Rkaa̱ 1

Bi̱ tsꞌén ítsꞌi̱yanii̱ Rkaa̱ nga katsꞌénda kui xo̱jo̱o̱n

1Achichí má xota̱ xi kamámejeén índonda nga katsꞌénꞌindó kjo̱a̱a̱ ngayeje ni xi kamá ngi̱jinná, 2xikótsꞌèn akóyáná ndeskande nga ítjatsꞌennii̱ kui xota̱ xi chistiko̱ kamá nga kamábe, ko̱jo nga mosoo̱ eén Néná kamá. 3Nda kasasienna an nga ngije tsangase ndi̱yàa̱ kótsꞌèn kjindibáni, indonda an nga katsꞌenꞌindoó ji ndí Teofilo̱, 4tsi̱ꞌe̱ nga nda xchi̱e̱ ji nga ja̱koxi̱ boá kjo̱a̱a̱ ni xi je akakoyaá.

Bi̱ tsꞌén katsóyàtjón ngo ndítsjie nga stse̱n Jua̱ xi botíndaá

5Kui ni̱xtjin jàn nga kamá Erondee̱ nda̱ ree̱ nangi Jundea̱, kisꞌijña ngo chináꞌmi xi ꞌmí Sakariya̱ xi tsíchji̱a̱ni já chináꞌmii̱ nda̱ xi ꞌmí Abiyaa̱. Chjo̱on kamánii̱ Sakariya̱ na̱ xi ꞌmí na̱ Sabee̱, na̱ xi chji̱a̱ni xota̱ tji̱e̱e̱ nda̱ xi ꞌmí Aaroo̱n. 6Nga joó nga kixi̱ kisꞌiṉtso̱ma ngindyi̱ko̱n Néná, kó jmíjín xi chꞌo tsꞌén tsíchji̱a̱taꞌin, ngatꞌa̱ katsꞌénkjatjosón kjo̱a̱botíxomaa̱ ko̱jo kjo̱a̱kitii̱ Néná. 7Ta̱nga jmí ndí kisꞌiejiín, ngatꞌa̱ nga ndi̱ kamá na̱ Sabee̱, kó nga joó nga je ꞌniú xchá. 8Ngo ni̱xtjin nga kui já chináꞌmi xi chji̱a̱ni Sakariyaa̱ kasakoo̱ nga sa̱ꞌín xaá Néná xí tsꞌén ngi̱ya na̱ngo̱xi̱i̱, 9xikó kisꞌie kjo̱a̱xcha̱á já chináꞌmii̱, Sakariyaa̱ nda kamá ni̱xtjii̱n ngatꞌa̱ kui kasakoo̱, nga kui xi ku̱i̱ꞌítí ni sije̱n na̱ngo̱xi̱ ndikoón Néná. 10Kó ngayeje xota̱ na̱xi̱ńdaá ndyi̱chji̱a̱a̱ Néná ndi̱tsee̱n na̱ngo̱xi̱i̱ chi̱bo̱a̱ nga tjítí ni sije̱n xi niꞌánkjién nga niꞌándikón Néná. 11Kó ngo ndítsjiee̱ Néná jatjokjaà xtji̱e̱e̱n nga fojnií ṉchandikón nínga ꞌbítí ni sije̱e̱n. 12Kó nga kamábe Sakariyaa̱ kui ndítsjiee̱, achichí kijíndikoón, kó katsakjónní. 