Luu 1
1
Ɛ̀ kɔn tìh Luu chlǐh-aɛ la
1Ǎn jbɛɛ nyɔ̍ Tiɔfelɔ, nyɔ̍ dɔu fɔ̀n dɛ̍ we̍ wɛ̀ u̍h chlǐh dɛ̍ᵻ ìh gbǎ-a dě à nynɛ̌ we̍-ɛ. 2Nyɔ̍ ùh jě-a ìh la sɔ dě i̍h-a gbɔ̀ tè la̍-ɛ, iě u̍h bla̍-a Nyɔsoa-a pɔ̀n chɛ̀-ɛ, ìh kɔn taǐn u̍h sèàɛ̍-a àɔ̀ wlùh-ɛ, i̍h bo nyɔ̍ dɔu laa̍ u̍h chlǐh. 3Jɔ̍pòo̍ Tiɔfelɔ, dɛ̍ᵻ kli̍hgbɛ̍ ìh sɔ-a dě ìh la i̍h-a gbɔ̀ tè la̍-ɛ, ka ǐn juo-a i̍h-a gbɔ̀ wɛ̀-ɛ, nɛ̀ ɛ̍ mu̍ jii̍ nmɔ ka i̍h nu̍-a nɛ-ɛ iě i̍h-a taǐn chlǐh ke dǒ ìn we̍. 4Ǎn chlǐh ìh la̍ wɛ̀ dɛ̍ᵻ u̍h poe-a ìn nǎ-ɛ, ìè i̍h-a gblangbai̍ wɔ̌n.
Kǎ Chɔɔn ɔ̀ po̍-a nyɔ̍ nǐ dlǔ-ɛ nu̍ ka wlǔh-ɛ
5Ti̍ Ɛlo nu̍-a blǔh baa dě Judia bloa̍ kɛ̍n-ɛ, nɛ̀ u̍h blě Nyɔsoa-a slaǎ sà nyɔ̍ due, ɔ̍ nynɛ̌ bo Sɛɛkewlaɛɔ. Ɔ̍ sɔ dě Abaija-a slaǎ sà chɛǐ, wɛ̀ Ewlɔn-a jǔ Ilesebɛ nu̍ ɔ̍ nynɔ̌. 6U̍h nɛ-a sɔɔ̌n-ɛ, u̍h-a nu̍-dɛ̍ slɛ̌ i̍ dě Nyɔsoa jlǐh. U̍h-a tè-o Joi-a telě kli̍hgbɛ̍ i̍. 7Jɛ u̍h se̍ jǔ blě. Dɛ̍nu̍ɛ, Ilesebɛ sie slàmàɛ̀, wɛ̀ u̍h nɛ-a sɔɔ̌n-ɛ u̍h nɛ̍.
