Rkaa̱ 6

Bi̱ tsꞌén tsíchji̱a̱ Kjisoo̱ kjo̱a̱a̱ ni̱xtjin ndikoón

(Matioo̱ 12:1-8; Markoo̱ 2:23-28)

1Kó ngo ndi̱yà nga ni̱xtjin ndikón, Kjisoo̱ jaꞌa ngo ngi̱ndie nínga tjitjíe̱ to ndso̱ko̱a̱n ṉño̱pan, kó xota̱ tsi̱ꞌe̱ tsꞌenje̱n ńtiín to ndso̱ko̱a̱n ṉño̱paa̱n, kó ngi̱ya tsja katsꞌénngaya nga itjiá, sꞌe̱ iskjinie kui too̱. 2Kó tjín já fariseoo̱, xi bi̱ katsó:

–Míkjo̱a̱a̱ nga ndyi̱niꞌánjnú ngo ni xi tsjandièjín kjo̱a̱kitii̱ nga niꞌán nga ni̱xtjin ndikón.

3Kó Kjisoo̱, bi̱ katsoó kui jaá:

–A kji̱e̱ niꞌányàjínjnú ni xi katsꞌén Ndabii̱ nga kamábojoó kui ko̱jo xota̱ xi tsoꞌbájo̱. 4Kótsꞌèn tsꞌasꞌien ndiꞌaa̱ Néná, kó iskjinie kui ko̱jo xota̱a̱ pan xi je kiniꞌánkꞌasꞌiee̱n Néná, kui xi tsjandièjín kjo̱a̱kitii̱ nga skji̱ni̱e̱ kui ko̱jo xota̱a̱, kó ta̱kuítsí já chináꞌmii̱ xi ma kjinie, kó iskjinie, kó ti̱ katsjaá xota̱ xi tsoꞌbájo̱ kui nga.

5Kó bi̱ katsó ngase Kjisoo̱:

–Ndií nda̱ xi̱ꞌii̱n ngaskande kui botixómaá ni̱xtjin ndikoón nga.

Bi̱ tsꞌén katsꞌéndaya Kjisoo̱ ngo nda̱ xi kixíyà tsja

(Matioo̱ 12:9-14; Markoo̱ 3:1-6)

6Kó bi̱ kamá kje̱ꞌe ni̱xtjin ndikón, Kjisoo̱ tsꞌasꞌien ngi̱ya ndiꞌa nínga ndokjo̱a̱ eén Néná kó akóyá, kó ki̱a̱ kisꞌijña ngo nda̱ xi kixíyà tsja xi kixi̱i̱, 7kó já chji̱ni̱e̱kjo̱a̱kitii̱ ko̱jo já fariseoo̱ ndyi̱kondaꞌma Kjisoo̱, tsi̱ꞌe̱ nga sku̱i̱e̱ tsi sa̱ꞌíndaya kui nda̱a̱ nga ni̱xtjin ndikón, tsi̱ꞌe̱ nga bo̱a̱ tsꞌén sa̱ko̱ó ngo kjo̱a̱ nga ko̱óngítaꞌin. 8Ta̱nga Kjisoo̱ kamákjiín ni xi ndyi̱tsꞌènkjó kui jaá, kó bi̱ katsoó nda̱ xi kixíyà tsjàa̱:

–Ti̱sítji̱n, kó kꞌi̱e̱ tindyin ji ngamasiee̱n.

Kó kui nda̱a̱, jastjíe̱n sꞌe̱ kasasienkixi̱. 9Kó Kjisoo̱, bi̱ katsoó xota̱ xi ngasee̱:

–Ngo ni kosíyájnúꞌun: Mí ni xi tsjandiè kjo̱a̱kitii̱ nga ma niꞌán nga ni̱xtjin ndikón: A ni xi nda, axa̱ ni xi ndajín. A ko̱ꞌna̱xiéꞌá, axa̱ si̱ꞌankꞌién ngo xota̱.

