IOANE 8
8
Ko te Fafine ko Taia i te Tulafono o te Mulilua
1Ne 'foki atu katoa a tino ki olotou fale, ka ko Iesu ne fano ki te mauga o Olive. 2Ka koi taeao pogipogi, a ia ne fano ki loto i te Fale Tapu, kae ne o'mai ki a ia a tino katoa; nofo ei a ia ki lalo, kamata eiloa o akoako atu ki a latou. 3Ka ko faiakoga o te Tulafono mo Falesaio, ne aumai ne latou te fafine ne maua atu e mulilua, kae ne fakatu a ia i olotou mua. 4Ko muna mai latou ki a Iesu, “Te faiakoga, a te fafine tenei ne maua tonu eiloa e mulilua. 5#Levi 20.10; Teu 22.22-24A te fakatonuga a Mose ki a tatou i te Tulafono, ke peipei ki fatu a tino e amioga pena; kae se a la tou taofi?” 6Ko fai mai latou pena o tofotofo Iesu, ko te mea ke maua ne latou se mea ke 'moli ei ne latou a ia. Ka ko Iesu ne punou ki lalo, kae ne tusitusi tena maikao i te laukele. 7Ka ko latou ne fesili mai faeloa ki a ia, toe fakapela ake ei ki luga, kae muna atu ki a latou, “Ko te tino tela e seai sena agasala i a koutou na, ke muamua la o pei ne ia se fatu ki te fafine.” 8Tela la, ne toe punou ifo a ia, kae tusitusi i te laukele. 9I te lagonaga ne latou te muna tena a Iesu, solo takitokotasi ei latou o olo ki tua, e kamata mai i te tino tafamatua. Ko Iesu eiloa mo te fafine tela e tu i ona mua ne 'toe mai. 10Ne toe fakapela ake a Iesu ki luga, lavea ei ne ia me ko seai se tino kae na ko te fafine, ana muna, “Te fafine, ko fea tino kola ne 'moli mai ne latou a koe? E isi se tino kai fakasala ne ia koe?” 11Ne tali mai a ia, “Te Aliki, e seai eiloa se tino.” Muna atu ei a Iesu ki a ia, “E pena foki au, e se fakasala foki ne au koe; fano la kae sa toe agasala.”)#8.11: E uke a tusitusiga mo lomiga taumua e seai iei a foaitau konei (8.1-11); ko nisi lomiga e maua iei a foaitau konei mai tua o te Ioane 21.24; kae ko isi lomiga e maua mai tua o Luka 21.38; tasi o lomiga e maua mai tua o te Ioane 7.36.
A Iesu ko te Mainaga o te Lalolagi
12 #
Mata 5.14; Ioa 9.5 Ne toe faipati atu a Iesu ki a latou penei, “Ko au ko te mainaga o te lalolagi: ko te tino e tautali mai ki a au, e se sasale a ia i te pouliga, kae ka maua ne ia te mainaga o te ola.” 13#Ioa 5.31Muna atu ei Falesaio ki a ia, “A koe e molimau eiloa ki a koe; e se tonu foki tau molimau.” 14Ne tali atu a Iesu ki a latou, “Ikai, e tusa eiloa me molimau au ki a au eiloa, e tonu eiloa taku molimau; me e iloa ne au a te koga ne vau au i ei, mo te koga ka fano au ki ei; kae se iloa ne koutou te koga ne vau au i ei, mo te koga ka fano au ki ei. 15A koutou e fakamasino faka te foitino; kae se fakamasino ne au se tino. 16Kae kafai e fakamasino au, e tonu taku fakamasinoga; me e se ko au fua tokotasi, ka ko maua mo te Tamana tela ne uga mai ne ia au. 17#Teu 19.15E tusi i te otou Tulafono me tonu te molimau a te tokolua. 18Au e molimau ki a au eiloa, ka ko te Tamana tela ne uga mai ne ia au, e molimau foki ki a au.” 19Olotou muna ki a ia, “Tefea tou Tamana?” Ne tali atu a Iesu, “E se iloa ne koutou au, e se iloa foki ne koutou toku Tamana; moi fai ne iloa ne koutou au, e penei ko iloa ne koutou toku Tamana!”
