IOANE 13

Ko Mulumulu ne Iesu a Vae o Ona Soko

1A te aso nei ko te aso mai mua o te 'Kaiga o te Paseka. Ko iloa ne Iesu me ko oko ki te taimi ka tuku ei ne ia te lalolagi nei, kae fanatu ki tena Tamana. Ne lagona ne ia te alofa ki ona tino i te lalolagi, kae alofa foki eiloa a ia ki a latou ke oko ki te fakaotiga.

2Ka koi 'kai Iesu mo ona soko. A te Tiapolo ko oti ne filifili ne ia a Iuta te tama a Simona te Isikaliota, ke fakalata ne ia a Iesu.#13.2: Te Tiapolo … fakaosooso a Iesu; io me Te Tiapolo ko oti ne filifili ne ia a Iuta, te tama a Simona te Isikaliota, ke fakalata ne ia a Iesu. 3Ko iloa 'lei ne Iesu me ko tuku mai ne te Tamana ki a ia te pule katoatoa i mea katoa. A ia ne vau mai te Atua, kae ka toe fanatu foki ki te Atua. 4Tela, ne tu ake ei a ia ki luga ka koi fai te 'kaiga, ne tapale keatea ona gatu tafa ki tua, kae 'sai ne ia te solo ki tena taugasulu. 5Ne 'ligi ne ia te vai ki te kautali fano, kae kamata eiloa o mulumulu ne ia vae o ona soko. Ne fakamalo ne ia ki te solo tela ne 'sai i tena taugasulu. 6Ko oko atu a ia ki a Simona Petelu, ko ia tela ne fai mai ki a ia, “Te Aliki, e a e mulumulu eiloa ne koe oku vae?” 7Ne tali atu a Iesu ki a ia, “A te mea ko fai ne au, e se iloa nei ne koe, kae ka iloa ne koe fakamuli.” 8Ne fai mai Petelu ki a ia, “E se mafai lele eiloa ne koe o mulumulu oku vae i so se taimi.” Ne tali atu a Iesu, “Kafai e se mulumulu ne au ou vae, e se fai koe mo oku soko!” 9Ne fai mai Simona Petelu, “Te Aliki, sa 'mulugina fua ko oku vae, ka ko oku lima foki, e pela foki mo toku ulu katoa.” 10Ne tali atu a Iesu, “A ia tela ko oti ne koukou, ko 'ma katoa tona foitino, kae se toe manako o toe mulumulu a ia, ka ko ona vae fua.#13.10: I nisi lomiga e se sae iei vagana i ei, ko olotou vae. A koutou e 'ma, kae se ko koutou katoa.” 11Ko leva ne iloa ne Iesu a te tino tela ka fakalata ne ia a ia; tena te mea ne fai atu ei a ia, “A koutou katoa e 'ma, kae na ko te tokotasi fua.”

12 # Luka 22.27 Mai tua ifo o te mulumuluga o olotou vae, ne toe pei a gatu o Iesu kae toe foki ki tena nofoga i te laulau 'kai. Ne fesili atu a ia, “Ko maina i a koutou a te mea tela ko oti ne fai ne au ki a koutou? 13Ko fakaigoa mai au ne koutou ko te Faiakoga mo te Aliki, e tonu foki eiloa te mea tena e fai mai ne koutou, me ko au eiloa. 14Ko au ko te otou Aliki mo te otou Faiakoga, kae ne fatoa oti atu eiloa ne mulumulu ne au otou vae. E 'tau la mo koutou o fakatau mulumulu otou vae. 15Ko avatu ne au te fakaakoakoga mo koutou. Tela la, e 'tau mo koutou o fai pela mo te mea ko oti ne fai ne au ki a koutou. 16#Mata 10.24; Luka 6.40; Ioa 15.20E taku atu ne au a te tonuga ki a koutou: e se sili atu te tavini i lo tena pule; e se sili atu foki te avefekau i a ia tela e a ia te fekau. 17Ko iloa nei ne koutou a te mea tonu; amutia koutou manafai e fai ne koutou!

