Chhóng-sṳ Ki 22

Song-chú Min-lin Â-pak-lâ-hón Hien Yî-sat

1Liá-têu sṳ yî-heu, Song-ti oi kháu-ngiam Â-pak-lâ-hón. Song-ti ham kì: “Â-pak-lâ-hón!” Kì en: “Ngài chhai liá-vi!” 2Song-ti kóng: “Ngì oi tai ngiâ lai-é, chhiu-he ngì só-siak ke tân-tên-chṳ́ Yî-sat, to Mô-li-â hi, chhai Ngài chṳ́-sṳ ngì ke sân-táng, chiông kì cho sêu-fa-chi hien-pûn Ngài.”

3Thi-ngi ngit tá-chó, Â-pak-lâ-hón pho-hó hien-chi yung ke chhèu, piong chhai lì poi-táng, tai-tén lióng-ke phu̍k-ngìn lâu kiâ lai-é Yî-sat, khiung-ha hi Song-ti chṳ́-sṳ ke thi-fông. 4To thi-sâm ngit, Â-pak-lâ-hón ngo-thèu yén-yén chhiu khon-tó ke thi-fông. 5Kì tui phu̍k-ngìn kóng: “Ngì-têu lâu lì-è liù chhai liá-vi; ngài lâu se-ngìn-è to ke-phién kin-pai, yèn-heu ngài-têu chang to-chón-lòi liá-vi.”

6Â-pak-lâ-hón chiông hien-chi yung ke chhèu piong chhai kiâ lai-é Yî-sat ke kiên-thèu táng, chhṳ-kâ sú nâ-tén fó-chúng lâu tô-é; lióng chṳ́-yà khiung-ha hiong-chhièn hàng. 7Yî-sat hêm yit-sâng: “Â-pâ!”

Â-pak-lâ-hón en-kóng: “Lai-é, cho má-ke?”

Yî-sat mun-kóng: “Fó-chúng lâu chhèu chhiòn-phu yû lé, hien-chi ke yòng-è chhai nai?”

8Â-pak-lâ-hón en-kóng: “Lai-é, hien-chi ke se yòng-è, Song-ti chhṳ-kâ voi chún-phi hó.” Lióng-sà yu ki-siu̍k hiong-chhièn hàng.

9Kì-têu to Song-ti chṳ́-sṳ ke thi-fông, Â-pak-lâ-hón khôi-sṳ́ hí chi-thàn, tôi-chhèu chhai táng-kô, chiông chhṳ-kâ ke lai-é Yî-sat khún hí-lòi, piong chhai chi-thàn ke chhèu-táng. 10Yèn-heu, Â-pak-lâ-hón chhûn-sú, khià-hí tô-é, oi chhṳ̀ kiâ lai-é. 11Ke-sṳ̀, Song-chú ke thiên-sṳ́ tui thiên-táng hêm kì: “Â-pak-lâ-hón! Â-pak-lâ-hón!”

Kì en-kóng: “Ngài chhai liá-vi!”

12Thiên-sṳ́ kóng: “M̀-hó chhṳ̀ liá se-ngìn-è; lièn yit-si̍t-é ya cho-m̀-tet sông-hoi kì! Liá-ha Ngài khok-sṳ̍t tî ngì he kin-vi Song-ti ke; yîn-vi ngì mò chiông chhṳ-kâ ke lai-é, chhiu-he ngì ke tân-tên-chṳ́, liù-tén m̀ pûn Ngài.”

13Â-pak-lâ-hón si-mien khon yit-ha, khon-tó yit-chak yòng-kú, lióng-chak kok pûn se su-kî chhàn-tén. Kì hàng ko-hi chiông yòng-kú lâi chhut-lòi, yung kì thoi kiâ lai-é cho sêu-fa-chi. 14Só-yî, Â-pak-lâ-hón lâu ke thi-fông ôn-to Yâ-fò-fà-Yî-le̍t#22:14 “Yâ-fò-fà-Yî-le̍t” yi-sṳ he “Song-chú voi yi-phi” ya-he “Song-chú voi khon-ku”.; chhṳ̍t-to kîm-pû-ngit thai-kâ hàn-kóng: “Chhai Song-chú ke sân-táng, Kì voi yi-phi#22:14 “yi-phi” ya-he yi̍t-cho “khon-ku” ya-he “hién-hien”..”

15Song-chú ke thiên-sṳ́ thi-ngi pái tui thiên-táng hêm Â-pak-lâ-hón kóng: 16“Song-chú kóng: ‘Ngì ki-yèn cho liá-khien sṳ, mò chiông ngì ke tân-tên-chṳ́ liù hâ-lòi m̀ pûn Ngài, só-yî Ngài chṳ́-tén Ngài chhṳ-kâ ke miàng fat-sṳ, 17Ngài yit-thin voi su-fuk pûn ngì, oi pûn ngì chhin-tô chṳ́-sûn, chhiong thiên-táng ke sên-é, hói-piên ke sâ án-tô; ngì ke heu-thoi voi chṳ̂n-fu̍k thi̍t-ngìn. 18Thi-song van-koet voi yîn-vi ngì ke heu-thoi tet-tó fuk-hi, yîn-vi ngì thâng-chhiùng Ngài ke min-lin.’ ” 19Â-pak-lâ-hón chón-to kiâ phu̍k-ngìn ke-vi, kì-têu chhiu khiung-ha hi Phe̍t-sṳ-pâ, chhiu-he Â-pak-lâ-hón he̍t ke thi-fông.

Nâ-ho̍k ke Heu-thoi

20Heu-lòi, yû-ngìn lâu Â-pak-lâ-hón kóng: “Me̍t-kâ lâu ngiâ ló-thâi Nâ-ho̍k kiung pat-ke lai-é: 21Chóng-chṳ́ Vû-sṳ̂, kiâ ló-thâi Pu-sṳ̂, Kî-mû-li (Â-làn ke â-pâ), 22hàn-yû Kî-siet, Ha̍p-só, Pit-tha̍t, Yit-lâ lâu Pí-thú-li (Li-pak-kâ ke â-pâ).” 23Me̍t-kâ lâu Â-pak-lâ-hón ke ló-thâi Nâ-ho̍k kiung liá pat-ke lai-é. 24Nâ-ho̍k ke se-chiá Liù-mâ kiung Thì-pat, Kâ-hàm, Thâ-hot lâu Mâ-kâ.

Currently Selected:

Chhóng-sṳ Ki 22: THV12Rdb

Highlight

Copy