20A muna konei, ne fai atu ne Iesu i te potu tela e teu ei tupe, i te taimi ne akoako ei a ia i te Fale Tapu; kae e seai eiloa se tino ne puke ki a ia, i te mea e seki oko ki tona taimi tonu.
E se Mafai ne Koutou o Olo ki te Koga e Fano Au ki ei
21Ne toe muna atu a Iesu ki a latou, “Au ka fano keatea, ko 'sala ei koutou ki a au, kae ka 'mate koutou i otou agasala. Ko te koga e fano au ki ei, e se mafai ne koutou o olo atu ki ei.” 22Muna a tino Iutaia, “Ne fai mai ana muna, ‘E se mafai ne koutou o olo ki te koga e fano au ki ei.’ Ko te uiga la o tena muna tenei, me ka tamate a ia ne ia eiloa?” 23Ne tali atu a ia ki a latou, “koutou ne tino mai lalo nei, ka ko au se tino mai luga; a koutou ne tino o te lalolagi nei, ka ko au e se se tino o te lalolagi nei. 24Tena te pogai ne fai atu ei au ki a koutou, me ka 'mate koutou i otou agasala, kae ka 'mate eiloa koutou i otou agasala, manafai e se talitonu mai eiloa koutou me ‘Ko Au Tenei Ko Ia.’ ” 25Ne muna mai latou ki a ia, “Ko oi koe?” Ne tali atu a Iesu ki a latou, “E pela eiloa mo taku faiatuga ki a koutou mai te kamataga.#8.25: E pela mo taku faiatuga mai te kamataga; io me Kai a e 'tau i ei o faipati atu au ki a koutou? 26E uke a mea e fia faipati ei au ki a koutou, e uke foki a mea e fia fakamasino ne au; ka ko ia tela ne uga mai ne ia au, e tonu eiloa a ia. Ko taku atu ne au ki te lalolagi a mea ne lagona ne au mai i a ia.”
27Ne seki maina i a latou i a ia ne faipati atu ki a latou e uiga ki te Tamana. 28Tela, muna atu ei a Iesu ki a latou, “Kafai ko palele ne sisi ake ki luga ne koutou au te Tama a te Tagata, ko iloa ei ne koutou me ‘Ko Au Tenei Ko Ia,’ kae se fai fua ne au se mea; e taku atu fua ne au a mea kola ne akoako mai ne toku Tamana ki a au. 29Ka ko ia tela ne uga mai ne ia au, e 'nofo tasi maua; me i te Tamana ne seki tuku mai ne ia au ke nofo tokotasi, me fai sale eiloa ne au a mea kola e fiafia a ia ki ei.” 30I te faipatiga ne ia a muna konei, e tokouke a tino ne talitonu ki a ia.
Ko Tino Saoloto mo Pologa
31Ne faipati atu a Iesu ki tino Iutaia kola ne talitonu ki a ia, “Kafai e faka'logo koutou ki aku akoakoga, ko oku soko tonu koutou. 32Ka iloa ne koutou te munatonu, ko te munatonu foki ka fakasaoloto ne ia koutou.” 33#Mata 3.9; Luka 3.8Ne tali mai latou ki a ia, “A matou nei ne 'tupu mai i a Apelaamo, kae ne seki pologa eiloa i se tino. Kae pefea eiloa o fai mai koe, ‘Ka fakasaoloto koutou’?” 34Ne tali atu a Iesu ki a latou, “Au e muna tonu atu ki a koutou, ko te tino tela e fai ne ia te agasala, ko te pologa a te agasala. 35A te pologa foki, e se nofo tumau eiloa i te fale, ka ko te tama tonu e nofo tumau eiloa i ei ke oko ki te se gata mai. 36Tela la, kafai ko te Tama e fakasaoloto ne ia koutou, ko te mea eiloa ko maua te otou saolotoga tonu. 37E iloa ne au i a koutou ne 'tupu mai i a Apelaamo; ka ko koutou e fia tamate ki a au, i te mea e se talia ne koutou taku muna. 38Au e faipati ki mea ko oti ne lavea ne au i toku Tamana; ka ko koutou e fai a mea ko oti ne lagona ne koutou mai te otou tamana”
