Rkaa̱ 7
7
Bi̱ tsꞌén katsꞌéndaya Kjisoo̱ ngo mosoo̱ nda̱ ngito̱ko̱o̱ jájuún
(Matioo̱ 8:5-13)
1Ngije kamaá Kjisoo̱ nga tsíchji̱a̱jo xota̱ na̱xi̱ńdaá, kijí na̱xi̱ńdáꞌniú Kapernau̱n. 2Kó ngo moso̱ xi achichí tjoó nda̱ ngito̱ko̱o̱ jájuún, ndajín tjiín, kó je mején ma kꞌien. 3Kó nga tsintꞌié kuí nda̱ ngito̱ko̱o̱ jájuún kjo̱a̱a̱ Kjisoo̱, katsangiya kaꞌa xota̱ xi xchá jundíoo̱, tsi̱ꞌe̱ nga ꞌniú tsíꞌáa̱ Kjisoo̱ nga kji̱ndi̱bá tsꞌendáyà kui mosoo̱. 4Kó kui xota̱ xi xchaá jachókoón Kjisoo̱, kó ꞌniú tsíꞌaá, nga bi̱ katsoó:
–Nda ini̱ma̱a̱ kui nda̱a̱, tsoboárií nga ko̱si̱ke̱je ji, 5ngatꞌa̱ tjórií na̱xi̱ńdájne̱, kó ngaskande ngo ndiꞌa nínga ndokjo̱a̱ eén Néná katsꞌéndajne̱.
6Kó Kjisoo̱ kijíjo̱ kui xota̱ xi xchaá. Ta̱nga ngije makjachó má ndiꞌaa̱, kui nda̱ ngito̱ko̱o̱ katsangiya kaꞌa já amingoo̱, xi bi̱ katsoó Kjisoo̱:
–Ndi̱a̱, mejénjínna sa̱ꞌinxtií, ngatꞌa̱ nde tsoboájínna nga ku̱i̱tjásꞌi̱n ji ndiꞌana, 7kuíni nga ngaskande kamájín nga án má xi kijíkjaꞌaa̱, ta̱nga ndókjo̱e̱ ji ngo én, kó ka̱mandaya moso̱na. 8Ngatꞌa̱ ti̱ bo̱a̱ ti̱ tsꞌén án, ti̱ tjínna ngo ngito̱ko̱ xi botixómána, kó ti̱ tjínna jájún xi botixomáa̱, kó tsi bi̱ xiáa̱n xi̱ꞌbi̱: Tꞌen ji, kó ko̱e̱je̱, kó tsi kje̱ꞌe xí ja̱bíꞌi̱n xiáa̱n, kó kji̱ndi̱bá, kó kjiꞌanga moso̱na tsangiya an nga sa̱ꞌín ngo ni, tsꞌénkjátjosónna.
9Nga tsintꞌié kuí nii̱ Kjisoo̱, achichí kijíndikoón, kó askotsijee̱n xota̱ xi yajángií, kó bi̱ katsoó:
–Ja̱koxi̱ ni xi xiánjnúꞌun nga kji̱e̱ ngo nda̱ sakóna kꞌi̱e̱ Israee̱l, xi bi̱ tsꞌén ꞌniú sꞌijii̱n.
10Kó nga jachó nginí kui já xí kanangiyaa̱ ki̱a̱ ndiꞌaa̱ nda̱ ngito̱ko̱o̱ jájuún, kamábe nga je kamándaya kui nda̱ moso̱ xi oo̱n.
Bi̱ tsꞌén katsꞌénkjaꞌáꞌyaá Kjisoo̱ ndií ngo xota̱chjo̱on kꞌán xi je kꞌien xi̱ꞌii̱n
11Kó jaskan Kjisoo̱ kijí ngo na̱xi̱ńdáꞌniú xi ꞌmí Naín, kó nijan kijíjo̱ xota̱ tsi̱ꞌe̱ ko̱jo kjín ngase xota̱. 12Kó ngije makjachó kuí na̱xi̱ńdáꞌniuú, kamábe nga tjífíkanijín ngo ini̱ma̱, ndí ngoo̱ ngo na̱an kꞌán xi je kꞌien xi̱ꞌii̱n, kó achichí má xota̱ na̱xi̱ńdaá xi nijan kijíkanijínjo̱. 13Kó Ndi̱a̱a̱ nga kamábe, ni̱ma̱ kamaá kui xota̱chjo̱on, kó bi̱ katsoó:
–Ngata̱ cheꞌéjín ji.
