IOANE 12

Ko te 'Miliga o Iesu i Petania

(Mata 26.6-13; Male 14.3-9)

1E toe ono aso mai mua o te Paseka, kae fano Iesu ki Petania, ko te koga ne nofo i ei Lasalo, tela ne fakaola ne Iesu mai te mate. 2Ne fakatoka ne latou se 'kaiga i te koga tena, ne laulau meakai i ei Maleta, ka ko Lasalo ne kai fakatasi mo Iesu i te laulau. 3Ne puke ne Malia te pauna katoa o te sinu manogi 'togi 'mafa, 'ligi ei ne ia ki vae o Iesu, kae 'solo ki ona laulu, kae ne fonu te fale i te manogi o te sinu. 4A te soko e tokotasi o Iesu, ko Iuta te Isikaliota, tela ne fakalata ne ia a Iesu, ne fai ake penei: 5“Ai a seki 'togi atu ei te sinu manogi tenei ki se toluselau tupe siliva,#12.5 tupe siliva: onoono ki te 6:7 ko ave ei te tupe tena ki tino ma'tiva?” 6Ana pati kona, e se fai pela ona ko ia e alofa ki tino ma'tiva, ka ko te mea ko ia se tino kaisoa; tela e ave sale ne ia te taga tupe, kae fakaaoga ne ia. 7Kae ne muna atu a Iesu: “Tuku eiloa i ei! Ke tausi eiloa ne ia te sinu tena mo te aso e tanu ei au. 8E 'nofo koutou mo tino ma'tiva, ka ko au e se nofo tumau i a koutou i aso katoa.”

Ko te Pulepulega Masei ki a Lasalo

9Ko iloa ne te vaitino e tokouke o Iutaia i a Iesu ko nofo i Petania, tela olo ei latou ki ei; kae ne seki olo fua latou ona ko Iesu, kae ke onoono foki latou ki a Lasalo, tela ne fakatu ne Iesu mai te mate. 10Tela la, ko mafaufau foki ei faitaulaga sili ki se auala e tamate ei ne latou Lasalo; 11me ko ia ne ala mai ei o 'tele keatea te tokoukega o Iutaia mai olotou takitaki, kae talitonu ki a Iesu.

Ko te Uluatuga Manumalo o Iesu ki Ielusalema

(Mata 21.1-11; Male 11.1-11; Luka 19.28-40)

12I te sua aso, a te vaitino e tokouke ne o'mai ki te Paseka, iloa ake ei ne latou i a Iesu ko vau ki Ielusalema. 13Tela, ave ei ne latou lau o pama kae olo o fakafetaui ki a Iesu, kae kalaga penei: “Ke vikia te Atua! Ke fakamanuia ne te Atua a ia tela e vau i te igoa o te Aliki! Ke fakamanuia atu te Atua ki te Tupu o Isalaelu!” 14Ne maua ne Iesu te asini mo sopo a ia i ei, e pela eiloa mo te muna e tusi i te Tusi:

15 # Saka 9.9 “Sa mataku koe, e te fa'kai ko Siona!

Kiloke ko vau tou Tupu ki a koe,

E sopo i luga i te tama asini!”

16E se iloa ne ona soko te muna tena e tusi i te Tusi; kae i te taimi ne oko ei a Iesu ki tona 'malu, ne manatua ei ne latou me ne fai mai te Tusi, me ko oti ne fai ne latou a te mea nei mō ia.

17A te vaitino ne 'nofo fakatasi mo Iesu, i te taimi ne kalaga atu ei a ia ki a Lasalo ke vau ki tua mai te tanuga; kae toe fakatu mai te mate; ne fakasalalau ne latou te mea ne tupu. 18Tena te pogai ne fakafetaui ei a Iesu ne te vaitino, me ko iloa ne latou me ko Iesu ne fai ne ia te fakailoga fakaofoofogina tenei. 19Ne fai'pati Falesaio i a latou eiloa, “Onoono la koutou, a tatou e se manumalo! Kiloke, a te lalolagi katoa ko tau'tali atu i a ia!”

Ko Nisi Tino Eleni ko Salasala ki a Iesu

20E isi ne Eleni i tino kola ne olo ki Ielusalema o tapuaki ki te Atua i te taimi o te 'kaiga. 21Ne o'mai latou ki a Filipo, se tino Petesaita i Kalilaia, kae fai mai, “Tou 'malu, a matou e fia fetaui ki a Iesu.” 22Fanatu ei Filipo o fai ki a Anitelea, olo ei laua tokolua ki a Iesu o fai ki ei. 23Ne tali atu a Iesu ki a laua: “Ko oko mai te taimi e tuku ei te 'malu lasi ki te Tama a te Tagata. 24Au e muna tonu atu ki a koutou: a te fuataga saito e se mafai o uke ne saito e maua mai i ei, seiloga ke to ki te laukele kae pala i ei. Kafai e pala, ko tupu mai ei saito e uke. 25#Mata 10.39; 16.25; Male 8.35; Luka 9.24; 17.33Ko te tino e atafai ki tona ola, ka maumau tona ola; ka ko te tino e se fakapelepele ki tona ola i te lalolagi nei, e maua ne ia te ola se gata mai. 26Kafai e fia tavini mai se tino ki a au, e 'tau o tautali mai ki a au, ko te koga e nofo au i ei, e nofo foki i ei taku tavini. Ka vikia ne toku Tamana a ia tela e tavini mai ki a au.”

