Jénesii̱s 25

Bi̱ tsꞌén kꞌien Abraa̱n

1Nguije kꞌien na̱ Saraa̱, Abraa̱n kisꞌiee̱ ingo chjo̱on xi kiꞌmí na̱ Ketura̱, 2kó kui xota̱chjo̱on kisꞌiee̱ kjín ndí xí tsi̱ꞌe̱ Abraa̱n, kuí bí xi̱ꞌbi̱ xi ndií:

Simraa̱n,

Joksaa̱n,

Medaa̱n,

Madiaa̱n,

Isbaa̱k,

ko̱jo Súaa̱j.

3Joksaa̱n boá xí kamá na̱ꞌmii̱ Sebaa̱ ko̱jo Ndendaa̱n. Xota̱ tji̱e̱e̱ Ndendaa̱n boá xi kamá xota̱ Asuu̱r, xota̱ Letuu̱ ko̱jo xota̱ Leuu̱n.

4Ún kamá ndií Madiaa̱n, kó kuí bí xi̱ꞌbi̱:

Efaa̱,

Efee̱r,

Anoo̱k,

Abidaa̱,

ko̱jo Eldaa̱.

Ngayeje kui xotaa̱ xi xota̱ tji̱e̱e̱ na̱ Keturaa̱ kjindiboáni. 5-6Kó tji̱e̱nga tikón ngase Abraa̱n ngayeje ni xi tjiín, Isaa̱ katsꞌénkꞌasꞌiee̱n. Ta̱nga ngayeje ndí xí kisꞌiejoo̱ kje̱ꞌe ínchjín ta̱ ni tsjakon tsí xi katsjaá. Kó kui ndií xtji̱e̱e̱n nínga fotjo tsꞌueé kui ngu̱i̱ndiee̱ katsꞌénkjí, kjin katsꞌénkꞌíndonii̱ Isaa̱.

7Úchán ichítié ko̱jo kan ún nó kamaá Abraa̱n nga kisꞌijña nga̱sondie. 8-10Kó nda kisꞌijña, kó nguije jachó ni̱xtjii̱n, kjo̱a̱xchaári nga kꞌien. Kó Isaa̱ ko̱jo Ismaee̱l yínijín Abraa̱n ki̱a̱ nínga kjiꞌinijín na̱ Sara̱ chjo̱ón, ki̱a̱ ti̱xa̱ na̱xi̱ xi tikón Makpela̱, ki̱a̱ tiñaa̱ kꞌijñá Mamree̱, kui ti̱xa̱ na̱xi̱ xi Abraa̱n tsꞌatsiee̱ Efroo̱n.

11Kó nguije kꞌien Abraa̱n, Néná katsꞌénchikonñé Isaa̱, kó kui nda̱a̱ ki̱a̱ kisꞌijña tꞌa nínga tikón kui ndańchꞌi̱ xi ꞌmí «Ndańchꞌií Néná xi tikoón ko̱jo be ngayeje nii̱».

Xota̱ tji̱e̱e̱ Ismaee̱l

12-16Kuí bí xi̱ꞌbi̱ xi xota̱ tji̱e̱e̱ Ismaee̱l, ndií Abraa̱n, kui xi na̱an kamánii̱ na̱ Angaa̱r, xi chji̱a̱ni Ejipto̱, na̱ xi mosoo̱ na̱ Saraa̱ kamá. Kuí bí jaꞌeén nga tiejó nguito̱ko̱o̱ xtín xota̱ xi chji̱a̱ni ndií Ismaee̱l, xi kótsꞌén katsen ko̱jo nínga kisꞌińdo ko̱jo tꞌanangui xi kisꞌiee̱:

Nebaioo̱t, kuí boá xi ndí tjón kamá,

Kendaa̱r,

Andbee̱l,

Mibsaa̱n,

Mismaa̱,

Ndumaa̱,

Masaa̱,

Andaa̱r,

Temaa̱,

Jetuu̱r,

Nafii̱,

ko̱jo Kedmaa̱.

17Úchán ko̱jo kantjiꞌún jó nó kamaá Ismaee̱l nga kisꞌijña nga̱sondie, kó nguije kꞌien ki̱a̱ nijan kisꞌinijínjo̱ xota̱ xi xchaá. 18Xota̱ tji̱e̱e̱ Ismaee̱l ki̱a̱ kisꞌińdo nangui Abilaa̱ ngaskande xtji̱e̱e̱n na̱ngui, tiñaa̱ tsindioó na̱xi̱ńdá Ejipto̱ xtji̱e̱e̱n na̱ngui, ki̱a̱ ngándá nínga kisꞌińdo xkjín.

