Luu 3

Chɔɔn bla̍ Nyɔsoa-a tìh

(Matio 3.1-12; Maɛ 1.1-8; Chɔɔn 1.19-28)

1Taɛbiwleɔ nu̍-a Wloma nyɔ̍-a Bloa̍ Joi-ɛ, ɛ̍ sɔ̀nᵻá pùè jɔ̌ m̀m̌ naɛ laa̍, nɛ̀ Pɔntiɔ Pale bo ɔ̀ nu̍ kɔ̀mla̍ dǒ Judia bloa̍ we̍. Wɛ̀ Ɛlo blě Kaladii bloa̍. Iě ɔ̍ deǐ Felɔ blě dě Itowlia ke Tlakɔnaita fɔɔ. Wɛ̀ Lasana blě Abileni bloa̍. 2Nɛ̀ Anna ke Kaifa nu̍ Nyɔsoa-a slaǎ sà nyɔ̍-a dlǔtuᵻ. Dǒ Nyɔsoa dbo̍-e ɔ̍ tu̍owli dě Sɛɛkewlaɛɔ-a jǔ Chɔɔn we̍ dě kwlǎslò we̍. 3Iě Chɔɔn ple̍ bloa̍ kli̍hgbɛ̍ nɛ-a Jɔɔdɛn nǐ wɔ̍i̍n-ɛ kɛ̍n i̍, ɔ̍ bla̍ Nyɔsoa tìh. Ɔ̍ la̍a̍, “Mɔ̀ poe mɔ̀-a gblɛ̍n sɔ̀ɛ̀n kɛ̍n i̍, mɔ̀ iě nǐ dlǔ po̍. Nɛ̀ Nyɔsoa-a mu̍ mɔ̀-a gblɛ̍n sɔ̀ɛ̀n-a tìh i̍ tǎli.” 4Kǎ ɛ̍ nu̍ ka chlǐh-ɛ dě Nyɔsoa-a tu̍owli po̍ nyɔ̍ Asaia-a chlǐh-dɛ̍ di̍i̍, ɛ̍ la̍a̍,

“Nyɔ̍-a we̍le-e dě kwlǎslò we̍, ɔ̍ la̍a̍,

‘Mɔ̀ po̍ wìè gba̍a̍ dǒ Joi we̍,

mɔ̀ slɛ̌-ɛ ɛ̍ i̍ dǒ ɔ̍ we̍.

5Tɔ̀ùn dlǔᵻá kli̍hgbɛ̍-a mu̍ jǐ-ɛ,

tlu̍hᵻ kli̍hgbɛ̍-a mu̍ i̍ pɛ̍lɛ-ɛ.

Wìè ɛ̀ klǐ-ia i̍-ɛ, ɛ̍ mu̍ i̍ slɛ̌-ɛ,

iě ɛ̀ klìma̍-a ja̍i̍-ɛ, ɛ̍ iě pɛlɛpɛ nɛ.

6Nyɔ̍ kli̍hgbɛ̍-a mu̍ ka Nyɔsoa-a mu̍-a nyɔ̍ sèìe-ɛ nu̍-ɛ jě.’ ”

