Jénesii̱s 24

Bi̱ tsꞌén kasakoo̱ xkjín Isaa̱ ko̱jo na̱ Rebekaa̱

1Achichí jè xchá kamá Abraa̱n, kó Néná katsꞌénchikonñé ngayeje ni xi katsꞌén. 2Ngo ni̱xtjin Abraa̱n tsíchji̱a̱a̱ nda̱ mosoo̱ xi ꞌniú xchaá kui xi botixómaá ngayeje ni xi tjiín, kó bi̱ katsoó:

—Tꞌíjñí ji ndse̱ nguindie ti̱ꞌmina, ngatꞌa̱ ngo ni kꞌuíndá xí mejénna nga si̱ꞌinkjatjosén ji. 3-4Nda tsi kꞌi̱e̱ tikónjíi̱n xota̱ Kanaa̱n, ta̱nga nguiboanéná tꞌín ji nguindyi̱ko̱n Néná xí tsi̱ꞌe̱ ndiꞌakꞌajmii̱ ko̱jo xi tsi̱ꞌe̱ tꞌananguii̱ nga ko̱e̱ꞌéndiéjín ji nga ndína Isaa̱ ngo na̱ xi chji̱a̱ni nangui Kanaa̱n ku̱i̱xanjo̱. Tasá tꞌen ji nanguina kó ti̱ndyi̱sé ji ngo na̱ xi xingu̱i̱ ji̱n xi kꞌuijñájo̱ ndína.

5Kó kui nda̱ mosoo̱ bi̱ katsoó:

—Kó tsi kui naa̱ ka̱mamejénjiín kji̱ndi̱boá kui ngu̱i̱ndiee̱, mí xí sa̱ꞌin an. A chjiéngá kjuínjo̱ an ndíi̱ ki̱a̱ tꞌanangui nínga jatje ji, tsi̱ꞌe̱ nga kuí má xi ko̱ngase.

6Kó Abraa̱n bi̱ katsoó:

¡Jmí, ngata̱ bo̱a̱jín niꞌín ji! 7Kjiꞌa nga Néná xí tsi̱ꞌe̱ ndiꞌakꞌajmii̱ tsíꞌána nga kjo̱tjo an ndiꞌaa̱ na̱ꞌmina, ko̱jo na̱xi̱ńdána, kuí boá xi índajo̱na nga xota̱ tji̱e̱na tsja̱á kui tꞌananguii̱. Kó kuí boá xi sa̱nguíyá ndítsjiee̱ tsi̱ꞌe̱ nga ko̱e̱je̱tjoón jí, kó nga sa̱ko̱ó jí ngo chjo̱on xí tsi̱ꞌe̱ ndína Isaa̱. 8Kó tsi kui naa̱ ka̱mamejénjiín kji̱ndi̱boá kꞌi̱e̱e̱, jè kiniꞌínkjatjosén ji kui kjo̱a̱ꞌbíndaa̱. ¡Ta̱nga tsjandiéjín an nga kꞌuínje̱ ji ndína jánján!

9Kó kui nda̱ mosoo̱ katsꞌénjo̱ꞌo nga sa̱ꞌínkjatjosón ni xi katsoó Abraa̱n, kui xi ndi̱a̱a̱, 10kósꞌe̱ iskjíbé tie cho̱toꞌoyitsꞌén xi tsi̱ꞌe̱ ndi̱a̱a̱, sꞌe̱ jaꞌájin ngayeje to̱ko̱ya ni tsjakon xi síndoo̱ ndi̱a̱a̱, kó kijí xtji̱e̱e̱n nangui Mesopotamia̱, ki̱a̱ na̱xi̱ńdaá Naoo̱r. 11Jè má kjimanguixón nga jachó kui nda̱ mosoo̱ ki̱a̱ ndi̱tsee̱n na̱xi̱ńdaá, kó ki̱a̱ indyiátaꞌniú cho̱toꞌoyitsꞌeén, tsi̱ꞌe̱ nga sa̱ꞌínkjaꞌyá ki̱a̱ tꞌa ndańchꞌií. Kó kuí má chi̱bo̱a̱a̱ fíkjaꞌá ndójoa ndańchꞌi̱ ínchjiín. 12Kó ki̱a̱ kui nda̱ mosoo̱, bi̱ katsó nga tsíchji̱a̱a̱ Néná:

