IOANE 9

Ko Faka'pula ne Iesu a Mata o te Tagata ne Fanau mai e Kivi

1I te sasalega a Iesu, ne lavea ne ia te tagata tela ne fanau mai e kivi. 2Ne fesili mai ki a ia ona soko, “Te Faiakoga, ko oi ne agasala, ko te tagata nei io me ko ona matua, ko ala ei o fanau mai a ia e kivi?” 3Ne tali atu a Iesu, “E se agasala a te tagata nei io me ko ona matua, ka ko tupu te mea nei ke fakaasi ei te 'mana o te Atua i te faiga ke 'lei ona mata. 4E 'tau mo tatou o fai a galuega a ia tela ne uga mai ne ia au, ka koi ao; me ka oko mai te po, ko seai ei se tino e mafai o galue i ei. 5#Mata 5.14; Ioa 8.12Au ko te mainaga o te lalolagi, i a au koi nofo i te lalolagi.” 6I te palelega ne fai atu a pati a Iesu, puaki ei a ia ki te laukele, kae palu ne ia te pela mo ona suavale, nini ei ne ia a mata o te tagata kivi ki te mea tena. 7Oti, muna atu ei a Iesu ki a ia, “Fano o mulumulu i te vai koukou i Siloama,” ko tena uiga “Ugaatu.” Fano ei a ia o mulumulu kae ne foki mai ko kite.

8Muna a tino kola ko oti ne iloa muamua ne latou a ia e kivi ona mata, “E se ko ia tenei ne sagasaga sale kae akai mea?” 9Muna a isi tino, “Ko ia eiloa tenei.” Kae fai mai nisi, “E se ko ia, kae e tai pela eiloa mo ia.” Muna a te tino kivi ki a latou, “Ko au eiloa tenei.” 10Ne fai atu ei latou ki a ia, “Ne fai pefea ke 'pula ou mata?” 11Ne tali mai a ia, “Ko te tagata e igoa ki a Iesu ne palu ne ia te pela kae ne nini ki oku mata, kae ne fai mai foki ki a au, ‘Fano ki te vai koukou i Siloama o mulumulu i ei.’ Fano ei au o mulumulu oku mata i kona, 'kite ei au.” 12Tela, fai atu ei latou ki a ia, “Tefea la te tagata tena?” Ne tali mai a ia, “E se iloa ne au.”

Ko Sukesuke ne Falesaio me ne 'Lei Pefea Ona Mata

13Ne aumai ne latou ki Falesaio te tino kivi. 14Ko te Sapati ne palu ei ne Iesu te pela o faka'pula ona mata. 15Ne toe fesili foki Falesaio ki a ia, me ne 'pula pefea ona mata. Ana muna ki a latou, “Ne nini ne ia oku mata ki pela ko oti ne palupalu, 'mulu ei oku mata, tenei ko kite ei au.” 16Muna a nisi Falesaio, “E se mai te Atua te tagata nei, i te mea e se tausi ne ia te Sapati.” Muna a nisi tino, “E mafai pefea ne se tagata agasala o fai ne fakailoga pena?” Tela, vaelua ei latou.

17Ne toe muna atu a Falesaio ki te tino kivi, “Se a tau mau e uiga mo ia, me ne faka'pula ne ia ou mata?” Ana muna, “Se pelofeta eiloa a ia.” 18Kae ne seki talitonu tino Iutaia ki a ia, me ko ia tela ne kivi, ka ko toe kite ona mata, ke oko eiloa ki te taimi ne ami ei ona matua ne latou. 19Kae ne fesili latou ki a laua, “Kote lua tama tenei, tela ne fai mai koulua me ne kivi eiloa i te fanaumaiga? Kae ne kite pefea?” 20Ne tali mai ona matua ki a latou, “Ko iloa ne maua me ko te ma tama tenei, kae e iloa tonu foki eiloa ne maua me ne fanau mai e kivi. 21Kae ne kite pefea, e se iloa ne maua me ko oi ne faka'pula ne ia ona mata. Fesili atu ki a ia me ko matua. E mafai eiloa ne ia o tali mai.” 22Ne fai atu pena ne ona matua, i te mea ne ma'taku laua i tino Iutaia; me ko iku i te lotou filifiliga, me kafai e taku atu ne se tino i a Iesu ko te Keliso, e tuli keatea mai te fale tapuaki. 23Tena te mea ne fai atu ei pena ona matua, “A ia ko matua, fesili atu ki ei.”