7Wɛ̀ ɔ̍ la̍a̍ dě nyɔ̍ dɔu ùh ji̍-a dě ɔ̍ we̍ ùh iě-a nǐ dlǔ po̍-ɛ we̍, “Mɔ̀ na̍a̍ mɔ̀ flɔn di̍i̍ i̍ kǎ mɔ̀ dǎ. Nyɔ̍ kàn gbɛ̍n-ɛ ɛ̀ Nyɔsoa-a mu̍-a dbo̍-ɛ, mɔ̀ jajeɛ̍ mɔ̀-a mu̍ ɛ̍ i̍ pǔh de ae? 8Mɔ̀ nu̍ dɛ̍ᵻ i̍h iě ɛ̍ to ka mɔ̀ poe-a gblɛ̍n sɔ̀ɛ̀n kɛ̍n i̍ wɛ̀-ɛ. Mɔ̀ bɔ̌ ka nu̍, ‘Àɔ̀ Eblaɛɛn-a nynuu̍, nɛ̀ Nyɔsoa se̍ à kàn gbɛ̍n mu̍,’ ɛ̍ nɔ̀ɔ̍, mɔ̀ bɔ̌ ɛ̍ dě di̍i̍ i̍ po̍-ɛ, dɛ̍nu̍ɛ, Nyɔsoa bɛ̌ɛ sɔɔ̌ᵻ la Eblaɛɛn-a nynuu̍ we̍i̍ nu̍-ɛ. Ɛ̍ kɔn ǎn sèàɛ̍ mɔ̀ wlùh, 9tòɛ̀-a chɛ̀ jě ti̍ wɛ̀ kaka ɛ̍ iě tu̍ᵻ bloɔ̍ gblǔn i̍. Ɛ̍ tìh-ɛ, tu̍ jɛ se̍-a buǒᵻ chɛ̀ po̍-ɛ, nɛ̀ ɛ̍ mu̍ dba̍-ɛ, wɛ̀ u̍h iě ɛ̍ jlǐh po̍.”

10Wɛ̀ nyɔ̍ tlùgbei̍ laa̍ u̍h tèle ɔ̍ i̍. U̍h la̍a̍, “Wɛ̀ nɛ̀ dɛ̍ à iě nu̍ ɛ?”

11Iě ɔ̍ sà u̍h-a wlu̍ pɔ̀n we̍. Ɔ̍ la̍a̍, “Nyɔ̍ ɔ̀ blě-a wola̍ᵻ sɔɔ̌n-ɛ, ɔ̍ nyǐ nyɔ̍ ɔ̀ se̍-a wola̍ blě-ɛ due. Nɛ̀ nyɔ̍ ɔ̀ blě-a di̍-dɛ̍ᵻɛ́, kǎ ɔ̍ iě nu̍ ke.”

12Nɛ̀ taa̍sìh sà nyɔ̍ ji̍ nǐ dlǔ po̍ la̍ ke. Iě u̍h la̍a̍ dě Chɔɔn we̍, “Dlǔtu, dɛ̍ à iě nu̍ ɛ?”

13Wɛ̀ ɔ̍ la̍a̍ dě u̍h we̍, “Pò kɔ̀mla̍ tba̍ dɛ̍ mɔ̀ iě sà-ɛ, nɛ̀ mɔ̀ bɔ̌ ɛ̍ dɛ̍ dɛɛ kɛ̍n po̍-ɛ.”

14Fledlǔ tèle ɔ̍ i̍ ke, u̍h la̍a̍, “Àɔ̀ nɔ̀ɔ̍-ɛ, dɛ̍ à iě nu̍ ke ɛ?”

Iě ɔ̍ la̍a̍ dě u̍h we̍, “Mɔ̀-a pɔluh pɛ̌n i̍ dǒ mɔ̀-a pɛ̌ɛ la we̍. Mɔ̀ bɔ̌ nyɔ̍-a kloǒ nu̍-ɛ, wɛ̀ mɔ̀ bɔ̌ ɔ̍ dɛ̍ kwa̍a̍ sà-a. Iě mɔ̀ wɔ̍ bɔ̌ nyɔ̍ si̍h i̍ tùi-ɛ ke.”

