Rkaa̱ 3

Bi̱ tsꞌén íni̱jmì Jua̱ xi botíndaá eén Néná

(Matioo̱ 3:1-12; Markoo̱ 1:1-8; Juaa̱ 1:19-28)

1Nó tjiꞌún nga kisꞌijña xá nda̱ xi ꞌmí Tiberio̱ Sesaa̱, nda̱ xi ꞌmí Ponsio Pilatoo̱ kisꞌijña xtitjoón nangi Jundea̱, Erondee̱ atíxoma nangi Ngalilea̱, kó ntsꞌi̱e̱ xi ꞌmí Ngiripee̱ atíxoma nangi Iturea̱ ko̱jo Trakonite̱, kó Lisaniaa̱ atíxoma nangi Abilene̱, 2kui ni̱xtjin nga kamá chináꞌmi xi ꞌniú nkꞌa xaá nda̱ xi ꞌmí Anàa̱ ko̱jo Kaifaa̱, kui ni̱xtjin jàn, Néná tsíchji̱a̱jo Juaa̱ ndií Sakariya̱ ki̱a̱ nangi kixií. 3Kó Juaa̱ kijí ngayeje nangi xi síndotꞌa ndejèꞌ Jorndaa̱n, kó íni̱jmi̱ì nga sa̱tíndá tsi̱ꞌe̱ nga sa̱ꞌínkꞌoyà yojoo̱ kjo̱a̱a̱ jé xí ndyi̱tsꞌèn, tsi̱ꞌe̱ nga si̱ꞌanjetakoón, 4xikótsꞌèn kjitꞌa xo̱jo̱n xi katsꞌénda nda̱ chji̱ni̱e̱ꞌe̱én Néná xi ꞌmí Isayaa̱, nínga bi̱ tsó:

Ndaꞌyaá ngo nda̱ xi kjandayà nangi kixií, xi bi̱ tsó:

“Tꞌíjñandajnúu̱ ndi̱ya̱à Ndi̱a̱a̱, ti̱ꞌankixi̱jnú ndi̱ya̱à kui.

5Ngayeje nínga konga, xi̱ndyiándié,

kó ngayeje na̱xi̱ ko̱jo tji̱ngi̱, són ka̱ma,

kó ndi̱yà xí ńkjá ngájén, ka̱ma na̱xo̱,

kó ndi̱yà xí nkꞌaya nkꞌajon, són ka̱ma.

6Kó ngayeje xotaa̱ xi sku̱i̱e̱ kui kjo̱a̱ꞌnaxiéꞌá xi katsangiya Néná.”

7Kjiꞌanga jataxie xotaa̱ tsi̱ꞌe̱ nga kastindá, Juaa̱ bi̱ katsoó:

–¡Xota̱ xi ja̱kon ye̱ kónjnú! ꞌYá xí bo̱a̱ katsójnú nga ka̱ma ku̱i̱yòjnúu̱ kjo̱a̱xcha̱án Néná xí je kjimatiñaa̱. 8Ta̱sá ti̱ꞌánjnú ni xi ko̱kó nga je kiniꞌánkꞌoyàjnú yojojnú, kó ngata̱ bi̱jín tsꞌén fojintakónjnú: “¡Tji̱e̱e̱ nda̱ xi ꞌmí Abraa̱n ndokjo̱a̱ ñá!” Ngatꞌa̱ xiyàjnúꞌun nga tsi Néná xi mejeén, ngaskande kui ndi̱jo̱o̱ ka̱ma sa̱ꞌín xota̱ tji̱e̱e̱ Abraa̱n. 9Kó ti̱ je tikónnda jachaa̱, tsi̱ꞌe̱ nga ko̱tie yaá ndeskande ja̱ma̱a̱, ngatꞌa̱ ngayeje yá xí jmí to xi nda tsjájín, bichá, kó ngi̱jin ndiꞌí jàn bichijmijin.

10Kó xota̱ kjiín, bi̱ katsó nga asíyaá Juaa̱:

–Mí ni xi si̱ꞌanjne̱ ji̱n.

11Kó bi̱ katsó Juaa̱:

–Xi jó chi̱nga tjiín, ngo nga tsjaá xi jmíjiín, kó xi tjiín nichinie, nga tsjaá xi jmíjiín nga.

