Chhóng-sṳ Ki 23

Â-pak-lâ-hón Mâi-thi Chong Sâ-lâ

1Sâ-lâ chhai-sṳ hióng-su yit-pak ngi-sṳ̍p chhit-se. 2Sâ-lâ sí chhai Kâ-nàm ke Kî-lie̍t-Â-pâ (chhiu-he Hî-pak-lùn). Â-pak-lâ-hón vi kì pî-sông thai-kieu.

3Â-pak-lâ-hón lì-khôi thìn Sâ-lâ sṳ̂-thí ke thi-fông, lòi-to Het-ngìn ke só-chhai, kóng: 4“Ngài he chhiam-he̍t chhai ngì-têu tông-chûng ke ngoi-chhu̍k ngìn; chhiáng-mai yit-te thi pûn ngài cho mu-thi, hó-pûn ngài mài ngâ pû-ngiòng.”

5Het-ngìn en Â-pak-lâ-hón kóng: 6“Sîn-sâng chhiáng-thâng! Ngì chhai ngài-têu tông-chûng he yit-vi chûn-kui ke vòng-chṳ́. Chhiáng chhai ngài-têu chui-hó ke mu-thi, mài-chong ngì ke pû-ngiòng; thai-kâ ngien-yi pûn ngì mu-thi mài-chong kì.”

7Â-pak-lâ-hón chhiu hong hí-lòi, khúi chhai ke thi-fông ke Het-ngìn mien-chhièn, 8kóng: “Na-he ngì-têu ngien-yi pûn ngài chhai liá-vi mài-chong ngài ke pû-ngiòng, chhiáng ngì vi ngài khiù Só-hot ke lai-é Yî-fut-lùn, 9chiông thièn-mî ke Ma̍k-pí-lâ-lùng mai-pûn ngài; chhiáng kì chhai ngì-têu mien-chhièn cheu sṳ̍t-ka mai-pûn ngài cho mu-thi.”

10Yî-fut-lùn lâu khì-thâ Het-ngìn khiung-ha chhô chhai sàng mùn-héu si̍p-fi ke thi-fông; oi pûn ngi̍p-sàng ke ngìn ya thâng tet-tó, kì chhiu thai-sâng tui Â-pak-lâ-hón kóng: 11“Sîn-sâng, m̀-hó án-ngiòng, chhiáng-thâng! Ngài oi chiông ke-te thièn lièn thièn-tú ke lùng sung-pûn ngì; ngài oi tông thùng-pâu ke mien-chhièn sung-pûn ngì, pûn ngì mài-chong ngiâ pû-ngiòng.”

12Â-pak-lâ-hón yu khúi chhai Het-ngìn mien-chhièn, 13ya yung thai-kâ thâng tet-tó ke sâng tui Yî-fut-lùn kóng: “Chhiáng thâng ngài kóng, ngì na hén, ke-te thièn-thi ngài oi yung mâi ke, khiù ngì chiông chhièn sû hí-lòi, ngài chhiu cho-tet chhai ke-vi mài-chong ngài ke pû-ngiòng.”

14Yî-fut-lùn en Â-pak-lâ-hón kóng: 15“Sîn-sâng chhiáng-thâng, ke-te thi ke ka-chhṳ̍t he si-pak chak ngiùn-pi, ngì lâu ngài chûng-kiên liá-têu chhièn son má-ke nè? Chhiáng chiông ngì ke pû-ngiòng mài chhai ke-vi!” 16Â-pak-lâ-hón thùng-yi, chhiu cheu Yî-fut-lùn chhai Het-ngìn mien-chhièn kóng chhut-lòi ke ka-chhièn, chiông ke-sṳ̀ thûng-yung ke chhièn si-pak chak ngiùn-pi kâu-pûn kì.

17Án-ngiòng, Yî-fut-lùn chhai Man-li tûng-phién Ma̍k-pí-lâ ke thi-sán-khièn chhiu su̍k Â-pak-lâ-hón; liá thi-sán pâu-hàm thièn-thi lâu khì-chûng ke lùng, pin só-yû ke su-muk. 18Chhi-si̍p chhai sàng mùn-héu ke-têu Het-ngìn, chhiòn-phu sṳ̀n-ngin liá thi-sán-khièn su̍k Â-pak-lâ-hón.

19Â-pak-lâ-hón chhiu chiông pû-ngiòng Sâ-lâ mài-chong chhai Kâ-nàm thi Man-li tûng-phién Ma̍k-pí-lâ lùng-tú. (Man-li chhiu-he Hî-pak-lùn). 20Ngièn-lòi su̍k Het-ngìn ke-te thièn-thi lâu thièn-tú ke lùng, chhiu án-ngiòng sàng-cho Â-pak-lâ-hón sṳ̂-ngìn ke mu-thi.

Currently Selected:

Chhóng-sṳ Ki 23: THV12Rdb

Highlight

Copy