IOANE 11

Ko te Mate o Lasalo

1 # Luka 10.38,39 A te tagata e igoa ki a Lasalo, ne nofo i Petania, kae ne masaki. A Petania ko te fa'kai o Malia mo tena taina ko Maleta. 2#Ioa 12.3A Malia tenei, ko ia tela ne 'ligi ne ia te sinu manogi ki vae o te Aliki kae 'solo ki ona laulu, ka ko Lasalo tena tuagane, ne masaki. 3Ne uga te fekau a tuagane o Lasalo ki a Iesu, “Te Aliki, a tou taugasoa fagasele e masaki.” 4I te lagonaga ne Iesu, fai ei ana muna penei, “A te masaki tenei e se iku ki te mate; kae mo te vikiga o te Atua, ke vikia ei foki te Tama a te Atua i ei.”

5Ne alofa a Iesu ki a Maleta mo tona taina, pela foki ki a Lasalo. 6Ne maua ne ia te tala i a Lasalo ne masaki, nofo ei a ia i te koga tena i aso e lua. 7Tela, faipati atu ei a ia ki ona soko, “Tou foki ki Iutaia.” 8Ne tali atu ona soko, “Te Faiakoga, ne fatoa teka atu fua nei te taimi ne fia peipei ei koe ki fatu ne tino Iutaia, ka ko mafaufau foki koe ke toe foki koe ki ei?” 9Ne tali atu a Iesu: “E se sefulu lua itula i te ao? Tela la, kafai e sasale se tino i te ao, e seai se mea e fakalavelave ki tena sasale, me lavea faka'lei ne ia a mea i te mainaga o te lalolagi nei. 10Kae kafai e sasale a ia i te po, e mafai o siga a ia, me e seai se mainaga i a ia.” 11Ne fai atu ne Iesu te muna tena, kae toe faipati atu: “A te taugasoa o tatou ko Lasalo e moe, kae ka fano au o fāgu ake ke ala.” 12Ne tali atu ona soko, “Te Aliki, kafai a ia e moe, kati e toe 'lei.” 13Ne faipati eiloa Iesu e uiga ki te mate o Lasalo; kae ne taofi pela ona soko, i te pati a Iesu e fakauiga fua ki te moe o Lasalo. 14Tela, faipati tonu atu ei a Iesu, “A Lasalo ko mate. 15Ona ko koutou, ko fiafia ei au, i a au seki nofo i tena matega, ko te mea ke talitonu koutou. Tou olo ki ei.” 16Ko fai atu Toma tela e fakaigoa ki te Masaga ki ona takaga soko, “Tou olo katoa fakatasi mo te Faiakoga, ke 'mate fakatasi tatou mo ia.”

A Iesu ko te Toetu mo te Ola

17I te okoatuga a Iesu, iloa ake ei ne ia i a Lasalo ko oti ne tanu, ko tusa mo aso e fa ko teka. 18A Petania e tu pili eiloa ki Ielusalema, e tai katoa te lua maila te va. 19E tokouke a tino Iutaia ne o'mai o fakamafanafana ki a Maleta mo Malia, i te mate o te la tuagane.

20Ne iloa ne Maleta i a Iesu ko vau, fanatu ei a ia o fakafetaui ki a ia, ka ko Malia ne nofo i te fale. 21Ne fai atu Maleta ki a Iesu, “Te Aliki, moi nofo koe i konei, penei e se mate toku tuagane! 22Kae nei, e iloa ne au me talia ne te Atua so se mea e fakatagi atu ei koe ki a ia.” 23Muna a Iesu ki a Maleta, “A tou tuagane ka toe ola mai.” 24Ne tali atu Maleta, “E iloa ne au me ka toe ola mai i te aso fakaoti.” 25Ne fai atu a Iesu ki a ia, “Au ko te toetu mo te ola; so se tino e fakatuanaki ki a au, e tusa eiloa me mate; kae ola eiloa a ia. 26So se tino foki e ola nei kae fakatuanaki ki a au, e se mafai eiloa o mate. E talitonu la koe ki te mea nei?” 27Ne tali mai Maleta, “Ao e te Aliki! Au e talitonu i a koe ko te Keliso ko te Tama a te Atua, tela ne fai mai ei pelofeta me e vau ki te lalolagi.”

Ko Tagi Iesu

28I te otiga o ana muna kona, fano ei Maleta o kalaga atu ki a Malia tona taina, “Ko oko mai te Faiakoga, kae ne 'sala ki a koe.” 29Ne lagona ne Malia muna konei, tu ei ki luga o fano fakavave o fakafetaui a Iesu. 30Ka ko Iesu e seki oko atu ki te fa'kai, me koi nofo eiloa i te koga ne fetaui ei laua mo Maleta. 31Ko tino Iutaia kola ne iai i te fale fakatasi mo Malia, ne o'mai o fakamafanafana ki a ia, ne tautali atu i a Malia i te laveaga ne latou me ko tu ki luga o fano ki tua. Ne manatu latou pela me ko fano o tagi i te tanuga.

