LUKA 13

Salamo ki Otou Agasala i a Koutou mana 'Mate

1I te taimi tena, e isi ne tino ne 'nofo i kona, ne fai ki a Iesu e uiga mo tino Kalilaia kola ne tamate ne Pilato, i te taimi ne fai ei olotou taulaga ki te Atua. 2Ne tali atu a Iesu: “E leake eiloa koutou i tino Kalilaia konei e sili atu i te agasala i lo nisi Kalilaia, i te mea ne tamate latou penei? 3Ikai! Au e fai atu ki a koutou, me kafai e se salamo koutou ki otou agasala, ka 'mate katoa koutou e pela mo latou. 4Kae pefea te tinoagafulu mo te tokovalu i Siloama, kola ne 'mate ne 'taogina ne te olo ne fati ki luga i a latou? E leake eiloa koutou i te mea nei se fakamaoniga i a latou ne tino e ma'sei atu i tino katoa kola ne 'nofo i loto i Ielusalema? 5Ikai! Au e fai atu ki a koutou, me kafai e se salamo koutou ki otou agasala, ka 'mate katoa koutou e pela mo latou.”

Ko te Tala Fakatusa ki te Mati se Fua

6Ne fai atu ne Iesu ki a latou te tala fakatusa tenei: “E isi se tagata ne toki te mati i tena togavine. Ne fanatu o tau fuaga kae seai sena mea ne maua. 7Tela, muna atu ei a ia ki tena tino galue i te fatoaga, ‘Kiloke, ko tolu tausaga toku vau sale ki konei, o tau fuaga i te mati tenei, kae seki maua eiloa ne au se fuaga. Tua ki lalo! Me e tu tauanoa fua i te laukele.’ 8Ka ko te tino galue i te fatoaga ne tali atu penei, ‘Te aliki, tuku ake mua i te tausaga tenei e tasi; ka keli fakapukupuku ne au se lua, kae ka fakafonu ki kaiao mo fakaola. 9Kafai la ko fua mai i te tausaga ma vau, ko seai la se gali pela; kae kafai e seai, ko te taimi tena ko tua ei ne koe ki lalo.”’

Ko Fai ne Iesu ke 'Lei te Masaki o te Fafine i te Sapati

10I te Sapati e tasi, ne akoako atu Iesu i loto i se fale tapuaki. 11E isi se fafine i ei ne pukea ne se agaga masei, kae ne fai ne ia te fafine ke masaki i tausaga e sefulu valu; ko makau ake eiloa a ia, ka ko se mafai foki o tu ke tonu. 12I te laveaga ne Iesu, kalaga atu ei ki a ia penei, “Te fafine, a koe ko 'lei mai tou masaki.” 13Ne tuku a lima o Iesu ki luga i te fafine, ko te taimi eiloa tena ne mafola tonu ei tena foitino, 'viki ei ki te Atua. 14#Eso 20.9,10; Teu 5.13-14 A te pule o te fale tapuaki, ne kaitaua ki a Iesu me ne fai ne ia ke 'lei te tino masaki i te Sapati, tela faipati atu ei a ia ki tino penei, “E ono aso e 'tau mo tatou o ga'lue i ei: tela la, o'mai i aso kona, ke fai ei otou masaki ke 'lei, kae sa o'mai i te Sapati.” 15Ne tali atu te Aliki ki a ia penei: “A koutou tino 'loi! A koutou takitokotasi e masani sale o 'tala otou pulumakau io me ko asini mai otou fale kae ave o fainu i te Sapati. 16Ka ko te fafine tenei, ne tupu mai i te gafa o Apelaamo, kae ne saisai ne Satani i tausaga e sefulu valu; e a, e se 'tau a ia o 'tala mai i ona saisaiga i te Sapati?” 17Ne ma'vale katoa ona fili i tena tali ne fai, kae ne fia'fia tino katoa ki mea fakaofoofogina takitasi ne fai ne ia.

Ko te Tala Fakatusa ki te Fuaga o te Sinapi

(Mata 13.31-32; Male 4.30-32)

18Muna a Iesu: “E pela mo se a te Malo o te Atua? Se a te mea ka fakatusa ne au ki ei? 19E pela mo se fuaga o te lakau e igoa ki te sinapi, ne ave ne se tino o toki i tena manafa; ne ola kae ne tupu ake mo fai se matuā lakau lasi, kae ne fai ofaga o manueva i luga i ona kaula.”

