Nu̍-dɛ̍ᵻ 2

Kǎ Nyɔsoa-a Sùù nu̍ ka ji̍-ɛ

1Ti̍ ɛ̍ nu̍-a klèᵻá sàì jua̍a̍-a peě-ɛ, wɛ̀ wlùh gbaɛ blě nyɔ̍ kli̍hgbɛ̍ gbǎ tàdùè dǒ weɛ̍ laa̍ di̍i̍. 2U̍h iě-a kèle-ɛ, nɛ̀ slɛ̀-a sɔ dě ja̍i̍ ka poɔ dɔu-a ji̍-ɛ. Wɛ̀ ɛ̍ jǐ dě gbò kɔn di̍i̍ u̍h tè-a i̍-ɛ. 3Dǒ u̍h jě-e dɛ̍ ɛ̍ wɔ̀ nɛ̍-a mɛɔ, iě ɛ̍ wɔ̀ u̍h kli̍hgbɛ̍ dlǔ dě gbò. Jɔ-ɛ, nɛ̀ ɔ̍ naɛ nɛ dǒ ɔ̍ pùn. 4Iě Nyɔsoa-a Sùù jǐi u̍h kli̍hgbɛ̍ i̍, sɔ u̍h-a po̍ la̍ wlu̍ diih sǔh, ìh Sùù po̍-a dě u̍h wɔ̍ɔ̍n-ɛ.

5Ɛ̍ ti̍ laa̍ nɛ̀ Juu-a Nyɔsoa nyɔ̍ ùh tǐn-a dǒ Juluslɛn-ɛ, bloa̍ kli̍hgbɛ̍ nɛ-a da̍a ja̍u̍n la sɔ̀n-ɛ bo u̍h sɔ kɛ̍n i̍. 6U̍h wɔ̌n-a wlu̍ la-ɛ, sɔ ɛ̍ gbe-e dě u̍h di̍i̍ i̍, wɛ̀ u̍h kli̍hgbɛ̍ gbǎ tàdùè. Dɛ̍nu̍ɛ, jɔ-ɛ nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n. 7Sɔ ɛ̍ wlǔh i̍ u̍h de̍e̍ iě ɛ̍ flɔn-ɛ u̍h wɔ̍n, wɛ̀ u̍h la̍a̍, “Na̍a̍, jɔ̍gbauᵻ la ùh-a wlu-aɛ, Kaladii nynuu̍ bo lě. 8Wɛ̀ ka ɛ̍ iě nu̍ wɛ̀ à jɔ-ɛ, nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n ɛ? 9À nyɔ̍ duuh sɔ Patia bloa̍ ke, Mɛdia bloa̍ ke, Ilam bloa̍ ke, Mɛsopotemia bloa̍ kɛ̍n. Duuh sɔ Judia bloa̍ ke, Kapadosia bloa̍ ke, Pɔntɔ bloa̍ ke, Esea bloa̍ kɛ̍n. 10Iě duuh sɔ Flejia bloa̍ ke, Panfelia bloa̍ ke, Iche bloa̍ ke, ɛ̍ ke Lebia-a fɔ̌ ɛ̀ kɔǎɛn-a Saiwlein wlɔ̀ i̍-ɛ ke. Iě à duuh sɔ dǒ Wlom wlɔ̀ di̍i̍. 11Juu nyɔ̍ ke nyɔ̍ gbǎ-a Juu dɛ-ɛɛ ke, nɛ̀ juh sɔ-a Kli bloa̍ ke Awlebia bloa̍ kɛ̍n-ɛ, jɛ à jɔ-ɛ nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n. Nɛ̀ u̍h-a sà Nyɔsoa-a wɔ̍n ku̍ dbo̍ nu̍ tìh i̍.” 12Sɔ ɛ̍ wlǔh i̍ u̍h de̍e̍, iě ɛ̍ gbe-e dě u̍h di̍i̍ i̍. Iě u̍h la̍a̍, “Ɛ̀ la nɛ̀ ɛ̍ gbɔ̀-a nynɛ̌-ɛ wèè.”

13Jɛ nɛ̀ nyɔ̍ duuh-a nui u̍h jlii̍h kɛ̍n i̍, u̍h la̍a̍, “Nyɔ̍ la, nmɔ̍ bo ɛ̀ nu̍ u̍h.”