Ko Faipati a Iesu e Uiga ki Tona Mate

27“Nei, a toku loto ko se toka; kae ne a nei aku muna ka fai atu? Ka fai ake au pela, ‘Te Tamana, fakaola mai au i te itula tenei’? Ka ko te mea tonu eiloa tena ne vau ei au, ke puapuaga au i te itula tenei. 28Te Tamana, tuku atu te vikiga ki tou igoa!” Tela, oko mai ei te leo mai te lagi, “Ko oti ne tuku atu ne au te 'malu, kae ka toetuku atu foki ne au te 'malu.”

29A tino ne 'tu i ei, ne lagona ne latou te leo kae fai ake, “Ko 'pa te fatili!” Kae ne fai ake nisi tino, “Se agelu ne faipati ki a Iesu!” 30Kae ne fai atu a Iesu ki a latou: “E se mo oku te leo tenei ne oko mai, kae mo koutou. 31Ko te taimi tenei ko 'tau o fakamasino te lalolagi; ka tuli ei keatea te aliki masei o te lalolagi nei. 32Kafai e sisi ake au ki luga mai te laukele, ka 'futi mai ne au a tino katoa ki a au.” 33Mai ana muna konei, ko fakaasi atu ei ne ia a te uiga o te mate, ka mate ei a ia. 34#Sala 110.4; Isa 9.7; Tani 7.14 Ne tali mai te vaitino: “E fai mai te motou Tulafono, i te Keliso e ola eiloa ki te se gata mai. E pefea la o muna mai koe i a au te Tama a te Tagata e 'tau o sisi ki luga? Ko oi te Tama a te Tagata tenei?” 35Ne tali atu a Iesu ki a latou: “Ka nofo nei te mainaga i a koutou i ne mo aso. Fai la otou olaga ke 'lei, ka koi nofo i a koutou te mainaga, ko te mea ke se oko mai te pouliga ki a koutou; me ko te tino e ola i te pouliga, e se iloa ne ia te koga e fano a ia ki ei. 36Ke talia ne koutou te mainaga me koi nofo i a koutou, ko te mea ke fai koutou mo tino o te mainaga.”

Ko te se Talitonu o Tino Iutaia

I te otiga o pati a Iesu konei, fano ei a ia o 'muni mai i a latou. 37E ui eiloa i te fai ne ia fakailoga fakaofoofogina i olotou mata, kae se talitonu eiloa latou ki a ia. 38#Isa 53.1Ko te mea ke fakataunu ei te muna a te pelofeta ko Isaia:

“Te Aliki, ko oi ne talitonu ki omotou muna ne fai atu?

Ko oi foki ne fakaasi atu ki ei ne te Aliki tona mana?”

39Ona ko te pogai tenei, ne se mafai eiloa ne latou o talitonu, me ne fai mai eiloa a Isaia penei:

40 # Isa 6.10 “Ne fakapouli ne te Atua olotou mata,

Ne 'pono foki ne ia olotou mafaufau,

Ko te mea ke se lavea ne olotou mata,

Ke se maina foki i olotou mafaufau,

Ke se toe 'foki mai latou ki a au

Ke faka'lei ne au olotou masaki.”

41Ne fai atu ne Isaia a muna kona, me ne lavea atu ne ia te 'malu o Iesu, tela faipati mai ei a ia e uiga ki ei.

42Kae ne tokouke eiloa a takitaki o Iutaia ne fakatuanaki ki a Iesu; kae ona ko Falesaio, ne seki faipati fakaasiasi atu ei latou ki te mea tena, i a latou mana atuli ki tua mai te fale tapuaki. 43Me ko latou kola e ma'nako ki tavaega mai tino, i lo tavaega mai te Atua.

Ko Fakamasinoga e Maua mai i Muna a Iesu

44Ne faipati atu a Iesu i te leo malosi: “So se tino e fakatuanaki ki a au, e se fakatuanaki mai fua ki a au, kae ki a ia foki tela ne uga mai ne ia au. 45So se tino e lavea ne ia au, e lavea foki ne ia a ia tela ne uga mai ne ia au. 46Au ne vau ki te lalolagi, i a au ko te mainaga; ko te mea ke se nofo tumau faeloa i te pouliga a ia tela e fakatuanaki ki a au. 47So se tino e lagona ne ia aku muna kae se fakalogo ki ei, e se fakamasino ne au. Me i a au e seki vau o fakamasino te lalolagi, kae o fakaola te lalolagi. 48So se tino e 'teke ne ia au, kae se talia ne ia aku muna, e isi eiloa se tino e fakamasino ne ia a ia. A te muna tela ne faipati atu ne au, ko tona famasino tena i te aso fakaoti. 49Me i a au e se faipati fua i taku pule, ka ko te Tamana tela ne uga mai ne ia au, ne tuku mai foki ne ia te poloakiga ki a au, ki mea e 'tau o taku atu, ki a koutou. 50Kae e iloa ne au me i ana poloakiga, ko te ola se gata mai tena. Tela la, a mea e faipati atu ne au, ko mea ne fai mai ei te Tamana ke faipati atu ne au.”

Currently Selected:

IOANE 12: Tusi Tapu

Highlight

Copy