Luu 2

Kǎ Jusu nu̍ ka wlǔh-ɛ

(Matio 1.18-25)

1Dǒ ti̍ laa̍ di̍i̍ bo Wloma nyɔ̍-a Bloa̍ Joi Akɔslɔ poe telě u̍h iě nyɔ̍ kli̍hgbɛ̍ nɛ-a dǒ blǔh laa̍ kɛ̍n-ɛ slè. 2U̍h iě-a nyɔ̍ slè-ɛ i̍ sàɛ̀-ɛ, nɛ̀ Kɔwleneɔ bo ɔ̀ nu̍ kɔ̀mla̍ dǒ Siwlia bloa̍ kɛ̍n. 3Iě nyɔ̍ kli̍hgbɛ̍-a mu̍ nynɛ̌ po̍ la̍. Jɔ-ɛ, nɛ̀ ɔ̍ mu̍ dǒ ɔ̍ chɛ̀-a wlɔ̀ di̍i̍ ɔ̍ iě nynɛ̌ po̍.

4Wɛ̀ Josɛ sɔ dě Kaladii dǒ Naaslɔɛ wlɔ̀ di̍i̍, iě ɔ̍ mu̍ Judia dǒ Bɛfleɛɛn wlɔ̀ di̍i̍. Bɛfleɛɛn wlɔ̀ bo ɛ̀ nu̍ blǔh baa Depe-a wlɔ̀, wɛ̀ Josɛ nu̍ Depe-a tloemlai. Ɛ̍ kɔn ɔ̍ mu̍-o u̍h iě ɔ̍-o slè-e. 5Ɔ̍ wɔ̌an mu̍-u tìh-ɛ, ɔ̍ ke ɔ̍ sɛ̌ dlǔ tù nynɔ̌ Mɛle mu̍, nɛ̀ ɔ̍ nɛ kwlǐ. 6Dǒ u̍h nɛ wɛ̀ kwlǐ gbɛ̍n ɔ̍. 7Iě ɔ̍ sà ɔ̍ sàǐtòò gbàɔ̀n, ɔ̍ wlǔh-i jɔ̍gbau jǔ, wɛ̀ ɔ̍ pìàɛ̍n ɔ̍ jliɛ̍ i̍, iě ɔ̍ pɛ̌n-ɛ ɔ̍ i̍ dě bliᵻá di̍i̍ di̍-i gblòùn gbà di̍i̍. Dɛ̍nu̍ɛ, u̍h se̍ pɛ̌n la̍ jě dě dihwi̍h gbò di̍i̍.

Blawɛ̌ᵻ we̍ i̍ gbɛ̀n nyɔ̍ wɔ̌n Jusu-a wlǔh-u pɔ̀n

8Ɛ̍ wlù weɛ̍ laa̍ nɛ̀ blawɛ̌ᵻ we̍ i̍ gbɛ̀n nyɔ̍ nɛ dě pibǐ di̍i̍ u̍h-a tù u̍h-a blawɛ̌ᵻ jlǐhɛ̍ dě bloa̍-a fɔ̌ laa̍ we̍. 9Dǒ Joi-a ǐnchɔ̀ wlǔh-i u̍h kɛ̍n, iě Joi-a tìh-a i̍ bɛ̌-ɛa fa̍n u̍h de̍e̍ i̍. Sɔ ɛ̍ po̍ u̍h faɔn kaa̍. 10Wɛ̀ ǐnchɔ̀-a chɛ̀ la̍a̍, “Mɔ̀ bɔ̌ faɔn ple̍-ɛ. Ǐn ja mɔ̀ pɔ̀n chɛ̀ ɛ̀ mu̍-a nyɔ̍ kli̍hgbɛ̍ mɔna̍-a po̍-ɛ. 11Mɔ̀-a Sèìe Nyɔ̍ Klai ɔ̀ nu̍-a Joi-ɛ, ɔ̍-ɔ bo ɔ̀ wlǔh sèàn dǒ Depe blǐ wlɔ̀. 12Ɛ̀ mu̍-a juola nu̍-ɛ la, mɔ̀-a mu̍ jǔpliɛ jě jliɛ̍ iě ɔ̍ i̍ pìàɛ̍n, wɛ̀ ɔ̍ iě i̍ pɛ̌n-ɛ dě bliᵻá di̍i̍ di̍-i gblòùn gbà di̍i̍.”

