Nu̍-dɛ̍ᵻ 3

Kǎ klɔ-nyɔ̍ nu̍ ka pǔh-ɛ

1Dǒ weɛ̍ due di̍i̍ nɛ̀ Pitɛ ke Chɔɔn-a mu̍ dě Nyɔsoa-a slaǎ sà gbò sɔ̀n dǒ u̍h-a ba̍le ti̍ we̍, nɛ̀ jlǔh te̍le i̍ wɛ̀. 2Ɛ̍ wɔ̍n u̍h-a dǎɛ-a Pa̍la̍ Wɔ̍n Chɛ̀wɛ-ɛ, dǒ nyɔ̍gbei gba̍ jɔ̍gbau due ɔ̀ sà-a klɔ-ɛ dě ɔ̍ de̍ di̍i̍-ɛ. Nɛ̀ u̍h-a gba̍ ɔ̍ doǒ ka sɔ̀n-a sɛ̀n-a, ɔ̍ iě nyɔ̍ ùh-a pa̍-a dě gbò-a chɛ̀-ɛ wlǐ we̍ slɔ̀. 3Dǒ ɔ̍ jě-e Pitɛ ke Chɔɔn nɛ̀ u̍h-a ji̍ gbò pa̍ la̍. Wɛ̀ ɔ̍ slɔ̀ u̍h wlǐ we̍. 4Wɛ̀ Pitɛ ke Chɔɔn wlò jlǐh i̍ dě ɔ̍ we̍. Pitɛ la̍a̍, “Gbɛ̀n à ja̍.” 5Wɛ̀ ɔ̍ gbɛ̀n u̍h ja̍ sòo̍sòo̍. Sɔ ɔ̍ jajeɛ̍ u̍h-a ji̍ ɔ̍ dɛ̍ nyǐ la̍-a de. 6Wɛ̀ Pitɛ la̍a̍ dě ɔ̍ we̍, “Ǐn se̍ sebla̍ ke kòo̍ blě, jɛ dɛ̍ ǐn blě-a bo ǎn mu̍ ìn nyǐ. Jusu Klai ɔ̀ sɔ-a dǒ Naaslɔɛ-ɛ, ǎn sèàɛ̍ ìn wlùh ìè na dǒ ɔ̍ nynɛ̌ kɛ̍n.” 7Wɛ̀ Pitɛ gbɛ̍n ɔ̍ di̍na̍ sɔ̍n i̍, iě ɔ̍ dǔ ɔ̍ ja̍i̍. Dǒ jǔ laa̍ ɔ̍ bu̍hᵻ ke ɔ̍ klɔsɔɛ̍ᵻ nyna wɛ̀ i̍h sǐ-o dode̍. 8Pàǐè, wɛ̀ ɔ̍ wa̍n bloɔ̍, iě ɔ̍ nyna i̍. Sɔ ɔ̍ na la̍-ɛ sǔh. Wɛ̀ ɔ̍ ke u̍h pa̍ dě slaǎ sà gbò sɔ̀n. Nɛ̀ ɔ̍ na-ɛ, ɔ̍ plìn i̍ ja̍i̍-i, iě ɔ̍ tùi Nyɔsoa nynɛ̌ i̍. 9Nyɔ̍ kli̍hgbɛ̍ jě ɔ̍-ɛ, nɛ̀ ɔ̍ na-ɛ, iě ɔ̍ tùi Nyɔsoa nynɛ̌ i̍. 10U̍h gbɛ̀n-a ɔ̍ ja̍-a, iě u̍h juo ɔ̍ i̍. Nɛ̀ ɔ̀ tè-a i̍ dǒ slaǎ sà gbò-a Pa̍la̍ Wɔ̍n Chɛ̀wɛ we̍ wɛ̀ ɔ̍ slɔ̀-a wlǐ-ɛ, nɛ̀ ɔ̍-ɔ bo. Dɛ̍ ɛ̀ nɛ-a ɔ̍ pùn-ɛ, sɔ ɛ̍ wlǔh i̍ u̍h de̍e̍ iě ɛ̍ flɔn-ɛ u̍h wɔ̍n.