15Nyɔ̍ kli̍hgbɛ̍ u̍h jajeɛ̍ Chɔɔn bo ɔ̀ nu̍ Nyɔsoa-a Chèɛ̀ Tba̍ju de, iě u̍h-a pu̍e̍e ɛ̍ wlùh i̍. 16Wɛ̀ Chɔɔn la̍a̍ dě u̍h kli̍hgbɛ̍ we̍, “Ǎn po̍ mɔ̀ nǐ dlǔ dǒ nǐ we̍, jɛ jɔ mu̍-a ji̍-ɛ, ɔ̍ gbǐh bɛ̌ i̍ ɛ̍ sìì naɛ̍. Ǐn se̍ i̍ blaɛ iě ɔ̍ bu̍hdih-a chɛ̀ kwa̍ blě. Ɔ̍ nɔ̀ɔ̍, ɔ̍ mu̍ mɔ̀ nǐ dlǔ po̍ dǒ Nyɔsoa-a Sùù ke nɛ̍ we̍. 17Ɔ̍ blě dɛ̍ i̍ bla̍ tu̍ kwa̍ wɛ̀ ɔ̍ iě dɛ̍ i̍ bla̍. Wɛ̀ ɔ̍ iě kwǐ kɛnɛ̌-a chɛ̀ dě ɔ̍ slǎ po̍. Jɛ ɔ̍ mu̍ i̍h-a fli̍h dě nɛ̍ ɛ̀ se̍-a mɔ̌ la̍ kɔn-ɛ di̍i̍ po̍.”

18Chɔɔn po̍ u̍h gbǐh ku̍u̍ kaa̍, iě ɔ̍ bla̍ pɔ̀n chɛ̀ dě nyɔ̍gbei we̍. 19Jɛ Chɔɔn wlu-i kɔ̀mla̍ Ɛlo we̍. Dɛ̍nu̍ɛ, ɔ̍ dǔ Ɛlodia ɔ̀ nu̍-a ɔ̍ fɛ̀i̍n-a nynɔ̌-ɛ, ɛ̍ ke dɛ̍ᵻ sɔ̀nᵻ kli̍hgbɛ̍ ɔ̍ nu̍-aɛ ke. 20Wɛ̀ ɔ̍ po̍ Chɔɔn kasoo. Sɔ dɛ̍ᵻ sɔ̀nᵻá chɛ̀ bo ɔ̍ poe pùla̍ dlǔ.

Chɔɔn po̍ Jusu nǐ dlǔ

(Matio 3.13-17; Maɛ 1.9-11)

21Nyɔ̍ kli̍hgbɛ̍ wɔ̀-a nǐ dlǔ po̍-ɛ, wɛ̀ Jusu po̍ nǐ dlǔ ke. Ɔ̍ nɛ dǒ ba̍le la̍ wɛ̀ ja̍u̍n pɔ̀ni wɔ̍i̍n. 22Iě Nyɔsoa-a Sùù nɛ dě gbɔ̀lǐh-a tu̍ di̍i̍, wɛ̀ ɛ̍ ji̍ wlù dǒ ɔ̍ kɛ̍n. Wɛ̀ wlu̍ sɔ dě ja̍i̍wlɔ̀, ɛ̍ la̍a̍, “Mɔ̀ ǎn tìh kma Jǔ, ǎn wlùh tè i̍ dǒ ìn we̍.”

Jusu-a chɛ̌gba la

(Matio 1.1-17)