Pitɛ wlu dě nyɔ̍ tlùgbei̍ we̍

14Wɛ̀ Pitɛ ke gba̍tòà-a pùè jɔɛ̍ due sie-a dǒ de̍-ɛ nyna i̍. Wɛ̀ ɔ̍ wǐ dě nyɔ̍ tlùgbei̍ laa̍ we̍, ɔ̍ la̍a̍, “Ǐn pò Juu nyɔ̍ ke juh tǐn-a da̍a Juluslɛn wlɔ̀ la di̍i̍-ɛ, mɔ̀ po̍ nɔ̌ ǐn we̍ dounᵻ nmɔ jii̍ wɛ̀ dɛ̍ ɛ̀ nɛ-a sèàn-a, iě ɛ̍ gbɔ̀ sòò i̍ sà dě mɔ̀ we̍. 15Nyɔ̍ la ɛ̍ se̍ nmɔ̍ ɛ̀ se̍ u̍h nu̍, ka mɔ̀ dǎ-aɛ, ɛ̍ se̍ la̍a̍n nɛ. Mɔ̀ gbɛ̀n-e, sɔ̀n sɛ̀n-aɛ ɛ̍ se̍-o wlè ke̍. Jɛwɛ̀ jlǔh-a gbɛ̍n dǒ nyɔ̍ pùn i̍. 16Jɛ ɛ̀ la ɛ̀ nɛ-a sèàn-aɛ, ɛ̍ kɔn tìh bo Nyɔsoa-a tu̍owli po̍ nyɔ̍ Joɛ sà-a.

17‘Nyɔsoa la̍a̍, Ɛ̀ la bo ǎn mu̍ nu̍ dǒ bɔ̌ɛ-o wǐh di̍i̍.

Ǎn mu̍ ǎn Sùù dǒ nyɔ̍ kli̍hgbɛ̍ kɛ̍n po̍.

Wɛ̀ mɔ̀-a jɔ̍gbauᵻ ke nynɔ̌gbaɔᵻ nynuu̍ iě ǎn gbànwli po̍.

Mɔ̀-a nynuu̍gbèè-a mu̍ Nyɔsoa kwlǎ jěe.

Nɛ̀ mɔ̀-a nyɔ̍ klaaᵻá mu̍ Nyɔsoa ja̍ᵻ ja.

18I̍i̍n, jɔ̍gbauᵻ ke nynɔ̌gbaɔᵻ ùh nu̍-a ǎn pòi̍nynuu̍-a chɛ̀-ɛ,

ǎn mu̍ ǎn Sùù dǒ u̍h kɛ̍n po̍ dǒ wǐh laa̍ di̍i̍,

nɛ̀ u̍h-a mu̍ ǎn gbànwli po̍.

19Nɛ̀ ǎn mu̍ jbaɛdih po̍ nɔ̌ ja̍i̍wlɔ̀ nɔ̌ dlǔwèàì,

wɛ̀ iě nyɔ̍ wɔ̍n flɔn-ɛ dɛ̍ᵻ nu̍ dě bloɔ̍ dě sɔ̀n.

Nɛ̀ kǎ nymɔ̍ ke, nɛ̍ ke, daluh ku̍u̍ku̍-a mu̍ nɛ-ɛ nu̍ ke.

20Nɛ̀ jlǔh-a mu̍ gbe,

wɛ̀ chǔh iě slìi̍h nɛ ka nymɔ̍-ɛ sasǎ,

wɛ̀ Joi-a wɔ̍n ku̍-ɛ ke tìh-a i̍ bɛ̌-ɛ weɛ̍ iě ji̍-ɛ dǔ.

21Jɛ nɛ̀ nyɔ̍ɔ ùh-a mu̍-a Joi-a nynɛ̌ i̍ dǎ-ɛ, nɛ̀ u̍h-a mu̍ pǔh.’

22“Mɔ̀ɔ̍ Eslɔɛ nyɔ̍, mɔ̀ tba̍ dounᵻ i̍ wɛ̀ mɔ̀ iě wlu̍ la wɔ̌n. Jusu la ɔ̀ sɔ-a dǒ Naaslɔɛ wlɔ̀ di̍i̍-ɛ, ɔ̍ bo Nyɔsoa dbo̍ mɔ̀ we̍, iě ɔ̍ to ɔ̍ mɔ̀ i̍ dǒ jbaɛdih ke, nyɔ̍ wɔ̍n flɔn-ɛ dɛ̍ᵻ ke dɛ̍ᵻ klaaᵻ ɔ̍ nu̍-aɛ we̍. Nyɔsoa bo ɔ̀ jii dě ɔ̍ ja̍a̍ wɛ̀ ɔ̍ nu̍ ìh la nɔ̌ mɔ̀ nynɛ̌, mɔ̀-a jlǐhɛ̍ se̍ tà maɛ. 23Jusu la ɔ̍ iě-a kwlǎ sà-ɛ dě mɔ̀ we̍-ɛ, dǒ Nyɔsoa-a di̍i̍chì ke ɔ̍ tɔɔ kɛ̍n bo ɛ̍ kɔ̍ i̍. Iě mɔ̀ nu̍ ɛ̍ wɛ̀ gblɛ̍n sɔ̀ɛ̀n nyɔ̍ kɔ̍ ɔ̍ dǒ gbàɛ̍ kɛ̍n i̍ tu̍ wlì iě u̍h dbǎ ɔ̍. 24Jɛ Nyɔsoa sà ɔ̍-e. Ɔ̍ sèìe ɔ̍ dě mɛ̌ɛ-a nyɔ̍ i̍ poa-a gbɛɛ̍ di̍i̍. Dɛ̍nu̍ɛ, mɛ̌ɛ se̍ ɔ̍ i̍ gbɛ̍n-ɛ bɛ̌ɛ. 25Ɛ̍ bo Depe bla̍ dǒ ɔ̍ pùn, ɔ̍ la̍a̍,