8Ti̍ ɛ̍ nu̍-a Sɛɛkewlaɛɔ naɛ dbo̍ nu̍ ti̍ dě Nyɔsoa-a gbò sɔ̀n-ɛ, iě ɔ̍ mu̍ ɛ̍ nu̍ la̍-a. 9Dɛ̍nu̍ɛ, u̍h tèle-a dɛ̍ i̍-ɛ, sɔ ɔ̍-ɔ bo wǐh jɛɛ ɔ̍ iě dě Joi-a slaǎ sà gbò sɔ̀n mu̍ ɔ̍ iě nɔ̌-dɛ̍ᵻ fɔ̍n. 10Wɛ̀ nyɔ̍ tlùgbei̍-a ba̍le nɔ̌ sɔ̀n ti̍ ɔ̍ fɔ̍n-a nɔ̌-dɛ̍ᵻɛ́. 11Wɛ̀ Joi-a ǐnchɔ̀ wlǔh-i ɔ̍ i̍. Nɛ̀ ǐnchɔ̀ nyna i̍ dǒ nɔ̌-dɛ̍ᵻ kɛ̍n fɔ̍n-ɛ gblǒ-a di̍na̍ we̍. 12Sɛɛkewlaɛɔ jě-a ɛ̍-ɛ, sɔ ɛ̍ wa̍ ɔ̍ dɛ̍ we̍, iě faɔn-a nu̍ ɔ̍. 13Jɛ Joi-a ǐnchɔ̀ la̍a̍ dě ɔ̍ we̍, “Sɛɛkewlaɛɔ, bɔ̌ faɔn ple̍-ɛ. Nyɔsoa wɔ̌n àn ba̍le wlu̍ wɛ̀. Àn nynɔ̌ Ilesebɛ-a mu̍ jɔ̍gbau jǔ wlǔh-i dǒ ìn we̍, nɛ̀ ìn dǎɛ ɔ̍ Chɔɔn. 14Wɛ̀ ìè nmɔ ìè mɔna̍ nu̍, nɛ̀ nyɔ̍ dɔu-a mu̍ ɔ̍ wlǔh tìh-a mɔna̍ nu̍. 15Ɔ̍ mu̍ wɔ̍n ku̍ nyɔ̍ nu̍ dǒ Joi we̍. Ɔ̍ bɔ̌ nmɔ̍ nǎ-a, nɛ̀ ɔ̍ bɔ̌ nyɔ̍ nu̍-dɛ̍ᵻ kli̍hgbɛ̍ nǎ-a ke. Sɔ dě ɔ̍ wlǔh la̍-ɛ, Nyɔsoa-a Sùù-a mu̍ ɔ̍ i̍ jǐi. 16Nɛ̀ ɔ̍ mu̍ Eslɔɛ nynuu̍ dɔu i̍ bǐi dě u̍h-a Joi Nyɔsoa we̍. 17Ɔ̍ mu̍ Joi jǔ mu̍ wɛ̀ ɔ̍ iě kmu-u gbǐh blě ke ka Nyɔsoa-a tu̍owli po̍ nyɔ̍ Ilaɛja-ɛ, wɛ̀ ɔ̍ iě baaᵻá wlùh i̍ bǐi dě u̍h-a nynuu̍ we̍. Nɛ̀ ɔ̍ mu̍ ɛ̍ nu̍ nyɔ̍ wɔ̍n blaɛ nyɔ̍ iě i̍ slɛ̌-nyɔ̍-a flɔ̍nwlùh blě. Ɔ̍ mu̍ Joi-a nyɔ̍ gba̍a̍ po̍ dǒ ɔ̍ we̍.”
18Wɛ̀ Sɛɛkewlaɛɔ la̍a̍ dě Joi-a ǐnchɔ̀ we̍, “Pò ɛ̀ la ɛ̍ ja nɛ mu̍-ɛ, nɛ̀ ka ǎn mu̍-o dɛ̍ i̍ juo-ɛ nu̍ ɛ? Dɛ̍nu̍ɛ, ǐn nu̍ taɔju, iě ǎn nynɔ̌ nɛ̍ wɛ̀ ke.”
19Wɛ̀ Joi-a ǐnchɔ̀ sà ɔ̍ wlu̍ pɔ̀n we̍, ɛ̍ la̍a̍, “Mɔ̍ Keblɛ, ǐn nyna i̍ dǒ Nyɔsoa jǔ. Ɔ̍ dbo̍ m iě wlu dě ìn we̍, iě ìn pɔ̀n chɛ̀ la wlùh sèàɛ̍. 20Jɛ ka ìn se̍-a ǎn wlu̍ tìh chɛ̀ po̍-ɛ, nɛ̀ àn mu̍ bo̍bo̍ nu̍ te̍e̍ wɛ̀ àn jǔ iě wlǔh, iě dɛ̍ ǐn dǎ-aɛ ɛ̍ iě nɛ dǒ ti̍-a taǐn di̍i̍.”
