo ki ona tuauma. 6Ko ave ei ne ia ki tena fale, kae ami ona taugasoa mo ona tuakoi ke o'mai. Ko fai atu ei a ia ki a latou, ‘Ke fiafia ake tatou, me ko oti ne maua ne au taku mamoe ne galo!’ 7Au e fai atu ki a koutou, me pena foki eiloa te lasi o te fiafia i te lagi i te tino agasala e tokotasi, ko salamo i lo te tinoiva mo te tokoiva tino amiotonu, kola e se aoga ki ei te salamo.”

Ko te Tupe ne Galo

8“E pela foki mo se fafine e isi ne ana tupe siliva e sefulu, kae ne galo e tasi. Se a la tena mea ka fai? Ka fa'ka ne ia se moli kae tuetue ne ia tena fale, kae onoono faka'lei ki koga katoa ke maua ne ia te tupe. 9Kafai ko maua ne ia te tupe, ko ami ei ne ia ona taugasoa mo ona tuakoi ke o'mai. Ko fai atu ei a ia penei, ‘Ke fia'fia fakatasi ake tatou, me ko maua ne au taku tupe ne galo!’ 10Au e fai atu ki a koutou, me pena foki eiloa te fia'fia o te kau agelu a te Atua, i te tino agasala e tokotasi ko salamo.”

Ko te Tama Fakamaumau Mea

11Ne toe fai atu a Iesu: “E isi se tagata e tokolua ana tama tagata. 12A te toekimuli ne muna atu ki tena tamana, ‘Toku tamana, na tuku mai nei toku vaega mai i a koe.’ Tela, vaelua ei ne te tamana ana mea i ana tama tagata e tokolua. 13E fia fua aso mai tua ifo, ko fakatau atu ne te toekimuli a nisi mea o tena vaega, tiaki tena kaiga kae fano mo tupe. Ne fano ki se fenua 'mao, kae fakamaumau ana tupe ki mea se aoga. 14Ne fakamaumau ne ia ana mea katoa. Ne poko te oge lasi i te fenua tena, palele atu foki eiloa mo ana mea. 15Ne fano o galue i se tagata e tokotasi i te fenua tena, kae ne uga a ia ne te tino tena ke fano o tausi puaka i tena manafa, ko te toe galuega fatauva eiloa tena. 16Ana muna eiloa ke kai ne ia meakai a puaka, me seai se tino ne avatu ne meakai ma ia. 17Fakamuli ake ko o'mai mafaufauga 'lei kae fai ake pela: ‘A tino ga'lue a toku tamana e uke atu olotou meakai, kae se mafai ne latou o kai olotou meakai ke palele, kae tenei au e likiliki faeloa! 18Au ka tu ki luga o foki ki toku tamana, o fai atu ki a ia penei: “Toku tamana, au ko agasala ki te Atua pela foki ki a koe. 19Ko se 'tau o taku au ko tau tama, kae ke fai au mo fai se tino o au tino ga'lue.” ’ 20Tela, tu ake ei a ia ki luga kae foki ki tena tamana.

“Ka koi 'mao eiloa a ia mai te fale, ka ko lavea mai a ia ne tena tamana. Ko fonu te loto o tena tamana i te alofa kae tele atu, 'sai ne ia kae sogi. 21Kae muna mai a ia, ‘toku tamana, au ko agasala ki te Atua e pela foki ki a koe. Ko se 'tau au o taku ko tau tama.’ 22Ka ko kalaga te tamana ki ana tavini, ana muna: ‘Fakavave! Aumai te gatu sili i te 'lei o fakapei ki a ia. Faulu se mama ki tena maikao kae fakataka ona vae. 23Ko olo ei koutou o puke mai te tama pulumakau putaputa o ta mo fai te 'kaiga fiafia a tatou. 24Me ko taku tama tenei ne mate, kae nei ko ola; ne galo, kae nei ko maua.’ Tela la, kamata ei te 'kaiga.

25“A te toekimua i te taimi tena, e i te vao. I tena fokimaiga, ko pili mai ki te fale, ne lagona ne ia a leo o lakau fakatagitagi mo tino e 'saka. 26Ne kalaga atu a ia ki te tavini e tokotasi; kae fesili atu ki ei penei, ‘Se a te mea tena e fai?’ 27Ne tali mai te tavini, ‘Ko tou taina ko foki mai, ka ko tou tamana ne ta ne ia te tama pulumakau, me ko toe foki mai a ia e ola.’ 28Ko oko eiloa i te makonokono o te toekimua. Ko se mafai ne ia o ulu ki loto i te fale; tela, vau ei ki tua tena tamana kae fakamolemole atu ki a ia, ke vau ki loto i te fale. 29Ne tali atu a ia ki tena tamana, ‘Kiloke, e uke tausaga ne galue ei au mo koe, kae seki soli fakatasi ne au sau fakatonuga. Ne a mea ne aumai ne koe ma aku? Ne seki aumai ne koe se tama kouti mo fakafiafia ei au mo oku taugasoa. 30Ka ko tau tama tena ne fakamaumau ne ia au mea ki fafine fina lalolagi, ko foki mai i te taimi nei, ta ei ne koe tau tama pulumakau putaputa ma ia.’ 31Ne tali atu tena tamana penei, ‘Taku tama, a taua e 'nofo tasi eiloa i te kaiga, tela la, e a koe aku mea katoa. 32Ko 'tau foki o fai se 'kaiga e fakafiafia ei tatou, me i tou taina tena ne mate, kae nei ko ola, ne galo, kae nei ko maua.”’

Currently Selected:

LUKA 15: Tusi Tapu

Highlight

Copy