13U̍h iě-a kli dǎ-a, nɛ̀ Nyɔsoa-a ǐnchɔ̀ sùɛ̀ sɔ dě ja̍i̍wlɔ̀ i̍h nɛ dǒ ǐnchɔ̀ laa̍ we̍, iě i̍h-a ble̍ Nyɔsoa tìhwe̍ po̍ duǐh. I̍h la̍a̍,

14“Mɔ̀ à bɛ̌-ɛ Nyɔsoa-a nynɛ̌ i̍, ɔ̀ tǐn-a dě ja̍i̍wlɔ̀-ɛ,

nɛ̀ nyɔ̍ ùh-a pɛ̌n-ɛa ɔ̍ wlùh i̍ nɔ̌ bloɔ̍-ɛ, pɔ̀ìě dǒ u̍h we̍.”

15Ti̍ Nyɔsoa-a ǐnchɔ̀ sɔ-a dǒ u̍h we̍ i̍h mu̍-a de̍ ja̍i̍wlɔ̀-ɛ, wɛ̀ blawɛ̌ᵻ we̍ i̍ gbɛ̀n nyɔ̍ la̍a̍, “Mɔ̀ à mu̍ Bɛfleɛɛn à iě dɛ̍ Joi la̍ ɛ̀ nɛ-a deě-ɛ jě.”

16Wɛ̀ u̍h tèwe u̍h mu̍, iě u̍h jě Mɛle ke Josɛ, nɛ̀ jǔpliɛ pɛ̌n i̍ dě gblòùn gbà di̍i̍. 17U̍h jě-a jǔ laa̍-ɛ, wɛ̀ u̍h sèàɛ̍ u̍h wlùh ka Nyɔsoa-a ǐnchɔ̀ nu̍-a ɔ̍ tìh we̍ i̍ sèàɛ̍-ɛ dě u̍h we̍-ɛ. 18Dɛ̍ blawɛ̌ᵻ we̍ i̍ gbɛ̀n nyɔ̍ sà-a dě u̍h we̍-ɛ, nyɔ̍ kli̍hgbɛ̍ ùh wɔ̌n-a i̍h-ɛ, ɛ̍ flɔn-ɛ u̍h wɔ̍n. 19Ìh kli̍hgbɛ̍ u̍h bla̍-aɛ, Mɛle gbɛ̍n-ɛ i̍h dounᵻ i̍, iě ɔ̍ naɛ i̍h-a tìh-a wlùh i̍. 20Wɛ̀ blawɛ̌ᵻ we̍ i̍ gbɛ̀n nyɔ̍ blě Nyɔsoa tìhwe̍ po̍ duǐh ble̍-ɛ u̍h mu̍ de̍ dǒ dɛ̍ᵻ kli̍hgbɛ̍ u̍h wɔ̌n-a iě u̍h jě-a we̍. Ɛ̀ kɔn taǐn Nyɔsoa-a ǐnchɔ̀ sà-a dě u̍h we̍-ɛ, ɛ̍ bo ɛ̀ nɛ.

Jusu tùi-ɛ nynɛ̌

21Ɔ̍ wlǔh-aɛ, ɛ̍ nu̍ wǐh mɛ̀ta̍a̍n iě ɔ̍ poe-ɛ plɔ̀n. Wɛ̀ u̍h tùi ɔ̍ Jusu nynɛ̌. Nynɛ̌ laa̍ bo Nyɔsoa-a ǐnchɔ̀ tùi ɔ̍ wɛ̀ Mɛle dǔ ɔ̍ kwlǐ nɛ-ɛ.