21Nɛ̀ nyɔ̍gbei laa̍ u̍h-a fuo-e Sɛɛkewlaɛɔ. Sɔ dɛ̍ ɔ̍ nu̍-a dě slaǎ sà gbò sɔ̀n wlè-ɛ wɛ̀-ɛ, ɛ̍ gbe-e u̍h di̍i̍ i̍. 22Ti̍ ɔ̍ sǐ-a sɔ̀n-ɛ, ɔ̍ se̍ dě u̍h we̍ wlu-ɛ bɛ̌ɛ. Sɔ u̍h juo-o dɛ̍ i̍ ka ɔ̍ ja-a se̍ mɔ̌ ja̍ dě slaǎ sà gbò sɔ̀n-ɛ. Nɛ̀ ɔ̍ se̍ wlu-ɛ bɛ̌ɛ, sɔ sɔ̍nᵻ po̍-ɛ bo ɛ̀ nu̍ ɔ̍ wlu-ɛ.
23Ti̍ ɔ̍ dbo̍ nu̍ ti̍ chlà-a dlǔ i̍-ɛ, wɛ̀ ɔ̍ mu̍ dě ɔ̍ blǐ gbò. 24Ti̍ gbɔ̍ sì-aɛ, wɛ̀ ɔ̍ nynɔ̌ Ilesebɛ nɛ kwlǐ. Iě ɔ̍ se̍ sɔ̀n sǐ dǒ chǔhᵻ m̀m̌ di̍i̍. 25Wɛ̀ Ilesebɛ la̍a̍, “Joi se̍ ǎn tìh we̍ mǎle, ɛ̍ kɔn ɔ̍ nu̍ ǐn wlùh we̍ nɔ̌ nya̍. Wɛ̀ ɔ̍ sà ǐn tɛ̀n jii̍ nɔ̌ ǐn ba̍ᵻ nynɛ̌.”
Kǎ Jusu-a wlǔh-u tìh nu̍ ka ji̍-ɛ
26Ilesebɛ-a kwlǐ nu̍ chǔhᵻ mɛ̀o̍ sǔh, wɛ̀ Nyɔsoa dbo̍ ɔ̍ ǐnchɔ̀ Keblɛ dě Kaladii bloa̍ kɛ̍n dǒ Naaslɔɛ wlɔ̀ di̍i̍. 27Wɛ̀ ɛ̍ mu̍ dě jǔ nynɔ̌nyaa ɔ̀ se̍-a dɛ̍ i̍ juo-ɛ we̍, ɔ̍ nynɛ̌ bo Mɛle. Ɔ̍-ɔ laa̍, nɛ̀ Depe-a tloemlai Josɛ bo ɔ̀ tù ɔ̍ sɛ̌ dlǔ. 28Wɛ̀ Nyɔsoa-a ǐnchɔ̀ ji̍ dǒ ɔ̍ we̍. Iě ɛ̍ la̍a̍, “Wlùh-a i̍ tè-ɛ dǒ ìn we̍. Joi nɛ ìn we̍ iě ɔ̍ nyǐ ìn pɔ̀ìě klaa.”
29Sɔ ɛ̍ gbe-e dě Mɛle di̍i̍ i̍ kaa̍, iě ɔ̍ pu̍e̍e wlùh i̍. Ɔ̍ la̍ nɛ̀ nyɔ̍ nyinɔ̍ i̍ sà-a kaɛn la, ɛ̍ gbɔ̀-a nynɛ̌ ɛ wèè. 30Iě Nyɔsoa-a ǐnchɔ̀ la̍a̍, “Bɔ̌ faɔn ple̍-ɛ, dɛ̍nu̍ɛ, àn tè-e Nyɔsoa-a wlùh i̍. 31Àn mu̍ sùù kɛ̍n nɛ, wɛ̀ ìè jɔ̍gbau jǔ wlǔh-i. Nɛ̀ ìn dǎɛ ɔ̍ Jusu. 32Ɔ̍ mu̍ wɔ̍n ku̍, wɛ̀ nyɔ̍gbei iě ɔ̍ Sìì Nyɔ̍ Wɔ̍n Nyɔsoa-a Jǔ dǎɛ. Nɛ̀ Joi Nyɔsoa-a mu̍ ɔ̍ blǔh baa we̍ i̍ nu̍ dǒ ɔ̍ baa Depe wɔ̀ɔ̀. 33Nɛ̀ ɔ̍ mu̍ blǔh baa nu̍ dǒ Eslɔɛ nyɔ̍ we̍ nɔ̌ kmɔ̌-a kmɔ̌. Ɔ̍ kmɔ̌ wlu̍ i̍ kɔn-ɛ se̍ siee la̍ kɔn mu̍.”