‘Ǎn jě Joi ma̍u̍ ma̍u̍ dǒ ǐn jlǐhwai.

Ka ɔ̍ nɛ-a dǒ ǎn sɔ̍n chɛ̀ we̍-ɛ, nɛ̀ dɛ̍ se̍ ǐn tǔn-ɛ bɛ̌ɛ.

26Ɛ̍ kɔn ǎn pɔluh pɛ̌n i̍,

iě ǎn wɔ̍n-a po̍ nmɔ-ɔ slɛ̀.

Ɛ̍ se̍-o siee, ǎn ku̍-a mu̍ wlì tè dɛ̍ blě ke.

27Dɛ̍nu̍ɛ, ìn se̍ wɔ̌n mu̍ ǐn se̍ dě kàn nɛ̍ di̍i̍ sie mu̍.

Nɛ̀ ìn se̍ wɔ̌n mu̍ àn we̍ fòè nyɔ̍ iě sɔ̀n.

28Wìè ɛ̀ nyǐ-a nyɔ̍ feɛ-ɛ, mɔ̀ bo ɔ̀ nu̍ ɛ̍ wɛ̀ ǐn juo ɛ̍ ka.

Nɛ̀ àn mu̍ ɛ̍ nu̍ wɛ̀ mɔna̍ iě ǐn i̍ jǐi dǒ ìn jlǐhwai.’

29“Ǐn de̍di̍i̍ᵻ, ǎn mu̍ dě mɔ̀ di̍i̍ i̍ flɔn-ɛ ka à baa Depe ɔ̀ kàn-aɛ, ɔ̍ mɛ̌-aɛ wɛ̀ u̍h tè ɔ̍ i̍. Ɔ̍ gbàlɔ̍ nɛ ka da̍a à we̍ kmɔ̌ sèàn. 30Jɛ ɔ̍ nu̍ Nyɔsoa-a tu̍owli po̍ nyɔ̍, sɔ ɔ̍ juo Nyɔsoa-a tɔ̀ma̍a̍ wlu̍. Ɔ̍ po̍ wlu̍ tɔ̀ma̍a̍ ka ɔ̍ mu̍-a Depe-a tloemlai-a due blǔh baa we̍i̍ nu̍ dǒ Depe wɔ̀ɔ̀-ɛ. 31Sɔ nɛ̀ dɛ̍ Nyɔsoa-a mu̍-a nu̍ dě nya̍-aɛ, Depe juo ɛ̍ i̍. Ɛ̍ kɔn ɔ̍ wlu dǒ Chèɛ̀ Tba̍ju-a mɛ̌ wlǔh-e dɛ we̍, ɔ̍ la̍a̍,

‘Ɔ̍ se̍ dě kàn nɛ̍ di̍i̍ sie,

sɔ ɔ̍ kǔ se̍ sɔ̀n ke.’

32Jusu-a taǐn laa̍ bo Nyɔsoa sà-e, wɛ̀ à kli̍hgbɛ̍ à nu̍ sàànsi̍i̍h dǒ ɛ̍ we̍. 33Ɔ̍-ɔ bo Nyɔsoa dǔ-a ka ja̍i̍ wɛ̀ dǒ ɔ̍ di̍na̍ we̍, iě ɔ̍ jě Sùù kɔn wlu̍ Baa Nyɔsoa po̍-a tɔ̀ma̍a̍-ɛ. Sùù ɔ̍ po̍-a àɔ̀ kɛ̍n-ɛ, ɛ̍ kɔn nu̍-dɛ̍ᵻ bo mɔ̀-a wɔ̌n-a, iě mɔ̀-a jě-a sèàn. 34Jɛ Depe se̍a dě ja̍i̍wlɔ̀ mu̍ wɛ̀ ɔ̍ la̍a̍,

‘Joi la̍a̍ dě ǎn Joi we̍,

Tè i̍ da̍a ǎn di̍na̍ we̍ te̍e̍

35iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

36“Ɛ̍ tìh-ɛ, Eslɔɛ nyɔ̍ kli̍hgbɛ̍ kɔn u̍h iě ɛ̍ i̍ juo. Jusu ɔ̀ mɔ̀ kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍ bo Nyɔsoa nu̍-a ka Joi ke Chèɛ̀ Tba̍ju we̍ i̍ wɛ̀.”

