Nu̍-dɛ̍ᵻ 1

Nyɔsoa po̍ ɔ̍ Sùù-a wlu̍ tɔ̀ma̍a̍

1-2Tiɔfelɔ, sɔ dě Jusu-a dbo̍ gbɔ̀ tè la̍, wɛ̀ ɛ̍ iě-a dě ɔ̍ ja̍i̍wlɔ̀ gba̍ weɛ̍ kɛ̍n jɛɛ-ɛ, ɔ̍ nu̍-dɛ̍ᵻ ke ɔ̍ nyɔ̍ nǎ po̍-ɛ kli̍hgbɛ̍ ǐn chlǐh i̍h dě ǎn sàǐtòò chlǐh-dɛ̍ di̍i̍. Ɛ̍ ti̍ laa̍ nɛ̀ ɔ̍ wɔ̀ ɔ̍ gba̍tòà ɔ̍ tba̍-a chèɛ̀-ɛ slɛ̌ chèɛ̀ i̍ po̍-ɛ wɛ̀ dě Nyɔsoa-a Sùù ja̍a̍. 3Ɔ̍ wɔ̀-a klàn tìh i̍ jě-ɛ wɛ̀-ɛ, wɛ̀ ɔ̍ to ɔ̍ chɛ̀ dě u̍h we̍. Iě ɔ̍ nu̍ dɛ̍ᵻ dɔu i̍h iě ɛ̍ we̍i̍ flɔn-ɛ ka ɔ̍ nɛ-a kmɔ̌-ɛ. Ɛ̍ nu̍ ɛ̍ wɛ̀ ɔ̍ wlǔh-i ɔ̍ kòà i̍ dǒ wǐh-a kwela nyìɛ̍ di̍i̍. Wɛ̀ ɔ̍ wlu dě u̍h we̍ dǒ Nyɔsoa-a nyɔ̍ wlu̍ i̍ kɔn dɛ we̍. 4Ti̍ ɔ̍ ke u̍h gbǎ-a tàdùè-ɛ, wɛ̀ ɔ̍ sèàɛ̍ u̍h wlùh, ɔ̍ la̍a̍, “Mɔ̀ bɔ̌ dǒ Juluslɛn sɔ-ɛ, jɛ mɔ̀ fuo nyǐ-dɛ̍ kɔn wlu̍ ǐn Baa po̍-a tɔ̀ma̍a̍-ɛ, ɛ̀ kɔn tìh ǐn sèàɛ̍-a mɔ̀ wlùh-ɛ. 5Chɔɔn po̍ nyɔ̍ nǐ dlǔ dǒ nǐ we̍, jɛ mɔ̀ɔ̍ nɔ̀ɔ̍, wǐh gbɔ̍ iě sì-ɛ nɛ̀ Nyɔsoa-a Sùù bo ɛ̀ mu̍ nǐ nu̍ mɔ̀ iě dlǔ po̍.”

Jusu gba̍-ɛ dě ja̍i̍wlɔ̀

6Ti̍ Jusu ke ɔ̍ gba̍tòà wèla-a tàdùè i̍-ɛ, wɛ̀ u̍h tèle ɔ̍ i̍, u̍h la̍a̍, “Joi, àn mu̍ Eslɔɛ nyɔ̍ tùn kwa̍a̍ tù dode̍ ti̍laa ae?”

7Jusu la̍a̍ dě u̍h we̍, “Nɔɔ ke ti̍ la ǐn Baa chɛ̍n-a dǒ ɔ̍ chɛ̀-a tùn we̍-ɛ, mɔ̀ se̍ i̍h nɔ̀ɔ̍ juo mu̍. 8Jɛ ti̍ Nyɔsoa-a Sùù-a mu̍-a mɔ̀ kɛ̍n gbǎ-ɛ, nɛ̀ mɔ̀-a mu̍ gbǐh blě, wɛ̀ mɔ̀ iě ǎn sàànsi̍i̍h nu̍ dǒ Juluslɛn, ɛ̍ ke Judia ke Sɛmewlea bloa̍ kli̍hgbɛ̍ kɛ̍n i̍. Ɛ̍ ke dě bloa̍-a siee la̍ ke.” 9Ɔ̍ wɔ̀-a dɛ̍ laa̍ bla̍-a dě u̍h we̍-ɛ, wɛ̀ ɔ̍ dǔ-iɛ ja̍i̍. U̍h nɛ dǒ ɔ̍ kɛ̍n i̍ gbɛ̀n la̍ sǔh iě nǐgban kaɛn ɔ̍ i̍, wɛ̀ ɔ̍ mǎ-ɛ u̍h jlǐh.