12Ti̱ bo̱a̱ ti̱ tsꞌén jachókatíndá yojoo̱ já xí foaꞌáꞌyá to̱n xi machjítjé ni, kó bi̱ katsó nga asíyaá Juaa̱:

–Ji Mostro̱, mí ni xi ka̱ma si̱ꞌanjne̱ ji̱n.

13Kó Juaa̱, bi̱ katsoó:

–Ngata̱ tsꞌatiojín chjaꞌáchjíjnú xikó kjiꞌi chjaꞌáchjíjnú.

14Ti̱ bo̱a̱ ti̱ tsꞌén tjín jájún, xi bi̱ katsó nga asíyaá:

–Kó ji̱n, mí ni xi si̱ꞌanjne̱.

Kó Juaa̱, bi̱ katsoó:

–Ngata̱ ta̱ꞌyajínni xi chjaꞌáxín kjo̱a̱ꞌniújnúu̱ ni xi tjiín, ti̱nde ngata̱ ꞌbíndisotaꞌínjínjnú xotaa̱, kó ngatamanijnú to̱n xi niꞌánjnú.

15Kó ngayeje xotaa̱ nga kijíndikoón kui nii̱, katsꞌénkjó ngi̱jin ini̱ma̱a̱ tsi ta̱ꞌaa̱ nga Juaa̱ xi Kristoo̱, 16ta̱nga Juaa̱, bi̱ katsoó ngayeje kui xotaa̱:

–An, nga ja̱koxi̱ ndáfoa xí botindá án, ta̱nga sꞌe̱ ndibá ngo xi tjín ngasee̱ ngaꞌniú ta̱bo̱a̱jiín án, kui xi ngaskande tsoboájínna nga an skjíndóo̱ ńꞌniuú tji̱xíndieé, kó kuí boá xi A̱si̱énni̱xtjii̱n Néná ko̱jo ndiꞌí xi ko̱tíndánijnú. 17Jè tsꞌényaꞌa ngi̱ya tsja ni xi sa̱ꞌíntsjie to ndso̱ko̱a̱n ṉño̱paa̱n nga xín sa̱ꞌínkjaꞌa xtjieé. Kó kjo̱a̱ꞌátjó to ndso̱ko̱a̱n ṉño̱paa̱n ngi̱ndie nínga xindyiá, kó ku̱i̱ꞌítí xtjieé ngo ngi̱jii̱n ndiꞌí xí jmíni̱xtjin kꞌo̱.

18Kó kui nii̱, ko̱jo kjín ngase kjo̱a̱botíxoma xi katsóyà Juaa̱ nga tsíchji̱a̱jo xotaa̱ éntjatsi̱e̱e̱ Néná. 19Kó ti̱ bo̱a̱ ti̱ tsꞌén Juaa̱ katsꞌénxchánjo̱ nda̱ xtitjón xi ꞌmí Erondee̱, ngatꞌa̱ na̱ Erondíaa̱ tikónjo̱, chjo̱ón ntsꞌi̱e̱ Erondee̱ kui xi ꞌmí Ngiripee̱, ko̱jo kjo̱a̱a̱ ngayeje ni xi ndajínkjiꞌi xi katsꞌén, 20kó ingo ni xi ndajín katsꞌén ngase, nga katsangisꞌien ndo̱bo̱a̱yà Juaa̱.

Bi̱ tsꞌén kastindá Kjisoo̱

(Matioo̱ 3:13-17; Markoo̱ 1:9-11)

21Kó ni̱xtjin nga ngayeje xota̱ na̱xi̱ńdaá jachókatíndá yojoo̱, ti̱ jachó Kjisoo̱ nga, kó ti̱ kastindá, kó nga tsꞌénchji̱a̱a̱ Néná, katjoxꞌá ndiꞌakꞌajmi jàn, 22kó A̱si̱énni̱xtjii̱n Néná nga yojo, ja̱kjiꞌi tójo má kjiꞌi nga kjindibánié Kjisoo̱, kó kandaꞌyá ngo nda̱ ndiꞌakꞌajmi jàn, xi bi̱ katsó:

–Jí xí ndí tjóna, ꞌniú tsjátjínna kjo̱a̱a̱ ji.