13Ta̱nga ndítsjiee̱, bi̱ katsoó: —¡Sakariya̱, ngata̱ ndakinjín má ji! Ngatꞌa̱ Néná je tsintꞌieé ji ko̱jo chjóo̱n nga ndyi̱ndokjo̱a̱jnúu̱, kó na̱ Sabee̱ ngo ndí kꞌuieé, xi Jua̱ kuítꞌe jaꞌén jí. 14Kó achichí tsja kꞌuieé ji, ko̱jo kjín xota̱ xi tsja ka̱maa̱ nga stse̱n kuí ndií. 15Ngatꞌa̱ ndíi̱ achichí ꞌniú nkꞌa xá xí kꞌuieé ngindyi̱ko̱n Néná. Jmí bino̱ ko̱jo jmí xán kꞌuijín, kó ndeskande nga tjiyáꞌmá nga A̱si̱énni̱xtjii̱n Néná tsja̱angaꞌniuú. 16Kó kuí boá xi sa̱ꞌín nga kjín xota̱ xi chji̱a̱ni Israee̱l xi kjo̱e̱ꞌekón nginií Néná kui xi Ndi̱a̱a̱ kui xotaa̱. 17Ko̱jo kuí boá xi ko̱e̱je̱tjoón Ndi̱a̱ná, kó kꞌuijñájii̱n a̱si̱énni̱xtjii̱n ko̱jo ngaꞌniuú Néná, xikoó nda̱ chji̱ni̱e̱ꞌe̱én Néná xi ꞌmí Eliyaa̱, tsi̱ꞌe̱ nga ko̱óndaa̱ ini̱ma̱a̱ xi na̱ꞌmi ko̱jo xi ndí, ko̱jo tsi̱ꞌe̱ nga xi kitikjo̱a̱a̱ kixi̱ ka̱ma, ko̱jo tsi̱ꞌe̱ nga ku̱i̱ꞌíjñandaa̱ Ndi̱a̱ná xota̱ na̱xi̱ńdá xi mejeén nga sa̱ꞌín xaá. 18Sꞌe̱ Sakariyaa̱, bi̱ katsoó ndítsjiee̱: —Kótsꞌèn skuiéni an nga ka̱ma kui nii̱. Ngatꞌa̱ an ko̱jo chjo̱onna jè ꞌniú xchájne̱. 19Sꞌe̱ bi̱ katsó ndítsjiee̱: —Án xí ꞌmína Ngabrie̱, kó ngatsjéni̱xtjin nga ngindyi̱ko̱n Néná tikòn an, kó án xí kanangiyana tsi̱ꞌe̱ nga kꞌuini̱jmiì jí kui éntjatsi̱e̱e̱. 20Kó ngotꞌe̱ ꞌne̱ ngiti̱ ka̱májín ko̱ndókjo̱e̱ ji ngaskande ni̱xtjin nga ka̱ma kui nii̱, ngatꞌa̱ kisꞌijinjiín énna, kui xi kjo̱tjosón nga kjo̱chó ni̱xtjin. 21Kó xota̱ na̱xi̱ńdaá ndyi̱koyaa̱ ndyi̱koyaa̱ Sakariyaa̱, kó ta̱ bi̱ ta̱ maa̱ nga tá tsie kjiꞌbondíyaá ngi̱ya na̱ngo̱xi̱ ndikoón Néná. 22Kó nga jataxie Sakariyaa̱, ngiti̱ kamájín tsíchji̱a̱, kó kjiꞌá boá nga kamákjiín kui xotaa̱ nga ngo ni akakoo̱ ngi̱ya na̱ngo̱xi̱ ndikoón Néná, ngatꞌa̱ ta̱ tsja tsí Sakariyaa̱ xi katsꞌéntíyaá nga tsíchji̱a̱jo. Kó bo̱a̱ tsꞌén kistsoꞌbá nga kamájín tsíchji̱a̱. 23Kó ngije jatjosón ni̱xtjii̱n xaá, Sakariyaa̱ kijí ndiꞌaa̱.