10Dě ɔ̍ we̍ ja̍i̍ u̍h-a jlǐh maɛ, u̍h iě-a kèle-ɛ nɛ̀ jɔ̍gbauᵻ sɔɔ̌n pa̍ jlii̍ plǔᵻ iě u̍h nyna u̍h pùn. 11Iě u̍h la̍a̍, “Kaladii nynuu̍, dɛ̍ kɔn da̍a mɔ̀ nyna i̍ iě mɔ̀-a gbɛ̀n dě ja̍u̍n we̍ ɛ? Jusu la ɔ̀ sà-ɛa da̍a mɔ̀ we̍ ɔ̀ gba̍-ɛa ja̍i̍wlɔ̀-ɛ, ka mɔ̀ nu̍-a ɔ̍ ja̍i̍wlɔ̀ mu̍ la̍ jě-ɛɛ, kǎ ɔ̍ mu̍ de̍ ji̍-ɛ nu̍.”

Kòà poe Juda nyɔ̍ wɔ̀ɔ̀

12Dě Ɔle-Tu̍ᵻá Tlu̍h kɛ̍n bo u̍h nɛ wɛ̀ ìh kli̍hgbɛ̍ la i̍h gbǎ. Dě u̍h sɔ-ɔ wɛ̀ u̍h ji̍ de̍ dǒ Juluslɛn wlɔ̀ di̍i̍. Sɔ deě ìè wlɔ̀ ji̍ nu̍ tlu̍h gbɔ̍ɔ̍ gbɔ̀ tile. 13U̍h nyni̍-a wlɔ̀-ɛ, ja̍i̍ gbòju kɔn di̍i̍ u̍h tè-a i̍ se̍e̍-ɛ, dě u̍h mu̍. U̍h-u nɛ-a dě gbò-a chɛ̀-ɛ, Pitɛ ke, Chɔɔn ke, Chiin ke, Andlu ke, Felɔ ke, Tɔmɔ ke, Batalamio ke, Matio ke, Afia-a jǔ Chiin ke, Samo ɔ̀ fɔ̀n-a bloa̍-a tìh we̍-ɛ ke, ɛ̍ ke Chiin-a jǔ Juda ke. 14U̍h bo ùh-a gbèɛ̀ɛn chɛ̍chɛ̍ iě u̍h-a ba̍le, u̍h ke nynɔ̌gbaɔᵻ ke. Ɛ̍ ke Jusu de̍ Mɛle ke ɔ̍ de̍di̍i̍ᵻ jɔ̍gbauᵻ ke.

15Ɛ̍ bo u̍h nu̍ dǒ wǐh gbɔ̍ di̍i̍, iě Pitɛ nyna i̍ dě u̍h nynɛ̌ ɔ̍ iě wlu. Nyɔ̍ ùh gbèɛ̀ɛn-a dǒ tà-a chɛ̀-ɛ, u̍h wɛ̀ kmɛ due kwela sɔɔ̌n (120) nu̍-ɛ. 16Ɔ̍ la̍a̍, “Mɔ̀ɔ̍ de̍di̍i̍ᵻ kli̍hgbɛ̍ wɛ̀-a de̍-ɛ, Nyɔsoa-a wlu̍ kɔn ɛ̍ iě chɛ̀-ɛ gbǎ. Nyɔsoa-a Sùù wlu-i dě Depe ja̍a̍ tɛin iě ɔ̍ po̍ gbànwli dǒ Juda pùn, ɔ̀ nyɔ̍gbei jii-a iě u̍h gbɛ̍n-a Jusu-ɛ. 17Juda laa̍ à nyɔ̍ due bo dě à gbɔ̀ù di̍i̍. Ɔ̍ blě ɔ̍ naɛ nu̍-dɛ̍ ke de nɔ̌ dbo̍ la di̍i̍.”