10Kó askotsijee̱n xota̱ xi jaꞌatjiyajoo̱n, kó bi̱ katsoó kui nda̱ xi kixíyà tsjàa̱:

–Tjintie ndse̱.

Kó kui nda̱a̱ bo̱a̱ katsꞌén, kó kamándaya tsja. 11Kó kui já chji̱ni̱e̱kjo̱a̱kitii̱ ko̱jo já fariseo̱ xi ngasee̱, achichí katsꞌénxchán, kó ítsꞌi̱yanii̱ nga askjoyá kótsꞌèn ko̱e̱je̱e̱ kondra̱ Kjisoo̱.

Bi̱ tsꞌén jaꞌájin Kjisoo̱ nga tiejó já apostroo̱

(Matioo̱ 10:1-4; Markoo̱ 3:13-19)

12Kui ni̱xtjin jàn, Kjisoo̱ kijí ngo tji̱ngi̱ nga tsíchji̱a̱a̱ Néná, kó ki̱a̱ jaꞌaa̱ ngo ni̱xtji̱e̱n nga tsíchji̱a̱a̱ Néná. 13Kó nga kisisie̱èn, tsíchji̱a̱a̱ ngayeje xota̱ tsi̱ꞌe̱, kó tiejó má já xí jaꞌájin xi já apostro̱ katsoó. 14Kuí xi̱ꞌbi̱ nga tiejó já xí jaꞌájin Kjisoo̱: Ximoo̱, nda̱ xi ti̱ Peé katsoó nga, ko̱jo nda̱ xi ꞌmí Jandree̱ ntsꞌi̱e̱ Ximoo̱, ko̱jo Sandiyaá, ko̱jo Juaa̱, ko̱jo Ngiripee̱, ko̱jo Bartolomee̱, 15ko̱jo Matioo̱, ko̱jo Tomaa̱, ko̱jo Sandiyá ndií nda̱ xi ꞌmí Alfeoo̱, ko̱jo Ximoo̱ nda̱ xi Chi̱ni̱ kiꞌmií nga, 16ko̱jo Jundaa̱ ntsꞌi̱e̱ nda̱ xi ꞌmí Sandiyaá, ko̱jo Junda̱ Iskariotee̱, nda̱ xi jaskan atíñá Kjisoo̱.

Kjisoo̱ bi̱ tsꞌén akóyaá ko̱jo katsꞌéndaya kjín xota̱

(Matioo̱ 4:23-25)

17Kó Kjisoo̱ jatjajen nginí ki̱a̱ tji̱ngi̱i̱ ko̱jo xota̱ tsi̱ꞌe̱, kó ki̱a̱ nínga soón kixindyia, kó achichí má xota̱ xi kisꞌiṉtso̱matjingii̱ xi chji̱a̱ni ngayeje nangi Jundea̱, ko̱jo na̱xi̱ńdáꞌniú Jerusale̱n, ko̱jo na̱xi̱ńdá xí síndotꞌa ngi̱ndi̱o̱ò xi ꞌmí Tiroo̱ ko̱jo Sindo̱n, 18xi jachókintꞌieé Kjisoo̱ ko̱jo tsi̱ꞌe̱ nga sa̱ꞌíndaya chiꞌin xi tjiín, ko̱jo kui xota̱ xi tsie kjo̱a̱ni̱ma̱ jaꞌa ta̱ngatꞌanii̱ a̱siénni̱xtjin xi ndajiín, ti̱ bo̱a̱ ti̱ tsꞌén kamándaya nga. 19Kó ngayeje xotaa̱ nga kamámejeén katsꞌénjo̱ Kjisoo̱, ngatꞌa̱ ngo ngaꞌniú jatjoo̱ yojoo̱ xi katsꞌéndaya ngayeje xotaa̱.

