ZẸFANIA 3

1DINDỌN hlan ewọ he yín atẹ̀nọ podọ gbigbletọ, hlan tòdaho nukunbianọ lọ 2Ewọ ma sètónuna ogbè lọ gba; ewọ ma yí oplọ́n lọ gba; ewọ ma dotu to OKLUNỌ mẹ gba; ewọ ma dọ̀n sẹpọ̀ jẹ Jiwheyẹwhe etọn de gba.

3Kinnikinni he nọ li lẹ wẹ ahọvi etọn lẹ to gblagbla e tọn mẹ; ohia whèjai tọn lẹ wẹ whẹ̀datọ etọn lẹ; yé ma nọ kiklọ ohú lẹ du to afọnnu gba. 4Gbẹtọ whiwha danunọ wẹ yẹwhegán etọn lẹ: yẹwheno eton lẹ ko flu fiwiwe lọ, yé ko wà huhlọnnu hlan osẹ́n lọ. 5Dódónọ wẹ OKLUNỌ to gblagbla e tọn mẹ; ewọ ma na wà oylanwà gba; afọnnu afọnnu we ewọ nọ hẹn whẹ̀dida etọn wa jẹ hinhọn mẹ, ewọ ma gbòpò gba; ṣigba mawanugbonọ ma yọn winyan de gba 6Yẹn ko sán akọta lẹ sẹ̀, atọ̀họ lọnglonẹnmẹ yeton lẹ sọ yín ovọjẹ: Yẹn ko hẹn alihogbo yetọn lẹ gbọgbé, bọ mẹde ma sọ jugbọn e mẹ: yè và tòdaho yetọn lẹ súdo, sọmọ bọ omẹ de ma sọ tin, bọ tomẹnu de ma sọ tin finẹ. 7Yẹn dọmọ, Hiẹ na dibusi mi nugbonugbo, hiẹ na yí oplọ́n; mọ yè ma na do san ninọ̀ etọn sẹ̀ gba, kẹdẹdi ehe yẹn ko de gbọn ewọ tọn dali lẹpo: ṣigba yé fọ́n afonnufú bo gble wiwà yetọn lẹpo. 8Enewutu mì nọtepọ́n mi wẹ OKLUNỌ dọ, kakajẹ azán he gbè yẹn fọ́n tite jẹ amánà lọ kọn: na whẹ̀dida ṣie wẹ nado sinyan akota lẹ, na yẹn nido pli ahọludu lẹ dopọ, nado kọn homegble ṣie do yé ji, yedọ adi zogbe ṣie lẹpo; na aigba lẹpo we ye na yi miyon awuwhàn ṣie tọn do vasudo. 9Na whenenu wẹ yẹn na lé nùflo wiwe de hlan gbẹtọ lẹ, na yé mẹpó nido no dawhá ylọ oyín OKLUNỌ tọn, nado nọ sẹn ẹn po abó dopo po. 10Godo otọ Etiopia tọn lẹ wẹ yé na hẹn vẹvẹtọ ṣie lẹ sọn wá, yẹ́dọ viyọnnu mẹgbàdo ṣie tọn, na avọ́ nunina de hlan mi. 11To azán nẹ mẹ wẹ hiẹ ma na yín memọwinyan na wiwà towe lẹpo gba, ehemẹ hiẹ ko jẹsẹ́nmẹ do ogo e te: na whenẹnu wẹ yẹn na dè yé he to aglinjẹ to gigodaho towe mẹ lẹ sọn gblagbla hiẹ tọn mẹ, podọ hiẹ ma na yín ṣandùtọ to osé wiwe ṣie mẹ ba gba. 12Ṣigba yẹn na jó gbẹtọ wamọnọ nukunbianọ lẹ de dai to gblagbla hiẹ tọn mẹ, yé bo na sọ nọ dotu to oyín OKLUNỌ tọn mẹ. 13Pipòtọ Islaeli tọn lẹ ma na wà oylanwà, mọ sọ dọ lalo lẹ gba; mọ odẹ́ oklọnọ de ma na yín mimọ to onù yetọn mẹ gba: na yé dù bo sọ mlọnai, bọ mẹde ma nahẹn yé savo gba. 14Jihàn, hiẹ viyonnu Zioni tọn È; dabobo, hiẹ Islaeli E; yí ayiha lẹpo do yín homẹhùnnọ bo sọ jaya, hiẹ viyọnnu Jelusalẹm tọn È. 15OKLUNỌ ko zé whẹ̀dida towe lẹ yì, é ko dlan kẹ̀ntọ towe do gbonu: ahọlu Islaeli tọn, yèdọ OKLUNỌ, tin to gblagbla hiẹ tọn mẹ: hiẹ ma na sọ mọ oylan depope ba gba. 16To azán nẹ gbè é na yín didọ hlan Jelusalẹm dọ, Hiẹ dibu blo: podọ hlan Ziọni dọ, a dike alọ towe lẹ yín jijẹ̀ blo. 17OKLUNỌ Jiwheyẹwhe towe tin to gblagbla hiẹ tọn mẹ, hlọnhlọnnọ dopo de mẹhe na whlẹnmẹ: ewọ na yí ayajẹ do jaya to oji we, ewọ na yín abọẹnọ to owanyi etọn mẹ; ewọ na yí hànjiji do jaya to oji we. 18Yé ko yín awublanọ na obẹ́pli ayìdego lọ he yẹn dè yì sọn hiẹ mẹ, na zizé daga ovlẹ tọn to ewọ go: he ko hẹn agbàn ovlẹ tọn. 19Dayi e go, to ojlẹ nẹ mẹ yẹn na zán hẹ mẹhe bianukunna we lẹpo: yẹn bo na sọ whlẹn ewọ he pozọn, bo sọ bẹ́ ewọ he yè yàn yì pli; yẹn bo na sọ hẹn yé zùn pipà po oyín de po, owinyan mẹhetọn ko tin to aigba lẹpo mẹ. 20Ojlẹ nẹ mẹ wẹ yẹn na hẹn mì wá họmẹ, podọ ojlẹ nẹ mẹ wẹ yẹn na ṣinyan mì: na yẹn na basi oyín de na mì po pipà de po to gbẹtọ aigba lọ tọn lepo ṣẹnṣẹn, whenuena yẹn sọ vọ̀ mẹmẹglọ mìtọn hẹnwá to nukun mìtọn lẹ nukọn, wẹ OKLUNỌ dọ.

Currently Selected:

ZẸFANIA 3: BWL23

Highlight

Copy