Rkaa̱ 2

Bi̱ tsꞌén katsen Kjisoo̱

(Matioo̱ 1:18-25)

1Kó kui ni̱xtjin jàn, nda̱ xtitjoón Roma̱ xi ꞌmí Aungusto̱ Sesaa̱, katsjákjo̱a̱ nga ka̱ma xki̱ ngayeje xota̱ xi tjín nga̱sondiee̱. 2Kó nda̱ xi ꞌmí Sirenioo̱ tjiín xá nangi Siria̱ nga tjón tjón katjoꞌóꞌyá xki̱i̱ xota̱. 3Ngayeje xotaa̱ kijíkítꞌa xo̱jo̱n yojoo̱, kó kja̱kijí kja̱kijí na̱xi̱ńdá nínga chji̱a̱ni. 4Kó Kosiee̱ jatjoni na̱xi̱ńdáꞌniú Nasaree̱t, xi tikón nangi Ngalilea̱, sꞌe̱ kijí ndí na̱xi̱ńdáꞌniú Belee̱n xi tikón nangi Jundea̱, nínga katsen nda̱ re Ndabii̱, ngatꞌa̱ Kosiee̱ xota̱ tji̱e̱e̱ nda̱ re Ndabii̱ chji̱a̱ni, 5tsi̱ꞌe̱ nga ki̱a̱ si̱tꞌa xo̱jo̱n Kosiee̱ ko̱jo na̱ Riyaa̱, kui na̱ xi ixánjo̱ nga ja̱bo̱a̱ je yaꞌa ndí. 6Kó nga síndo na̱xi̱ńdáꞌniú Belee̱n, jachó ni̱xtjii̱n nga stse̱n ndií na̱ Riyaa̱. 7Kó ki̱a̱ katsen ndí xíꞌín xi tjoón, sꞌe̱ ítsakjájón ndí ńjño, kó ngi̱ya kojo̱ nínga kjiényá cho̱o̱ ki̱a̱ yíjñaya, ngatꞌa̱ ngiti̱ jmí ngi̱ndie nínga tsjayojo kasakojiín kui ndiꞌaa̱.

Já xí koo̱n cho̱tsa̱nga̱ bi̱ tsꞌén kijíkatsijee̱n ndí ndí Kjisoo̱

8Kó kisꞌie kui ngi̱ndiee̱ já xí koo̱n cho̱tsa̱nga̱ xi askoo̱n cho̱o̱ nga jñoó ki̱a̱ ngi̱jin kꞌijñaá. 9Kó ki̱a̱, ngo ndítsjiee̱ Néná jachókoón, kó kjo̱a̱jee̱ Néná katsꞌéntsijen yejee̱, kó achichí katsakjónní. 10Kó kui ndítsjiee̱, bi̱ katsoó: —Ngata̱ ndakonjínmájnú, ngatꞌa̱ éntjatsi̱e̱ boá xi kjoéꞌe̱ xiyàjnúꞌun, tsi̱ꞌe̱ nga ngayeje xota̱ xi tsja ka̱maa̱: 11Nga ngotꞌe̱ ꞌne̱ je katsen na̱xi̱ńdáꞌniuú Ndabii̱ ngo xi kꞌo̱xiéꞌájnú, kui xi KRISTOO̱, xi Ndi̱a̱jnú. 12Kó kui nii̱ xi chi̱bo̱a̱ ka̱majnú: Ki̱a̱ sa̱kójnú ngo ndí ndí xí tjíxtiéní ńjño nga kjiꞌijñaya ngo kojo̱ nínga kjiényá cho̱o̱. 13Kó ta̱niján ma jatjokjàtꞌaa̱ kui ndítsjiee̱ achichí kjín ngase ndítsjie xi katsꞌéntsjaà Néná, nga bi̱ katsó:

14¡Ngatꞌieé kjo̱a̱je Néná ndiꞌakꞌajmi jàn!

¡Kó ngatꞌieé kjo̱a̱xió kꞌi̱e̱ tꞌanangii̱ xota̱ xi ndyi̱tsꞌènkjátjosoón kjo̱a̱ndaa̱ Néná!

