Rkaa̱ 8

Ínchjín xí asíko̱jo Kjisoo̱

1Kó jaskan ngije kamá kui nii̱, Kjisoo̱ kijí ngayeje na̱xi̱ńdáꞌniú ko̱jo ndí nangi, nga katsóyà éntjatsi̱e̱e̱ kjo̱a̱a̱ nínga botixómá Néná. Nga tiejó xota̱ tsi̱ꞌe̱ ki̱a̱ nijan kistsoꞌbájo̱, 2ko̱jo bo̱a̱ tsꞌén tjín ínchjín xí Kjisoo̱ katsꞌéndaya nga tsꞌaxieé a̱siénni̱xtjin xi ndajín ko̱jo kjín to̱ko̱ya chiꞌin. Ngi̱jii̱n kui ínchjiín, ki̱a̱ tsoꞌbájin na̱ Riyaa̱, kui xi ti̱ na̱ Leé kiꞌmií nga, kui xi yito a̱si̱énni̱xtjii̱n xindajín jatjo ngi̱jin yojoo̱, 3ko̱jo na̱ Juaá, chjo̱ón kui nda̱ xi ꞌmí Kusaa̱, nda̱ xi katsꞌénxájo̱ Erondee̱, ko̱jo na̱ Susa̱, ko̱jo kjín ngase kje̱ꞌe ínchjín xí katsꞌénseén nga asíko̱jo nga katsjaá ta̱ ni xi tjínrií.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ nda̱ xi atítsojo xojmaá

(Matioo̱ 13:1-9; Markoo̱ 4:1-12)

4Kó kjiꞌanga kjín xota̱ kamátikó xí kjindibáni xki̱ na̱xi̱ńdáꞌniú xi kijíkoón Kjisoo̱, íni̱jmi̱ì kui énkjín xi bi̱ tsoó:

5–Ngo nda̱ xi ꞌbítji̱e̱, kijíkꞌítji̱e̱ xojmá. Kó nga ítji̱e̱ xojmaá, ngo tjín xí ixó tꞌa ndi̱ya̱à, kó xota̱ xi jaꞌaa̱ katsjánié, kó ni̱siee̱ iskjinie. 6Kó ingo tjín kuí xojmaá xi ixó nga̱són ndi̱jo̱o̱, kó ngije katjońtsꞌién, kixí, ngatꞌa̱ jmí ndáfoa kisꞌiejiín. 7Kó ingo tjín kuí xojmaá xi ixó ngi̱jin yándáꞌyaá, kó nga kamánkꞌá yándáꞌyaá nijan kamánkꞌá, kó katsꞌénxí. 8Kó ingo tjín kuí xojmaá xi ixó tꞌanangi xi ndaa̱, kó kisꞌiee̱ to, kó íntsꞌién, kó nda to katsjá, ngaskande úchán to katsjá nga ngo xojmaá.

Nga katsóyà Kjisoo̱ kui nii̱, ꞌniú tsíchji̱a̱ nga bi̱ katsó:

–Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

9Kó xota̱ tsi̱ꞌe̱ Kjisoo̱ asíyaá, mí ni xi mejeén tsó kui énkjín xi katsóyà. 10Kó Kjisoo̱, bi̱ katsó:

–Jún jè kiꞌmíyàjnú ni xi tjiꞌmaá xikótsꞌèn botixómá Néná, ta̱nga xota̱ xi ngasee̱ énkjín xí tjindókjo̱a̱jo, tsi̱ꞌe̱ nga ndatsi skotsíjen, sku̱i̱e̱jín, kó ndatsi ku̱i̱ntꞌiè, ka̱makjínjiín.

Bi̱ tsꞌén katsóyà Kjisoo̱ kjo̱a̱a̱ énkjiín nda̱ xi ꞌbítji̱e̱e̱

(Matioo̱ 13:18-23; Markoo̱ 4:13-20)