«Ji Ne, ji xi Nee̱ ndi̱a̱na Abraa̱n, ꞌniú míꞌaá nga nda si̱ꞌinje̱ ji ndi̱a̱na Abraa̱n, kó teꞌé ji ngu̱i̱ndie nga nda ko̱e̱je̱na kui ni̱xtjii̱n. 13Tsitsíjinní, kꞌi̱e̱ tikòn an tꞌa kui ndańchꞌií. Kó tji̱e̱nga ínchjín xí chji̱a̱ni kui ngu̱i̱ndiee̱ kjo̱e̱ꞌékꞌaxié ndójoa, 14teꞌéndiéní nga kui tsa̱kjin xo̱ngo xi kuíꞌáa̱ nga kꞌo̱e̱je̱ngui nisaa̱ tsi̱ꞌe̱ nga tsja̱ána ndójoa, nga jmí tsi ta̱ an tsí xi ngatsjána, ti̱ ngatsjaá cho̱toꞌoyitsꞌénna nga. Kó bo̱a̱ tsꞌén skuie an nga nda tiniꞌínje̱ ji ndi̱a̱na, kó nga kui naa̱ xi tichjeꞌéjin ji tsi̱ꞌe̱ nga kꞌuijñájo̱ Isaa̱, kui nda̱ xi ngatsjé ni̱xtjin tsꞌenkjátjosoón ni xi chjiéꞌée̱».

15Kó ti̱ tsꞌénchji̱a̱ ngasee̱ Néná kuí nda̱ mosoo̱ nga jachó na̱ Rebekaa̱ nga tsꞌényaꞌa ngo nisa ndójoa nga̱són tjiaa. Na̱ Rebekaa̱ tsa̱kji̱ín Betuee̱l boá, ndíndee na̱ Milka̱ chjo̱ón Naoo̱r, ntsꞌi̱e̱ Abraa̱n. 16Na̱ Rebekaa̱ achichí tsjákisꞌie, kó tikón xo̱ngo. Kó kui naa̱ jatjajen nínga tikón ndańchꞌií íkitsie ndójoa nisaa̱ kó nguije tsꞌénfínijinguí, 17kui nda̱ mosoo̱ tsanga má nga kijíkoón, kó bi̱ katsoó:

—Ngo kjo̱a̱nda kuíꞌaá, chií ndójoa xi ndyi̱a̱ nisáa teꞌéní.

18Kó na̱ Rebekaa̱ tji̱e̱nmá tsꞌenje̱ngui nisaa̱, kó bi̱ katsoó:

—Tꞌi̱ ji xingá.

Kó kui naa̱ yíꞌniú nisaa̱ sꞌe̱ katsjaá ndójoa kui mosoo̱. 19Kó nguije kamaá nga katsjaá ndójoa kui mosoo̱, bi̱ katsoó:

—Kꞌoxié má ra an ngase ndójoa tsi̱ꞌe̱ nga kꞌuí cho̱toꞌoyitsꞌée̱n nga, ngaskande nga kꞌuí xikó kjiꞌi mejeén.

20Kó xi tsá xi boaꞌa iskjitjónyá ndójoa xi ndyi̱a̱ nisaa̱ ngu̱i̱yaa̱ nínga tikón ngu̱i̱ndie nínga ꞌbi ndójoa kui cho̱o̱, sꞌe̱ kijíkjaꞌá ngase ngu̱i̱ya ndańchꞌií, ngaskande nga katsjaá ngayeje cho̱toꞌoyitsꞌeén. 21Kó kui mosoo̱ achichí kijíndikoón kjo̱a̱a̱ kui naa̱, kó askotsijen ndá ndaá, kó jmí ni katsójín, ta̱ tsꞌénkoyárií nga sku̱i̱e̱ nga Néná asíko̱jo nga ki̱a̱ sa̱ko̱ó ngo chjo̱on xí tsi̱ꞌe̱ Isaa̱.