Bi̱ tsꞌén akóyá Kjisoo̱ kjo̱a̱a̱ ꞌyá xota̱ xi tsja tjiín ko̱jo xi tsjajín tjiín ngindyi̱ko̱n Néná

(Matioo̱ 5:1-12)

20Kó Kjisoo̱ askotsijee̱n xota̱ tsi̱ꞌe̱, kó bi̱ katsoó:

–Achichíra̱ tsjajnú jún xi ni̱ma̱jnú, ngatꞌa̱ tsa̱jún boá nínga botixómá Néná.

21Achichíra̱ tsjajnú jún xi bojójnú ngotꞌe̱, ngatꞌa̱ sꞌe̱ stsi̱e̱jnú.

Achichíra̱ tsjajnú jún xi ndyi̱chaꞌájnú ngotꞌe̱, ngatꞌa̱ sꞌe̱ ko̱jno̱jnú.

22Achichíra̱ tsjajnú jún nga xotaa̱ sa̱ꞌínchꞌójnú, ko̱jo nga ko̱ngatji̱ngijnú, ko̱jo nga chꞌo ka̱tso̱jnú, ko̱jo nga chꞌo ka̱maa̱ jaꞌénjnú xikoó tsi ngo ni xi ndajín, ta̱ngatꞌanii̱ ndií nda̱ xi̱ꞌii̱n. 23Tsja ngatamajnú kui ni̱xtjin jàn, kó tsjangatꞌiéjnú, ngatꞌa̱ ta̱nisién je ni xi sa̱kójnú ndiꞌakꞌajmi jàn, ngatꞌa̱ bo̱a̱ ti̱ tsꞌén xota̱ xi xchaá kui xotaa̱, bo̱a̱ katsꞌénjo̱ já chji̱ni̱e̱ꞌe̱én Néná.

24Ta̱nga, xi̱xꞌi̱a̱njnú jún xota̱ xi cho̱n, ngatꞌa̱ jè kisꞌiejnú kjo̱a̱tsjajnú jún.

25Xi̱xꞌi̱a̱njnú jún xi ngotꞌe̱ kitsiejnú, ngatꞌa̱ sꞌe̱ ka̱mabojójnú.

Xi̱xꞌi̱a̱njnú jún xi ngotꞌe̱ ndyi̱mojnó jún, ngatꞌa̱ sꞌe̱ on ka̱majnú, ko̱jo sꞌe̱ xchaꞌájnú.

26Xi̱xꞌi̱a̱njnú jún kjiꞌanga ngayeje xotaa̱ nda tsꞌén ku̱i̱chji̱a̱ kjo̱a̱a̱ jún, ngatꞌa̱ xota̱ xi xchaá kui xotaa̱ ti̱ bo̱a̱ ti̱ tsꞌén katsꞌénjo̱ já chji̱ni̱e̱ꞌén ndísoó nga.

Bi̱ tsꞌén akóyá Kjisoo̱ kjo̱a̱a̱ nga niꞌánngojo

(Matioo̱ 5:38-48; 7:12)

27Ta̱nga jún xi ndyi̱ndaꞌyájnúꞌun, bi̱ xiánjnúꞌun: Tjó ti̱ꞌánjnú xota̱ xi kondra̱jnú, nda ti̱ꞌanjo̱jnú xota̱ xi chꞌoo̱ jún, 28ti̱ꞌanchikonñéjnú xota̱ xi chꞌo tjítsójnú, chji̱a̱ꞌatjejnú xota̱ xi ku̱i̱chji̱a̱taꞌinjnú. 29Tsi tjín xí ko̱tꞌa ngo tꞌanijin, te̱ꞌée̱ nga ko̱tꞌa xi ingoo̱ nga, kó tsi tjín xí kjo̱a̱ꞌáxiín ńjño xi kjitꞌa nga̱xten, te̱ꞌée̱ chi̱ngàa̱ nga. 30Ta̱ ꞌyání xi ku̱i̱ꞌaa̱ ngo ni, te̱ꞌée̱, kó tsi tjín xí kjo̱a̱ꞌáxiín ni xi tse̱, ngata̱ chjiéꞌéjíi̱n nga tsja̱ꞌóyá nginií. 31Xikó tsꞌén mejénjnú nga si̱ꞌanjo̱jnú jún, bo̱a̱ ti̱ ti̱ꞌanjo̱jnú xota̱ xi kje̱ꞌe nga.