Jusu gba̍-ɛ dě slaǎ sà gbò sɔ̀n

22Ti̍ nyni̍-a Mɛle ke Josɛ iě-a u̍h-a chɛ̀ i̍ dle-ɛ, ɛ̀ Mose-a telě la̍ nyɔ̍ iě-a nu̍-ɛ, wɛ̀ u̍h gba̍ jǔpliɛ laa̍ dǒ Juluslɛn u̍h iě ɔ̍ Joi i̍ to. 23Dɛ̍nu̍ɛ, Joi-a telě la̍a̍, “Pò nyɔ̍ sà sàǐtòò gbàɔ̀n wɛ̀ ɔ̍ iě jɔ̍gbau wlǔh-iɛ, nɛ̀ ɔ̍ kɔn dǒ Joi we̍.” 24Nɛ̀ u̍h sà-ɛ gbɔ̀lǐhᵻ sɔɔ̌n àe̍e̍ pawo̍o̍ᵻ plɔ̀ᵻ sɔɔ̌n slaǎ-a, ɛ̀ Joi-a telě la̍ nyɔ̍ iě-a nu̍-ɛ.

25Dǒ ti̍ laa̍ di̍i̍-ɛ, nɛ̀ jɔ̍gbau due nɛ dǒ Juluslɛn, ɔ̍ nynɛ̌ nu̍ Simiɔ. Ɔ̍ gblɛ̍n nmɔ jii̍ iě ɔ̍ nu̍ Nyɔsoa nyɔ̍. Iě Nyɔsoa-a Sùù nɛ ɔ̍ we̍. Nɛ̀ ɔ̍ fuo Eslɔɛ nyɔ̍-a pǔh-u ti̍. 26Iě Nyɔsoa-a Sùù sèàɛ̍ ɔ̍ wlùh, ɛ̍ la̍ ɔ̍ se̍ mɛ̌ mu̍ wɛ̀ ɔ̍ iě Joi-a Chèɛ̀ Tba̍ju jě. 27Wɛ̀ Nyɔsoa-a Sùù gba̍ Simiɔ dě slaǎ sà gbò sɔ̀n. Ti̍ laa̍ nɛ̀ Jusu de̍ bei-a gba̍ ɔ̍ deě u̍h iě dɛ̍ telě dǎ-a nu̍ dǒ ɔ̍ we̍. 28Wɛ̀ Simiɔ dǔ jǔpliɛ laa̍ iě ɔ̍ gbàɛ̍ ɔ̍ kwa̍a̍ i̍, wɛ̀ ɔ̍ po̍ Nyɔsoa tlɔ̌. Ɔ̍ la̍a̍,

29“Joi, mɔ̍ àn pòi̍ju. Nu̍ ɛ̍ la̍ sǔh iě mɛ̌ dě wlùh-a i̍ tè-ɛ di̍i̍,

ɛ̀ kɔn wlu̍ ìn po̍-a tɔ̀ma̍a̍-ɛ.

30Dɛ̍nu̍ɛ, ǐn tba̍ nyɔ̍ ɔ̀ mu̍-a àn nyɔ̍ sèìe-ɛ jlǐhɛ̍ wɛ̀,

31ɔ̀ ìn po̍-a gba̍a̍ nyɔ̍ kli̍hgbɛ̍ iě-a jě-ɛ.

32Ɔ̍ bo ɔ̀ nu̍ sɔ̀npli ɔ̀ mu̍ àn tìh-a taǐn to dě ùh se̍-a Juu nyɔ̍-ɛ we̍.

Wɛ̀ ɔ̍ iě àn tìh-a i̍ bɛ̌-ɛ dě àn Eslɔɛ nyɔ̍ we̍ gba̍.”