39Ne tali mai latou ki a ia, “A Apelaamo ko te motou tamana.”Muna a Iesu, “Kafai koutou ko tama a Apelaamo, ke fai la ne koutou#8.39: Moi ne fai ko koutou … ka fai ne koutou; I nisi lomiga e fai peneiMoi fai ko koutou … fai. galuega a Apelaamo. 40Kae nei, a koutou e fia tamate ki a au tela ko oti ne faipati atu ki a koutou i te munatonu ne lagona ne au mai te Atua. E se fai pena Apelaamo! 41Ko fai ne koutou a faifaiga a te otou tamana.” Ne tali mai latou, “E se ne tama sala matou; e tokotasi te motou Tamana, ko te Atua.” 42Muna a Iesu ki a latou, “Kafai ko te Atua te otou Tamana, e penei la ko alofa mai koutou ki a au, me i a au ne vau mai te Atua kae ne vau ki konei; ne seki vau foki au i a au eiloa, ka ko au ne uga mai ne ia. 43Ai a e se maina ei koutou i aku muna? I te mea, e se fia faka'logo koutou ki ei. 44A koutou ko fanau a te otou tamana ko te tiapolo, kae fai foki ne koutou a mea e manako malosi ki ei te otou tamana. A ia se tino tatino eiloa mai te kamataga, kae ne seki tumau i te munatonu, me e seai se munatonu e i loto i a ia. Kafai e faipati ki se muna loi, ko ana pati eiloa kona e faipati ki ei; me i a ia se tino loi, ka ko te tamana foki eiloa o tino 'loi. 45Au e muna tonu atu ki a koutou, me tena te mea e se talitonu mai ei koutou ki a au. 46Ko oi se tino o koutou e mafai o fakaasi mai ne ia taku agasala? Kae kafai e faipati au ki te munatonu, ai a la e se talitonu ei koutou ki a au? 47Ko te tino tela e vau mai te Atua, e fakalogo ki muna a te Atua; tena te mea e se fakalogo ei koutou, i a koutou e seki o'mai mai te Atua.”
Ko Iesu mo Apelaamo
48Ne tali mai tino Iutaia ki a ia, “E se tonu te motou pati i a koe se tino Samalia, kae e isi foki se temoni i a koe?” 49Ne tali atu a Iesu, “E seai se temoni i a au, ka ko au e ava ki toku Tamana, ka ko koutou e se ava ki a au. 50Au e se salasala ki soku tavaega, kae isi se tino e sala ki ei, ko ia foki tena ko te famasino. 51Au e muna tonu atu ki a koutou: kafai se tino e tausi taku muna e se mate eiloa a ia.” 52Ne muna mai tino Iutaia ki a ia, “Ko iloa nei ne matou me isi se temoni i a koe! Apelaamo mo pelofeta ko 'mate; kae pefea eiloa o fai mai koe, ‘Kafai se tino e tausi taku muna e se mate eiloa a ia.’ 53E sili atu koe i te motou tamana ko Apelaamo tela ko mate? Ko 'mate foki pelofeta! Ka ko oi la koe i tou taofi?” 54Ne tali atu a Iesu, “Kafai e tavae au ki a au eiloa, e se aoga taku tavaega. A ia tela e tavae ne ia a au, ko toku Tamana, ko ia tonu eiloa tela ne fai mai ei koutou me ko te otou Atua. 55E seki iloa ne koutou a ia, kae e iloa ne au a ia. Kafai e fai ake au pela me se iloa ne au a ia, ko taku ei au se tino loi e pela mo koutou. Kae iloa tonu ne au a ia, kae fakalogo foki au ki ana muna. 56Ne fiafia foki te otou tamana ko Apelaamo o kilo ki toku aso. Ne kilo ki ei kae ne fiafia.” 57Muna a latou ki a ia, “E seki katoa te lima sefulu ou tausaga, kae ne lavea ne koe pefea Apelaamo?”#8.57: ko oti ne lavea ne koutou a Apelaamo?; i nisi lomiga e fai pela e mata a Apelaamo ne matea ne ia a koutou?
58Muna a Iesu ki a latou, “Au e muna tonu atu ki a koutou; ka koi tuai o fanau Apelaamo ka ko iai au.”
59Ne puke ne latou a fatu o pei ki a ia, fakagalo ake ei a Iesu o fano ki tua mai te Fale Tapu.
Currently Selected:
IOANE 8: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