32Ngatꞌa̱ tsi ta̱kuítsí xota̱ xi tjoó jún xi si̱ꞌantjójnú, mí kjo̱a̱nda xi tjínjnú. Ngaskande xota̱jeé tsꞌéntjó xota̱ xi ndyi̱tsꞌèntjó kuí. 33Kó tsi ta̱kuítsí xota̱ xi nda sa̱ꞌínjo̱jnú jún xi nda si̱ꞌanjo̱jnú, mí kjo̱a̱nda xi tjínjnú. Ngaskande xota̱jeé tsꞌén kuí nii̱. 34Kó tsi ta̱kuítsí xota̱ xi si̱ꞌankíyájnú xi ndyi̱chiyájnúu̱ nga tsja nginíjnú, mí kjo̱a̱nda xi tjiín kui nii̱. Ngaskande xota̱jeé tsꞌénkíyaà ngo ni xkjín, nga ndyi̱koyaa̱ nga ingo bo̱a̱ kjiꞌi tsja̱á nginií xkjín. 35Ta̱nga jún chjiéngá si̱ꞌantjójnú kondra̱jnú, kó nda ti̱ꞌanjo̱jnú, kó ti̱ꞌankíyájnúu̱ ngo ni, nga jmí tsi xchiyàjnúu̱ nga kje̱ꞌe ni ko̱e̱ꞌé nginíjnú, kó bo̱a̱ tsꞌén nga sa̱kójnú ngo kjo̱a̱nda xi ꞌniú je, kó jún, ndií Néná xí tikón ndiꞌakꞌajmi jàn ka̱majnú, kui Néná xí nda tsꞌénjo̱ xota̱ xi bejín ni xi nda niꞌánjo̱, ko̱jo xota̱ xi ndajín ndyi̱tsꞌèn. 36Chjiéngá ni̱ma̱takón ngatamajnú, xikótsꞌèn ni̱ma̱ maa̱ Na̱ꞌmijnú.

Bi̱ tsꞌén akóyá Kjisoo̱ kjo̱a̱a̱ nga ndikón nga fongitaꞌin jé ngo xota̱

(Matioo̱ 7:1-5)

37Ngata̱ fongitaꞌínjínjnú jé ngo xota̱, tsi̱ꞌe̱ nga Néná ko̱óngitaꞌínjínjnú ngo jé. Ti̱ꞌanjetakónjnúu̱ xingi̱jnú, kó Néná sa̱ꞌínjetakónjnú jún. 38Te̱ꞌéjnúu̱ ni xi ka̱machjieén ngo xota̱, kó Néná tsja̱ajnú ni xi ka̱machjiénjnú jún. Tsja̱ajnú ngo stsa chi̱bo̱a̱ xi sꞌi̱kitsie má nga ꞌniú xi̱ndyiá. Ngatꞌa̱ ti̱ kuii̱ yáchi̱bo̱a̱ xi si̱ꞌankjiénjnú nga xꞌi̱chi̱bo̱a̱jnú, ti̱ kuii̱ xi sa̱ꞌínkjién Néná nga kꞌo̱chi̱bo̱a̱jojnú jún.

39Kó Kjisoo̱ katsóyaà ngo énkjín xi bi̱ tsó:

–A ka̱márií ngo nda̱ xi ti̱ka̱ ko̱ko̱ó ndi̱yà kje̱ꞌe nda̱ xi ti̱ka̱. A mí tsí nga joó nga ku̱i̱xo̱ya ti̱xa̱a̱. 40Nda̱ xi tjibókoyaá ꞌniújín ngase ka̱maa̱ ta̱bo̱a̱jínnii̱ mostroo̱, ta̱nga ngije akakoyaá kui nda̱a̱, bo̱a̱ ti̱ tsꞌén ka̱maa̱ xikoó kui mostroo̱.