( 18Ɔ̍ kà kɔn wlǐ ɔ̍ jě-aɛ, i̍h bo ɔ̍ tɛ̀n-ɛ blǔh. Dǒ blǔh-a chɛ̀ kɛ̍n bo ɔ̍ kà-ɛ i̍ iě ɔ̍ wa̍ i̍. Wɛ̀ ɔ̍ di̍i̍ dɛ̍ᵻ kli̍hgbɛ̍ wlǎ sɔ̀n. 19Nyɔ̍ kli̍hgbɛ̍ tǐn-a dǒ Juluslɛn-ɛ, u̍h wɔ̌n pɔ̀n la. Ɛ̍ kɔn u̍h-a dǎɛ blǔh-a chɛ̀ Akedama dě u̍h blǐ wlu̍ di̍i̍. Ɛ̍ gbɔ̀ nu̍ Nymɔ̍ Blǔh.)

20“Ɛ̍ chlǐh-ɛ dě Duǐh Chlǐh-dɛ̍ di̍i̍, ɛ̍ la̍a̍,

‘Ɔ̍ gbò kɔn ɛ̍ iě flu̍h nu̍,

nɛ̀ nyɔ̍ se̍ kɔn ɔ̍ iě-e tǐn.’

Ɛ̍ la̍a̍ dɛ-ɛ,

‘Nɛ̀ nyɔ̍ dɔɔ kɔn ɔ̍ iě dǒ ɔ̍ wɔ̀ɔ̀ gbǎ-ɛ.’

21“Nɛ̀ɛ̍, ɛ̍ blaɛ i̍ à iě nyɔ̍ chèɛ̀ tba̍ dǒ ɔ̍ wɔ̀ɔ̀. Jɛ nyɔ̍ ɔ̀ ke à sà-a na-a dě à ke Joi Jusu-a mu̍-ɔn ji̍-ɔn ti̍ we̍-ɛ, 22ɛ̍ ke sɔ dě Chɔɔn-a nyɔ̍ nǐ dlǔ po̍-ɛa gbɔ̀ tè la̍ wɛ̀ ɛ̍ iě-a weɛ̍ Jusu sà-a dǒ à we̍ ɔ̍ gba̍-ɛa ja̍i̍wlɔ̀-ɛ kɛ̍n jɛɛ-ɛ, ɛ̍ we̍ nyɔ̍ bo à iě-e dǔ. Wɛ̀ ɔ̍ ke à iě ɔ̍ mɛ̌ wlǔh-ea sàànsi̍i̍h nu̍.”

23Wɛ̀ u̍h tba̍ nyɔ̍ sɔɔ̌n chèɛ̀, Josɛ u̍h-a dǎɛ-a Basaba-a, ɔ̍ nynɛ̌ diih nu̍ Jɔslu, ɛ̍ ke Matataia ke. 24Wɛ̀ u̍h ba̍le, u̍h la̍a̍, “Joi, ìn juo nyɔ̍ kli̍hgbɛ̍-a wlùh, ɛ̍ tìh-ɛ, nyɔ̍ ìn tba̍-a dě ùh sɔɔ̌n la nynɛ̌-ɛ, toe ɔ̍ àɔ̀. 25Iě gba̍tòà dbo̍ ɛ̀ Juda tǎli-a i̍ iě ɔ̍ mu̍-a tà ɔ̍ kɔn-aɛ, wɛ̀ ɔ̍ iě dǒ ɔ̍ wɔ̀ɔ̀ gbǎ-ɛ.” 26Wɛ̀ u̍h tèle dɛ̍ i̍ dǒ nyɔ̍ sɔɔ̌n laa̍ we̍. Sɔ Matataia-a sɛ̌ bo ɛ̀ ji̍ ja̍i̍, iě ɔ̍ gbǎ dǒ Klai-a gba̍tòà-a pùè jɔɛ̍ due laa̍ kɛ̍n.

Currently Selected:

Nu̍-dɛ̍ᵻ 1: KDNT

Highlight

Copy