22Kó nguije kamaá nga katsꞌe ndójoa cho̱toꞌoyitsꞌeén, kui mosoo̱ íjñaá ṉtjo̱n na̱ Rebekaa̱ ngo sti̱ngaro xi to̱nsinié xi jun ngramo̱ é, ko̱jo íjñaá tsja ngo ni xi ꞌbíkjá ndsa̱ xi úchán ngramo̱ é nga. 23Kósꞌe̱ bi̱ katsoó:

—Ngo kjo̱a̱nda míꞌaá, tꞌíyéní, ꞌyání na̱ꞌmíi̱ chjo̱on, kó, a ka̱ma sakóndiéjne̱ nga an ko̱jo xota̱na ki̱a̱ tsjayójojne̱ ndiꞌaa̱ na̱ꞌmíi̱ kui ni̱xtji̱e̱e̱n.

24-25Kó kui naa̱ bi̱ katsó:

—Na̱ꞌmina má Betuee̱l, ndií na̱ Milkaa̱ ko̱jo Naoo̱r. Ndiꞌajne̱ tjín ngu̱i̱ndie nínga ka̱ma si̱ꞌankjaꞌyájnú kui ni̱xtji̱e̱e̱n, kó ti̱ tjínjne̱ tsie xka̱ xi kjinie cho̱toꞌoyitsꞌeén nga.

26Kósꞌe̱ kui mosoo̱ asién tikoó, kó katsjaá ndokꞌóchji Néná, 27nga bi̱ katsó:

«¡Ngatamachikonñé ji Ne, ji xi Nee̱ ndi̱a̱na Abraa̱n, ngatꞌa̱ ngatsjé ni̱xtjin nda tiniꞌínje̱ ji ko̱jo kjimaꞌnítakín ji ndi̱a̱na! ¡Jí boá xi tińtje̱tjénní ngaskande ndiꞌaa̱ xota̱ xkjín Abraa̱n!»

28Nguije tsintꞌié kuí nii̱, kui tsa̱kjin xo̱ngo̱ó tsanga má kijí ndiꞌaa̱ nga kijítsáyaá na̱aa̱n. 29-30Kó Labaa̱n, ntsꞌi̱e̱ na̱ Rebekaa̱ nga kamábe sti̱ngaroo̱ ko̱jo ngo ni xi ꞌbíkjá ndsa̱ xí yaꞌa na̱ Rebekaa̱, kó nga tsintꞌié ni xi katsó ndichja, kui nda̱a̱ tsanga má kijí ndi̱tsenján, kó kamábe nga ki̱a̱ síndo kui nda̱ mosoo̱ ko̱jo cho̱toꞌoyitsꞌeén ki̱a̱ tꞌa ndańchꞌií. 31Nga kamábe, bi̱ katsó Labaa̱n:

«Ja̱bíꞌi̱n ji nda̱, Néná boá xi nda jeꞌejoo̱ kꞌi̱e̱e̱, ndibé jí ndiꞌana, nga ki̱a̱jín ndi̱tsee̱n mindyin. ¡Jè íjñanda an ngo ngu̱i̱ndie nínga si̱ꞌinkjaꞌyé ji ko̱jo ngo ngu̱i̱ndie nínga kꞌuíndo cho̱toꞌoyitsꞌée̱n nga!»

32Kósꞌe̱ kui nda mosoo̱ kijíjo̱ Labaa̱n ndiꞌaa̱, kó nguije jachó ki̱a̱a̱, Labaa̱n katsjaá ndójoa kui mosoo̱ ko̱jo já xí tjimájo̱ tsi̱ꞌe̱ nga ko̱ngóyá. Kó cho̱toꞌoyitsꞌeén kachjeꞌéxiín chꞌia xí ndyi̱yaꞌa, kó katseꞌeé ni chinie. 33Kósꞌe̱ nguije ikꞌíjñatꞌaa̱ ni chinie, kui mosoo̱ bi̱ katsó:

—Jmí ni skjíni̱e̱jín an ngaskande nga xiyajnúꞌun mí xá jéꞌe̱ an kꞌi̱e̱e̱.