Pitɛ bla̍ dɛ̍ dě nyɔ̍ laa̍ we̍

11Nyɔ̍gbei jě-a jǔ laa̍ ɔ̍ pèle-a Pitɛ ke Chɔɔn we̍-ɛ, sɔ ɛ̍ flɔn-ɛ u̍h wɔ̍n. Wɛ̀ u̍h wlǎ dě u̍h we̍ dǒ Sɔlɔma-a Fùnǐ sɔ̀n. 12Dɛ̍ u̍h nu̍-a dǒ u̍h we̍ wlǎ-aɛ, ɛ̍ bo Pitɛ jě wɛ̀ ɔ̍ la̍a̍, “Mɔ̀ɔ̍ Eslɔɛ nyɔ̍, dɛ̍nu̍ ɛ̍ kèle mɔ̀ i̍ iě mɔ̀-a gbɛ̀n à ja̍ sòo̍sòo̍ ɛ? Jɔ̍gbau la mɔ̀ jajeɛ̍ à chɛ̀-ɛ gbǐh ke Nyɔsoa nyɔ̍ chɛ̀ nu̍-ɛ bo ɛ̀ na-ɛ ɔ̍ ae? 13Jɛ Eblaɛɛn ke Ase ke Jekɔ-a Nyɔsoa, ɔ̀ nu̍-a à baaᵻá Nyɔsoa-a, ɔ̍ bo ɔ̀ bɛ̌-ɛ ɔ̍ pòi̍ju Jusu-a nynɛ̌ i̍. Jusu mɔ̀ sà-a kwlǎ u̍h iě-a dbǎ, wɛ̀ Pale-a pɔ̀n-a ɔ̍ sɔ̍n kɛ̍n sà i̍ de iě mɔ̀ se̍-a wɔ̌n la̍ nɛ-ɛ, ɔ̍ bo. 14Ɔ̀ nu̍-a i̍ slɛ̌-nyɔ̍ ɔ̀ wɛ̀-a nɛi̍-ɛ, ɔ̍ bo mɔ̀ tba̍ chla iě mɔ̀ sèàɛ̍ Pale wlùh ɔ̍ iě nyɔ̍ gbe̍ja̍a̍ poe nyɔ̍ sɔ̍n kɛ̍n sà dǒ mɔ̀ we̍. 15Mɔ̀ɔ̍ bo ùh dbǎ ɔ̀ nɛ-ɛa nyɔ̍ kmɔ̌-ɛ. Jɛ Nyɔsoa sà ɔ̍-e. Àɔ̀ bo à nu̍ ɛ̍ sàànsi̍i̍h. 16Jɛ Jusu-a nynɛ̌ wlùh gbaɛ bo ɛ̀ nɛ kmɔ̌, iě jɔ̍gbau la mɔ̀ juo-a iě mɔ̀-a jě-a ka da̍a-ɛ, wɛ̀ ɔ̍ dalǔhᵻ sǐ-o dode̍. Wlùh gbaɛ ɛ̀ jii-a dě Jusu ja̍a̍-ɛ, ɛ̍ bo ɛ̀ nɛ kmɔ̌ iě jɔ̍gbau la ɔ̍ pǔh ka te̍kle̍e̍. Ɔ̍ bo mɔ̀ kli̍hgbɛ̍ mɔ̀-a jě-a ka da̍a.