14Kó Kjisoo̱, tji̱e̱nmá kijíkóntiñaa̱ koxa̱ xi kjiꞌiya kui nda̱ xo̱ngò xí je kꞌiee̱n, kó katsꞌénjo̱ kui koxa̱a̱, kó já xi ndyi̱yaꞌankꞌaá xió kixindyia, kó Kjisoo̱, bi̱ katsoó nda̱ xo̱ngò xi je kꞌiee̱n:
–Nda̱ xo̱ngò, jí xí bi̱ tꞌíxiaán: ¡Ti̱sítji̱n!
15Kó kui nda̱ xi kꞌiee̱n, tji̱e̱nmá kisꞌijñando, sꞌe̱ tsíchji̱a̱, kó Kjisoo̱ kijíjo̱ kui nda̱a̱ nínga tikón na̱aa̱n. 16Kó ngayeje xotaa̱ katsakjónní, sꞌe̱ katsjaá kjo̱a̱je Néná, nga bi̱ katsó:
–Ngo nda̱ chji̱ni̱e̱ꞌe̱én Néná xí ꞌniú nkꞌa xaá jatjojinná.
Kó tjín xi bi̱ katsó:
–Néná jè kjoeꞌekoón xota̱ na̱xi̱ńdá xí tsi̱ꞌe̱.
17Kó ngayeje nangi Jundea̱ ko̱jo ngayeje na̱xi̱ńdá xi síndotꞌa tiñaa̱, kamábe ni xi katsꞌén Kjisoo̱.
Bi̱ tsꞌén tsíchji̱a̱jo Kjisoo̱ xota̱ xi katsangiyajo̱ én Jua̱ xi botíndaá
(Matioo̱ 11:2-19)
18Kó xota̱ tsi̱ꞌe̱ Juaa̱ kiniꞌánkintꞌié kjo̱a̱a̱ ngayeje kui nii̱. Kó Juaa̱ tsíchji̱a̱a̱ jó xota̱ tsi̱ꞌe̱, 19kó katsangiyakoo̱n Kjisoo̱, tsi̱ꞌe̱ nga ko̱síyaá tsi kuí Kjisoo̱ xi kji̱ndi̱baá, axa̱ chjiéngá kje̱ꞌe xí skoyaá. 20Kó kui jaá jachókoón Kjisoo̱, kó bi̱ katsoó:
Jua̱ xi botíndaá xí katsangiyajne̱, tsi̱ꞌe̱ nga ko̱si̱yajne̱ ji: A jí xò boá kui nda̱ xi kjo̱e̱ꞌe̱é, axa̱ xchiyá xò ji̱n kje̱ꞌe.
21Ti̱ kuii̱ chi̱bo̱a̱ Kjisoo̱ achichí má xota̱ xi katsꞌéndaya chiꞌin xi tjiín, ko̱jo xi kjo̱a̱ni̱ma̱ ndyi̱foaꞌatio, kó tsꞌaxié a̱siénni̱xtjin xi ndajín xi tjíjii̱n xotaa̱, kó kjín má xota̱ xi ti̱ka̱ xi katsꞌéntsijee̱n. 22Kó Kjisoo̱, bi̱ katsoó kui jaá:
–Tangínjnú, kó tꞌíyájnúu̱ Juaa̱ ni xi je kamáyàjnú, ko̱jo ni xi je kandaꞌyájnú, tꞌíni̱jmìjnúu̱ nga xi ti̱ka̱a̱ je kamátsijee̱n, ko̱jo nga xi ni̱ma̱ see̱ je ma fí, ko̱jo nga xi tjiín chiꞌin xi tsꞌénkjátsón tji̱xin yojoná je kamándaya, ko̱jo nga xi xtiyaa̱ je tsintꞌié, ko̱jo nga xi kꞌiee̱n je jaꞌáꞌyaá, ko̱jo nga xota̱ ni̱ma̱a̱ je tjíꞌmíyaá éntjatsi̱e̱e̱ Néná. 23Kó achichíra̱tsjaa̱ kui xi ta̱ngatꞌajiín án nga sti̱ngíni.