34Iě Mɛle la̍a̍ dě ǐnchɔ̀ we̍, “Ǐn se̍-a dɛ̍ i̍ juo-ɛ, nɛ̀ ka ɛ̍ mu̍ nɛ-ɛ nu̍ ɛ?”
35Iě ǐnchɔ̀ la̍a̍ dě ɔ̍ we̍, “Nyɔsoa-a Sùù-a mu̍ ìn kɛ̍ɛ̍n ji̍, wɛ̀ Sìì Nyɔ̍ Wɔ̍n Nyɔsoa-a gbǐh iě ìn kɛ̍n nɛ. Ɛ̍ tìh-ɛ, jǔ ɔ̀ mu̍-a wlǔh-ɛ, ɔ̍ mu̍ Nyɔsoa-a Jǔ nu̍, wɛ̀ ɔ̍ iě ɔ̍ jǔ dbee. 36Nu̍ wlùh, àn wloa̍ nyɔ̍ Ilesebɛ ɔ̀ nɛ̍-a wɛ̀-ɛ, ɔ̍ nɛ kwlǐ kaka. Ɔ̀ u̍h la̍ ɔ̀ sie-a slàmàɛ̀ de-ɛ, ɔ̍ kwlǐ-a chǔhᵻ mɛ̀o̍ sèàn. 37Dɛ̍-o-dɛ̍ se̍ kmu dǒ Nyɔsoa we̍.”
38Iě Mɛle la̍a̍, “Mɔ̍ Joi-a pòi̍ju. Ǎn sà nǐ wɔ̍n, ka ìn dǎ-aɛ, ɛ̍ iě laǎn nɛ dǒ ǐn we̍.” Wɛ̀ ǐnchɔ̀ sɔ dǒ ɔ̍ we̍.
Mɛle mu̍ dě Ilesebɛ we̍ i̍ nala
39-40Dǒ wǐh laa̍ di̍i̍ Mɛle tèwe-e, wɛ̀ Judia bloa̍ ɛ̀ blě-a tlu̍hᵻɛ́, ɔ̍ mu̍ dě ɛ̍ kɛ̍n dǒ Ilesebɛ we̍ wlɔ̀. Iě ɔ̍ pa̍ dě Sɛɛkewlaɛɔ blǐ gbò, wɛ̀ ɔ̍ sà Ilesebɛ nyinɔ̍ i̍. 41Ilesebɛ wɔ̌n-a Mɛle-a ɔ̍ nyinɔ̍ i̍ sà wlu̍-ɛ, jǔpliɛ nɛ-a dě ɔ̍ di̍i̍-ɛ, sɔ ɔ̍ buǒ mu̍-o ja̍i̍ sǔh, iě Nyɔsoa-a Sùù jǐi Ilesebɛ-ɛ i̍. 42Iě ɔ̍ wǐ, ɔ̍ la̍a̍, “Nyɔsoa nyǐ ìn pɔ̀ìě dě nynɔ̌gbaɔᵻ kli̍hgbɛ̍ nynɛ̌, wɛ̀ ɔ̍ nyǐ jǔ àn mu̍-a wlǔh-iɛ pɔ̀ìě ke. 43Dɛ̍ bo ɛ̀ sà-e ǎn jua̍a̍ wɛ̀ ǎn Joi de̍-a ji̍ nɔ̌ ǐn we̍ i̍ nala ɛ? 44Ǐn wɔ̌n-a àn ǐn nyinɔ̍ i̍ sà wlu̍-ɛ, jǔpliɛ nɛ-a dě ǐn di̍i̍-ɛ, ɔ̍ buǒ mu̍-o ja̍i̍ kleǐn dǒ mɔna̍ we̍. 45Mɔ̀ nynɔ̌ jɔ Joi wlu-a dě we̍ wɛ̀ ɔ̀ dǎɛ ɛ̍ tìh-ɛ, nɛ̀ ìn nmɔ i̍.”