11Kuí nii̱ xi mejeén tsó kui énkjiín: Xojmaá, kuí xí eén Néná, 12kó kui xi ixó tꞌa ndi̱ya̱à, kuí xí xikoó xota̱ xi ntꞌié eén Néná, ta̱nga ta̱ tji̱ꞌni̱u̱ ndibá xindajín ndiabloo̱, kó foaꞌáxiín ngi̱jin ini̱ma̱a̱ kui eén, tsi̱ꞌe̱ nga sꞌi̱jinjiín, kó kjo̱tjoꞌajín. 13Kó kui xojmá xí ixó nga̱són ndi̱jo̱o̱, kuí xí xikoó xota̱ xi ntꞌié eén Néná, kó tsja maa̱ nga kjíbé, ta̱nga nga jmí ja̱ma̱jiín, ta̱ ngotjón tsí sꞌijii̱n, kó nga fochó chi̱bo̱a̱ nga chjátꞌayákón tsꞌenkjié kjo̱a̱. 14Kó kui xojmá xí ixó ngi̱jin ndaꞌyaá, kuí xí xikoó xota̱ xi ntꞌié eén Néná, ta̱nga chíchi̱ chíchi̱ ꞌbijñá kui eén, ngatꞌa̱ kjo̱a̱nda̱a̱ kjo̱a̱cho̱o̱n, ko̱jo kjo̱a̱tsja xi tjiín kuí nga̱sondiee̱, tsꞌénchájá, kó jmí to ꞌbéjiín nga maxchá. 15Kó kui xojmá xí ixó tꞌanangi ndaa̱, kuí xí xikoó xota̱ xi kixi̱, ko̱jo xi ngayeje ini̱ma̱a̱ nga ntꞌié eén, ko̱jo nga tsꞌénkjátjosón ni xi tsó eén Néná, kó ꞌniú mindyia, kó nda to xi tsjá.

Bi̱ tsꞌén akóyá Kjisoo̱ kjo̱a̱a̱ ndiꞌií

(Markoo̱ 4:21-25)

16Ngojín xota̱ xi ku̱i̱ꞌítí ngo ndiꞌí xí tsꞌentsíjenná, tsi̱ꞌe̱ nga jaskan skjíbé ngo ti̱jì xí ku̱i̱ꞌíꞌmáni, ko̱jo tsi ngindie ngo ṉchan ku̱i̱ꞌíjñá, a mí tsí ta̱sá nínga ꞌbítíyá ndiꞌí xí tsꞌentsíjee̱n ku̱i̱ꞌíjñá, tsi̱ꞌe̱ nga sa̱ꞌíntsijee̱n xota̱ xi kꞌo̱sꞌien ngi̱ya ndiꞌaa̱. 17Ngatꞌa̱, nde ngojín ni xi ꞌma xi xcha̱jín, ti̱nde jmíjín ngo ni xi ko̱ndókjo̱a̱si̱e̱n xi xcha̱ nda ndajín, ko̱jo tsi xcha̱jín nínga tsijee̱n.

18Tsitsíjenjnúu̱ kótsꞌèn ndaꞌyájnú, ngatꞌa̱ xi ntꞌié ni xi bokoyá an, tsie ngase ko̱e̱ꞌeé nga ka̱makjiín, ta̱nga xi ntꞌiéjín, chja̱ꞌáxiín ngaskande ni chií xi tsꞌénkjó nga makjiín.

Bi̱ tsꞌén katsóyà Kjisoo̱ ꞌyání xi na̱aa̱n ko̱jo ntsꞌi̱e̱

(Matioo̱ 12:46-50; Markoo̱ 3:31-35)

19Kó na̱aa̱n, ko̱jo já ntsꞌi̱e̱, ko̱jo ínchjín ndichja jachó nínga tikón Kjisoo̱, ta̱nga kamájín jachókón tiñaa̱ ngatꞌa̱ achichí xota̱ tjín. 20Kó tjín xí katsóyaà Kjisoo̱, nga bi̱ katsoó:

–Na̱áa̱n, ko̱jo ntsꞌie, ko̱jo ndichje ndi̱tsén jàn síndo, kó mején xoò sku̱i̱e̱e̱.

21Ta̱nga Kjisoo̱, bi̱ katsoó kui jaá:

–Na̱ana, ko̱jo ntsꞌié án, ko̱jo ndichja án kuí xí ntꞌié ko̱jo xi tsꞌén ni xi tsó eén Néná.

Bi̱ tsꞌén katsꞌénkꞌíxió Kjisoo̱ tjo̱o̱ ko̱jo ndáchíkoón

(Matioo̱ 8:23-27; Markoo̱ 4:35-41)

22Kó ngo ndi̱yà nga Kjisoo̱ ko̱jo xota̱ tsi̱ꞌe̱, tsꞌasꞌien ngo ngi̱ya tjotso je, bi̱ katsoó:

–Tjián ngándá xí ingoboá jàn.