24Kó ngije kijí xota̱ xi katsangiya Juaa̱, Kjisoo̱ ítsꞌi̱yanii̱ nga katsóyaà xotaa̱ kjo̱a̱a̱ Juaa̱, kó bi̱ katsoó:
–Mí xí tsangíntsitsijenjnúu̱ nangi kixií. A ngo yáxá xi ítsanie tjo̱o̱. 25Tsi jmí, mí xí tsangíntsitsijenjnúu̱. A ngo nda̱ xi ńjño tsjakon tsꞌényajá. Jún jè yàjnú nga kui xota̱ xi boajá ńjño tsjakoo̱n ko̱jo xi nda síndoo̱, ndiꞌaa̱ re boá nínga síndo. 26Kó, mí xí tsangíntsitsijenjnúu̱. A ngo nda̱ chji̱ni̱e̱ꞌe̱én Néná. A jo̱o̱n, ja̱ kuí boá xián an, kó nkꞌa ngase xaá, ta̱bo̱a̱jiín ngo nda̱ chji̱ni̱e̱ꞌe̱én Néná. 27Kjo̱a̱a̱ kuii̱ bí xi kjitꞌa xo̱jo̱n eén Néná, nínga bi̱ tsoó:
Kꞌi̱e̱ tsꞌéntsangiyatjoón chji̱ni̱e̱ꞌénna,
tsi̱ꞌe̱ nga ku̱i̱ꞌíjñanda ndi̱yàa̱, nga ko̱e̱je̱tjoón.
28Tsꞌénxiyàjnúꞌun nga kꞌi̱e̱ kui nga̱sondiee̱ kji̱e̱ tsenjín ingo nda̱ chji̱ni̱e̱ꞌén xi nkꞌa ngase xaá xikoó Jua̱ xi botíndaá, ta̱nga kui nda̱ xi ꞌniú chichí ngase xaá nínga botíxomaa̱ Néná, nkꞌa ngase xaá ta̱bo̱a̱jiín Juaa̱.
29Kó ngayeje xota̱ na̱xi̱ńdá ko̱jo já xí foaꞌáꞌyá to̱n xi machjítjé nii̱, nga tsintꞌieé Juaa̱, katsꞌénkixi̱ yojoo̱ ngindyi̱ko̱n Néná, nga katsjandiè nga Juaa̱ atíndá, 30ta̱nga já fariseoo̱ ko̱jo já chji̱ni̱e̱kjo̱a̱kitii̱, katsꞌénchꞌó ni xi mejeén Néná, nga kamámejénjiín nga Juaa̱ atíndá. 31Kó Ndi̱a̱a̱, bi̱ katsó:
–Mí xí bo̱a̱ má kón xi kókón kui xota̱ xi tjín kuí ni̱xtjin xi̱ꞌbi̱. 32Bo̱a̱ má kón, xikoó já xo̱ngò xí síndo ndi̱tse̱e̱n, xi bi̱ ndyi̱tsoó xkjín: “Kiniꞌánkjaniejne̱ yána̱xo̱ xi foniee̱, ta̱nga jún kichájínjnú, kandajne̱ só xi ndasen tsó, ta̱nga jún kichaꞌájínjnú.” 33Ngatꞌa̱ jeꞌe Jua̱ xi botíndaá, xi iskjiniejín pan, ti̱nde katsꞌejín bino̱, kó jún bo̱a̱ kiꞌmíjnúu̱ nga xindajín tjíjii̱n. 34Jaskan jeꞌe ndií nda̱ xi̱ꞌii̱n, nda̱ xi iskjinie, ko̱jo xi katsꞌe, kó bi̱ kiꞌmíjnúu̱: Kui nda̱a̱, nda̱ xki̱ꞌá, nda̱ chꞌi̱, nda̱ amingoo̱ já xí foaꞌáꞌyá to̱n xi machjítjé ni ko̱jo xota̱ jé boá xi̱ꞌbi̱. 35Ta̱nga kjo̱a̱kjínkoón Néná sꞌijñatsijen kjo̱a̱a̱ ni xi tjítsꞌén kuí.