Kuí xi̱ꞌbi̱ xota̱ tji̱e̱ xi yaꞌanii̱ Kjisoo̱

(Matioo̱ 1:1-17)

23Kjisoo̱ tjínraá tsi ta̱ kantié nó nga ítsꞌi̱yani xaá. Kjisoo̱ kuí xí ndií Kosiee̱ katsó xotaa̱, kó Kosiee̱ ndií Elii̱, 24kó Elii̱ ndií Mataa̱t, kó Mataa̱t, ndií Lebii̱, kó Lebii̱, ndií Melkii̱, kó Melkii̱, ndií Janaa̱, kó Janaa̱, ndií Kosiee̱, 25kó Kosiee̱, ndií Matatiyaa̱, kó Matatiyaa̱, ndií Amoo̱, kó Amoo̱, ndií Nauu̱n, kó Nauu̱n, ndií Eslii̱, kó Eslii̱, ndií Nagaii̱, 26kó Nagaii̱, ndií Maa̱t, kó Maa̱t, ndií Matatiyaa̱, kó Matatiyaa̱, ndií Semeii̱, kó Semeii̱, ndií Kosiee̱, kó Kosiee̱, ndií Jundáa̱, 27kó Jundáa̱, ndií Joanaa̱, kó Joanaa̱, ndií Resaa̱, kó Resaa̱, ndií Sorobabee̱l, kó Sorobabee̱l, ndií Salatiee̱l, kó Salatiee̱l, ndií Nerii̱, 28kó Nerii̱, ndií Melkii̱, kó Melkii̱, ndií Andii̱, kó Andii̱, ndií Kosaa̱n, kó Kosaa̱n, ndií Elmandaa̱n, kó Elmandaa̱n, ndií Ee̱r, 29kó Ee̱r, ndií Josuee̱, kó Josuee̱, ndií Eliesee̱r, kó Eliesee̱r, ndií Jorii̱n, kó Jorii̱n, ndií Mataa̱t, 30kó Mataa̱t, ndií Lebii̱, kó Lebii̱, ndií Simeoo̱n, kó Simeoo̱n, ndí Jundáa̱, kó Jundáa̱, ndií Kosiee̱, kó Kosiee̱, ndií Jonaa̱n, kó Jonaa̱n, ndií Eliakii̱n, 31kó Eliakii̱n, ndií Meleaa̱, kó Meleaa̱, ndií Mainaa̱n, kó Mainaa̱n, ndií Matataa̱, kó Matataa̱, ndií Nataa̱n, 32kó Nataa̱n, ndií Ndabii̱, kó Ndabii̱, ndií Isaii̱, kó Isaii̱, ndií Obee̱nd, kó Obee̱nd, ndií Boo̱, kó Boo̱, ndií Salmoo̱n, kó Salmoo̱n, ndií Naasoo̱n, 33kó Naasoo̱n, ndií Aminandaa̱b, kó Aminandaa̱b, ndií Araa̱n, kó Araa̱n, ndií Esroo̱n, kó Esroo̱n, ndií Faree̱, kó Faree̱, ndií Jundáa̱, 34kó Jundáa̱, ndií Jako̱b, kó Jako̱b, ndií Isaa̱, kó Isaa̱, ndií Abraa̱n, kó Abraa̱n, ndií Teraa̱j, kó Teraa̱j, ndií Najoo̱r, kó Najoo̱r, 35ndií Seruu̱j, kó Seruu̱j, ndií Rangau, kó Rangau, ndií Pelee̱j, kó Pelee̱j, ndií Ebee̱r, kó Ebee̱r, ndií Salaa̱, 36kó Salaa̱, ndií Kainaa̱n, kó Kainaa̱n, ndií Arfajaa̱nd, kó Arfajaa̱nd, ndií See̱n, kó See̱n, ndií Noee̱, kó Noee̱, ndií Lamee̱k, 37kó Lamee̱k, ndií Matusalee̱n, kó Matusalee̱n, ndií Enoo̱k, kó Enoo̱k, ndí Jaree̱nd, kó Jaree̱nd, ndií Maalalee̱l, kó Maalalee̱l, ndií Kainaa̱n, 38kó Kainaa̱n, ndií Enoo̱, kó Enoo̱, ndií See̱t, kó See̱t, ndií Andaa̱n, kó Andaa̱n, ndií Néná.

Currently Selected:

Rkaa̱ 3: MAIX

Highlight

Copy