33Sɔ dɛ̍ Simiɔ bla̍-a dǒ jǔpliɛ la pùn-ɛ, ɛ̍ wlǔh i̍ ɔ̍ de̍ ke ɔ̍ baa de̍e̍. 34Iě Simiɔ sà-ɛ u̍h nǐ wɔ̍n. Wɛ̀ ɔ̍ la̍a̍ dě jǔ de̍ Mɛle we̍, “Jǔ la ɔ̍ tìh nyɔ̍ dɔu-a mu̍-u gbɔ̀lɔ-ɛ, iě nyɔ̍ dɔu iě sèìe-ɛ nɔ̌ Eslɔɛ. Ɔ̍ mu̍ juola ɛ̀ sɔ-a dě Nyɔsoa we̍-ɛ nu̍ nyɔ̍ dɔu iě ɔ̍ chla tba̍. 35Ɔ̍ mu̍ u̍h-a wlùh i̍ naɛ dɛ̍ᵻ gbaɛ̍we̍ tè. Nɛ̀ àn pɔluh-a mu̍ wàànwààn nu̍ dǒ wɔɛ we̍, ka nmǎ-a plàn chlɛ̀n-a chɛ̍n dɛ̍ i̍-ɛ.”

36Nɛ̀ dǒ Nyɔsoa-a tu̍owli po̍ nynɔ̌gbau due nɛ, ɔ̍ nynɛ̌ nu̍ Ana. Fanjuwɛ-a jǔ nynɔ̌gbaɔ bo, ɔ̍ sɔ dě Asa-a chɛǐ. Jɛ ɔ̍ tǐn-a jla̍-ɛ, ɛ̍ nu̍ sɔ̀nᵻ mɛ̀sɔɔ̌n gbài̍ iě ɔ̍ nu̍ tèwànynɔ̌. 37Ɔ̍ nu̍ tèwànynɔ̌ te̍e̍ iě ɔ̍ sɔ̀nᵻ nu̍ kwela mɛ̀ta̍a̍n jɔ̌ nyìɛ̍ (84). Jɛ nɛ̀ ɔ̍-ɔ sɔ dě slaǎ sà gbò sɔ̀n kleǐn. Nɛ̀ kǎ ɔ̍ po̍ jlǔh iě ɔ̍ sà wɛɛ ɔ̍ ba̍le wlù ke sɔ̀n. 38Dǒ ti̍-a taǐn laa̍ di̍i̍ bo ɔ̍ ji̍-i iě ɔ̍ po̍ Nyɔsoa tlɔ̌. Wɛ̀ ɔ̍ bla̍ tìh dǒ jǔpliɛ laa̍ ɔ̍ dɛ we̍ dě nyɔ̍ kli̍hgbɛ̍ ùh-a pɔ̀n-a ti̍ Nyɔsoa-a mu̍-a Juluslɛn sèìe-ɛ jě-ɛ i̍-ɛ we̍.

Josɛ bei mu̍ dǒ de̍ Naaslɔɛ wlɔ̀ di̍i̍

39Josɛ ke Mɛle wɔ̀-a dɛ̍ᵻ kli̍hgbɛ̍ Joi-a telě dǎ-aɛ nu̍-ɛ, wɛ̀ u̍h mu̍ dǒ de̍ Kaladii bloa̍ kɛ̍n dǒ u̍h-a chɛ̀-a Naaslɔɛ wlɔ̀ di̍i̍. 40Wɛ̀ jǔ laa̍ ɔ̍ ku̍-i kmu-ɛ ke flɔ̍nwlùh dɔu. Wɛ̀ Nyɔsoa-a blɛ nɛ ɔ̍ we̍.