Mɛle po̍ Nyɔsoa tlɔ̌
46Iě Mɛle la̍a̍,
“Ǎn bɛ̌-ɛ Joi-a nynɛ̌ i̍.
47Ǎn nmɔ-ɛ dǒ ǎn Nyɔsoa ɔ̀ nu̍-a ǎn Sèìe Nyɔ̍-ɛ we̍.
48Mɔ̍ nu̍-a ɔ̍ plǒai pòi̍ju-ɛ, ɔ̍ se̍ ǎn tìh we̍ mǎle.
Sɔ da̍a sèàn blǐ-ɛ, nyɔ̍ kli̍hgbɛ̍-a mu̍ ǐn i̍ nmɔ nynɔ̌ dǎɛ.
49Dɛ̍nu̍ɛ, Sìì Nyɔ̍ Wɔ̍n Nyɔsoa ɔ̀ wɛ̀-a gblɛ̍ja̍i̍-ɛ, ɔ̍ nu̍ wɔ̍n ku̍ dɛ̍ᵻ dǒ ǐn we̍.
50Nyɔ̍ ùh-a tè-a ɔ̍ ja̍-ɛ, u̍h-u bo ɔ̍ jě wɔɛ, sɔ dǒ jǎɛ-o nyɔ̍ we̍ ìè jǎɛ-o nyɔ̍ we̍ mu̍.
51Ɔ̍ kmu-u gbǐh bo ɔ̍ nu̍,
iě ùh-a chɛ̍n-a blɔ̌-ɛa di̍i̍chì-ɛ, ɔ̍ gbà u̍h ja̍i̍.
52Ɔ̍ sà nyɔ̍ ùh ku̍-a wɔ̍n-ɛ dǒ u̍h-a nynɛ̌ gbalǎᵻ kɛ̍n,
wɛ̀ ɔ̍ dǔ nyɔ̍ ùh ja-a u̍h-a chɛ̀ wlù-ɛ ja̍i̍.
53Ɔ̍ nyǐ mɔ̌-a nu̍ nyɔ̍ dɛ̍ᵻ chɛ̀ chɛ̀,
jɛ pàn-nyɔ̍ nɔ̀ɔ̍, u̍h nɛ kwa̍a̍ i̍ palǎpalǎ wɛ̀ u̍h mu̍.
54 Eslɔɛ nyɔ̍ ùh-a dbee-a ɔ̍ jǔ-ɛ,
ɔ̍ naɛ u̍h sɔ̍nᵻ we̍ i̍,
ka ɔ̍ nu̍-a wlu-ɛ dě à baaᵻá baaᵻ we̍-ɛ.
55Eblaɛɛn ke ɔ̍ tloemlai wɔɛ jě tìh
se̍ dǒ ɔ̍ wlì i̍ wɛ̀ nɔ̌ kmɔ̌-a kmɔ̌.”
56Mɛle bɛ̌ɛ ɔ̍ iě chǔhᵻ ta̍a̍n nu̍ dǒ Ilesebɛ we̍, iě ɔ̍ dǔ ɔ̍ blǐ mu̍-ɛ.