37Ti̍ nyɔ̍gbei wɔ̌n-a wlu̍ la-a, sɔ ɛ̍ tǔh u̍h i̍ kaa̍. Wɛ̀ u̍h la̍a̍ dě Pitɛ ke gba̍tòà juh sie-a dǒ de̍-ɛ we̍, “De̍di̍i̍ᵻ, nɛ̀ ka à iě nu̍ ɛ?”

38Wɛ̀ Pitɛ la̍a̍ dě u̍h we̍, “Mɔ̀ bǐi i̍, wɛ̀ mɔ̀ iě nǐ dlǔ po̍ kli̍hgbɛ̍ dǒ Jusu Klai-a nynɛ̌ kɛ̍n. Nɛ̀ mɔ̀-a gblɛ̍n sɔ̀ɛ̀n-a tìh-a mu̍ i̍ tǎli-ɛ. Nɛ̀ mɔ̀-a mu̍ Nyɔsoa-a Sùù jě. 39Dɛ̍nu̍ɛ, Nyɔsoa-a tɔ̀ma̍a̍ wlu̍ kɔn dǒ mɔ̀ ke mɔ̀-a nynuu̍ we̍, ɛ̍ ke nyɔ̍ kli̍hgbɛ̍ nɛ-a tà tɔ̀ɔ̀n-ɛ ke juh à Joi Nyɔsoa dǎ-a dǒ ɔ̍ chɛ̀ we̍-ɛ ke.”

40Wɛ̀ Pitɛ bla̍ gbòɛ̀ diih dě u̍h we̍, iě ɔ̍ tù u̍h slɛ̌n, ɔ̍ la̍a̍, “Ǐn gbɛ̍n mɔ̀-a bu̍hᵻ, mɔ̀ sèìe mɔ̀-a chɛ̀ dě ti̍laa nyɔ̍-a tba̍ɛ kɛ̍n i̍ la di̍i̍ lě.” 41Nyɔ̍ ùh wɔ̌ɛn-a Pitɛ-a wlu̍-ɛ, u̍h bo ùh poe-ɛ nǐ dlǔ. Nyɔ̍ ùh gbǎ-a dě u̍h-a gbɔ̀ù di̍i̍ dǒ weɛ̍ laa̍ di̍i̍-ɛ, u̍h bɛ̌ɛ nyɔ̍-a wlǔ ta̍a̍n (3,000) nu̍-ɛ. 42Wɛ̀ u̍h-a cheǎn-ɛ gba̍tòà dɛ̍ we̍ ma̍u̍, u̍h ke u̍h-a nɛ̍aɛ we̍. Nɛ̀ u̍h-a gbo̍a̍ɛ sɔ̍n jǔ iě u̍h-a ba̍le.

Kǎ wlùh gbaɛ blě nyɔ̍-a kmɔ̌ iě ka nɛ

43Wɛ̀ jbaɛdih dɔu ke nyɔ̍ wɔ̍n flɔn-ɛ dɛ̍ᵻ nui-ɛ dě Jusu-a gba̍tòà ja̍a̍. Sɔ ɛ̍ po̍ nyɔ̍ɔ faɔn. 44Wlùh gbaɛ blě nyɔ̍ kli̍hgbɛ̍ u̍h-u sèàɛ̍ kɛ̍n, iě u̍h-a dɛ̍ nɛ due. 45Jɔ-ɛ, nɛ̀ ɔ̍ ple̍ ɔ̍ kɔn-dɛ̍ᵻ ke ɔ̍ blewi̍h. Iě u̍h-a gblè i̍h, nɛ̀ jɛ jɔ nɛ-a gba̍ ka̍-a, ɛ̍ bo u̍h-a nyǐ ɔ̍. 46Ka sɔ̀n-a sɛ̀n-a, kǎ u̍h-a gbèɛ̀ɛ̍n dě Nyɔsoa-a slaǎ sà gbò sɔ̀n. Nɛ̀ u̍h-a gbǎ tàdùè u̍h blǐ gbòᵻ i̍ iě u̍h-a di̍-i dɛ̍we̍ dǒ wlùh wlǎ we̍. 47Wɛ̀ u̍h-a po̍ Nyɔsoa tìhwe̍, iě u̍h-a nu̍-dɛ̍-a po̍ nyɔ̍ kli̍hgbɛ̍ gbǐh. Nɛ̀ ka sɔ̀n-a sɛ̀n-a, kǎ Joi-a po̍ nyɔ̍ ùh pǔh-aɛ dě u̍h-a gbɔ̀ù di̍i̍.

Currently Selected:

Nu̍-dɛ̍ᵻ 2: KDNT

Highlight

Copy