Kósꞌe̱ kijí. 23Ta̱nga tji̱e̱nga ndyi̱foaꞌatio ngi̱jin ndáfoaa̱, kisꞌifé Kjisoo̱. Kó ta̱ kjiꞌa má kjindibá ngo tjo̱ꞌniú xí kitsjiee̱n ndáfoaa̱, kó ndeskande tsꞌenkꞌásꞌién má ndáfoa ngi̱ya tjotso jee̱, kó je mejeén matingándá. 24Kó tsangínchoo̱n Kjisoo̱, kó kiniꞌánkjaꞌaá, nga bi̱ kiꞌmií:

–¡Mostro̱! ¡Mostro̱! ¡Jè matingándá!

Sꞌe̱ ngije jaꞌaá Kjisoo̱, katsꞌénxchánjo̱ tjo̱o̱ ko̱jo ngaꞌniuú ndáfoaa̱, kó kixixió, sꞌe̱ kisꞌie xió xió nga̱són ndáfoaa̱. 25Kó Kjisoo̱, bi̱ katsoó xotaa̱:

–Ñá tsangínjo̱jnú kjo̱a̱sꞌijinjnú.

Kó kui jaá achichí katsakjónní ko̱jo kijíndikoón, kó ja̱kꞌi̱e̱ ja̱ngaján asíyaá xkjín, nga bi̱ katsoó:

–ꞌYá nda̱a̱ bo̱a̱ xi̱ꞌbi̱, nga ngaskande tjo̱o̱ ko̱jo ndáfoaa̱ tsjaá kjo̱a̱, kó ntꞌiéꞌeén.

Bi̱ tsꞌén katsꞌéndaya Kjisoo̱ ngo nda̱ xi tjíjii̱n a̱si̱énni̱xtjii̱n xindajín

(Matioo̱ 8:28-34; Markoo̱ 5:1-20)

26Kó ti̱chaa̱n jachó nangii̱ xota̱ Jerasa̱, kui nangi xi tikón ngándá xi ingoboaá, kje̱n nangi Ngalilea̱. 27Kó nga jatjajen Kjisoo̱ tjotso jee̱, kijí nga̱són kixí jàn, kó jachókoón ngo nda̱ xi kjindibáni na̱xi̱ńdáꞌniú jàn, xi je kjín ni̱xtjinnii̱ nga tikónjii̱n ngi̱jin yojoo̱ ngo a̱si̱énni̱xtjii̱n xindajín, kó jmí ńjño yajájín, ti̱nde ngiti̱ jmí ndiꞌa kisꞌijñajín, ngatꞌa̱ ki̱a̱ ngi̱jin na̱xi̱mikꞌiee̱n kisꞌijña. 28Kó kui nda̱a̱ nga kamábe Kjisoo̱, ꞌniú askjandáyà, kó asiéntikoó tꞌa se Kjisoo̱ sꞌe̱ bi̱ katsó:

–¡Mí xí tjiín kjo̱a̱a̱ an, Kjisoo̱, ndií Néná xí tikón ndiꞌakꞌajmi jàn! ¡ꞌNiú tsꞌénmíꞌaá nga jmí kjo̱a̱ni̱ma̱ niꞌínkjeꞌejínní!

29Kuíni nga bi̱ katsó ngatꞌa̱ Kjisoo̱ tsíꞌaá kui a̱siénni̱xtjin xi ndajiín, tsi̱ꞌe̱ nga jatjojin ngi̱jin yojoo̱ kui nda̱a̱. Ngatꞌa̱ achichí kjín ni̱xtjinnii̱ kui a̱si̱énni̱xtjii̱n nga katsꞌéntsi̱ꞌe̱ yojoo̱ kui nda̱a̱, kó xotaa̱ nda tsi ńꞌniúki̱cha̱ má ítaꞌniú tsja ko̱jo se, tsi̱ꞌe̱ nga jmí ni sa̱ꞌínjín, ti̱ kuí xí iskjítindsóni, kó kui xindajiín ta̱xkiya katsꞌénkjí ngi̱ndie kjiꞌitiya kui nda̱a̱. 30Kó Kjisoo̱, bi̱ katsoó nga asíyaá:

–Kó ꞌmií.

Kó kui nda̱a̱, bi̱ katsó:

–Lejio̱n ꞌmíjne̱.