Bi̱ kamaá Kjisoo̱ ndiꞌaa̱ nda̱ fariseo̱ xi ꞌmí Ximoo̱
36Kó ngo nda̱ fariseo̱ tsíꞌáa̱ Kjisoo̱ tsi̱ꞌe̱ nga kijíkjiniejo̱ ṉño̱ ndiꞌaa̱, kó nga tsꞌasꞌien Kjisoo̱ ndiꞌaa̱ kui nda̱a̱, kisꞌijñatꞌa yámíxa̱a̱. 37Kósꞌe̱ kjiꞌa má jachókoón ngo na̱ xi tjiín jé, xí chji̱a̱ni na̱xi̱ńdáꞌniuú, kó nga tsintꞌié nga Kjisoo̱ tikóntꞌa yámíxa̱ ndiꞌaa̱ nda̱ fariseoo̱, jachójo̱ ngo ndí ramita̱ ndásíje̱n, 38kó kisꞌijñando tꞌa se Kjisoo̱, askjandá, sꞌe̱ ítsꞌi̱yanii̱ nga ndándyíko̱n aniéjónni sé Kjisoo̱, kó tsja̱to̱ko̱ katsꞌénxíjónni, sꞌe̱ atíndsoꞌá sé, kósꞌe̱ katsangijon ndásíjee̱n. 39Nga kamábe kui nii̱ nda̱ fariseoo̱, bi̱ tsꞌén katsꞌénkjó: “Tsi ja̱koxi̱ nga kui nda̱a̱ xi nda̱ chji̱ni̱e̱ꞌe̱én Néná, kamákjínrií ꞌyá naa̱ bo̱a̱ xi tjítsꞌénjo̱, ngatꞌa̱ na̱ xi tjiín jé boá.” 40Kó Kjisoo̱, bi̱ katsoó nda̱ fariseoo̱:
–Ji Ximo̱, ngo ni tikónna xi xiyaá ji.
Sꞌe̱ bi̱ katsó nda̱ fariseoo̱:
–Tꞌíyéní, Mostro̱.
41Sꞌe̱ Kjisoo̱ katsóyaà ngo énkjín xi bi̱ tsó:
–Jó má já xí kitsjiee̱n to̱o̱n ngo nda̱ xi tsꞌénkíyà to̱n, ngo ma xi kitsjiee̱n ún úchán to̱n ndenario̱, kó xi ingoo̱ ichítié má xi kitsjiee̱n. 42Kó nga jmíjiín kui jaá kótsꞌèn sa̱ꞌínsón to̱n xi kitsjiee̱n, nda̱ xi tsꞌénkíyà to̱o̱n katsꞌénjetakoón nga jó kui jaá. Ngotꞌe̱ ꞌne̱ tꞌíyéní, ñání nga jó kui jaá xi ꞌniú tjó ngase ka̱maa̱ kui nda̱a̱.
43Sꞌe̱ Ximoo̱ bi̱ katsó:
–Bee̱ko̱n an nga kuí nda̱ xi ꞌniú tsie ngase katsꞌénjetakoón.
Kó Kjisoo̱, bi̱ katsó:
–Bo̱a̱ kjiꞌi ni xi kase ji.
44Kó Kjisoo̱ askotsijee̱n kui naa̱, kósꞌe̱ bi̱ katsoó nda̱ xi ꞌmí Ximoo̱:
–A titsitsijìi̱n kui naa̱. Tsꞌasꞌien an ndiꞌàa̱, kó jmí ndáfoa katseꞌéjínní xi aniejón an ndsa̱ko án, ta̱nga kui naa̱ ndándyíko̱n aniéjónni ndsa̱ko án, kó tsja̱to̱ko̱ katsꞌénxíjónni nga. 45Katseꞌéjìi̱n ngo ndsó tꞌanijón án nga kiniꞌíntindení, ta̱nga kui naa̱, ndeskande koó nga tsꞌasꞌien an ndiꞌàa̱ tsꞌénbotíndsoꞌá ndsa̱ko án. 46Jmí isti̱ kanangijinjín tokó án, ta̱nga kui naa̱, ndásíje̱n katsangijon ndsa̱ko án. 47Kuíni nga bo̱a̱ xianñaa nga ndatsi kjín má jeé, jè kiniꞌánjetakoón, ngatꞌa̱ achichí ꞌniú katsꞌéntjó, ta̱nga kui xota̱ xi chiboa niꞌánjetakoón, chiboa tsí tsꞌéntjó.
48Kó Kjisoo̱, bi̱ katsoó kui naa̱:
–Ji chjo̱on jée̱ jè kiniꞌánjetakoón.
49Kó xota̱ xi ngase xi síndojo̱ tꞌa yámíxa̱a̱, ítsꞌi̱yanii̱ nga bi̱ katsó ja̱kꞌi̱e̱ ja̱ngajaán xkjín:
–ꞌYání bo̱a̱ kui xi̱ꞌbi̱, nga ngaskande jé tsꞌénjétakoón.
50Kó Kjisoo̱, bi̱ katsó ngasee̱ kui naa̱:
–Ta̱ngatꞌanii̱ kjo̱a̱sꞌijìi̱n, kuíni nga je jatjoꞌa ji, tꞌen xió xió ji ꞌne̱.
Currently Selected:
Rkaa̱ 7: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