Ko te Tala Fakatusa ki te Mea Faka'fete Falaoa

(Mata 13.33)

20Ne toe fesili atu a Iesu: “Ka fakatusa ne au ki te a te Malo o te Atua? 21E pela mo te mea faka'fete falaoa, ne puke ki ei se fafine o palu ki loto i se tisi falaoa lasi, ke oko eiloa ki te 'fete katoa o te paluga.”

Ko te Mataloa Mataliki

(Mata 7.13-14,21-23)

22A Iesu ne fanatu i loto i fa'kai 'lasi mo fa'kai fo'liki, kae ne akoako atu ki tino i tena auala o fano ki Ielusalema. 23E isi se tino ne fesili mai ki a ia, “Te Aliki, ka mutana fua a tino e 'sao?” Ne tali atu a Iesu ki a latou: 24“Fai te mea e mafai ne koutou o fai o ulu atu i te mataloa mataliki; me muna atu au ki a koutou, me ka tokouke tino ka taumafai o ulu i ei, kae ka se mafai.

25“A te pule o te fale ka tu atu o 'pono te mataloa; tela la, ka 'tu koutou i tua kae kamata o tukituki atu i te mataloa, kae fai ake penei: ‘Te Aliki, 'tala mai te mataloa ki a matou!’ Kae tali atu a ia, ‘E se iloa ne au me ne o'mai koutou maifea!’ 26Kae ka tali mai koutou, ‘Tatou ne 'kai kae inu fakatasi, ne akoako foki koe i te motou fa'kai!’ 27#Sala 6.8 Ka toe tali atu a ia, ‘E se iloa ne au me ne o'mai koutou maifea. Olo katoa koutou keatea mai i a au, tino amio ma'sei!’ 28#Mata 22.13; 25.30 Ka isi se fakatau'tagiga mo te gaī o nifo i te taimi ka lavea ei ne koutou Apelaamo, Isaako, Iakopo mo pelofeta katoa i te Malo o te Atua; ka ko koutou ka 'tuli keatea! 29#Mata 8.11,12 Ka o'mai a tino mai te sopogala, te togala, matu mo saute, kae ka 'nofo i te 'kaiga i te Malo o te Atua. 30#Mata 19.30; 20.16; Male 10.31I te taimi tena, ko tino kola ne faka'muli ka 'mua, ka ko tino kola ne 'mua ka faka'muli.”

Ko te Alofa o Iesu mo Ielusalema

(Mata 23.37-39)

31I te taimi foki eiloa tena, e isi ne Falesaio ne o'mai ki a Iesu kae ne muna mai ki a ia, “E 'tau mo koe o fano keatea mai konei, kae fano ki se isi koga, i a Helota e fia tamate ki a koe.” 32Ne tali atu Iesu ki a latou: “Olo o muna atu ki te alope tena: ‘A te aso nei mo te aso a taeao, ka afuli ne au agaga ma'sei keatea mai tino, kae fai foki ke 'lei a tino ma'saki, ka ko te tolu o aso, ka fakapalele ei taku galuega.’ 33E 'tau la mo au o fai taku galuega i te aso nei, e pela foki te aso a taeao, mo taeao atu; me se tonu manafai e tamate se pelofeta i se isi koga seiloga ko Ielusalema fua.

34“Ielusalema, Ielusalema! Ne tamate ne koe a pelofeta, kae peipei foki ne koe ki fatu a avefekau ne uga mai ne te Atua ki a koe! Ko fia taimi ne manako au o fakamaopoopo ou tino katoa i loto i oku lima, e pela mo se moa fafine e fakapulupulu ne ia ana tama mai lalo i ona kapakau, kae se talia eiloa ne koutou! 35#Sala 118.26 Nei la, ka tiakina lele atu ne au te otou fale. Au e muna atu ki a koutou, ka se lavea ne koutou au, ke oko ki te taimi tela ka muna ake ei koutou pela, ‘Ke manuia a ia tela e vau i te igoa o te Aliki.”’

Currently Selected:

LUKA 13: Tusi Tapu

Highlight

Copy