Ngatꞌa̱ achichí kjín má a̱siénni̱xtjin xindajín xi tsꞌasꞌienjin ngi̱jin yojoo̱. 31Kó kui xindajiín, ꞌniú tsíꞌáa̱ Kjisoo̱ tsi̱ꞌe̱ nga ki̱a̱jín katsangiya ti̱xa̱na̱nga̱a̱ tꞌanangii̱. 32Kó ki̱a̱ tji̱ngi̱i̱, achichí má chi̱nga̱ tjimá xi ndyi̱kjién ngi̱jin ndi̱xcho̱o̱, kó kui a̱siénni̱xtjin xindajiín, ꞌniú tsíꞌaá Kjisoo̱ tsi̱ꞌe̱ nga ngi̱jin yojoo̱ kui chi̱nga̱a̱ kꞌo̱sꞌienjin, kósꞌe̱ Kjisoo̱ katsjaákjo̱a̱. 33Kó kui a̱si̱énni̱xtjii̱n jatjojii̱n kui nda̱a̱, kó chi̱nga̱a̱ kijíkꞌíndojii̱n, kó ta̱xkiya tsanga tsobé ngo nínga nkꞌa, kó ki̱a̱ ixó ngi̱jin ndáfoaa̱, nínga jesón ngándá ngayejee̱.

34Kó kui já xí ndyi̱koo̱n kui chi̱nga̱a̱, nga kamábe ni xi kamaá, tsanga má nga kijí ngi̱jin na̱xi̱ńdáꞌniú jàn ko̱jo tꞌa ṉdi̱a̱ nga kijíkꞌíni̱jmì kuí nii̱. 35Kó xotaa̱ kijíkatsijen mí ni xi kamaá, kó nga jachó nínga tikón Kjisoo̱, kamábe kui nda̱ xi kjín a̱si̱énni̱xtjii̱n xindajín kisꞌińdojin yojoo̱ nga je xió tikóntꞌa se Kjisoo̱, je tsꞌényajá ńjñoo̱, kó je nda tikón, kó kui xotaa̱ achichí katsakjónní. 36Kó xota̱ xi kamábe ni xi kamaá, íni̱jmi̱ì kótsꞌèn jatjoꞌa kui nda̱ xi kisꞌijñajii̱n a̱siénni̱xtjin xindajiín. 37Kósꞌe̱ ngayeje xota̱ xi chji̱a̱ni nangi Jerasa̱, ꞌniú tsíꞌáa̱ Kjisoo̱ tsi̱ꞌe̱ nga kjo̱tjoni kui nangii̱, ngatꞌa̱ achichí katsakjónní kjo̱a̱a̱ kui ni xi kamaá. Kó Kjisoo̱ tsꞌasꞌien ngi̱ya tjotso jee̱, sꞌe̱ kijí. 38Kó kui nda̱ xi jatjojii̱n a̱siénni̱xtjin xindajiín ngi̱jin yojoo̱, ꞌniú tsíꞌaá Kjisoo̱ tsi̱ꞌe̱ nga kjo̱jo, ta̱nga Kjisoo̱, bi̱ katsoó:

39–Ta̱sá tꞌen nginí ndiꞌàa̱, kó tꞌíni̱jmì jí ni je xi katsꞌénjoo̱ Néná.

Kó kui nda̱a̱ kijí, kó íni̱jmi̱ì xota̱ na̱xi̱ńdaá ni xi katsꞌénjo̱ Kjisoo̱.

Bi̱ tsꞌén katsꞌéndaya Kjisoo̱ ngo tsa̱kjìn ko̱jo ngo xota̱chjo̱on

(Matioo̱ 9:18-26; Markoo̱ 5:21-43)

40Kó kjiꞌanga kijí nginí Kjisoo̱, achichí má xota̱ xi tsja kamaá nga jachókoón, ngatꞌa̱ ngayejee̱ nga je ndyi̱koyaa̱. 41Kósꞌe̱ ta̱niján má jachókoón ngo nda̱ xi ꞌmí Jairo̱, kui xi nda̱ ngito̱ko̱o̱ ndiꞌa nínga ndokjo̱a̱ eén Néná kamá. Kó asiéntikoó tꞌa se Kjisoo̱, kósꞌe̱ ꞌniú tsíꞌaá nga kjo̱jo ndiꞌaa̱, 42ngatꞌa̱ ta̱ ngo tsí má ndí tsa̱kjìn xí tikoón, xi mara̱ tsi ta̱ tiejó noó, xi je mején ma kꞌien. Kó tji̱e̱nga tsꞌénfí Kjisoo̱ ndiꞌaa̱ Jairoo̱, achichí xota̱ xi nijan kijíjo̱ xi ngaskande ndyi̱ꞌbindyióꞌniú má.

