IOANE 10

Ko te Tala Fakatusa ki te Lulu Mamoe

1“Au e fai tonu atu ki a koutou, ko te tino tela e se ulu atu i te mataloa o fano ki te lulu mamoe, kae kake o fano ki ei mai se isi ala, a ia se tino kaisoa kae faomea. 2Ka ko ia tela e ulu atu i te mataloa, ko ia tena ko te tausi mamoe. 3Ka tala mai ki a ia ne te tausi mataloa te mataloa; kae lagona ne mamoe tona leo: kae kalaga foki a ia ki ana mamoe i olotou igoa, takitaki ei latou ki tua. 4Kafai e ave ne ia ana mamoe, e mua i a latou, kae tautali atu mamoe i a ia; i te mea ko iloa ne latou tona leo. 5Ka se tau'tali latou ki se tino fakaatea, ka 'tele latou keatea; i te mea e se matea ne latou a tona leo.”

6Ne faipati atu ne Iesu a te muna fakatusa tenei ki a latou; ka ko latou ne seki maina me ne a uiga o mea ne faipati atu ne ia ki a latou.

Ko Iesu ko te Tausi Mamoe 'Lei

7Ne toe faipati atu a Iesu ki a latou: “Au e fai tonu atu ki a koutou, ko au tenei te mataloa o mamoe. 8A tino katoa kola ne mua mai i a au, ne tino kai'soa kae faomea; kae se fakalogo mamoe ki a latou. 9Ko au nei te mataloa. Kafai e ulu mai i a au se tino, ka sao a ia; ka vau a ia ki loto kae toe fano ki tua, kae ka maua ne ia ne meakai. 10A te tino kaisoa, e vau fua o kaisoa, o tatino, kae fakamasei mea. Au ne vau ko te mea ke maua ne latou te ola, kae ke maua malosi eiloa ne latou.

11“Ko au te tausi mamoe 'lei. E tuku atu ne te tausi mamoe 'lei a tona ola ke sui ei a mamoe. 12Ka ko te tino faigaluega, e se ko te tausi mamoe, e se e a ia te lafu mamoe; kafai e lavea ne ia te luko ko vau, ko tiaki ne ia a mamoe, kae tele, puke ei latou ne te luko, mafuta valevale ei mamoe. 13E tele te tino faigaluega me i a ia se tino faigaluega fua, kae se manatu 'mafa ki mamoe. 14Ko au te tausi mamoe 'lei; e iloa tonu eiloa ne au aku mamoe, kae e iloa tonu foki au ne aku mamoe. 15#Mata 11.27; Luka 10.22E iloa au ne te Tamana, e iloa foki ne au te Tamana. E tuku atu foki toku ola e sui ei aku mamoe. 16E isi ake foki ne aku mamoe, kae se 'tu i loto i te lulu tenei. E 'tau mo au o aumai latou, ka faka'logo foki latou ki toku leo; ko tasi ei te lafu mamoe, mo te tausi mamoe e tokotasi.#10.16: A latou ka fai; i nisi fuliga e isitela ka tasi.

17“Tena te mea e alofa ei toku Tamana ki a au, me loto fiafia au o tuku atu toku ola, ko te mea ke toe maua ne au. 18E seai se tino e ave ne ia keatea mai i a au, ka ko au eiloa e tuku atu ne au. E i a au te pule o tuku atu, e i a au foki te pule o toe aumai. A te fakatonuga tenei ko oti ne maua ne au mai toku Tamana.”

19Ne toe vaelua foki ei tino Iutaia i muna konei. 20A te tokoukega o latou ne fai ake, “E isi se temoni i a ia; a ia foki ko valea. Ai a e faka'logo ei koutou ki a ia?” 21Muna a isi tino, “A pati konei e se ne pati a se tino e pukea. E mafai ne se temoni o faka'pula mata o se tino kivi?”

Ko Teke ne Tino Iutaia a Iesu

22Ne fai i Ielusalema te 'Kaiga o te Fakatapuga o te Fale Tapu; i aso tonu o te tau 'moko. 23Ne sasale a Iesu i te Fale Tapu i te Fale Fakaoso o Solomona. 24Ne mumu mai ki a ia tino Iutaia, kae muna mai ki a ia, “Ka pefea te leva ka 'nofo ei a matou mo te manatu fakalotoloto lua? Kafai ko koe te Keliso, fakaasi tonu mai ki a matou.” 25Ne tali atu a Iesu ki a latou, “Ko oti au ne muna atu ki a koutou, kae se talitonu eiloa koutou. Ko galuega e fai ne au i te igoa o toku Tamana, e molimau latou ki a au; 26kae se talitonu eiloa koutou, i te mea i a koutou e se ko aku mamoe, e pela eiloa mo aku muna ki a koutou. 27A aku mamoe e fakalogo ki toku leo, kae e iloa ne au latou, kae tautali mai i a au. 28E avatu ne au ki a latou a te ola se gata mai; kae se mafai latou o 'mate; kae se mafai foki ne se tino o 'fao latou mai i a au. 29A te mea ne tuku mai ne toku Tamana ki a au, e sili atu #10.29: A te mea tela ne tuku mai ne toku tamana ki a au e sili atu; i nisi lomiga e isi iei A toku Tamana, tela ne tuku mai ne ia latou ki a au, e sili atu. i mea katoa, e seai se tino e mafai o 'fao ne ia latou, mai i te puipuiga a toku Tamana. 30A maua mo toku Tamana e tasi eiloa.”

31Kae ne toe puke a tino Iutaia ki fatu o peipei a ia. 32Muna a Iesu ki a latou, “Ko uke a galuega 'lei ne fakaasi atu ne au ki a koutou mai toku Tamana. Tefea la te galuega i mea kona, ko ala ei o peipei au ne koutou ki fatu?” 33#Levi 24.16Ne tali mai a tino Iutaia ki a ia, “E se ko galuega 'lei e peipei ei koe ne matou, ka ko tou muna masei; me i a koe se tagata fua, ka ko fai eiloa ne koe a koe mo fai te Atua.” 34#Sala 82.6Ne tali atu a Iesu ki a latou, “E tusi i te otou Tulafono me ne muna mai te Atua, ‘A koutou ne atua’? 35Kafai ne fakaigoa ne te Atua a latou kola ne oko ki ei te muna, ne atua, e se mafai eiloa o fakaseaoga te Tusi. 36E a, e taku ne koutou a te tino tela ko oti ne fakatapu ne te Tamana, kae uga mai ki te lalolagi, ‘A koe se tino muna masei,’ i te mea i a au ne fai atu, ‘Au ko te Tama a te Atua’? 37Kafai e se fai ne au a galuega a toku Tamana, sa talitonu koutou ki a au. 38Kae kafai e fai ne au, e tusa eiloa me se talitonu koutou ki a au, kae ke talitonu koutou ki aku galuega, ko te mea ke iloa ne koutou kae talitonu, i te Tamana e i loto i a au, mo au foki e i loto i te Tamana.”

39Ne toe taumafai latou o puke a ia; kae ne sao a ia mai i olotou lima.

40 # Ioa 1.28 Ne toe fano a ia ki tua atu o Iolitana, ki te koga tela e papatiso sale i ei a Ioane, nofo ei i kona. 41E tokouke a tino ne o'mai ki a ia, olotou muna, “E seai se fakailoga a Ioane ne fai, ka ko mea katoa ne faipati ei Ioane e uiga mo te tagata tenei, e tonu katoa.” 42Kae e tokouke a tino ne talitonu ki a ia i te koga tena.

Currently Selected:

IOANE 10: Tusi Tapu

Highlight

Copy