Jénesii̱s 23

Bi̱ tsꞌén kꞌien na̱ Saraa̱

1Úchán ko̱jo kan yito nó kamaá na̱ Saraa̱ nga kisꞌijña nga̱sondie, 2kó ki̱a̱ kꞌien na̱xi̱ńdá Kiriat-Arba̱, kui xi Ebroo̱n ꞌmí ngotꞌe̱ xi tikón nangui Kanaa̱n. Jaskan nguije Abraa̱n askjandátjé na̱ Saraa̱ nga kisꞌijñaxa̱ꞌya̱, 3kijíchji̱a̱jo xota̱ tji̱e̱e̱ Ee̱t xi síndo kui ngu̱i̱ndiee̱, kó bi̱ katsoó:

4—Kuijín nanguii̱ chjiá an, ta̱nga kꞌi̱e̱ tikónjinjnúꞌun, ngo kjo̱a̱nda kuíꞌájnúꞌun, tatíñájnúꞌun ngo ngu̱i̱ndie nínga ka̱ma konijín an chjo̱ónna.

5Kó kui xota̱ tji̱e̱e̱ Ee̱t, bi̱ katsoó Abraa̱n:

6—Ndaꞌyéchiíjne̱ xingá, ngayeje ji̱n yandikónjne̱ ji. Tjanijín ji chjóo̱n nga̱tsjo xí ꞌniú tsjákjiꞌi ngase xi tikónjne̱, ngojín xi ku̱i̱ꞌíxꞌi̱a̱a̱n nga kjónijín ji chjóo̱n.

7Kósꞌe̱ Abraa̱n jastjíe̱n, kó kamábendikón kui xota̱ tji̱e̱e̱ Ee̱t, 8nga bi̱ katsoó:

—Tsi ja̱koxi̱ nga ko̱e̱ꞌéndiéjnúꞌun nga kꞌi̱e̱ konijín an chjo̱ónna kꞌi̱e̱e̱, ngo kjo̱a̱nda míꞌájnúꞌun, ndokjo̱a̱jochiíjnú Efroo̱n ndií Sóaa̱r, 9tsi̱ꞌe̱ nga ko̱tíñána ti̱xa̱ na̱xi̱ xi tikón Makpela̱, kui xi tikón tꞌa nínga ꞌbítji̱e̱ nii̱, kó bo̱a̱ tꞌínjnúu̱ nga kꞌuichjíi̱ xi kótjín chjií kui ngu̱i̱ndiee̱, tsi̱ꞌe̱ nga kꞌuiéna ngo nga̱tsjo xi tsa̱ꞌa̱n ka̱ma ngu̱i̱jii̱n nangui xi tsa̱jún.

10Kó nga Efroo̱n ki̱a̱ tikón ngu̱i̱jii̱n xota̱ tji̱e̱e̱ Ee̱t xi síndo ki̱a̱a̱, ꞌniú tsíchji̱a̱ nga bi̱ katsoó Abraa̱n tsi̱ꞌe̱ nga ku̱i̱ntꞌie ngayeje xota̱xá xí kamátikó kuí ngu̱i̱ndiee̱:

11—Ti̱ꞌinjetakín ji xingá, kotiñájaán kui ti̱xa̱ na̱xi̱i̱, ta̱ tsjáñaá ko̱jo kui kꞌijñá xi tikóntꞌaa̱, kó kuí xota̱xáná xi chistiko̱ kjo̱a̱a̱ nga ta̱ tsꞌéntsjañaá, tjanijín ji chjóo̱n ki̱a̱a̱.

12Kósꞌe̱ Abraa̱n ꞌniú kamábendikón kuí xotaa̱, 13kó bi̱ katsoó Efroo̱n nguindyi̱ko̱n ngayeje xotaa̱:

—Ngo kjo̱a̱nda míꞌaá, ndaꞌyé chiíní, an kꞌuichjí án xi kótjín chjií kui kꞌijñaá, kó ꞌniú míꞌaá chjábé ji chjií tꞌananguíi̱, tsi̱ꞌe̱ nga ka̱ma konijín an chjo̱ónna nguijee̱.

14Kó Efroo̱n bi̱ katsoó Abraa̱n:

15—Ji xingá, kui tꞌananguii̱ nijón úchán to̱ntiboa chjínií, a to̱n ꞌmíi̱ xi̱ꞌba̱. Tjanijín ji chjóo̱n kui ngu̱i̱ndiee̱.

16-20Kósꞌe̱ Abraa̱n ndakjiꞌi kamaá xi kótjín tsíꞌá Efroo̱n, kó nguindyi̱ko̱n xota̱ tji̱e̱e̱ Ee̱t íchjií kui nda̱a̱ xi nijón úchán to̱ntiboa xi tsíꞌá, xikó kjiꞌi kjo̱a̱kitii̱ já xí botiñá nii̱. Kó bo̱a̱ tsꞌén nga tsi̱ꞌe̱ Abraa̱n kamá kui tꞌananguii̱ ko̱jo kui ti̱xa̱ na̱xi̱i̱, ko̱jo ngayeje yá xí kjiꞌitjié kui tꞌananguii̱. Chistiko̱ kamá ngayeje jáxá xota̱ tji̱e̱e̱ Ee̱t.

Nguije kisꞌinda kui nii̱ Abraa̱n ki̱a̱ yínijín na̱ Saraa̱ ki̱a̱ ti̱xa̱ na̱xi̱ xi tikón Ebroo̱n, kje̱n kꞌijñá Mamree̱, ki̱a̱ nangui Kanaa̱n.

Currently Selected:

Jénesii̱s 23: MAIX

Highlight

Copy