Kǎ Chɔɔn ɔ̀ po̍-a nyɔ̍ nǐ dlǔ-ɛ nu̍ ka wlǔh-ɛ
57Iě kwlǐ gbɛ̍n Ilesebɛ, wɛ̀ ɔ̍ sà gbàɔ̀n ɔ̍ wlǔh-i jɔ̍gbau jǔ. 58Ka Joi nu̍-a gblɛ̍n-ɛ nmɔ-ɛ kaa̍ dǒ ɔ̍ we̍-ɛ, i̍h bo nyɔ̍ ke ɔ̍ nɛ-a dǒ gbò wɔ̍ɔ̍n-ɛ ke ɔ̍ wloa̍ nyɔ̍ wɔ̌n. Iě u̍h ke ɔ̍ nu̍ ɛ̍ mɔna̍.
59Jǔpliɛ laa̍ ɔ̍ nu̍ wǐh mɛ̀ta̍a̍n, iě u̍h mu̍ ɔ̍ plɔ̀n po̍ la̍ wɛ̀ u̍h iě ɔ̍ ɔ̍ baa Sɛɛkewlaɛɔ-a nynɛ̌ tùi. 60Jɛ ɔ̍ de̍ la̍a̍, “Iěe, mɔ̀ dǎɛ ɔ̍ Chɔɔn.”
61Wɛ̀ u̍h la̍a̍ dě ɔ̍ we̍, “Jɛ àn wloa̍ nyɔ̍-a nyɔ̍ se̍ nynɛ̌ la tù.” 62Wɛ̀ u̍h po̍ sɔ̍nᵻ dě ɔ̍ baa we̍ u̍h-a tèle ɔ̍ i̍, nynɛ̌ jihwe̍ ɔ̍ pɔ̀n-a u̍h iě-a ɔ̍ dǎɛ-ɛ.
63Iě Sɛɛkewlaɛɔ jbǎ gblu̍ pɔ̌ u̍h-a chlǐh-a kɛ̍n i̍-ɛ. Wɛ̀ ɔ̍ chlǐh dǒ ɛ̍ kɛ̍n, “Ɔ̍ nynɛ̌ bo Chɔɔn.” Sɔ ɛ̍ flɔn-ɛ u̍h kli̍hgbɛ̍ wɔ̍n. 64Dǒ tàdùè laa̍ ɔ̍ mɛɔ gbàli-ɛ, iě ɔ̍ bɛ̌ɛ wlu-ɛ dode̍, wɛ̀ ɔ̍ po̍ Nyɔsoa tlɔ̌. 65Wɛ̀ faɔn gbɛ̍n nyɔ̍ kli̍hgbɛ̍ ke u̍h nɛ-a dǒ gbò wɔ̍ɔ̍n-ɛ. Iě pɔ̀n laa̍ ɛ̍ sɛ̍ Judia bloa̍ kli̍hgbɛ̍ ɛ̀ blě-a tlu̍hᵻɛ́ kɛ̍n i̍. 66Nyɔ̍ kli̍hgbɛ̍ ùh wɔ̌n-a ìh la-ɛ, u̍h-a naɛ ɛ̍ wlùh i̍. Iě u̍h la̍a̍, “Dɛ̍ jǔ la ɔ̍ mu̍ nu̍ ɛo?” Dɛ̍nu̍ɛ, Joi-a gbǐh nɛ ɔ̍ we̍.
Sɛɛkewlaɛɔ po̍ Nyɔsoa tlɔ̌
67Iě Nyɔsoa-a Sùù jǐi Chɔɔn baa Sɛɛkewlaɛɔ i̍, wɛ̀ ɔ̍ po̍ Nyɔsoa-a tu̍owli, ɔ̍ la̍a̍,
68“Joi ɔ̀ nu̍-a Eslɔɛ nyɔ̍-a Nyɔsoa-ɛ, mɔ̀ à po̍ ɔ̍ tìhwe̍.