15Kó ngije kijí nginí ndítsjiee̱ ndiꞌakꞌajmi jàn, já xí ndyi̱koo̱n cho̱tsa̱nga̱a̱ ja̱kꞌi̱e̱ ja̱ngaján, bi̱ katsoó xkjín: —Tjián na̱xi̱ńdáꞌniú Belee̱n tsobo̱a̱, tjiantsitsíjée̱n ni xi kamá, kui ni xi Néná katsóyàná nga ka̱ma. 16Kó achichí tsá kijí, kó ki̱a̱ kamábe na̱ Riyaa̱ ko̱jo Kosiee̱, ko̱jo ndí ndií nga kjiꞌijñaya ngi̱ya kojo̱ nínga kjiényá cho̱o̱. 17Kó ngije kamábe, íni̱jmì ni xi kiꞌmií kjo̱a̱a̱ kui ndií. 18Kó ngayeje xi tsintꞌié kuí eén, kijíndikoón ni xi katsó já xí koo̱n cho̱tsa̱nga̱a̱. 19Ta̱nga na̱ Riyaa̱ ini̱ma̱a̱ íjin ngayeje kui ni xi kamaá, kó ta̱ kui ni katsꞌénkjó. 20Kó kui já xí koo̱n cho̱tsa̱nga̱a̱ nga kijíꞌoyá nginí nínga kjindibá, katsjaá kjo̱a̱je Néná kjo̱a̱a̱ ngayeje ni xi tsintꞌié ko̱jo ni xi kamábe, ngatꞌa̱ jatjosón ngayeje ni xi kiꞌmií.

Bi̱ tsꞌén akako ndí ndí Kjisoo̱ ngindyi̱ko̱n Néná

21Kó nga jachó xi ma jin ni̱xtjin, kiniꞌaán sirkunsisioo̱n kui ndií, kósꞌe̱ KJISO̱ ikítꞌa jaꞌén, ti̱ kuii̱ jaꞌén xí katsóyàtjón ndítsjiee̱, ngindiee̱ nga ko̱a̱ꞌa̱ ndí na̱ Riyaa̱.

22Kó ngije jatjosón ni̱xtjin nga katsꞌéntsjie yojoo̱ ngindyi̱ko̱n Néná, xikótsꞌèn íjñá kjo̱a̱kitii̱ Moisee̱, na̱ꞌmii̱ ko̱jo na̱aa̱n kui ndií, kijíjo̱ na̱xi̱ńdáꞌniú Jerusale̱n, tsi̱ꞌe̱ nga kijíkakoó Néná, 23xikótsꞌèn kjitꞌa kjo̱a̱kitii̱ Néná, nínga bi̱ tsoó: “Ngayeje ndí xíꞌín xi tjón stse̱n, chjiéngá ndí xí tsjiee̱ Néná kꞌuiín.” 24Kó bo̱a̱ tsꞌén kijítsꞌenkꞌásꞌieén Néná xikótsꞌèn botixómá kjo̱a̱kitii̱ Néná, nínga bi̱ tsoó: Chjiéngá ngo ꞌniú toṉña̱ ko̱jo tsi jó tójo si̱ꞌankꞌasꞌiee̱n Néná. 25Kó ki̱a̱ na̱xi̱ńdáꞌniú Jerusale̱n kisꞌijña ngo nda̱ xi ꞌmí Simeoo̱n xi tikónjii̱n A̱si̱énni̱xtjii̱n Néná, ngo nda̱ xi kixi̱ ko̱jo xi ni̱ma̱takón kamá, xi tsꞌénkoyaa̱ nga Néná kꞌo̱xiéꞌá xota̱ Israee̱l, 26kó A̱si̱énni̱xtjii̱n Néná katsóyàtjoón kui nda̱a̱ nga kji̱e̱ ko̱yàjín tsi tjónjín sku̱i̱e̱ Kristoo̱, kui xi sa̱ngíyá Néná. 27Kó A̱si̱énni̱xtjii̱n Néná kijíjo̱ kui nda̱ xi ꞌmí Simeoo̱n ki̱a̱ na̱ngo̱xi̱i̱, kó kjiꞌanga xi xchaá ndí ndí Kjisoo̱ kijíjo̱ ndatsa kui tsi̱ꞌe̱ nga sa̱ꞌínkjatjosón xikó tsó kjo̱a̱kitii̱, 28kui nda̱a̱ tsankꞌá kui ndií, kó katsjaá ndokꞌóchjì Néná, nga bi̱ katsó:

29Ngotꞌe̱ ꞌne̱ Ndi̱a̱, jè jatjosón ni xi kaseyetjénní:

Kó jè ka̱ma ko̱e̱ꞌéndiè ji nga kui mosòo̱ xió ko̱yà.