24Kó ngije jaꞌa kui ni̱xtjii̱n, chjo̱ón Sakariyaa̱ xi ꞌmí na̱ Sabee̱ tsaꞌa ndí, kó ún sá nga jatjojín ndiꞌaa̱, ngatꞌa̱ bi̱ tsꞌén katsꞌénkjó: 25“Kuí nii̱ xi katsꞌénjo̱na Ndi̱a̱ná ni̱xtjin nga ni̱ma̱ kamaá an, tsi̱ꞌe̱ nga jaꞌáxín kjo̱a̱soboána ngi̱jii̱n xotaa̱.”

Bi̱ tsꞌén katsóyàtjón ngo ndítsjie nga stse̱n Kjisoo̱

26Xi ma jun sá, Néná katsangiya ndítsjiee̱ xi ꞌmí Ngabriee̱ ngo ndí nangi xi chji̱a̱ni Ngalilea̱ xi ꞌmí Nasaree̱t, 27nínga tikón ngo tsa̱kjìn xo̱ngò xí ꞌmí na̱ Riya̱ xi kji̱e̱ jmí xi̱ꞌin ꞌbéjiín, ta̱nga jè kichjiáꞌá nga ku̱i̱xanjo̱ nda̱ xi ꞌmí Kosiee̱, xi chji̱a̱ni tji̱e̱e̱ nda̱ re Ndabii̱. 28Kó nga tsꞌasꞌien kui ndítsjiee̱ nínga tikón na̱ Riyaa̱, bi̱ katsoó: —¡Tinde na̱ Riyaa̱, achichí kjo̱a̱ndaa̱ Néná tsꞌéntsjaá!, Ndi̱a̱ná tikónjoo̱ ji. 29Na̱ Riyaa̱ ta̱ bi̱ ta̱ kamaá nga tsintꞌié kuí eén, kó katsꞌénkjó mí ni xi mejeén ka̱tso̱ kui kjo̱a̱tindee̱. 30Sꞌe̱ ndítsjiee̱, bi̱ katsoó: —Na̱ Riya̱, ngata̱ ndakinjín má ji, ngatꞌa̱ Néná tsꞌéntsjaá kjo̱a̱ndaa̱. 31Ngotꞌe̱ ꞌne̱ ngo ndí xꞌi̱e̱ ji, kó ngije stse̱n kuí ndií, KJISO̱ kuítꞌe jaꞌén. 32Kuí xí ꞌniú nkꞌa ka̱ma xaá, kuí xí ndií Néná xí tikón ndiꞌakꞌajmi jàn kꞌuiín, kó Ndi̱a̱ná kui xi Néná, tsja̱à nga ko̱tíxoma xikoó Ndabii̱, kui xi xota̱ tji̱e̱e̱, 33kó ngatsjéni̱xtjin nga ko̱tíxoma na̱xi̱ńdaá, kui xi ndiꞌaa̱ xota̱ tji̱e̱e̱ nda̱ xi ꞌmí Jako̱b, kó kui kjo̱a̱botíxomaa̱ jmíni̱xtjin kju̱i̱e̱. 34Kó na̱ Riyaa̱, bi̱ katsoó ndítsjiee̱: —Kó kótsꞌèn nga ka̱ma kui nii̱, xi kji̱e̱ jmí xi̱ꞌin tikónjo̱jín an. 35Kó ndítsjiee̱, bi̱ katsoó: —A̱si̱énni̱xtjii̱n Néná kji̱ndi̱bánieé ji, kó ngaꞌniuú Néná xí tikón ndiꞌakꞌajmi jàn ko̱óꞌmánii̱ tji̱nkꞌi̱e̱én, kuíni nga kui ndí xí stse̱én jí, ndií Néná kꞌuiín. 36Kó ko̱jo na̱ xingi̱ ji xi ꞌmí na̱ Sabee̱, ngo ndí kꞌuieé ndatsi je ꞌniú xchá, kó je jun sánií nga yaꞌa ndí, kui na̱ xi ndi̱ kiꞌmií. 37Ngatꞌa̱ ngayeje nii̱ xi ka̱maa̱ sa̱ꞌín Néná. 38Kó na̱ Riyaa̱, bi̱ katsó: —Kꞌi̱e̱ tikòn an nga na̱ mosoo̱ Ndi̱a̱ná án, kó ngatsꞌénjo̱na kui xikó kasení ji. Kó kui ndítsjiee̱ ngije katsó kui nii̱, kijí.

Na̱ Riyaa̱ bi̱ tsꞌén kijítsobekoo̱n na̱ Sabee̱

39Kui ni̱xtjin jàn, na̱ Riyaa̱ jastjíe̱n, kó tsá kijí ngi̱jin na̱xi̱i̱ ngo ndí na̱xi̱ńdá xí tikón nangi Jundea̱, 40kó nga jachó, tsꞌasꞌien ndiꞌaa̱ nda̱ xi ꞌmí Sakariyaa̱, sꞌe̱ katsꞌéntinde na̱ Sabee̱. 41Kó nga tsintꞌié nga katsꞌéntinde na̱ Riyaa̱, kui ndí xí yaꞌa na̱ Sabee̱ iskjínkꞌá má ngi̱ya nga̱tsꞌo̱a̱, kó na̱ Sabee̱ ti̱ kjiꞌa tsꞌasꞌienjii̱n A̱si̱énni̱xtjii̱n Néná. 42Kó ꞌniú má tsíchji̱a̱, nga bi̱ katsó: —Néná ꞌniú ngase tsꞌénchíkonñeé ji, ngi̱jii̱n ngayeje ínchjiín, kó tsꞌénchíkonñé ndíi̱ nga. 43Kó ꞌyání an, tsi̱ꞌe̱ nga an kji̱ndi̱bátsobekonna na̱aa̱n Ndi̱a̱na. 44Ngatꞌa̱ nga tsintꞌie an nga kiniꞌíntindení, ndí xí yaꞌa an, iskjínkꞌatsja má ngi̱ya nga̱tsꞌo̱a̱ án. 45Kó ¡achichíra̱tsjaa̱ nga kisꞌijii̱n ji ngatꞌa̱ kjo̱tjosón ni xi kiꞌmíyà xi katsó Ndi̱a̱ná!