Ɔ̍ ji̍ ɔ̍ nyɔ̍ we̍ gbǎ laa̍, iě ɔ̍ pùhbɔ u̍h kɛ̍ɛ̍n.
69Ɔ̍ nyǐ àɔ̀ Sèìe Nyɔ̍ ɔ̀ blě-a gbǐh-ɛ wɛ̀,
ɔ̀ nu̍-a ɔ̍ pòi̍ju Depe-a tloemlai-ɛ.
70Ɛ̍ kɔn wlu̍ bo ɔ̍ po̍ tɔ̀ma̍a̍ tɛin se̍e̍ dě ɔ̍ tu̍owli po̍ nyɔ̍ ja̍a̍,
71ɔ̍ iě à sèìe dě à nyɛ̌-nyɔ̍ kwa̍a̍,
ɛ̍ ke nyɔ̍ kli̍hgbɛ̍ ùh faɛn-ɛa àɔ̀-ɛ ke.
72Ɔ̍ chɛ̀-a ku̍o̍ bo ɔ̍ nu̍ wlùh we̍, wɛ̀ ɔ̍ jě à baaᵻ wɔɛ.
73Wlu̍ bo ɔ̍ po̍ tɔ̀ma̍a̍, iě ɔ̍ slɛ̀ɛ̀n dě à baa Eblaɛɛn we̍
74ɔ̍ iě àɔ̀ sèìe dě à nyɛ̌-nyɔ̍ kwa̍a̍.
Wɛ̀ à-a je̍e faɔn ple̍ dǒ ɔ̍ jǔ dbee la̍.
75Wɛ̀ à iě Nyɔsoa i̍ wɛ̀ɛ̀, à iě i̍ slɛ̌ dǒ ɔ̍ jlǐhwai
dǒ wǐh kli̍hgbɛ̍ à mu̍-a nu̍ nɔ̌ kmɔ̌ we̍-ɛ di̍i̍.
76“Ǎn jǔ, mɔ̀ bo ɔ̀ mu̍ Sìì Nyɔ̍ Wɔ̍n Nyɔsoa-a tu̍owli po̍ nyɔ̍ nu̍.
Dɛ̍nu̍ɛ, àn mu̍ dǒ Joi jǔ wɔ̀ ìè ɔ̍ wìè gba̍a̍ po̍.
77Wɛ̀ ìè ɔ̍ nyɔ̍ wlùh sèàɛ̍ ka u̍h-a mu̍-a pǔh-ɛ,
pò u̍h-a gblɛ̍n sɔ̀ɛ̀n-a tìh tǎli-ɛ i̍-ɛ.
78À Nyɔsoa nɛ blɛ, iě ɔ̍ kɔn wɔɛ.
Ɛ̍ kɔn ɔ̍ mu̍ ɛ̍ nu̍ sɔ̀n chɛ̀ ɛ̀ sɔ-a dě ja̍i̍wlɔ̀-ɛ ɛ̍ iě à sɛ̀n-ɛ, wɛ̀ à iě pǔh.
79Wɛ̀ ɔ̍ iě nyɔ̍ ùh tè-a dě kwile i̍-ɛ ke dě mɛ̌ɛ-a sùù di̍i̍-ɛ sɔ̀npli nyǐ,
ɔ̍ iě à sɔ̍nᵻ we̍ i̍ naɛ dǒ wìè ɛ̀ gba̍-a nyɔ̍ dě wlùh-a i̍ tè-ɛ di̍i̍-ɛ we̍.”
80Iě jǔ laa̍ ɔ̍ ku̍, iě ɔ̍ kmu dě ɔ̍ sùù di̍i̍. Wɛ̀ ɔ̍ nɛ dě kwlǎslò we̍ te̍e̍ iě ɔ̍ dǔ ɔ̍ chɛ̀ gbaɛ̍we̍ tè-ɛ dě Eslɔɛ nyɔ̍ we̍.
Currently Selected:
Luu 1: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.