23Ti̍ Jusu tè-a ɔ̍ dbo̍ nu̍-ɛ gbɔ̀-ɛ, nɛ̀ ɔ̍ sɔ̀nᵻ bɛ̌ɛ kwela ta̍a̍n nu̍-ɛ wɛ̀. Ɔ̍ nyɔ̍-a jǔ dɛ laa̍, nɛ̀ Josɛ bo nyɔ̍ɔ ju̍o̍e ɔ̍. Wɛ̀ Josɛ nu̍ Ɛli-a jǔ. 24Ɛli nu̍ Matɔ-a jǔ, Matɔ nu̍ Liifaɛ-a jǔ, Liifaɛ nu̍ Mɛoki-a jǔ. Mɛoki nu̍ Chana-a jǔ, wɛ̀ Chana nu̍ Josɛ-a jǔ. 25Josɛ nu̍ Matataia-a jǔ, Matataia nu̍ Emɔ-a jǔ, Emɔ nu̍ Neɔn-a jǔ, Neɔn nu̍ Ɛsli-a jǔ, iě Ɛsli nu̍ Nakai-a jǔ. 26Nakai nu̍ Maaɛ-a jǔ, Maaɛ nu̍ Matataia-a jǔ, Matataia nu̍ Sɛmɛin-a jǔ, Sɛmɛin nu̍ Joseɛ-a jǔ, iě Joseɛ nu̍ Jodɔ-a jǔ. 27Jodɔ nu̍ Joana-a jǔ, Joana nu̍ Wlisa-a jǔ, Wlisa nu̍ Sɛwlɔbɔbo-a jǔ, Sɛwlɔbɔbo nu̍ Seɛotiɔ-a jǔ, iě Seɛotiɔ nu̍ Nɛwli-a jǔ. 28Nɛwli nu̍ Mɛoki-a jǔ, Mɛoki nu̍ Adi-a jǔ, Adi nu̍ Kosam-a jǔ, Kosam nu̍ Eomadam-a jǔ, iě Eomadam nu̍ Ɛɛ-a jǔ. 29Ɛɛ nu̍ Jasua-a jǔ, Jasua nu̍ Ɛliisa-a jǔ, Ɛliisa nu̍ Jɔwlam-a jǔ, Jɔwlam nu̍ Matɔ-a jǔ, iě Matɔ nu̍ Liifaɛ-a jǔ. 30Liifaɛ nu̍ Simiɔ-a jǔ, Simiɔ nu̍ Juuda-a jǔ, Juuda nu̍ Josɛ-a jǔ, Josɛ nu̍ Jonam-a jǔ, iě Jonam nu̍ Ilaɛkɛm-a jǔ. 31Ilaɛkɛm nu̍ Mɛolia-a jǔ, Mɛolia nu̍ Mɛnɔ-a jǔ, Mɛnɔ nu̍ Matata-a jǔ, Matata nu̍ Netɛn-a jǔ, iě Netɛn nu̍ Depe-a jǔ. 32Depe nu̍ Jɛse-a jǔ, Jɛse nu̍ Obɛ-a jǔ, Obɛ nu̍ Boaa-a jǔ, Boaa nu̍ Saomɔ-a jǔ, iě Saomɔ nu̍ Naseɔn-a jǔ. 33Naseɔn nu̍ Aminada-a jǔ, Aminada nu̍ Amii-a jǔ, Amii nu̍ Ani-a jǔ, Ani nu̍ Ɛslɔn-a jǔ, Ɛslɔn nu̍ Pɛwlɛ-a jǔ, wɛ̀ Pɛwlɛ nu̍ Juuda-a jǔ. 34Juuda nu̍ Jekɔ-a jǔ, Jekɔ nu̍ Ase-a jǔ, Ase nu̍ Eblaɛɛn-a jǔ, Eblaɛɛn nu̍ Tɛwla-a jǔ, iě Tɛwla nu̍ Neɔ-a jǔ. 35Neɔ nu̍ Sɛwlu-a jǔ, Sɛwlu nu̍ Wleu-a jǔ, Wleu nu̍ Pɛlɛ-a jǔ, Pɛlɛ nu̍ Ibɔ-a jǔ, iě Ibɔ nu̍ Seɛla-a jǔ. 36Seɛla nu̍ Kɛna-a jǔ, Kɛna nu̍ Afasa-a jǔ, Afasa nu̍ Seɛm-a jǔ, Seɛm nu̍ Nɔa-a jǔ, iě Nɔa nu̍ Leimɛ-a jǔ. 37Leimɛ nu̍ Mɛtusla-a jǔ, Mɛtusla nu̍ Inɔ-a jǔ, Inɔ nu̍ Jawlɛ-a jǔ, Jawlɛ nu̍ Maalalii-a jǔ, iě Maalalii nu̍ Kɛna-a jǔ. 38Kɛna nu̍ Ino-a jǔ, Ino nu̍ Sɛɛ-a jǔ, Sɛɛ nu̍ Adaun-a jǔ, wɛ̀ Adaun nu̍ Nyɔsoa-a jǔ.

Currently Selected:

Luu 3: KDNT

Highlight

Copy