41Ánní nga xtjié xi kjingi ndyi̱ko̱n ntsꞌie titsitsijìi̱n, kó yejín ji yáxtió xi kjingi ndyikin ji. 42Axa̱ kótsꞌèn ma takín nga bi̱ sée̱ ntsꞌie: “Ntsꞌie, te̱ꞌéndièní nga kꞌoxié an xtjié xí kjingi ndyikin ji”, nga yejín ji yáxtió xi kjingi tse̱. ¡Jókje̱n! Tjón mára ꞌna̱xié ji yáxtió xi kjingi ndyikin ji, sꞌe̱ nda ka̱matsijeen tsi̱ꞌe̱ nga xchi̱e̱ ji xtjié xí kjingi ndyi̱ko̱n ntsꞌie ji.

Bi̱ tsꞌén akóyá Kjisoo̱ kjo̱a̱a̱ xikótsꞌèn ya xotaa̱

(Matioo̱ 7:17-20; 12:33-35)

43Ngojín yá xí nda, xi to xi ndajín ko̱a̱ja̱a̱, ti̱nde ngojín yá xí ndajín, xi to xi nda ko̱a̱ja̱a̱. 44Ngatꞌa̱ nga ngo nga ngo yaá ya kjo̱a̱a̱ to xi tsjá, ngatꞌa̱ ngojín yá ndaꞌyá xi toꞌingo̱ ko̱a̱ja̱a̱, ti̱nde ngojín yá sarsa̱ xi tostsi̱jè ko̱a̱ja̱a̱. 45Nda̱ xi ndaa̱, ni xi nda ꞌboxié xi tikónjii̱n ngi̱jin ini̱ma̱a̱, kó nda̱ xi ndajiín, ni xi ndajín ꞌboxié xi tikónjii̱n ngi̱jin ini̱ma̱a̱. Ngatꞌa̱ ni tsie xi tjíjii̱n ngi̱jin ini̱ma̱a̱ xotaa̱, kuí ni xi chji̱a̱ tsꞌoa.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ jó já xi katsꞌénda ndiꞌaa̱

(Matioo̱ 7:24-27)

46Míkjo̱a̱a̱ nga jún, “Ndi̱a̱, Ndi̱a̱” ndyi̱ꞌmìjnúu̱, kó niꞌánjínjnú ni xi xian an. 47Ngayeje xota̱ xi ndibakónna, kó ntꞌié énna, kó tsꞌénkjátjosón, kꞌi̱e̱ xiyàjnúꞌun xi kókón kui: 48Bo̱a̱ fóyanii̱ xikoó ngo nda̱ xi katsꞌénda ngo ndiꞌa, kó tjón katsꞌénda ngo ti̱xa̱ xi na̱nga̱, kó ítjatsꞌennii̱ xoó ndiꞌaa̱ nga̱soón ngo ndi̱jo̱ xi je, kó nga kamáje ndejeèꞌ, ndáfoaa̱ yeꞌétꞌa xchaán kui ndiꞌaa̱, ta̱nga nde katsꞌéntíyájiín, ngatꞌa̱ nga̱soón ngo ndi̱jo̱ kamánda. 49Ta̱nga xi tsintꞌié, kó katsꞌénkjatjosónjín, kꞌi̱e̱ xiyàjnúꞌun xi kókón kui: Bo̱a̱ fóyanii̱ xikoó ngo nda̱ xi katsꞌénda ngo ndiꞌa nga̱soón tꞌanangii̱, kó jmí xó ítjatsꞌenjínnii̱ nga katsꞌénda, kó nga kamáje ndejeèꞌ, ndáfoaa̱ yeꞌétꞌa xchaán kui ndiꞌaa̱, kó tji̱e̱nmá tsꞌáka, kó tsie ni xi jee̱.

Currently Selected:

Rkaa̱ 6: MAIX

Highlight

Copy