Kó Labaa̱n katsjandieé nga ku̱i̱chji̱a̱, 34kósꞌe̱ bi̱ katsó kui mosoo̱:

Mosoo̱ Abraa̱n boá an. 35Néná achichí tjítsꞌénchíkonñé ndi̱a̱na ngatꞌa̱ achichí cho̱n, Néná katsjaá cho̱tsa̱nga̱, ko̱jo cho̱yojo, ko̱jo to̱nsinié, ko̱jo to̱ntiboa, ko̱jo já moso̱, ko̱jo ínchjín moso̱, ko̱jo cho̱toꞌoyitsꞌén ko̱jo bórró. 36Kó ndi̱a̱na Abraa̱n ko̱jo na̱ Sara̱ chjo̱ón kisꞌiee̱ ngo ndí, nda tsi je ꞌniú xchá nga joó, kó ndi̱a̱na íjñaá kui ndií ngayeje ni xi tjiín. 37Kó ndi̱a̱na índajo̱na ngo ni nga nguiboanéná tꞌín ji katsóna nga tsjandiéjín xó án nga ndií kꞌuijñájo̱ ngo na̱ xi chji̱a̱ni nangui Kanaa̱n. 38Tasá kꞌi̱e̱ katsanguiyana nínga síndo xkjín, kó nga kꞌi̱e̱ kongasèe̱ ngo na̱ xi kꞌuijñájo̱ ndií.

39Kó bi̱ kixiáa̱n: Ndi̱a̱, kó mí xí sa̱ꞌin an tsi kji̱ndi̱boájo̱jínna kui naa̱ ki. 40Kósꞌe̱ bi̱ katsóna ndi̱a̱na: Ngatsjé ni̱xtjin tsꞌéntꞌiéꞌée̱n Néná, kó kuíni nga kuí boá xi sa̱nguíyá ndítsjiee̱ nga kjo̱joo̱ ji, kó nga nda ko̱e̱je̱e̱ ndi̱ya xí tiꞌmi. Ta̱nga jí xí ku̱i̱ndyi̱sée̱ ngo chjo̱on ndína ki̱a̱ ngu̱i̱jii̱n xota̱ xingu̱i̱ án. 41Kó tsi kui xotaa̱ tsja̱ájiín kui naa̱, ngaskande kjiꞌa boá nga ka̱mandé jí kjo̱a̱a̱ ni xi je ikꞌínda ñá nguindyi̱ko̱n Néná.

42Kó bo̱a̱ tsꞌén ngotꞌe̱ nga jéꞌe̱ an tꞌa ndańchꞌií, bi̱ tsꞌén tsíchji̱a̱a̱ Néná:

Ji Ne, ji xi Nee̱ ndi̱a̱na Abraa̱n, tsi ji xi mejeén, nda ngatjína nga tsꞌénfí an kui ngu̱i̱ndiee̱, 43tsitsíjinní nga kꞌi̱e̱ tikòn an tꞌa kui ndańchꞌií, kó tsi ngo na̱ xo̱ngo kji̱ndi̱boákꞌaxié ndójoa kui ndańchꞌií, kó tsi teꞌé chiíní ndójoa xi ndyi̱a̱ nisáa xiáa̱n, 44kó tsi tsja̱ána, kó ti̱ kꞌo̱xié ndójoa xi tsja̱á cho̱toꞌoyitsꞌeén nga, ngatamakjínna nga kuí boá kui naa̱ xi ji tichjeꞌéjin ji, tsi̱ꞌe̱ nga kui xi kꞌuijñájo̱ ndií ndi̱a̱na Abraa̱n.