Bi̱ tsꞌén kjindiboáni Isaa̱ ko̱jo Jakoo̱b

Ndií Isaa̱: Jakoo̱b ko̱jo Esauu̱

19Bi̱ tsꞌén kjindiboáni Isaa̱. 20Yichán noó Isaa̱ nga kisꞌijñajo̱ na̱ Rebekaa̱, kui xi tsa̱kji̱ín Betuee̱l, ndichja Labaa̱n kui xi xota̱ Araa̱n xi kisꞌińdo Padan Araa̱n.

21Na̱ Rebekaa̱ ndi̱ kamá, kuíni nga Isaa̱ tsíchji̱a̱a̱ Néná nga tsíchji̱a̱tjé chjo̱ón. Kósꞌe̱ Néná katsꞌénseén ni xi tsíꞌá Isaa̱, kó tsaꞌa ndí na̱ Rebekaa̱. 22Kó kamákjiín na̱ Rebekaa̱ nga ꞌni̱o̱ kamá ndí xí yaꞌa, ngatꞌa̱ kui jákjíndií askjan ngu̱i̱ya nga̱ntsꞌo̱a̱, kó bi̱ katsó: «Ji Ne, míkjo̱a̱a̱ nga bi̱ kjiꞌi ni xi kjimana» 23Kó Néná bi̱ katsoó:

«Nga jó ndíi̱, jó na̱xi̱ńdá ndyi̱bokó.

Kuí boá xi jó na̱xi̱ńdá kamá

ndeskande nguindiee̱ nga stse̱n.

Ngo xi ꞌniú ka̱ma,

kó ngo xi inda ka̱ma,

ta̱nga kui xi xchá ngu̱i̱chí ka̱maa̱,

kuí boá xi sa̱ꞌínseén xi kjindí ngasee̱».

24Nguije jachó ni̱xtjin nga stse̱n ndií na̱ Rebekaa̱, 25kamábe nga xi tjón katsee̱n iní kamá tji̱xin yojoo̱, kó achichí tsja̱xó kamá ngayeje yojoo̱, kuíni nga Esau̱ ítꞌa jaꞌén. 26Jaskan katsen ntsꞌi̱e̱ Esauu̱, kó Jakoo̱b ikítꞌa jaꞌén, ngatꞌa̱ kjiꞌiꞌniú chikín chikiín tji̱ngu̱i̱ se Esauu̱. Ichítié ko̱jo tie noó Isaa̱ nga katsꞌén ndí ꞌni̱o̱o̱ na̱ Rebekaa̱.

27-28Kó kamáxchá kuí jákjíndií, kó Esauu̱ ngo nda̱ xi tsꞌenkꞌién cho̱ kamá, ko̱jo xá jno̱ katsꞌén, kuíni nga Isaa̱ ꞌniú tjó ngase kamaá Esauu̱. Kó Jakoo̱b achichí xió kistsoꞌbá, kó ki̱a̱ kisꞌijña ndiꞌaa̱, kuíni nga na̱ Rebekaa̱ tjó ngase kamaá Jakoo̱b ta̱bo̱a̱jiín Esauu̱.

29Ngo ndi̱ya Jakoo̱b katsꞌénda ngo ni chinie, kjiꞌa má jachó Esauu̱ nga kjindiboáni ngu̱i̱jin jnoo̱, kó achichí bojó kamaá, 30kó bi̱ katsó nga askjandáyaá Jakoo̱b:

—Jè kjiꞌme bojó an, ꞌniú míꞌaá teꞌé chiíní ni chinie iní xi kiniꞌínde ji.

Kuíni nga Esauu̱ ti̱ Endo̱n#25:30 «Iní» tsó kui eén. kiꞌmií nga.

31Kó Jakoo̱b, bi̱ katsoó:

—Teꞌéní ngu̱i̱ndie nga an xi ndí tjón ka̱ma an, kó ka̱ma tsjaa ni chinie xi katsꞌenda an.

32Kó Esauu̱ bi̱ katsó:

—Tsja tji̱ꞌni̱u̱ú kui kjo̱a̱ndaa̱ ngotꞌe̱, ngatꞌa̱ jè kjiꞌme bojó an.

33Kó Jakoo̱b ꞌniú tsíꞌaá nga bi̱ katsoó:

Nguiboanéná tꞌín ji nga an si̱ꞌinkꞌasꞌínní kjo̱a̱nda xi tjiín nga ndí tjón ji. Kó nguiboanéná, katsó Esauu̱. 34Kó Jakoo̱b katsjaá Esauu̱ pan ko̱jo sopa̱ tsi̱ꞌe̱ lenteja̱ xi katsꞌénda, kó iskjinie ko̱jo katsꞌe, jastjíe̱n, sꞌe̱ kijí. Kó bo̱a̱ tsꞌén Esauu̱ katsꞌénchjíjínnii̱ kjo̱a̱nda xi tjiín nga kui xi ndí tjón kamá katsaki.

Currently Selected:

Jénesii̱s 25: MAIX

Highlight

Copy