Jusu nɛ dě slaǎ sà gbò sɔ̀n

41Dǒ sɔ̀n kli̍hgbɛ̍ di̍i̍-ɛ, Jusu de̍ ke ɔ̍ baa-a mu̍ dǒ Juluslɛn wlɔ̀ di̍i̍ u̍h iě Sììkɛ̍n Weɛ̍-a Peě tù. 42Jusu nu̍ sɔ̀nᵻá pùè jɔ̌ sɔɔ̌n wɛ̀ u̍h mu̍ Peě ɛ̀ nu̍-a u̍h-a tǐwai dɛ̍-ɛ kɛ̍n. 43Peě chlà-a dlǔ i̍ u̍h-a mu̍-a la̍ de̍-ɛ, iě Jusu sie dě Juluslɛn. Ɔ̍ de̍ ke ɔ̍ baa se̍ i̍h juo. 44U̍h jajeɛ̍ ɔ̍ nɛ dě u̍h blǐ nyɔ̍-a gbɔ̀ù di̍i̍ de. Wɛ̀ u̍h na dǒ weɛ̍ gbàǐ di̍i̍, iě u̍h dǔ ɔ̍ i̍ pɔ̀n-ɛ dě u̍h-a wloa̍ nyɔ̍ ke u̍h ba̍ᵻ nynɛ̌. 45Ti̍ u̍h se̍-a ɔ̍ jě wɛ̀-ɛ, iě u̍h blě ɔ̍ i̍ pɔ̀n-ɛ u̍h-a mu̍ de̍ Juluslɛn. 46Wǐh ta̍a̍n sì-aɛ, iě u̍h jě ɔ̍ dě Nyɔsoa-a slaǎ sà gbò sɔ̀n, nɛ̀ ɔ̍ tè i̍ dě nǎ po̍ nyɔ̍ nynɛ̌. Nɛ̀ ɔ̍ po̍ dě u̍h we̍ dounᵻ, iě ɔ̍ tèle tìh i̍. 47Ka ɔ̍ nu̍-a dɛ̍ɛ̍ i̍ wɔ̌n-ɛ ke nyɔ̍-a wlu̍ pɔ̀n we̍ sà-aɛ, nyɔ̍ kli̍hgbɛ̍ ùh wɔ̌n-a ɔ̍ wlu̍-ɛ, sɔ ɛ̍ wlǔh i̍ u̍h de̍e̍. 48U̍h jě-a ɔ̍-ɛ, sɔ ɛ̍ flɔn-ɛ u̍h wɔ̍n. Iě ɔ̍ de̍ la̍a̍ dě ɔ̍ we̍, “Ǎn jǔ, dɛ̍nu̍ ìn nu̍ àɔ̀ dɛ̍ kaɛn la pùn ɛ? Ìn baa ke ǐn ke àn sèò-a nu̍ àɔ̀, à dǔ-a ìn i̍ pɔ̀n-ɛɛ à blě-a.”

49Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a pɔ̀n-ɛ ǐn tàdɔ̀ɔ̀ i̍ ɛ? Mɔ̀ se̍ i̍h juo ka ǐn kɔn iě-a nɔ̌ ǐn Baa blǐ gbò nɛ-ɛ ae?” 50Jɛ u̍h se̍ dɛ̍ ɔ̍ bla̍-a dě u̍h we̍-ɛ i̍ wɔ̌n.

51Wɛ̀ ɔ̍ ke u̍h mu̍ de̍ dǒ Naaslɔɛ wlɔ̀ di̍i̍. Ɔ̍ nu̍ u̍h-a wlu̍ ma̍u̍. Wɛ̀ ɔ̍ de̍ blě-e ìh kli̍hgbɛ̍ la dǒ wlùh kɛ̍n. 52Iě Jusu ku̍-i flɔ̍nwlùh. Wɛ̀ ɔ̍ tè-e Nyɔsoa ke wlɔ̀ nyi̍ɔ̍-a wlùh i̍.

Currently Selected:

Luu 2: KDNT

Highlight

Copy