45Kó ti̱ tsꞌénchji̱a̱ ngasèe̱ Néná nga jachó na̱ Rebekaa̱ nga tsꞌényaꞌa ngo nisa nga̱són tjiaa, kó kijíkꞌaxié ndójoa ndańchꞌií, kó nga tsíꞌáa̱ chií ndójoa, 46tji̱e̱nmá tsꞌenje̱ngui nisa ndójoaa̱, kó katsjána, kó ti̱ katsjaá cho̱toꞌoyitsꞌénna nga. Kó nguije katsꞌe an ndójoaa̱, 47asíyáa̱ ꞌyání xi na̱ꞌmii̱, kó katsóyana nga Betuee̱l boá xi na̱ꞌmii̱, ndií Naoo̱r ko̱jo na̱ Milkaa̱.

Kósꞌe̱ kjiꞌa boá nga ijñáa̱ ngo sti̱ngaro ṉtjo̱n ko̱jo ngo ni ꞌbíkjá ndsa̱ ijñáa̱ tsja. 48Kósꞌe̱ asien an tikóna, kó katsꞌentsjáa̱ Néná, kui xi Nee̱ ndi̱a̱na Abraa̱n, ngatꞌa̱ kuí boá xi kꞌi̱e̱ kjindiboájo̱ kixi̱ kixi̱na nínga tikón tsa̱kjindeé ntsꞌi̱e̱ ndi̱a̱na, tsi̱ꞌe̱ nga kui xi ka̱ma chjo̱ón ndií ndi̱a̱na. 49Ngotꞌe̱ ꞌne̱, tꞌíyajnúꞌun tsi ka̱maꞌniátakónjnú ko̱jo tsi nda si̱ꞌanjo̱jnú ndi̱a̱na, kó tsi jmí, ti̱ tꞌíyajnúꞌun nga, ki̱a̱ ka̱maa̱ nga skuie an mí ra ni xi sa̱ꞌin an nguijee̱.

50Kósꞌe̱ Labaa̱n ko̱jo xkjín, bi̱ katsoó kui nda̱ mosoo̱:

—Néná boá xi tjítsꞌén ngayeje kui nii̱, kó ji̱n ka̱májín tsi nda ko̱jo tsi ndajín kꞌuinjne̱. 51Ta̱nga ki̱a̱a̱ tikón na̱ Rebekaa̱, ka̱ma kꞌuínje̱ ji, kó ngatama chjo̱ón ndií ndi̱a̱ tse̱, ngatꞌa̱ Néná boá xi bo̱a̱ tsꞌén mejeén nga ka̱ma.

52Nguije tsintꞌié kuí nii̱ kui nda̱ mosoo̱ Abraa̱n, asién tikoó ngaskande nga kisitꞌaa̱ xtjien tꞌananguii̱ nga katsjaá ndokꞌóchji Néná. 53Kósꞌe̱ tsꞌaxié ni to̱nsinié ko̱jo ni to̱ntiboa ko̱jo xtjí xi yaꞌa, kó katsjaá na̱ Rebekaa̱, kó ko̱jo ntsꞌi̱e̱ kui naa̱ ko̱jo na̱aa̱n katsjaá ni xi achichí tsjákón. 54Nguije kamá kui nii̱ iskjinie ko̱jo katsꞌe kui nda̱ mosoo̱ ko̱jo já xí nijan tjimájo̱, kó ki̱a̱ kisꞌiyojo kui ni̱xtji̱e̱e̱n.

Nga kamánguindyiojón achichí ta̱jñó jastjíe̱n kui jaá, kó kui nda̱ mosoo̱ tsíꞌaá kjo̱a̱a̱ xi tsi̱ꞌe̱ ndiꞌaa̱ tsi̱ꞌe̱ nga ko̱e̱je̱ nguiní ndiꞌaa̱ ndi̱a̱a̱, 55kó ntsꞌi̱e̱ ko̱jo na̱aa̱n na̱ Rebekaa̱ bi̱ katsó:

—Ngatꞌíjñá ra kui tsa̱kji̱ín ngui chiboa ni̱xtjin, sꞌe̱ ka̱ma ko̱e̱je̱ nguijee̱.