30Ngatꞌa̱ jè kamábe an kjo̱a̱ꞌnaxiéꞌáa̱,

31kui xi je ikꞌíjñinde ji nga ka̱ma

ngindyi̱ko̱n ngayeje xota̱ na̱xi̱ńdaá,

32kui xi xikoó ngo ndiꞌí xí sa̱ꞌíntsijee̱n xota̱ xi jundío̱jín,

kui xi ka̱ma kjo̱a̱jee̱ xota̱ na̱xi̱ńdáa̱ Israee̱l.

33Kó Na̱ꞌmii̱ ko̱jo na̱aa̱n ndí Kjisoo̱ achichí kijíndikoón ni xi tjíꞌmí kjo̱a̱a̱ kui ndií. 34Kó nda̱ xi ꞌmí Simeoo̱n katsꞌénchikonñé, kó bi̱ katsoó na̱ Riyaa̱ na̱aa̱n ndí Kjisoo̱:

–Kui ndí bí, jè bo̱a̱ tsꞌén kjindibáni nga kui xi sa̱ꞌínkꞌáka ko̱jo sa̱ꞌínkjaꞌáꞌyaá kjín xota̱ xi chji̱a̱ni Israee̱l. Ngatꞌa̱ kuí xí xikoó tsi ngo chi̱bo̱a̱ ka̱ma, kó kjín xota̱ xi sa̱ꞌínchꞌó, 35tsi̱ꞌe̱ nga kꞌuijñátsijen ni xi ndyi̱tsꞌènkjó ini̱ma̱a̱ kjín xota̱. Ta̱nga ngayeje kui nii̱, xikó maá tsi ngo ki̱cha̱ xi kjo̱a̱ꞌaxtikjá ini̱ma̱a̱ ka̱ma.

36Kó ti̱ ki̱a̱ tikón ngo na̱ chji̱ni̱e̱ꞌe̱én Néná xi ꞌmí na̱ Ana̱, tsa̱kji̱ín nda̱ xi ꞌmí Fenue̱l xi chji̱a̱ni xota̱ tji̱e̱e̱ nda̱ xi ꞌmí Asee̱r, jè ta̱nisién ꞌniú tji̱a̱n kamá kui xota̱chjo̱on ngatꞌa̱ achichí xo̱ngò nga ixán, kó yito tsí nó kamaá nga kisꞌijñajo̱ xi̱ꞌii̱n, ngatꞌa̱ kꞌien kui nda̱a̱, 37kó jè ichítié ko̱jo kantié nijón nó tjiín, kó ngatsjéni̱xtjin nga ki̱a̱ kisꞌijña ngi̱ya na̱ngo̱xi̱i̱, nga katsꞌén xaá Néná, nga ni̱xtjin ko̱jo nga ni̱xtji̱e̱n nga katsꞌénkjindiá, ko̱jo nga tsíchji̱a̱a̱ Néná. 38Kui ndí tji̱a̱a̱n ti̱ kuii̱ chi̱bo̱a̱ jachó nga ítsꞌi̱yanii̱ nga katsjaá ndokꞌóchjì Néná, kó tsíchji̱a̱jo kjo̱a̱a̱ kui ndí Kjisoo̱ ngayeje xota̱ xi ndyi̱koyaa̱ nga Néná kꞌo̱xiéꞌá xota̱ na̱xi̱ńdáꞌniú Jerusale̱n.