46Kó bi̱ katsó na̱ Riyaa̱:

Ini̱ma̱na tjítsꞌèntsjà kjo̱a̱jee̱ Ndi̱a̱na.

47Kó a̱si̱énni̱xtjinna iskjínkꞌá má nga tsja kamaá kjo̱a̱a̱ Néná xí ꞌboxiéꞌána.

48Ngatꞌa̱ an askotsijenna nga jaꞌájinna, nga ndí mosoo̱ ma an,

kꞌi̱e̱ tikòn an, kó ndeskande ngotꞌe̱ ꞌne̱ nga, achichíra̱tsjaa̱ ka̱tso̱na ngayeje tji̱e̱e̱ xota̱.

49Ngatꞌa̱ achichí tsie ni xi je katsꞌénjo̱na Néná xí tjiín ngaꞌniuú.

¡Tsjie jaꞌeén!

50Néná tsjaá kjo̱a̱ni̱ma̱takón ngayeje tji̱e̱e̱ xota̱

xi sku̱i̱e̱ndikón kuí.

51Néná katsꞌénkjién ngaꞌniuú,

kó katsꞌénkjatsón ni xi katsꞌénkjó xota̱ xi nkꞌakon maá yojoo̱ ngi̱jin ini̱ma̱a̱.

52Jaꞌáxiín xaá nga atíxoma kui xota̱ xi tjiín ngayeje ngaꞌniuú,

kó iskjininkꞌa xota̱ xi nda ini̱ma̱a̱.

53Xota̱ xi bojoó katsjaá nichinie,

kó xota̱ xi cho̱o̱n katsꞌénkjítiya.

54Asíko̱jo xota̱ Israee̱l, kui xi moso̱ tsi̱ꞌe̱,

tsi̱ꞌe̱ nga kjo̱a̱ꞌátsjiee̱n kjo̱a̱ni̱ma̱takoón.

55Xikó tsꞌén tsíchji̱a̱jo xota̱ tji̱e̱ xcháná xi ꞌmí Abraa̱n

ko̱jo xota̱ tji̱e̱e̱ ngatsjéni̱xtjin.

56Kó na̱ Riyaa̱ ján sá kamaá nga kisꞌijñajo̱ ndiꞌaa̱ na̱ Sabee̱, kósꞌe̱ jaskan kijí ndiꞌa xi tsi̱ꞌe̱.

Bi̱ kamá nga katsen Jua̱ xi botíndaá

57Kó nga jachó ni̱xtjin nga stse̱n ndií na̱ Sabee̱, ngo ndí xíꞌín kisꞌiee̱. 58Kó xota̱ tꞌa ndiꞌaa̱ ko̱jo xota̱ xkjín, nga tsintꞌié nga Néná katsjaá kjo̱a̱je nga kamáni̱ma̱a̱, tsja kamaá nga. 59Kó xi ma jin ni̱xtjin, tsangínjo̱ kui ndií nga kiniꞌaán sirkunsisioo̱n, kó Sakariya̱ ikítꞌa jaꞌén xikó ꞌmí na̱ꞌmii̱ kui ndií. 60Ta̱nga na̱aa̱n ndií, bi̱ katsó: —¡Jmí, chjiéngá Jua̱ kꞌuin! 61Kó bi̱ kiꞌmií na̱ Sabee̱: —Nde ngojín xota̱ xingi̱ ji xi bo̱a̱ ꞌmí. 62Kó kui xotaa̱ ta̱ tsja tsi katsꞌéntíyaá nga asíyaá na̱ꞌmii̱ ndií, tsi̱ꞌe̱ nga ka̱tso̱yà mí jaꞌeén xi ku̱i̱ꞌíjñaá. 63Kó Sakariyaa̱ tsíꞌá ngo ndí yátie xi niꞌánꞌindó, kósꞌe̱ bi̱ tsꞌén katsꞌénꞌindó: “Jua̱ kꞌuin jaꞌeén.” Kó ngayeje xotaa̱ kijíndikoón. 64Kó ti̱ kjiꞌa Sakariyaa̱ kamátsíchji̱a̱ nga katjondó na̱je̱n, kó ítsꞌi̱yanii̱ nga katsꞌéntsjaà Néná. 65Kó ngayeje xota̱ tꞌa ndiꞌaa̱ katsakjónní ni xi kamá, ko̱jo ngayeje xota̱ xi síndo na̱xi̱ xi chji̱a̱ni nangi Jundea̱, ta̱soboá kuí nii̱ tsíchji̱a̱. 66Kó ngayeje xota̱ xi tsintꞌié kuí nii̱, katsꞌénkjó, kó bi̱ katsó nga asíyaá xkjín: —ꞌYání bo̱a̱ xi ka̱ma kui ndií nga kjo̱chó ni̱xtjin. Ngatꞌa̱ nga ja̱koxi̱ ngaꞌniuú Ndi̱a̱ná boá xi tikónjii̱n.