18 # Sala 41.9 “Au e se faipati e uiga ki a koutou katoa; me ko iloa ne au a latou kola ko palele ne filifili ne au; ko te mea ke fakaoko ei a muna a te Tusi penei, ‘A te tino tela ne kai ki aku meakai, ko fia taua mai ki a au.’ 19Ko fai atu ne au nei ki a koutou a te mea tenei, ka koi tuai o oko mai, me kafai e oko mai ko talitonu ei koutou me ‘Ko Au Tenei Ko te Keliso.’ 20#Mata 10.40; Male 9.37; Luka 9.48; 10.16Au e muna tonu atu ki a koutou, a te tino e talia ne ia a te tino e uga atu ne au, e talia ne ia au; a te tino foki e talia ne ia au, e talia ne ia a ia tela ne uga mai ne ia au.”

Ko 'Valo ne Iesu a Tona Fakalataga

(Mata 26.20-25; Male 14.17-21; Luka 22.21-23)

21I te palelega ne faipati atu ne Iesu a mea konei, ne lagona ne ia te fi'ta o tena mafaufau kae takutonu atu ki a latou: “Au e muna tonu atu ki a koutou, se tokotasi mai i a koutou ka fakalata ne ia au.” 22Ne fakatau kilo'kilo ei latou mo te 'segi me ko oi e fakasino ki ei ana pati. 23A te soko e tokotasi, tela e alofa a Iesu ki ei, ne nofo pili ki ona tafa. 24Ne kalokalo atu te ulu o Simona Petelu ki te soko tena kae fai atu, “Fesili ki a ia me ko oi e fakasino ki ei tena faipatiga.” 25Tela la, ne soloki atu eiloa a ia ke pili ki tafatafa o Iesu, kae fesili, “Te Aliki, ko oi?” 26Ne tali atu Iesu, “A ia tela e avatu ne au ki ei te falaoa, manafai ko oti ne 'fui ne au; ko ia tena.” Ne pena eiloa o puke ne ia mo falaoa, 'fui, kae tuku atu ki a Iuta te tama a Simona te Isikaliota. 27I te otiga ne kai Iuta i te falaoa, ulu ei Satani ki loto i a ia. Ne fai atu a Iesu ki a ia, “A te mea tela e mafaufau koe o fai, na fai nei eiloa!” 28E seai eiloa se tino i a latou kola e i te laulau 'kai, ne maina i te mea ne fai atu ei a Iesu ki a ia. 29E taofi nisi me ko ala o faipati atu a Iesu pena, ona ko Iuta e nofo mo te tagatupe, ke na 'togi mai ne mea e 'tau mo latou i te 'kaiga; io me avatu se mea ki tino ma'tiva. 30Ne talia ne Iuta te falaoa, fano fakavave ei ki tua; ka ko po i te taimi tenei.

Ko te Poloakiga Fou

31I te fanoga ki tua a Iuta, fai atu a Iesu ki ona soko penei, “Nei, ko vikia au te Tama a te Tagata, ko vikia foki te Atua i a au. 32Kafai e vikia te Atua i a au, e vikia foki au ne te Atua, ka ko au ko vikia nei eiloa. 33#Ioa 7.34Aku tamaliki, ko se uke nei aso e fakatasi ei tatou, ka 'sala au ne koutou; kae taku atu nei ne au ki a koutou pela mo aku muna ki a Iutaia, ‘A te koga tela e fano au ki ei, e se mafai ne koutou o olo ki ei.’ 34#Ioa 15.12,17; 1Ioa 3.23; 2Ioa 5E avatu ne au ki a koutou te poloakiga fou: ke fakatau a'lofa koutou. E pela mo au e alofa ki a koutou; tela la, e 'tau mo koutou o fakatau a'lofa. 35Tena te mea e iloa ei ne tino katoa ko oku soko koutou, manafai e fakatau alofa koutou!”

Ko 'Valo ne Iesu i a Petelu ka Fakafiti

(Mata 26.31-35; Male 14.27-31; Luka 22.31-34)

36Ne fesili mai Simona Petelu ki a Iesu, “Te Aliki, ka fano koe ki fea?” Ne tali atu a Iesu, “Ko te koga e fano au ki ei, e se mafai ne koe o tautali mai i a au, kae ka tautali mai koe ki a au fakamuli.” 37Muna a Petelu, “Te Aliki, ai a e se mafai ei ne au o tautali atu nei i a koe? Au ko toka o 'mate fakatasi mo koe!” 38Ne tali atu a Iesu, “E tonu eiloa i a koe ko toka o mate mō au? Au e muna tonu atu ki a koe: ka koi tuai o tagi te moa, ka fakafiti fakatolu koe me se iloa ne koe au.”

Currently Selected:

IOANE 13: Tusi Tapu

Highlight

Copy