56Ta̱nga kui nda̱ mosoo̱ bi̱ katsó:

—¡Ngata̱ ꞌbíchjájínjnúꞌun ngase! Ngatꞌa̱ Néná jè katsjána ngu̱i̱ndie nga nda tsꞌén jéꞌe̱ an, kuíni nga ta̱sá teꞌéndiéjnúꞌun nga kjuín nguiñá an ndiꞌaa̱ ndi̱a̱na.

57-58Kósꞌe̱ ntsꞌi̱e̱ ko̱jo na̱aa̱n na̱ Rebekaa̱ tsíchji̱a̱a̱ kui tsa̱kji̱ín kó bi̱ katsó nga asíyaá:

—A kꞌuínje̱ xó jí kui xotaa̱.

Kó na̱ Rebekaa̱, jo̱o̱n kjuínjo̱ án, katsó. 59Kósꞌe̱ katseꞌéndieé na̱ Rebekaa̱ nga ko̱e̱je̱jo xota̱chjo̱on xí katsꞌénxchá ndeskande koó nga tsa̱kjinchií, tsi̱ꞌe̱ nga ko̱e̱je̱jo kui mosoo̱ ko̱jo já xí nijan tjimájo̱. 60Kósꞌe̱ xota̱ ndiꞌaa̱ na̱ Rebekaa̱ katsꞌénkixotꞌa nga bi̱ katsoó nga katsꞌénchikonñé:

«Ji ndí ndichja,

mejénjne̱ nga kꞌuieé

kjín mi̱ xota̱ tji̱e̱,

kó nga kui xi sa̱ꞌiín nga skjánjo̱

xota̱ na̱xi̱ńdá xí kondraa̱».

61Kósꞌe̱ na̱ Rebekaa̱ ko̱jo ínchjín mosoo̱ jastjíe̱n, kó kisꞌińdosoón cho̱toꞌoyitsꞌeén, sꞌe̱ kijítji̱nguii̱ kui nda̱ mosoo̱, kó bo̱a̱ tsꞌén kui nda̱a̱ kijíjo̱ na̱ Rebekaa̱.

62Kó Isaa̱ ki̱a̱ kisꞌijña xtji̱e̱e̱n nangui kixí xi tikón xtji̱e̱e̱n na̱ngui, kó kui kamánguixón ján ki̱a̱ jachó nínga tikón kui ndańchꞌi̱ xi ꞌmí «Ndańchꞌií Néná xi tikoón ko̱jo be ngayeje nii̱». 63Kijítsabe xtji̱e̱e̱n kui ngu̱i̱ndiee̱ kó nga iskjininkꞌa kje̱n, kamábe nga ndyi̱fochó tiña cho̱toꞌoyitsꞌén. 64Kó na̱ Rebekaa̱ ti̱ iskjininkꞌa kje̱n nga, kó nga kamábe Isaa̱ tji̱e̱nmá jatjajen cho̱toꞌoyitsꞌeén. 65Kó bi̱ katsoó nda̱ mosoo̱:

—ꞌYá xotaa̱ bo̱a̱ xi tsꞌéndibá ki̱a̱ kꞌijñaá xi tsꞌéndibá kjaꞌayíndi̱yaná.

Kó kui nda̱ mosoo̱ bi̱ katsoó:

—¡Kuí boá xi ndi̱a̱na!

Kuíni nga na̱ Rebekaa̱ iskjíbé ńjño xo̱ꞌba̱a̱ sꞌe̱ yíꞌmá kje̱n. 66Kósꞌe̱ kui nda̱ mosoo̱ katsóyaá Isaa̱ ngayeje ni xi kamá nínga kijií, 67kó Isaa̱ kijíjo̱ na̱ Rebekaa̱ ndiꞌa xi tji̱xi̱ín cho̱ kiniꞌándanii̱ nínga kisꞌijña na̱ Sara̱ na̱aa̱n Isaa̱, sꞌe̱ ixánjo̱, kó bo̱a̱ tsꞌén nga na̱ Rebekaa̱ chjo̱ón Isaa̱ kamá. Kui nii̱ xi asíko̱jo Isaa̱ nga tsá katsꞌénchíyá nga kꞌien na̱aa̱n.

Currently Selected:

Jénesii̱s 24: MAIX

Highlight

Copy