Bi̱ kamá nga kijíꞌoyá nginí na̱xi̱ńdáꞌniú Nasaree̱t

39Kó ngije katsꞌénkjatjosón ngayeje ni xi chji̱a̱ kjo̱a̱kitii̱ Néná, kijíꞌoyá nginí nangi Ngalilea̱ nínga tikón na̱xi̱ńdáꞌniú tsi̱ꞌe̱, kui xi ꞌmí Nasaree̱t. 40Kó kui ndií ta̱sasá kamáxchá, kó kisꞌiee̱ ngaꞌniú, ko̱jo kjo̱a̱kjínkón, kó kjén nga ta̱ ꞌniú tsie kjo̱a̱ndaa̱ Néná kisꞌiee̱.

Ndí nda̱chí Kjisoo̱ bi̱ tsꞌén tsíchji̱a̱ni̱jmìjo já chji̱ni̱e̱kjo̱a̱kitii̱

41Kó xi xchaá Kjisoo̱, xki̱ nó xki̱ nó fí sꞌué paskua̱ xi fotjo na̱xi̱ńdáꞌniú Jerusale̱n. 42Kó nga kamá tiejó noó Kjisoo̱, kijí na̱xi̱ńdáꞌniú Jerusale̱n, xikótsꞌèn tikón kjo̱a̱xcha̱á. 43Kó nga ndyi̱fíꞌoyá nginí ndiꞌaa̱ ngije jaꞌa kui sꞌueé, ndí Kjisoo̱ kisꞌijñamasien na̱xi̱ńdáꞌniú Jerusale̱n, kó nde kamábejín xi xchaá tsi bo̱a̱ kamá. 44Kó na̱ꞌmii̱ ko̱jo na̱aa̱n Kjisoo̱ katsꞌénkjó nga Kjisoo̱ ngi̱jii̱n xotaa̱, ki̱a̱rá tsoꞌbájin kamaá, kó je ngo ni̱xtjinnii̱ ndi̱yà nga ndyi̱fí, ta̱nga ngije tsangasejii̱n xota̱ xi be ko̱jo xi xkjín, 45kasakojiín, kó kijíꞌoyá nginí na̱xi̱ńdáꞌniú Jerusale̱n, tsi̱ꞌe̱ nga ki̱a̱ ko̱ngase.

46Kó xi ma ján ni̱xtjin kasako ki̱a̱ na̱ngo̱xi̱i̱, nga tikónjii̱n já chji̱ni̱e̱kjo̱a̱kitii̱, nga tsintꞌieé ko̱jo nga asíyaꞌa. 47Kó ngayeje xota̱ xi tsintꞌieé ndí nda̱chí Kjisoo̱, achichí kijíndikoón kjo̱a̱a̱ nga ta̱nisién kjínkón, ko̱jo kjo̱a̱a̱ ngayeje ni xi tsíchji̱a̱. 48Kó ngije kasako Kjisoo̱, na̱ꞌmii̱ ko̱jo na̱aa̱n, ta̱ bi̱ ta̱ kamaá, kó na̱aa̱n, bi̱ katsoó:

–Ndí xiánna, ánní nga bi̱ kjiꞌi ni xi kiniꞌínje̱jne̱. Na̱ꞌmíi̱ ko̱jo an achichí nda̱ kjimajne̱ nga ndyi̱mindyiséjne̱ ji.

49Sꞌe̱ ndí nda̱chí Kjisoo̱, bi̱ katsó:

–Mí kjoaá nga an ndyi̱mindyiséjnúꞌun. A yàjínjnú nga chjiéngá ndiꞌaa̱ Na̱ꞌmina kotíjña̱ an.

50Ta̱nga na̱ꞌmii̱ ko̱jo na̱aa̱n kamákjínjiín kui ni xi katsó kui ndií.

51Kó bo̱a̱ tsꞌén nijan kijíjo̱ nginí na̱xi̱ńdáꞌniú Nasaree̱t, kó Kjisoo̱ tsintꞌiéꞌén ngayeje ni xi kiꞌmií. Kó na̱aa̱n ndí nda̱chí Kjisoo̱ ngi̱jin ini̱ma̱a̱ jaꞌátjó ngayeje nii̱. 52Kó ndí nda̱chí Kjisoo̱ kjimaxchá, kó kjiꞌbeé kjo̱a̱kjínkón, kó kisꞌiee̱ kjo̱a̱ndaa̱ Néná, kó xotaa̱ nda kasasiee̱n.

Currently Selected:

Rkaa̱ 2: MAIX

Highlight

Copy