43Kó ngo xota̱chjo̱on xí tiejó nónií nga tjiín chi̱xójín xi je katsꞌénkjié ngayeje to̱o̱n nga kijíkoón chji̱ni̱e̱ndiki, kó nde ngojín xi katsꞌéndaya. 44Kui xota̱chjo̱on kijíkóntiñaa̱ xtji̱e̱e̱n nga̱xto̱n Kjisoo̱, kó katsꞌénjo̱ nga̱ndee̱ ńjñoo̱, kó ti̱ kjiꞌa kixixió kui chi̱xójín xí koo̱n.

45Kó Kjisoo̱, bi̱ katsó nga asíyá:

–ꞌYání bo̱a̱ xi katsꞌénjo̱na.

Kó xota̱ xi tsoꞌbájo̱ ji̱njín katsó, sꞌe̱ Peé, bi̱ katsó:

–Mostro̱, xota̱ kjiín tsꞌénꞌbindyióꞌniuú, kó ndyi̱tsangińña kꞌi̱e̱ ndyi̱tsangińña jaán, kó bi̱ tꞌísé ji: “ꞌYání bo̱a̱ xi katsꞌénjo̱na.”

46Ta̱nga Kjisoo̱, bi̱ katsó:

–Tjín xí katsꞌénjo̱na, ngatꞌa̱ tsijen kamána nga ngi̱jin yojona jatjojin ngo ngaꞌniú.

47Kósꞌe̱ kui xota̱chjo̱on nga kamábe nga kamáꞌmájiín yojoo̱, jatsié má nga kijíkoón Kjisoo̱, kósꞌe̱ asiéntikoó tꞌa se Kjisoo̱, sꞌe̱ katsóyaà ngi̱jii̱n ngayeje xotaa̱, míkjo̱a̱a̱ nga katsꞌénjo̱ ńjñoo̱ Kjisoo̱, ko̱jo kótsꞌèn nga ti̱ kuii̱ chi̱bo̱a̱ kamándaya. 48Kó Kjisoo̱, bi̱ katsoó:

–Ji chjo̱on, kjo̱a̱sꞌijìi̱n xí je tsꞌaxiéꞌaá, tꞌen xió xió ꞌne̱.

49Ti̱ tsꞌénchji̱a̱ ngase Kjisoo̱, nga jachó ngo nda̱ xi kjindibáni ndiꞌaa̱ nda̱ ngito̱ko̱o̱ ndiꞌa nínga ndokjo̱a̱ eén Néná, nga bi̱ katsoó:

–Jè kꞌien tsa̱kjìnchíi̱, ngiti̱ niꞌínxtíjíi̱n Mostroo̱.

50Ta̱nga Kjisoo̱ tsintꞌié kuí eén, kósꞌe̱ bi̱ katsó:

–Ngata̱ ndakinjín má, ta̱ ti̱ꞌinsꞌijin tsí ji, kó tsa̱kjìnchíi̱ kjo̱tjoꞌa.

51Kó nga jachó Kjisoo̱ ndiꞌaa̱ Jairoo̱, ta̱ꞌyajín xi nijan tsꞌasꞌienjo̱ ngase, ta̱ Peé, ko̱jo Sandiyaá, ko̱jo Juaa̱, ko̱jo na̱ꞌmii̱, ko̱jo na̱aa̱n kui tsa̱kjìnchií tsí. 52Kó ngayeje xotaa̱ ndyi̱kjandà nga ndasen kjimaa̱ kjo̱a̱a̱ kui tsa̱kjìnchií, ta̱nga Kjisoo̱, bi̱ katsoó:

–Ngata̱ chaꞌájínjnú, tsa̱kjìnchií kji̱e̱ ꞌméjín, ta̱ kjiꞌifé tsi.

53Kó ngayeje xotaa̱ tsajnókie Kjisoo̱, ngatꞌa̱ nga be nga je kꞌien kui tsa̱kjìnchií. 54Ta̱nga Kjisoo̱ iskjíbé tsja tsa̱kjìnchií, kó bi̱ katsoó:

–¡Tsa̱kjìnchí, ti̱sítji̱n ji!

55Kó ngije jaꞌáꞌyaá a̱si̱énni̱xtjii̱n, tji̱e̱nmá jastjíe̱n, kó Kjisoo̱ katsjákjo̱a̱ nga ko̱e̱ꞌeé nichinie. 56Kó xi xchaá kui tsa̱kjìnchií achichí kijíndikoón, ta̱nga Kjisoo̱ tsíꞌaá nga ta̱ꞌyajín xi ka̱tso̱yaa̱ kui ni xi kamaá.

Currently Selected:

Rkaa̱ 8: MAIX

Highlight

Copy