17“Jɛ dɛ̍ ǐn juo-aɛ, ǐn de̍di̍i̍ᵻ, dɛ̍ sɔ̀n mɔ̀ ke mɔ̀-a wlu̍ kwa̍ blě nyɔ̍ nu̍-a Jusu pùn-ɛ, mɔ̀ se̍ ɛ̍ i̍ juo dɛbo. 18Jɛ ɛ̀ Nyɔsoa sà-a dě ɔ̍ tu̍owli po̍ nyɔ̍ kli̍hgbɛ̍ ja̍a̍ tɛin-ɛ, ɛ̍ gbǎ chɛ̀-ɛ wɛ̀. Ɔ̍ la̍ ɔ̍ Chèɛ̀ Tba̍ju-a mu̍ jua̍i̍ sàɛ̀. 19Ɛ̍ tìh-ɛ, mɔ̀ bǐi i̍, nɛ̀ mɔ̀ fèàɛ̀ dě Nyɔsoa we̍, nɛ̀ ɔ̍ mu̍-o mɔ̀-a gblɛ̍n sɔ̀ɛ̀n i̍ slǎn. 20Nɛ̀ ɛ̍ mu̍ ti̍ kɔn wɛ̀ Joi iě feɛ i̍ jě-ɛ dbo̍. Ɔ̍ mu̍ Chèɛ̀ Tba̍ju Jusu dbo̍, ɔ̀ ɔ̍ klɛ̀ɛ̀n-a dǒ mɔ̀ we̍-ɛ. 21Jɛ ɔ̍ mu̍ dě ja̍i̍wlɔ̀ nɛ ke̍ te̍e̍ wɛ̀ dɛ̍ᵻ kli̍hgbɛ̍-a delee i̍ gbǎ ti̍ iě-o nyni̍. Ɛ̍ kɔn dela̍ bo Nyɔsoa po̍ tɛin se̍e̍ dě ɔ̍ tu̍owli po̍ nyɔ̍ ja̍a̍. 22Dɛ̍nu̍ɛ, Mose la̍a̍, ‘Ka Joi Nyɔsoa nu̍-a ǐn ja̍i̍ dǔ-ɛ, kǎ ɔ̍ mu̍ mɔ̀-a chɛ̀-a nyɔ̍ ja̍i̍ dǔ-ɛ nu̍ dě mɔ̀ nynɛ̌. Jɛ nɛ̀ dɛ̍-o-dɛ̍ ɔ̍ mu̍-a mɔ̀ wlùh sèàɛ̍-ɛ, mɔ̀ nu̍ ɛ̍. 23Nɛ̀ nyɔ̍-o-nyɔ̍ ɔ̀ se̍-a tu̍owli po̍ nyɔ̍ laa̍ ɔ̍ wlu̍ nu̍ mu̍-ɛ, nɛ̀ ɔ̍ mu̍-u gbɔ̀lɔ dě Nyɔsoa-a nyɔ̍ nynɛ̌ we̍.’ 24Nyɔsoa-a tu̍owli po̍ nyɔ̍ kli̍hgbɛ̍ ùh wlu-a sɔ dǒ Samio we̍ sǔh ìè nya̍ mu̍-ɛ, u̍h bla̍ wǐh la i̍h-a tìh kli̍hgbɛ̍. 25Mɔ̀ɔ̍ bo ùh nu̍ Nyɔsoa-a tu̍owli po̍ nyɔ̍-a nynuu̍. Mɔ̀ɔ̍ kɔn ku̍o̍ bo ɔ̍ po̍-a dǒ mɔ̀ baaᵻ we̍. Ɔ̍ la̍a̍ dě Eblaɛɛn we̍, ‘Dě àn tloemlai ja̍a̍ bo ǎn mu̍ kmɔ̌ nyɔ̍ kli̍hgbɛ̍ pɔ̀ìě nyǐ-i.’ 26Ɛ̍ kɔn Nyɔsoa dǔ-a ɔ̍ pòi̍ju ja̍i̍-ɛ, iě ɔ̍ dbo̍ ɔ̍ nɔ̌ mɔ̀ we̍ sàǐtòò ɛ̍ iě mɔ̀-a pɔ̀ìě nu̍, ɔ̍ iě mɔ̀ fèàɛ̀, mɔ̀ iě kà kɔn gblɛ̍n i̍ tǎli.”

Currently Selected:

Nu̍-dɛ̍ᵻ 3: KDNT

Highlight

Copy