24Ne toe ka'laga latou i te fakalua ki te tino kivi, kae fai atu ki a ia, “Avatu te vikiga ki te Atua; kae se ko Iesu, me e iloa ne matou i a Iesu se tagata agasala.” 25Ne tali mai a ia, “E se iloa ne au me i a ia se tagata agasala me ikai, kae tasi fua te mea e iloa ne au, au ne kivi muamua, kae nei ko kite.” 26Ne toe muna atu latou ki a ia, “Se a tena mea ne fai ki a koe? Kae ne fai foki pefea ne ia ke 'pula ou mata?” 27Ne tali mai a ia ki a latou, “Ko palele ne taku atu ne au ki a koutou, kae ne seki faka'logo mai eiloa koutou. Kae se a foki te mea ko toe fia faka'logo mai ei koutou? E ma'nako koutou ke fai koutou mo ona soko?” 28Ne muna masei latou ki a ia kae fai atu, “Ko koe tena ko tona soko; ka ko matou ko soko o Mose. 29E iloa ne matou i te Atua ne faipati ki a Mose, kae se iloa ne matou me ne vau mai i fea a te tagata tenei.” 30Ne tali mai a ia, “Ko ofo toku loto i te mea tenei, me se iloa ne koutou me ne vau a ia mai i fea, ka ko faka'pula ne ia oku mata! 31E iloa ne tatou i te Atua e se fakalogo ki tino agasala; kae fakalogo ki tino kola e ava ki a ia kae fai foki ne latou tona loto. 32Talu mai te kamataga o te lalolagi, ne seki lagona eiloa me isi se tagata ne faka'pula ne ia a mata o se tino ne fanau mai e kivi. 33Moi se vau mai te Atua te tagata tena, e se mafai ne ia o fai se mea e tasi.” 34Ne tali mai latou ki a ia, “Ne fanau mai koe e fonu i te agasala, kae vau koe o akoako mai matou?” Tela, atuli ei ne latou a ia ki tua.

Ko te Kivi Faka te Agaga

35Ne logo Iesu me ko oti ne atuli a ia ne latou ki tua; kae i te la fetauiga, fai atu ei ki a ia, “E a, e talitonu koe ki te Tama a te Tagata?” 36Ne tali mai a ia, “Te Aliki, ko oi a ia; ko te mea ke talitonu au ki a ia?” 37Ne fai atu Iesu ki a ia, “Ko oti ne matea ne koe a ia, ka ko ia foki eiloa tenei e sau'tala mo koe!” 38Ne fai atu a ia, “Te Aliki, au ko talitonu.” Ifo ei a ia ki a Iesu.

39Muna a Iesu, “Au ne vau ki te lalolagi nei o fakamasino, ko te mea ko tino kivi ke 'kite; ka ko tino 'kite ke kivi.” 40E isi ne Falesaio ne i kona kae ne lagona ne latou a muna konei, fai mai ei ki a ia, “A matou foki e 'kivi?” 41Muna a Iesu ki a latou, “Moi fai ne 'kivi otou mata, kati ko seai ne otou agasala; kae fai mai nei koutou, ‘A matou e se 'kivi omotou mata,’ tela la, e tumau eiloa koutou i te agasala.”

Currently Selected:

IOANE 9: Tusi Tapu

Highlight

Copy