Bi̱ tsꞌén katsóyàtjón Sakariyaa̱ xikoó ngo chji̱ni̱e̱ꞌe̱én Néná kjo̱a̱a̱ Juaa̱

67Kó Sakariyaa̱, na̱ꞌmii̱ kui ndií kisꞌikitsiee̱ A̱si̱énni̱xtjii̱n Néná, kó bi̱ katsó nga tsíchji̱a̱ xikoó ngo nda̱ chji̱ni̱e̱ꞌe̱én Néná:

68¡Nganiꞌántsjaá Ndi̱a̱ná, Néná xí tsi̱ꞌe̱ Israee̱l,

ngatꞌa̱ jè jeꞌekoón, kó jè íchjítjé nga tsꞌaxiéꞌá xota̱ na̱xi̱ńdaá!

69Kó katsangiya ngo xi ꞌniú tjiín ngaꞌniú nga kꞌo̱xiéꞌáná,

xi chji̱a̱ni xota̱ tji̱e̱e̱ Ndabii̱, nda̱ xi mosoo̱ Néná,

70Xikó tsꞌén tsíchji̱a̱tjón Néná nga katsꞌénkíchji̱a̱ já chji̱ni̱e̱ꞌén tsjiee̱ ndeskande koó ngasꞌe̱.

71Nga kui xi kꞌo̱xiéꞌáná kjo̱a̱a̱ ngayeje kondra̱ná, ko̱jo ngi̱ya tsja ngayeje xota̱ xi katsꞌénchꞌóná,

72tsi̱ꞌe̱ nga ni̱ma̱ ka̱maa̱ xota̱ tji̱e̱ xcháná,

ko̱jo nga kjo̱a̱ꞌátsjiee̱n ni nda xi índajo̱.

73Kui én xí ja̱koxi̱ nga sa̱ꞌin an katsoó

xota̱ xi xcháná Abraa̱n nga tsja̱aná,

74nga ngije tindyiondée̱ kondra̱ná,

ko̱ndoko̱nján nga si̱ꞌanxátꞌaa̱.

75Nga ngatsjéni̱xtjin nga tsjie ko̱jo nga kixi̱ ku̱i̱ndyión ngindyi̱ko̱n Néná.

76Kó kjo̱a̱a̱ ji nga ꞌne̱, ndí ndí tsa̱ꞌa̱n, nda̱ chji̱ni̱e̱ꞌe̱én Néná xí tikón ndiꞌakꞌajmi jàn kꞌuiín jí,

ngatꞌa̱ jí xí ku̱i̱ṉtje̱tjée̱n Ndi̱a̱ná, nga kꞌuijñínde ji ndi̱yà xí tsi̱ꞌe̱,

77tsi̱ꞌe̱ nga kꞌuiyée̱ xota̱ na̱xi̱ńdaá nga Néná kꞌo̱xiéꞌá,

tsi̱ꞌe̱ nga ka̱majetakoón jeé.

78Ngatꞌa̱ Néná kamáni̱ma̱a̱ ñá,

nga kui xi jeꞌekónná ndeskande nkꞌa jàn,

79Tsi̱ꞌe̱ nga tsja̱á ndiꞌí ngayeje xota̱ xi síndo nínga ꞌniú jñoó, ko̱jo nínga tjín kjo̱a̱bo̱yaa̱,

tsi̱ꞌe̱ nga kui xi ko̱ko̱ó ndsa̱ko ngo ndi̱yà nínga tjín kjo̱a̱xió.

80Kó kui ndií nga kjimaxchá kisꞌiee̱ ngaꞌniuú A̱si̱énni̱xtjii̱n Néná, kó ki̱a̱ kisꞌijña nangi kixií ngaskande nga akoó yojoo̱ xota̱ na̱xi̱ńdá xí chji̱a̱ni Israee̱l.

Currently Selected:

Rkaa̱ 1: MAIX

Highlight

Copy