32Ko oko mai Malia ki te koga tela ne nofo i ei a Iesu, ne lavea ne ia, fakasiga ifo ei a ia ki ona vae, ana muna, “Te Aliki, moi nofo koe i konei, penei e se mate toku tuagane.” 33Ko iloa ne Iesu me ko tagi Malia, pela foki mo tino Iutaia kola ne o'mai fakatasi mo ia; lagona ei ne ia te 'mae o tona loto, mo te fi'ta o tona mafaufau. 34Ne fesili atu a Iesu ki a latou, “Ne tanu i fea ne koutou a ia?” Ne tali mai latou, “Te Aliki, vau ake o onoono ki ei.” 35Ko tagi Iesu. 36Tela, fai ake ei a tino Iutaia, “Kiloke i te lasi o te alofa o Iesu ki a Lasalo!” 37Ka ko nisi o latou ko fai ake, “E se mafai ne ia tela ne faka'pula ne ia mata o tino kivi, o taofi te tagata tenei mai te mate?”

Ko te Fakaolaga o Lasalo

38Ko toe 'mae foki te loto o Iesu, fano ei a ia ki te tanuga; se ana e 'pono tona gutu ki te fatu. 39Ne fakatonu atu a Iesu, “Ave keatea te fatu!” Ne tali mai Maleta te tuagane o Lasalo ki a Iesu, “Te Aliki, ko manogi masei tona foitino. Ko fa nei aso talu te tanuga!” 40Ne fai atu a Iesu ki a ia, “Ne seki fai atu au ki a koe, me ka iloa ne koe te 'malu o te Atua manafai e fakatuanaki koe?” 41Ne ave keatea ne latou te fatu. Ko kilo ake a Iesu ki luga kae fai atu: “Au ko fakafetai atu ki a koe te Tamana, me ne talia ne koe au. 42Kae e iloa ne au me fakalogo mai faeloa koe ki a au i taimi katoa, ka ko fai atu ne au a muna konei ona ko tino konei, ko te mea ke talitonu, me ne uga mai au ne koe.” 43I te otiga o ana muna kona, kalaga malosi atu ei a ia, “Lasalo, vau ki tua!” 44Ne vau ei ki tua te tino ne mate, mo ona lima mo ona vae e saisai ki laugatu, e pela foki mo ona mata. Ne fai atu a Iesu ki a latou, “Talatala ake ona saisaiga, kae tuku atu ke fano.”

Ko te Pulepulega Masei ki a Iesu

(Mata 26.1-5; Male 14.1-2; Luka 22.1-2)

45E tokouke a tino Iutaia ne o'mai o asi mai ki a Malia. Ne lavea ei ne latou a mea ne fai ne Iesu, talitonu ei latou ki a ia. 46Ka ko nisi tino o latou, ne toe foki o taku ki Falesaio a mea ne fai ne Iesu. 47Tela, fakapotopoto ei ne Falesaio mo faitaulaga sili a te kau o te Fono, olotou muna, “Se a te mea ka fai ne tatou? A fakailoga fakaofoofogina katoa, ko fai ne te tagata tenei! 48Kafai e tiaki ne tatou ke fai ne ia mea penei, ko tino katoa ka talitonu ki a ia, mo tino pule o te Malo o Loma, ka fakamasei ne latou te Fale Tapu mo te fenua katoa o tatou!” 49A te sua tino o latou e igoa ki a Kaiafa, ko ia ko te Faitaulaga Pule i te tausaga tena, ne faipati penei, “E se iloa eiloa ne koutou se mea e tasi! 50E se iloa ne koutou me sili manafai e mate se tino e tokotasi, ko te mea ke ola te fenua katoa?” 51E seki mafua mai i a ia eiloa te pati tena, kae ona ko ia ko te Faitaulaga Pule i te tausaga tena, ne 'valo ei a ia me 'tau o mate Iesu mō tino Iutaia. 52E se mo Iutaia fua, kae mo te 'lukuga fakatasi o fanau a te Atua kola e salalau i fenua valevale. 53Tela, kamata mai eiloa i te aso tena o fia tamate ne latou a Iesu. 54Tena te pogai ne seki toe fai malaga fakaasiasi ei a Iesu ki tino Iutaia, kae ne fano fakafunafuna ki se koga e pili ki te koga lavaki, ki te fa'kai e igoa ki a Efalaima, kae ne nofo ei i kona fakatasi mo ona soko.

55Ko pili ki te Paseka a Iutaia, kae tokouke foki a tino mai fa'kai valevale ne o'mai ki Ielusalema, o fai te faifaiga o te faka'maga ka koi tuai o fai te 'Kaiga o te Paseka. 56Kae ne salasala latou ki a Iesu; ka koi 'tu latou i loto i te Fale Tapu, fakatau fesilisili ei latou penei, “Se a te otou taofi? E se vau a ia ki te 'kaiga?” 57A faitaulaga sili mo Falesaio, ne fakatonu atu me kafai se tino e matea ne ia a Iesu i se koga, e 'tau mo ia o fakailoa ki a latou, ko te mea ke puke fakapagota ne latou a ia.

Currently Selected:

IOANE 11: Tusi Tapu

Highlight

Copy